ႁူဝ်ၼႃႈၵူၼ်းၼုမ်ႇ ဝဵင်းမိူင်းသူႈ တိုၵ်းသူၼ်းထိုင်ပီႈၼွင်ႉၵူၼ်းမိူင်းၵူႈတီႈ ႁႂ်ႈၸွႆႈၵၼ်လုမ်းလႃး တူၺ်း ထိုင်သၽႃႇဝ ၾိင်ႈတိုၼ်း ဢွၼ်ၵၼ်ပႅတ်ႈယုၵ်းယၵ်း ႁႂ်ႈထုၵ်ႇတီႈ မႅၼ်ႈတၢင်း ။

ၸုမ်းၵူၼ်းၼုမ်ႇ ဝဵင်းမိူင်းသူႈ ႁူမ်ႈၵၼ်သေ ၵဵပ်းယုၵ်းယၵ်း ႁဵတ်းလွင်ႈမူတ်းသႂ် ၼႂ်းဝၢၼ်ႈ ၊ ၼႂ်းဝဵင်း မိူၼ်ၼင်ႇ သွင်ၾၢၵ်ႇၶၢင်ႈမႄႈၼမ်ႉငႃႉလႄႈ ႁိမ်းႁွမ်းၽြႃးလူင်ၵၢင်ဝဵင်း ၸိူဝ်းၼႆႉ တႄႇပီ2014 မႃး ထိုင်ယၢမ်းလဵဝ် ။

မီးယိူင်းဢၢၼ်းလူင် ၼင်ႇႁိုဝ်တေပဵၼ် တူဝ်ယၢင်ႇလီတွၼ်ႈတႃႇမိူဝ်းၼႃႈ ၼင်ႇႁိုဝ်ၵူၼ်းမိူင်းသူႈလႄႈ လုၵ်ႈလၢၼ် တေမေႃႁၵ်ႉသႃလွင်ႈမူတ်းသႂ် ဢမ်ႇပႅတ်ႈယုၵ်းယၵ်းမၢၵ်ႇမိူဝ်၊ ႁႂ်ႈပႅတ်ႈယုၵ်းယၵ်း ပဵၼ်တီႈ ပဵၼ်တၢင်း ၊ မေႃၸႅၵ်ႇၽႄယုၵ်းယၵ်းၼဝ်ႈလႄႈ ယုၵ်းယၵ်း ဢၼ်တေၸၢင်ႈၶိုၼ်း ဢဝ်ၸႂ်ႉ လႆႈ ၊ ႁႂ်ႈမေႃၸွႆႈၵၼ်ႁဵတ်းလွင်ႈမူတ်းသႂ် လုမ်းလႃးသိင်ႇဝႅတ်ႉလွမ်ႉ ၸဵမ်ၸိူဝ်းၼႆႉ ။

မေႃသွၼ်ၼၢင်းသႅင်ႁိူင်း ႁူဝ်ၼႃႈၵူၼ်းၼုမ်ႇမိူင်းသူႈလၢတ်ႈဝႃႈ- “ ၵေးၼမ်ႉငႃႉၼႆႉ ပဵၼ်တီႈပိုင်ႈသၢႆ ၸႂ်ၵူၼ်းမိူင်းသူႈ တင်းမိူင်း ၼင်ႇႁိုဝ်ၸူဝ်ႈလုၵ်ႈပၢၼ်လၢၼ်ပေႃးတေမီးၼမ်ႉၸႂ်ႉၼၼ်ႉ ႁႂ်ႈဢွၼ်ၵၼ် လုမ်းလႃးႁၵ်ႉသႃ သေၵမ်း။ ပေႃးၾိင်ႈႁိမ်းႁွမ်းႁဝ်းမူတ်ႈသႂ်ၵေႃႈ ၵူၼ်းယူႇသဝ်းၵေႃႈ တေမီးပၢႆးယူႇ လီၶႅမ်ႉ၊ ဝၢၼ်ႈမိူင်းၵေႃႈ တေႁၢင်ႈလီၼႆလႄႈ ၶႂ်ႈတိုၵ်းသူၼ်းထိုင်ၵူႈၵေႃႉဝႃႈ ဢမ်ႇလီပႅတ်ႈယုၵ်း ယၵ်း တူၵ်းၼမ်ႉလႄႈ ႁႂ်ႈဢွၼ်ၵၼ်ပႅတ်ႈယုၵ်းယၵ်း ပဵၼ်တီႈပဵၼ်တၢင်းသေၵမ်း - ဝႃႈၼႆ ။

ၵူၼ်းၼုမ်ႇမိူင်းသူႈ ႁူမ်ႈၵၼ်ၵဵပ်းယုၵ်းယၵ်း ၵူႈဝူင်ႈယူႇသေတႃႉ တီႈမိူင်းသူႈၼၼ်ႉ ယွၼ်ႉပိူဝ်ႈၵူၼ်း ၼမ်လႄႈ လုမ်းလႃးဢမ်ႇတူဝ်ႈထိုင်လႆႈ ။ ၸင်ႇလႆႈယွၼ်းတၢင်းၸွႆႈထႅမ် ၵူၼ်းယူႇၼႂ်းမိူင်းသူႈတင်း သဵင်ႈ ပႅတ်ႈယုၵ်းယၵ်း ႁႂ်ႈမီးပၵ်းမီးပိူင် ႁၵ်ႉသႃလွင်ႈမူတ်းသႂ် - ဝႃႈၼႆ။

ဝဵင်းမိူင်းသူႈၼႆႉမီး 4 ပွၵ်ႉ ။ ပဵၼ်ဝဵင်းဢၼ်ဢွၵ်ႇၵႅဝ်ႈသႅင် ၸိုဝ်ႈသဵင်လိုဝ်းလင်ၼႂ်းလုမ်ႈၾႃႉ ။ မီးလၢႆလၢႆၸၢဝ်းၶိူဝ်း လၢႆလၢႆၽႃႇသႃႇ – သႃသၼႃ လုၵ်ႉလၢႆတီႈလၢႆ တၢင်းမႃးယူႇ သဝ်းႁႃၵိၼ် လဵင်ႉတွင်ႉ။