ပႃႊတီႊႁူဝ်သိူဝ် SNLD တေဢွၼ်ႁူဝ်ၸတ်းႁဵတ်း ပၢင်ၾိုၵ်းၽွၼ်ႉပူၵ်းပွင်ပၢႆးပၺ်ၺႃ ပၼ်ၵူၼ်း ၼုမ်ႇ ၸႄႈဝဵင်းမိူင်းယႆ တႃႇ 28 ဢိူင်ႇ။

ပၢင်ၾိုၵ်းၽွၼ်ႉ လၢႆးပူင်သွၼ်လိၵ်ႈလၢႆးတႆး မိူဝ်ႈပီ 2016

 တႄႇဢဝ် ဝၼ်းတီႈ 05-20/05/2017 တႃႇၶၢဝ်းတၢင်း 15 ဝၼ်း ပႃႊတီႊႁူဝ်သိူဝ် SNLD တေဢွၼ် ႁူဝ်ၼမ်းၼႃႈ ၸတ်းႁဵတ်းပၢင်ၾိုၵ်းၽွၼ်ႉ လၢႆးပူင်သွၼ်လိၵ်ႈလၢႆးတႆး ပွၵ်ႈၵမ်းသွင် တီႈဝတ်ႉဝိႁၢရ် သႅင်မိူင်း ပွၵ်ႉ 3 ၸႄႈဝဵင်းမိူင်းယႆ ၸႄႈတွၼ်ႈလႃႈသဵဝ်ႈ ၸိုင်ႈတႆးပွတ်းႁွင်ႇ ။ ၼင်ႇႁိုဝ် ၵူၼ်းၼုမ်ႇ ပေႃးတေ မေႃၽႅၼ်ၵၢၼ် ပူၵ်းပွင်ပၼ် ပၢႆးပၺ်ၺႃ ၼႂ်းဝဵင်းမိူင်းယႆ ဝႃႈၼႆ ။


ၸၢႆးသိူဝ်ဢွၼ်ႇမိူင်း ၽူႈၼမ်းၼႂ်း ပႃႊတီႊႁူဝ်သိူဝ် ဝဵင်းမိူင်းယႆ လၢတ်ႈဝႃႈ “ ယူႇတီႈပႃႇတီႇ ႁူဝ်သိူဝ် ႁဝ်း ၸႄႈဝဵင်းမိူင်းယႆ မီးၽႅၼ်ၵၢၼ်ဝႆႉဝႃႈ ၼိုင်ႈပီလႂ် ၼိုင်ႈပွၵ်ႈ တႃႇပူၵ်းပွင်ပၼ်ၵူၼ်းၼုမ်ႇႁဝ်း ၵဵဝ်ႇ လူၺ်ႈပၺ်ၺႃ၊ မေႃသွၼ်ဢၼ်တေမႃးပူင်သွၼ်ပၼ်သမ်ႉ ပဵၼ်မေႃသွၼ် လုင်းၸၢႆးၾႃႈ။ လုင်းၾႃႈၼႆႉ လၢႆးပူင်သွၼ်မၼ်းၵေႃႈ ၶိုတ်းၵၢပ်ႈၶိုတ်းၸၼ်ႉမႃးၵူႈပီၵူႈပီ ယွၼ်ႉၼၼ်လႄႈ ၵူၼ်းၼုမ်ႇႁဝ်း မၼ်းထုၵ်ႇလီႁပ်ႉႁူႉၼႆလႄႈ ယူႇတီႈပႃႇတီႇႁဝ်း ၸင်ႇဢွၼ်ႁူဝ်သေ ၸတ်း ႁဵတ်း” ဝႃႈၼႆ ။


သိုပ်ႇလၢတ်ႈထႅင်ႈဝႃႈ ယိူင်းဢၢၼ်း တႃႇၸတ်းႁဵတ်းပၢင်ဢုပ်ႇၶႆႈ ပၢႆးႁူႉ၊ ပၢႆးႁၼ်လႄႈ လိၵ်ႈလၢႆးတႆး တႃႇၵူၼ်းမိူင်းၸႄႈဝဵင်းမိူင်းယႆႁဝ်း ၵူၺ်းၵႃႈ တေၸတ်းႁဵတ်းၼႂ်းဝၼ်းလႂ်တႄႉ ပႆႇတႅပ်းတတ်း၊ တေႃႈလဵဝ်ၼႆႉ သမ်ႉပဵၼ်ၽွင်းႁၢင်ႈႁႅၼ်း တႃႇပၢင်ၾိုၵ်းၽွၼ်ႉယူႇ။


ပၢင်ၾိုၵ်းၽွၼ်ႉလၢႆးပူင်သွၼ်လိၵ်ႈလၢႆးတႆးၼႆႉ မွၵ်ႇၵူၼ်းၼုမ်ႇ မႃးၶဝ်ႈႁူမ်ႈ ၼိုင်ႈဢိူင်ႇလႂ် ဢမ်ႇယွမ်း 3 ၵေႃႉ၊ တႃႇ 28 ဢိူင်ႇ ၼႂ်းၸႄႈဝဵင်း မိူင်းယႆ ဝႃႈၼႆ။


ပၢင်ၾိုၵ်းၽွၼ်ႉၼႆႉ ၶူးပူင်သွၼ်လူင် လုင်းၸၢႆးၾႃႈလႄႈၸုမ်းမေႃသွၼ် ဢွၼ်ႁူဝ်ၼမ်းၼႃႈ ပူင်သွၼ်ပၼ် တႃႇၶၢဝ်းတၢင်း 15 ဝၼ်း ၼႆယဝ်ႉ။


ပၢင်ၾိုၵ်းၽွၼ်ႉ လၢႆးပူင်သွၼ်လိၵ်ႈလၢႆးတႆး မိူဝ်ႈပီ 2016 ၼၼ်ႉ မေႃသွၼ် ၼ်ႂ်းဢိူင်ႇ 28 ဢိူင်ႇ ၸႄႈဝဵင်းမိူင်းယႆ ဢၼ်မႃးၶဝ်ႈႁူမ်ႈလဵပ်ႈႁဵၼ်း 218 ၵေႃႉ ၼႆယဝ်ႉ။


ၸုမ်းၶၢဝ်ႇၽူႈတွႆႇႁွၵ်ႈ/ ၸၢႆးယွတ်ႈၶမ်း 26/04/2017