ပၢင်ၵုမ် သၽႃး ၸႄႈမိူင်းတႆး ပွၵ်ႈ 2  ၊ ၵမ်းထူၼ်ႈ 3 ၶိုၼ်းတႄႇမိူဝ်ႈၼႆႉ ဝၼ်းထိ 19 ၊ လုမ်းၸွမ် ၸိုင်ႈ သူင်ႇ ၽိုၼ်လိၵ်ႈၸူး သၽႃးၸေႈမိူင်းတႆး ၵဵပ်းၵၢင်ၸႂ် ၽိူမ်ႉထႅမ်လႅၵ်ႈၸိုဝ်ႈ ႁွင်ႈၵၢၼ် ၽွင်းလူင် သွင်ဢၼ် ။

ဝၼ်းတီႈ 19/09/2016 ယၢမ်းၵၢင်ၼႂ် ပၢင်ၵုမ်သၽႃး ၸႄႈမိူင်းတႆး ၶိုၼ်းတႄႇ ၵမ်းထူၼ် 3 ၊ တီႈ လုမ်း သၽႃးၸႄႈမိူင်းတႆး ၸႄႈဝဵင်းတူၼ်ႈတီး ၸိုင်ႈတႆး ပွတ်းၸၢၼ်း။ မီးၶပ်ႉမၢႆပၢင်ၵုမ် 10 ဢၼ် ။


ၼႂ်းၼၼ်ႉ ၶပ်ႉမၢႆ 7  မီးလိၵ်ႈဢၼ် လုမ်းၸွမ်ၸိုင်ႈ သူင်ႇယိုၼ်ႈထိုင် သၽႃးမိူင်းတႆး။ ၼႂ်းၼၼ်ႉပႃးဝႆႉဝႃႈ-  ၼင်ႇႁိုဝ် ႁွင်ႈၵၢၼ်ၽွင်းလူင်မိူင်းႁူမ်ႈတုမ်လႄႈ ၸႄႈမိူင်း တေမိူၼ်ၵၼ်ၼၼ်ႉ ၽိူမ်ႉထႅမ်လႅၵ်ႈၸိုဝ်ႈႁွင်ႈၵၢၼ် ၽွင်းလူင်မိူင်းတႆး သွင်ႁွင်ႈၵၢၼ် ။ၵဵပ်းၵၢင်ၸႂ် ၽွင်းတႅၼ်းသၽႃးမိူင်းတႆး။ လႆႈသဵင်ၵမ်ႉထႅမ်ၼမ်လႄႈ မၵ်းမၼ်ႈပဵၼ်တၢင်းၵၢၼ် မိူဝ်ႈယၢမ်းဝၢႆးဝၼ်း ဝၼ်းမိူဝ်ႈၼႆႉ ။


ပႃးဝႆႉဝႃႈ - ႁွင်ႈၵၢၼ် ၽွင်းလူင် ၾၢႆႇလဵင်ႉလူလႄႈၽုၵ်ႇသွမ်ႈ  မိူင်းတႆးၼၼ်ႉ ႁႂ်ႈလႅၵ်ႈၸိုဝ်ႈပဵၼ် ႁွင်ႈၵၢၼ်ၽွင်းလူင် ၾၢႆႇလဵင်ႉလူ၊ ၽုၵ်ႇသွမ်ႈလႄႈ ၾၢႆၸေႈမိူင်းတႆး ၊ ႁွင်ႈၵၢၼ်ၽွင်းလူင် ၾၢႆႇ ႁၵ်ႉသႃ သိင်ႇဝႅတ်ႉလွမ်ႉလႄႈ ၾိင်ႈတိုၼ်းပဵၼ်ၸေႈမိူင်းတႆးၼၼ်ႉ လႅၵ်ႈၸိုဝ်ႈပဵၼ် ႁွင်ႈၵၢၼ်ၽွင်းလူင် ၾၢႆႇႁၵ်ႉသႃ သၽႃႇဝႃႉသိင်ႇဝႅတ်ႉလွမ်ႉလႄႈ ၾိင်ႈတိုၼ်းပဵၼ်ၸေႈမိူင်းတႆး  ဝႃႈၼႆ ။


လူင်ပွင်ၸိုင်ႈ NLD  ႁပ်ႉၼႃႈတီႈပဵၼ်လူင်ပွင်ၸိုင်ႈ မိူဝ်ႈႁူဝ်ပီ 2016 ၼႆႉသေ မိူဝ်ႈ ဝၼ်းတီႈ 07/04/2016 ၼၼ်ႉ မၵ်းမၼ်ႈႁွင်ႈၵၢၼ်လူင်ပွင်ၸိုင်ႈမိူင်းတႆး၊  ၽွင်းလူင် ႁွင်ႈၵၢၼ်သေပိုၼ် ၽၢဝ်ႇဝႆႉ ၼင်ႇပႃႈတႂ်ႈၼႆႉဝႆႉ ။


1) ၽွင်းလူင် ၾၢႆႇလႅၼ်လိၼ် လႄႈၾၢႆႇႁူမ်ႇလူမ်ႈ ပဵၼ် ၸဝ်ႈသိုၵ်းလူင် သူဝ်းမူဝ်းဢွင်ႇ၊
2) ၽွင်းလူင် ၾၢႆႇလဵင်ႉလူလႄႈၽုၵ်ႇသွမ်ႈ  ပဵၼ် ၸၢႆးလူင်ၵျေႃႇ၊
3) ၽွင်းလူင် ၾၢႆႇသဵၼ်ႈတႃႈသၢႆတၢင်း  ပဵၼ် ဢူးၶုၼ်ႇယႄးထုတ်ႉ၊
4) ၽွင်းလူင် ၾၢႆႇ ႁၵ်ႉသႃ သိင်ႇဝႅတ်ႉလွမ်ႉလႄႈ ၾိင်ႈတိုၼ်းပဵၼ်  ပဵၼ် တွၵ်ႊတိူဝ်ႊၺီႇၺီႇဢွင်ႇ၊
5) ၽွင်းလူင် ၾၢႆႇၾႆးၾႃႉ ပဵၼ်ဢူးသူၺ်ႇတဵင်း၊
6) ၽွင်းလူင်ၾၢႆႇၵၢၼ်မၢၵ်ႈမီးလႄႈၶူင်းၵၢၼ် ပဵၼ်ဢူးၸူဝ်းၺုၼ်ႉလုၼ်ႇ၊
7) ၽွင်းလူင် ၾၢႆႇတူင်ႇဝူင်းၵူၼ်း ပဵၼ် တွၵ်ႊတိူဝ်ႊမဵဝ်းထုၼ်း၊
8) ၽွင်းလူင် ၾၢႆႇပၼ်ႇတႃႇငိုၼ်းတွင်း ပဵၼ် ၸၢႆးသႅင်တိပ်ႉလူင်၊
9) ၽွင်းလူင်ၾၢႆႇလိူမ်ႈလႆႇ ပဵၼ်  ၸၢႆးသူမ်သၢႆး ။


ဢၼ်လႅၵ်ႈၸိုဝ်ႈႁွင်ႈၵၢၼ်ၽွင်းလူင် ၸေႈမိူင်း ႁႂ်ႈမိူၼ်ၵၼ်တၢင်း မိူင်းႁူမ်ႈတုမ်ၼၼ်ႉ  တၢင်ႇၸေႈမိူင်း လႅၵ်ႈယဝ်ႉၸဵမ်မိူဝ်ႈလႂ်ယဝ်ႉ။ တွၼ်ႈတႃႇမိူင်းတႆးတႄႉတိုၵ်ႉလႅၵ်ႈ ၼႂ်းပၢင်ၵုမ်ၵမ်းၼႆႉၵူၺ်းဝႃႈၼႆ ။