ၵူၼ်းသိုၵ်းမၢၼ်ႈၸိူဝ်းၵဵဝ်ႇၶွင်ႈၵၢၼ်ၶႃႈႁႅမ်တၢႆ ၵူၼ်းမိူင်းယေႃ 5 ၵေႃႉၼၼ်ႉ ၾၢႆႇလုမ်းတြႃးၸႄႈတွၼ်ႈ လႃႈသဵဝ်ႈ တႅပ်းတတ်းပၼ်တူတ်ႈတၢမ်ႇယဝ်ႉ။ ၵူၺ်းၵႃႈ တွၼ်ႈတႃႇပေႃႈမႄႈလုၵ်ႈလၢင်း ၸိူဝ်းၵိုတ်းတၢင်းလင်ၼၼ်ႉ ဢမ်ႇႁပ်ႉပုၼ်ႈၽွၼ်းပၼ် ဢမ်ႇပၼ်ငိုၼ်းသၢႆႈတႅၼ်းသင် ။

ၶႅပ်းႁၢင်ႈၵူၼ်းမိူင်းယေႃ 5 ၵေႃႉၸိူဝ်းလူႉတၢႆ ၼႂ်းပၢင်ႁႅၼ်းတၢၼ်း ယၢတ်ႇၼမ်ႉၶႂမ်ႈတဝ်ႈပၼ် ၽွင်းႁူဝ်လိူၼ်ၵျူႊလၢႆႊ

ၵူၼ်းဝၢၼ်ႈမိူင်းယေႃ ဢၼ်ပဵၼ်ပီႈၼွင်ႉႁွင်ႉႁႆႈ ဝၢႆးၶုတ်းႁၼ်ၶၢပ်ႈတူဝ်တၢႆ  ၵူၼ်းၸိူဝ်းထုၵ်ႇၶႃႈတၢႆ (Photo by citizen journalist)

ဝၼ်းတီႈ 15/09/2016 ယၢမ်းဝၢႆးဝၼ်း လုမ်းတြႃးၸႄႈတွၼ်ႈလႃႈသဵဝ်ႈ တႅပ်းတတ်းပၼ်တူတ်ႈတၢမ်ႇ သိုၵ်းမၢၼ်ႈၸိူဝ်းပူၼ်ႉပႅၼ်ၶႃႈႁႅမ်ၵူၼ်းမိူင်းယေႃတၢႆ 5 ၵေႃႉ မိူဝ်ႈၽွင်းႁၢင်လိူၼ်ၵျုၼ်ႊပူၼ်ႉမႃး။ ပၢင်တႅပ်းတတ်းတြႃးၼႆႉ ၾၢႆႇၸဝ်ႈၼႃႈတီႈ လႆႈႁွင်ႉဢဝ်ၵူၼ်းမိူင်းယေႃ ၸိူဝ်းပဵၼ်ပေႃႈမႄႈပီႈၼွင်ႉ ၵူၼ်းၸိူဝ်းလႆႈလူႉတၢႆၵႂႃႇ မႃးၶဝ်ႈႁူမ်ႈထွမ်ႇၸွမ်း။ သိုၵ်းမၢၼ်ႈၸိူဝ်းပူၼ်ႉပႅၼ်ႁဵတ်းၽိတ်းၵႂႃႇၼၼ်ႉ ယူႇတီႈလုမ်းတြႃးတႅပ်းတတ်း ပၼ်တူတ်ႈတၢမ်ႇႁဵတ်းၵၢၼ်ၼၵ်းလႄႈ တူၵ်းၶွၵ်ႈ 5 ပီ-ၸၢႆးလၢဝ်ၾႃႉ ၽူႈၶဝ်ႈႁူမ်ႈထွမ်ႇၸွမ်း တီႈပၢင်တႅပ်းတတ်းၼၼ်ႉ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ။


သိုၵ်းမၢၼ်ႈ တပ်ႉမတေႃႇ ၸိူဝ်းထုၵ်ႇတႅပ်းတတ်းပၼ်တူတ်ႈတၢမ်ႇ ႁဵတ်းၵၢၼ်ၼၵ်းလႄႈတူၵ်းၶွၵ်ႈ 5 ပီၼၼ်ႉ ပဵၼ်ၽူႈၵွၼ်းငဝ်ႈငုၼ်းၵုမ်းၵမ်ၽႅၼ်ၵၢၼ်ယၼ်ႇသိုၵ်း (ၸၵၶ) 10 ၸဝ်ႈသိုၵ်းလူင်မဵဝ်းဢွင်ႇ ။ ၽူႈၵွၼ်းတပ်ႉၵွင် ၶမယ 362 ၸဝ်ႈႁၢၼ်တိၼ်ႇမဵဝ်းၸေႃႇ ဢၼ်ပၵ်းတီႈႁူဝ်ပၢင်ႇ။ ၵႅမ်ၽူႈၵွၼ်းသိုၵ်း ဢႆႊဢူဝ်ႊ (IO) ၸဝ်ႈႁၢၼ်ဢွင်ႇၼေႇၽျူဝ်း။ ပဵၼ်ၽူႈမီးၸၼ်ႉၼႂ်းၾၢႆႇႁူမ်ႇလူမ်ႈသိုၵ်း (ၸယၽ) ၶုၼ်သိုၵ်းလူင်လိၼ်းၼၢႆႇၸူဝ်း။ ႁူဝ်သိုၵ်းလူင်ၸဵင်ႇဝိၼ်းမွင်ႇ၊ ႁူဝ်သိုၵ်းလူင်မွင်ႇဢူင်း လႄႈ ႁူဝ်သိုၵ်းမွင်ႇမွင်ႇထူၺ်း ၶဝ် 7 ၵေႃႉၸိူဝ်းၼႆႉ- ၼႆယဝ်ႉ ။


ၸိူဝ်းၶဝ် 7 ၵေႃႉၼႆႉ ဢိင်ၼိူဝ်လႆႈႁပ်ႉပၢၵ်ႇဝႃႈ ပဵၼ်ၵူၼ်းလႆႈပူၼ်ႉပႅၼ် ၶႃႈႁႅမ်တၢႆၵူၼ်းမိူင်းယေႃတႄႉ တီႈလုမ်းတြႃးၸႄႈတွၼ်ႈလႃႈသဵဝ်ႈ မိူဝ်ႈဝၼ်းတီႈ 10/08/2016 လႄႈ ယူႇတီႈလုမ်းတြႃးၵေႃႈလႆႈ တႅပ်းတတ်းပၼ်တူတ်ႈတၢမ်ႇၶဝ် ပွၵ်ႈၵမ်းၼႆႉ ။


ၸၢႆးလၢဝ်ၾႃႉ ၽူႈၶဝ်ႈထွမ်ႇၸွမ်းၵၢၼ်တႅပ်းတတ်းတြႃးလႄႈ  ပဵၼ်ပႃးၵူၼ်းၼႂ်းၼႃႈႁိူၼ်းၵူၼ်းၸိူဝ်းၵိုတ်း တၢင်းလင် လၢတ်ႈဝႃႈ- “ၶဝ်ဝႃႈတေပၼ်တူတ်ႈတၢမ်ႇၵူၼ်းႁဵတ်းၽိတ်းၼႆလႄႈ ႁွင်ႉဢဝ်ပေႃႈမႄႈပီႈၼွင်ႉ ၵူၼ်းမိူင်းယေႃ ၵူၼ်းၸိူဝ်းလူႉတၢႆၵႂႃႇၼၼ်ႉမႃးထွမ်ႇၸွမ်း၊ ၶဝ်ၵေႃႈတႅပ်းတတ်းတြႃးၵႂႃႇ။ ၵူၺ်းၵႃႈ ၶဝ်ဢမ်ႇႁပ်ႉပုၼ်ႈၽွၼ်းပၼ်ၶိုၼ်း လွင်ႈယူႇလွင်ႈၵိၼ်ၵူၼ်းၵိုတ်းတၢင်းလင်သေဢိတ်း၊ တႃႇတေပၼ်ငိုၼ်း သၢႆႈတႅၼ်းၵေႃႈ ဢမ်ႇလၢတ်ႈသေၶေႃႈ။ တွၼ်ႈတႃႇႁဝ်းၶႃႈၸိူဝ်းၵိုတ်းတၢင်းလင်တႄႉ လႆႈႁူပ်ႉတၢင်းယၢပ်ႇၽိုတ်ႇတႄႉတႄႉ၊ ၵွပ်ႈဝႃႈ ၵူၼ်းၸိူဝ်းဢၼ်ၶဝ်ၶႃႈႁႅမ်တၢႆၵႂႃႇၼႆႉ ပဵၼ်ၵူၼ်းႁႃလဵင်ႉၼႃႈႁိူၼ်းလွၼ်ႉလွၼ်ႉ။ ၵွပ်ႈၼၼ်လႄႈ ၸိူဝ်းၵိုတ်းတၢင်းလင်တႄႉၶႂ်ႈလႆႈငိုၼ်းသၢႆႈတႅၼ်း”- ဝႃႈၼႆ ။


ၼႂ်းၵၢၼ်တႅပ်းတတ်းတြႃးၼၼ်ႉ ႁူဝ်ပဝ်ႈၾၢႆႇလုမ်းတြႃးသိုၵ်း တိူင်းသိုၵ်းၸဵင်ႇႁွင်ႇဝၼ်းဢွၵ်ႇ (ယမၶ) လႃႈသဵဝ်ႈ ၵႅမ်ၸွမ်ႁၢၼ် ၼေႇဝိၼ်းဢွင်ႇ၊ ၽူႈမီးၸၼ်ႉၾၢႆႇၵူၼ်းမိူင်း (ပေႃႈမႄႈပီႈၼွင်ႉၵူၼ်းထုၵ်ႇၶႃႈတၢႆ) ၾၢႆႇယိုၼ်ႈလွင်ႈတၢင်းပိူင်ပဵၼ် ၸဝ်ႈသိုၵ်းၵျေႃႇမူဝ်းမိၼ်ႉ၊ ၸဝ်ႈၼႃႈတီႈၾၢႆႇၽူႈပူၼ်ႉပႅၼ်/ၾၢႆႇၵူၼ်းၽိတ်းသေ သူၶၻီး (ဢမု)  ၸဝ်ႈသိုၵ်းၼၢႆႇဝိၼ်း ၶဝ် 3 ၵေႃႉၸိူဝ်းၼႆႉၵေႃႈၶဝ်ႈပႃး - ၼႆယဝ်ႉ ။


မိူဝ်ႈဝၼ်းတီႈ 25/06/2016 ၼၼ်ႉ ငႃးသိုၵ်းမၢၼ်ႈတပ်ႉၶမယ 362 ဢၼ်လုၵ်ႉတၢင်းလႃႈသဵဝ်ႈ ၶိုၼ်ႈၵႂႃႇထိုင်တၢင်းထုင်ႉမိူင်းယေႃသေ ၵႂႃႇတီႉၺွပ်းဢဝ်ၵူၼ်းဝၢၼ်ႈ 5 ၵေႃႉ ၸိူဝ်းတိုၵ်ႉႁဵတ်းႁႆႈႁဵတ်းသူၼ်ယဝ်ႉ ပေႃႉထုပ်ႉထဵတ်ႈထၢမ်၊ ဢဝ်ၶူဝ်းသိုၵ်းၶူဝ်းလၢႆးၼုင်ႈပၼ်သေ ၶႃႈႁႅမ်တၢႆပႅတ်ႈ။

ၵၢၼ်ၶႃႈႁႅမ်တၢႆၵူၼ်းမိူင်းၼၼ်ႉ လွင်ႈဝႃႈပဵၼ်ၾၢႆႇသိုၵ်းမၢၼ်ႈ လႆႈပူၼ်ႉပႅၼ်ၶႃႈႁႅမ်တႄႉၼႆၼၼ်ႉ ၵေႃႉပဵၼ်ၸွမ်သိုၵ်းလူင်မျႃႉထုၼ်းဢူး ၽူႈမီးၸၼ်ႉၾၢႆႇႁူမ်ႇလူမ်ႈသိုၵ်း (ၸယၽ) ႁွင်ႈၵၢၼ်ၽွင်းလူင် ၾၢႆႇၵႅတ်ႇၶႄ ၵေႃႈလႆႈႁဵတ်းပၢင်သပ်းၸႅင်ႈၶၢဝ်ႇသေ လႆႈႁပ်ႉပၢၵ်ႇတီႈၵူၼ်းမိူင်း ပူၼ်ႉမႃးမိူဝ်ႈဝၼ်းတီႈ 20/07/2016 ။


ၵူၼ်းဝၢၼ်ႈၵူၼ်းမိူင်း မိူင်းယေႃ ၸိူဝ်းထုၵ်ႇၶႃႈႁႅမ်တၢႆၵႂႃႇ မိူဝ်ႈဝၼ်းတီႈ 25/06/2016 ၼၼ်ႉ ပဵၼ်ၸၢႆးဢၢႆႈသႅင် ဢႃယု 23 ပီ ၵူၼ်းဝၢၼ်ႈၵိုတ်ႈ။ ၸၢႆးဢၢႆႈလွတ်ႈ ဢႃယု 39 ပီ။ ၸၢႆးဢၢႆႈမွင်ႇ ဢႃယု 27 ပီ။ ၸၢႆးသူၺ်ႇလူႇ ဢႃယု 17 ပီ ၵူၼ်းဝၢၼ်ႈတပ်ႉ။ ၸၢႆးမွင်ႇ ဢႃယု 23 ပီ ၸိူဝ်းၼႆႉ ။