ၸုမ်းၵူၼ်းၼုမ်ႇ ဝဵင်းၼမ်ႉၶမ်း ႁူမ်ႈၵၼ်ၸတ်းပၢင်ႁႅၼ်းတၢၼ်းပၼ် သၶႁ (ၸၢႆးသႅင်ၸိုၼ်ႈ) ၽူႈၵေႃႇတင်ႈၸုမ်းၶၢဝ်ႇၽူႈတွႆႇႁွၵ်ႈလႄႈၽူႈႁွင်ႉၽဵင်းၵႂၢမ်းၸိူဝ်ႉၸၢတ်ႈ ဢၼ်လူႉၶွႆႈသုတ်းမုၼ်တဵမ်5ပီ ။

ဝၼ်းတီႈ 15/09/2016 ၸုမ်းၵူၼ်းၼုမ်ႇလႄႈၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းၼမ်ႉၶမ်း ႁူမ်ႈၵၼ်ႁႅၼ်း တၢၼ်းပၼ် ၸဝ်ႈပၢႆးမွၼ်း - ၽူးႁၢပ်ႇၵၢၼ်ၸိူဝ်ႉၸၢတ်ႈ သၶႁ ၸၢႆးသႅင်ၸိုၼ်ႈ။ တွၼ်ႈပွတ်းၼႂ် ၸုမ်းၵူၼ်း ၼုမ်ႇဢွၼ်ၵၼ်ၵႂႃႇလူႇတၢၼ်းၵၢပ်ႈသွမ်း တီႈဝတ်ႉ(ၵျွင်း) ဝၢၼ်ႈၼႃး ။


တွၼ်ႈၵၢင်ၶမ်ႈသမ်ႉမီးပၢင်ဢုပ်ႇၶႆႈလွင်ႈပိုၼ်းၵႅပ်ႈ သၶႁ ၸတ်းႁဵတ်းတီႈႁူင်းႁေႃၵေႃလိၵ်ႈလၢႆးလႄႈၾိင်ႈ ငႄႈတႆး ဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ။ ၸၢႆးလၢဝ်ၶိူဝ်း(ပၢၼ်းသီ)ပိုတ်ႇပၢင်သေ လၢတ်ႈၼႄပိုၼ်းၵႅပ်ႈ သၶႁ။ ၸုမ်းတွႆႇတိုင်ႈၼမ်ႉမၢဝ်းၶမ်း ႁွင်ႉၽဵင်းၵႂၢမ်းဢၼ် သၶႁ ယၢမ်ႈႁွင်ႉဝႆႉ ဢၼ်မီးၸိုဝ်ႈၵႂၢမ်းဝႃႈ “လုၺ်း ” လႄႈ “တႆးတိုၵ်ႉတွင်းယူႇ”မူၼ်ႈၸႂ်ပၼ်။ မီးၽူႈယႂ်ႇၵူၼ်းလူင်လႄႈၵူၼ်းၼုမ်ႇဢိၵ်ႇၵူၼ်းၼႂ်းပိုၼ်ႉတီႈၶဝ်ႈႁူမ်ႈ50 ပၢႆ ။


ၸၢႆးသၢမ်မူၼ်ႇ ႁူဝ်ပဝ်ႈၵေႃလိၵ်ႈလၢႆး လၢတ်ႈဝႃႈ - “ယိူင်းဢၢၼ်းဢၼ်လႆႈၸတ်းႁဵတ်းတႄႉ ၼင်ႇႁိုဝ်ၵူၼ်း ၼုမ်ႇပေႃးတေႁၼ်ၽူႈဢွၼ်ႁူဝ်လီ ဢၼ်ပဵၼ်တူဝ်ယၢင်ႇလီသေ မေႃယိူင်ႈပႆသဵၼ်ႈတၢင်းၸွမ်းဢၼ် မၼ်းၸဝ်ႈ လႆႈႁဵတ်းလႆႈသၢင်ႈမႃးၼၼ်ႉ ဢမ်ႇယိူင်ႈလႆႈမူတ်းၵေႃႈ ယိူင်ႈပၢႆးမွၼ်းၶဝ် ၵေႃႈလီယဝ်ႉ။ လိူဝ်ၼၼ်ႉႁႂ်ႈၵူၼ်း ၼုမ်ႇၶဝ် မေႃတမ်းယိူင်းဢၢၼ်းသေၶတ်းၸႂ်ၵႂႃႇ” - ဝႃႈၼႆ ။


ၾၢႆႇၼိုင်ႈၵေႃႈ ဝၼ်းတီႈ 15/09/2016 ၼႆႉ ဢိင်ၼိူဝ် ၸဝ်ႈသႅင်ၸိုၼ်ႈ (သၶႁ) ဢၼ်ပဵၼ်ၽူႈတႅမ်ႈလိၵ်ႈ၊ ၽူႈထတ်းထွင်လိၵ်ႈ ၸုမ်းၶၢဝ်ႇၽူႈတွႆႇႁွၵ်ႈ လူႉသဵင်ႈသုတ်းမုၼ်ၵႂႃႇ ၶွပ်ႈၶူပ်ႇ 5 ပီသေ ယူႇတီႈၸုမ်းၶၢဝ်ႇၽူႈတွႆႇ ႁွၵ်ႈ လႆႈၶုၵ်းထူပ်းယွင်ႈၵုၼ်းယေႃးမုၼ်မၼ်းၸဝ်ႈ၊ လူၺ်ႈလႆႈႁႅၼ်းတၢၼ်းႁဵတ်းတၢင်းလီ၊ လူႇတၢၼ်းၶဝ်ႈ သွမ်းဝၼ်း (ၿဵလ်း) လႄႈၶူဝ်းတၢၼ်း ၽႄၵုသူလ် ယၢတ်ႇၼမ်ႉၶႂမ်ႈတဝ်ႈပၼ်၊ တီႈသင်ၶၸဝ်ႈ ဝတ်ႉၵူႇတဝ်ႈ ဢိူင်ႇသီၽုမ်း ဝဵင်းၵဵင်းမႆႇ ၸိုင်ႈထႆး ၼင်ႇၵဝ်ႇ ။


သၶႁ - ၵိူတ်ႇမိူဝ်ႈပီ 1952 တီႈဝၢၼ်ႈမင်းသႅင် ဢိူင်ႇမင်းသႅင် ဝဵင်းတၢင်ႉယၢၼ်း ၸိုင်ႈတႆးပွတ်းႁွင်ႇ။ ၶဝ်ႈႁၢပ်ႇၵၢၼ် ၸိူဝ်ႉၸၢတ်ႈၸဵမ်မိူဝ်ႈပၢၼ်ပဵၼ်မၢဝ်ႇ တေႃႇထိုင်ပေႃးလူႉသဵင်ႈသုတ်းမုၼ် မိူဝ်ႈပီ2011 ယွၼ်ႉတၢင်းပဵၼ်ၶႅၼ်ႊသိူဝ်ႊတပ်း ၽွင်းဢႃယု လႆႈ 59ပီ ။