ပၢင်ၵုမ်ဢၼ် ၸတ်းႁဵတ်းဝၼ်းတီႈ 18 – 24/8/2017 ၼၼ်ႉ မီးတူဝ်တႅၼ်း တပ်ႉသိုၵ်းၶၢင်လွတ်ႈလႅဝ်း KIA ၊ တပ်ႉသိုၵ်းရၶႅင်ႇ AA ၊ တပ်ႉသိုၵ်းပူတ်းပွႆႇၸိူဝ်ႉၸၢတ်ႈ တဢၢင်း TNLA ၊ တပ်ႉသိုၵ်းၶႄႇၵဝ်ႈၵၢင်ႉ MNDAA ၊ တပ်ႉသိုၵ်းၸိုင်ႈတႆး SSPP/SSA ၊ တပ်ႉသိုၵ်းဢူၺ်းလီၻီႊမူဝ်ႊၶရႅတ်ႊတိၵ်ႊၸိူဝ်ႉၸၢတ်ႈ NDAA မိူင်းလႃး တင်း တပ်ႉသိုၵ်းမိူင်းဝႃႉၽွမ်ႉႁူမ်ႈ UWSA တင်းမူတ်း ၶဝ်ႈႁူမ်ႈ 28 ၵေႃႉ။ ဢွၵ်ႇလိၵ်ႈပိုၼ်ၽၢဝ်ႇ 8 ၶေႃႈ ဢၼ်တုၵ်းယွၼ်းပႃး ႁႂ်ႈမိူင်းၶႄႇ ၶဝ်ႈပႃး ၼႂ်းၵၢၼ်မိူင်း မိူင်းႁူမ်ႈတုမ် မၢၼ်ႈ။
ၶေႃႈပိုၼ်ၽၢဝ်ႇ ဢၼ်မီးၸုမ်ႈၸုမ်း လႄႈ ၸိုဝ်ႈၽူႈၶၢၼ်ပၢၵ်ႇ တူၵ်ႇလၢတ်ႈ တီႈမၢႆၶေႃႈ ထူၼ်ႈ7 ၼၼ်ႉဝႃႈ - “ တႃႇၵၢၼ်ငမ်းယဵၼ် မိူင်းမၢၼ်ႈ ပေႃးတေလႆႈဢွင်ႇမၢၼ် ၼၼ်ႉ တုၵ်းယွၼ်း လူင်ပွင် ၸိုင်ႈမိူင်းၶႄႇ ၶဝ်ႈပႃးႁူမ်ႈသၢင်ႈၵႂႃႇ” - ဝႃႈၼႆ။
8 ၶေႃႈ ၼၼ်ႉ - ပႃးလွင်ႈၶွတ်ႇၽွတ်ႈ တႅင်ႇတင်ႈ ၸွမ်သိုၵ်းလူင် ဢႅၼ်ႊပၼ်ႊလ ပဵၼ် ၵႅမ်ႁူဝ်ပဝ်ႈ ၶွမ်ႊမတီႊဢုပ်ႇဢူဝ်းၵၢၼ်မိူင်း မိူင်းႁူမ်ႈတုမ် FPNCC ဢၼ်ၸုမ်းယိပ်းၵွင်ႈ 7 ၸုမ်း ႁူမ်ႈၵၼ်ၶွတ်ႇ ၽွတ်ႈဝႆႉ၊ ၶွတ်ႇၽွတ်ႈၶွမ်ႊမတီႊႁဵတ်းၵၢၼ်၊ တႃႇဢုပ်ႇဢူဝ်းၵၢၼ်မိူင်း တႅပ်းတတ်း ၶွမ်ႊမတီႊ FPNCC ၵႂႃႇဢုပ်ႇ၊ တႅပ်းတတ်းလႆႈ လွၵ်းၸုၵ်း ၵဵဝ်ႇၵပ်းၵၢၼ်မိူင်း၊ ၵဵဝ်ႇၵပ်း ပၢင်ၵုမ်လူင်ၸူဝ်ႈပၢၵ်ႇပီ 21 ပၢင်လူင် ၵမ်းထူၼ်ႈ 3 သေ သင်ၾၢႆႇလူင်ပွင်ၸိုင်ႈ ယိုၼ်ႈမွၵ်ႇၶဝ်ႈႁူမ်ႈၵေႃႈ တေၵႂႃႇၶဝ်ႈႁူမ်ႈၸွမ်း - ၸဵမ်ၸိူဝ်းၼႆႉ။
လိၵ်ႈပိုၼ်ၽၢဝ်ႇၼၼ်ႉ ယင်းတူၵ်ႇတၵ်ႉ တီႈၵိူဝ်းၵုမ်ၸိုင်ႈမိူင်း တေႃႇဢွင်ႇသၢၼ်းသုၵျီႇဝႃႈ - ၸွမ်းၼင်ႇပၼ်ၵႂၢမ်းမၼ်ႈဝႃႈ တေၶွတ်ႇၽွတ်ႈ ၶွမ်ႊမတီႊဢုပ်ႇဢူဝ်းၵၢၼ်မိူင်းသေ ဢုပ်ႇဢူဝ်းၵၼ်ၵႂႃႇၼၼ်ႉ ႁႂ်ႈၸဵဝ်းပဵၼ်ပၢင်ဢုပ်ႇဢူဝ်းၵၼ်၊ လိူဝ်ၼၼ်ႉ တုၵ်းယွၼ်းသိုၵ်းလူင်ပွင်ၸိုင်ႈမၢၼ်ႈဝႃႈ ႁႂ်ႈၵိုတ်းၵၢၼ်ႁႅၼ်းသိုၵ်းလေႃႇတိုၵ်းၽႂ်းၽႂ်းသေ ဢုပ်ႇဢူဝ်းတင်း ၸုမ်း FPNCC သေ ဢမ်ႇၵႃး ပိုတ်ႇၽၵ်းတူ ဢႃႈမိုဝ်း တူဝ်ႈတၼ်းတႃႇဢုပ်ႇဢူဝ်း လွင်ႈၵၢၼ်ၵေႃႇသၢင်ႈမိူင်းႁူမ်ႈတုမ်ၻီႊမူဝ်ႊၶရေႊသီႊ ၸိုၼ်ႈၸၢင်ႇ ဢၼ်မီးသုၼ်ႇလႆႈတႅတ်းတတ်း ၽဵင်ႇပဵင်း ၼၼ်ႉယူႇ-ဝႃႈၼႆ။