လွင်ႈဢၼ်ပႃႇတီႇ NLD တၢင်ႇလိၵ်ႈတုၵ်းယွၼ်း ႁႂ်ႈပူတ်းယႃႉပၢင်လိူၵ်ႈတင်ႈသွမ်ႈ တီႈၼႂ်း 3 ဢိူင်ႇ ၼႂ်းၸႄႈဝဵင်းမိူင်းသူႈ ၸိုင်ႈတႆးပွတ်းၸၢၼ်းၼၼ်ႉ ၶွမ်ႊမသျိၼ်ႊၵၢၼ်လိူၵ်ႈတင်ႈမိူင်းႁူမ်ႈတုမ် ၼမ်းဢဝ်ဢုပ်ႇၵုမ်တႅပ်းတတ်းသေ ပွင်ႇၶၢဝ်ႇဝႃႈ ဢမ်ႇပူတ်းယႃႉ- ၽူႈမီးပုၼ်ႈၽွၼ်းၾၢႆႇၶွမ်ႊမသျိၼ်ႊ ၵၢၼ်လိူၵ်ႈတင်ႈ လၢတ်ႈ။

ၼႂ်းဢိူင်ႇ 3 ဢိူင်ႇ ၸႄႈဝဵင်းမိူင်းသူႈ ဢိူင်ႇၵုၼ်ၵျွင်း၊ ၼွင်ဢႅပ်း၊ မေႃႇမႄႈ ဢၼ်ၽူႈမီးသုၼ်ႇတွတ်ႈၶႅပ်းၵၢင်ၸႂ်မီး 4 ႁဵင်ပၢႆၼၼ်ႉ ယူႇတီႈပႃႇတီႇ NLD တၢင်ႇလိၵ်ႈတုၵ်းယွၼ်းထိုင်တီႈၶွမ်ႊမသျိၼ်ႊၵၢၼ်လိူၵ်ႈတင်ႈ ၸႄႈတွၼ်ႈဝႃႈ ႁႂ်ႈပူတ်းယႃႉပၢင်လိူၵ်ႈတင်ႈသွမ်ႈ ဢၼ်တေၸတ်းႁဵတ်းၽွင်းႁူဝ်လိူၼ်ဢေႊပရိူဝ်ႊၼႆႉ။ ဢိင်ဢၢင်ႈဝႃႈ ၵွပ်ႈဢမ်ႇမီးလွင်ႈႁူမ်ႇလူမ်ႈပဵင်းပေႃး တႃႇၸတ်းပၢင်လိူၵ်ႈတင်ႈ။ ၵဵဝ်ႇၵပ်းလွင်ႈၼႆႉ ယူႇတီႈၶွမ်ႊမသျိၼ်ႊၵၢၼ်လိူၵ်ႈတင်ႈမိူင်းႁူမ်ႈတုမ်ၵေႃႈ ၼမ်းဢဝ်မႃးဢုပ်ႇၵုမ်ၵၼ်သေ တႅပ်းတတ်းယဝ်ႉ ပွင်ႇၶၢဝ်ႇမႃးဝႃႈ ဢမ်ႇပူတ်းယႃႉယဝ်ႉ၊ တေသိုပ်ႇႁဵတ်းၵၢၼ်လိူၵ်ႈတင်ႈၵႂႃႇ- ၼႆယဝ်ႉ။


ဢူးတၢၼ်းတိၼ်ႇ ႁူဝ်ပဝ်ႈၶွမ်ႊမသျိၼ်ႊၵၢၼ်လိူၵ်ႈတင်ႈၸႄႈတွၼ်ႈလွႆလႅမ် လၢတ်ႈဝႃႈ- ႁဝ်းၶႃႈဢမ်ႇပူတ်းယႃႉ ပၢင်လိူၵ်ႈတင်ႈ 3 ဢိူင်ႇၼၼ်ႉ၊ ၵူၺ်းၵႃႈ မီးၶပ်းမၢႆဝႆႉဝႃႈတေၶၢႆႉႁူင်းတွတ်ႈၶႅပ်းၵၢင်ၸႂ် ၵႂႃႇဝႆႉတီႈဢၼ်ၸမ်ဝဵင်းၼၼ်ႉ။ ၾၢႆႇၶွမ်ႊမသျိၼ်ႊၵၢၼ်လိူၵ်ႈတင်ႈမိူင်းႁူမ်ႈတုမ်ၵေႃႈ ပိုၼ်ၽၢဝ်ႇဝႆႉယဝ်ႉ ဝႃႈတေၶၢႆႉႁူင်းတွတ်ႈၶႅပ်းၼၼ်ႉ။ ၼင်ႇႁိုဝ်ၵၢၼ်လိူၵ်ႈတင်ႈသွမ်ႈႁဝ်းၶႃႈ တေဢွင်ႇမၢၼ်ၵႂႃႇလီငၢမ်းၼၼ်ႉ ႁဝ်းၶႃႈလီႁူမ်ႈမိုဝ်းၵၼ်သေႁဵတ်းသၢင်ႈၵႂႃႇ။ ၵွပ်ႈၼၼ်လႄႈ 3 ဢိူင်ႇၼႆႉ တေၶၢႆႉႁူင်းတွတ်ႈၶႅပ်းၵၢင်ၸႂ်။ ပေႃးငဝ်းလၢႆးမၼ်းဢမ်ႇလီတေၶၢႆႉၼႆ ႁဝ်းၶႃႈမီးၽႅၼ်ၵၢၼ်ဝႆႉယဝ်ႉ၊ ၵူၺ်းၵႃႈ တေၶၢႆႉၵႂႃႇတၢင်းလႂ်ၼႆတႄႉ ႁဝ်းၶႃႈပႆႇပိုၼ်ၽၢဝ်ႇ၊ ၵွပ်ႈပႆႇထိုင်ၶၢဝ်းယၢမ်းမၼ်း၊ ႁႂ်ႈတမ်းဝၢင်းၸႂ်လွင်ႈႁူမ်ႇလူမ်ႈလႆႈၵွၼ်ႇ ၸင်ႇၵွႆႈၶၢႆႉ-ဝႃႈၼႆ။


ႁူင်းတွတ်ႈၶႅပ်းၼၼ်ႉ တေၶၢႆႉၵႂႃႇတၢင်းလႂ် ပႆႇမီးၽႂ်ႁူႉသေတႃႉ ဢၼ်ပဵၼ်ၾၢႆႇၸမ်ၸႂ်ၶွမ်ႊမသျိၼ်ႊၵၢၼ်လိူၵ်ႈတင်ႈ ၸႄႈဝဵင်း လၢတ်ႈဝႃႈ- တေဢမ်ႇပၼ်ႁၢင်ႇၵႆတင်းဝၢၼ်ႈၵူၼ်း ဢၼ်ပဵၼ်ဝၢၼ်ႈယႂ်ႇဝၢၼ်ႈလူင်လိူဝ်သေ 4 လၵ်း။


ၸၢႆးလဵၵ်ႉ ၽူႈၶၢၼ်ပၢၵ်ႇပႃႇတီႇႁူဝ်သိူဝ် လၢတ်ႈဝႃႈ- ပေႃးမႃးတႅၵ်ႈၵၼ်တင်း ဢၼ်ဝႃႈဢမ်ႇလႆႈတွတ်ႈၶႅပ်း ၵၢင်ၸႂ်ၼၼ်ႉ ဢၼ်ၶၢႆႉႁူင်းတွတ်ႈၶႅပ်းၼႆႉ ယင်းၶႅၼ်းဢိတ်းၼိုင်ႈယူႇ။ ၵူၺ်းၵႃႈ ၼႂ်းပိုၼ်ႉတီႈၼႆႉ ဢမ်ႇမီးပၢင်တိုၵ်းသိုၵ်းသိူဝ်သင်၊ ငဝ်းလၢႆးၵၢၼ်သိုၵ်းၵၢၼ်သိူဝ်ၼႂ်းပိုၼ်ႉတီႈၵေႃႈ ယင်းယဵၼ်ဝႆႉယူႇ၊ ၵူၺ်းၵႃႈ ၵူၼ်းဝၢၼ်ႈသမ်ႉတေလႆႈႁိူဝ်ႉလႆႈယၢပ်ႇသေ ၵႂႃႇတွတ်ႈၶႅပ်းၵၢင်ၸႂ် ဢၼ်ႁၢင်ႇယၢၼ်တင်းဝၢၼ်ႈတူဝ်ၵဝ်ႇ 4-5 လၵ်းၼၼ်ႉ မၼ်းယၢပ်ႇၸႂ်တွၼ်ႈတႃႇၵူၼ်းဝၢၼ်ႈ။ ၵူၼ်းဝၢၼ်ႈၵူၼ်းမိူင်းတႆးၼႆႉ ၸဵမ်မိူဝ်ႈလႂ်လႂ်မႃးၵေႃႈ ပေႃးၵဵဝ်ႇၵပ်းလွင်ႈတွတ်ႈၶႅပ်းၵၢင်ၸႂ်ၼႆ ၶဝ်ဢမ်ႇပေႃးသူၼ်ၸႂ်ပႃးၸႂ်ၵႃႈႁိုဝ်၊ တေလႆႈတိုၵ်းသူၼ်းတုၵ်းယွၼ်း ႁႂ်ႈၶဝ်မႃးတွတ်ႈၶႅပ်းၵၢင်ၸႂ်ယႂ်ႇယႂ်ႇၼမ်ၼမ်၊ လႅပ်ႈပဵၼ်ငဝ်းလၢႆးၼႆႉဝႆႉယူႇ-ဝႃႈၼႆ။


လွင်ႈဢၼ်ပႃႇတီႇ NLD တၢင်ႇလၢတ်ႈတုၵ်းယွၼ်းဝႆႉတီႈ ၶွမ်ႊမသျိၼ်ႊၵၢၼ်လိူၵ်ႈတင်ႈ တီႈမိူင်းသူႈဝႃႈ ႁႂ်ႈပူတ်းယႃႉပႅတ်ႈပၢင်လိူၵ်ႈတင်ႈသွမ်ႈ ၼႂ်း 3 ဢိူင်ႇ ၸႄႈဝဵင်းမိူင်းသူႈၼၼ်ႉ ယူႇတီႈၵူၼ်းမိူင်းၵေႃႈ ဢွၼ်ၵၼ်ထတ်းသၢင်ဢုပ်ႇလၢတ်ႈ ႁၢဝ်ႈႁႅင်း။


ၾၢႆႇၽူႈမီးပုၼ်ႈၽွၼ်း ၶွမ်ႊမသျိၼ်ႊၵၢၼ်လိူၵ်ႈတင်ႈၸႄႈဝဵင်း ၵေႃႉၼိုင်ႈၵေႃႈလၢတ်ႈဝႃႈ- မိူဝ်ႈပီ 2015 ၼၼ်ႉၵေႃႈ ယွၼ်ႉပိူဝ်ႈလွင်ႈႁူမ်ႇလူမ်ႈသေ ၵူၼ်းဝၢၼ်ႈၵူၼ်းမိူင်းၸိူဝ်းၼႆႉ ဢမ်ႇလႆႈတွတ်ႈၶႅပ်းၵၢင်ၸႂ်။ ထိုင်မႃးပီ 2017 ၼႆႉၵေႃႈ လွင်ႈတေဢမ်ႇလႆႈတွတ်ႈၶႅပ်းၵၢင်ၸႂ်ၼႆႉ လႆႈတွင်ႈထၢမ်တူၺ်းၵၢင်ၸႂ်ၶဝ်ဝႃႈ ႁၼ်ထိုင်ၸိူင်ႉႁိုဝ်၊ တေႁဵတ်းႁိုဝ်လီၸိူဝ်းၼႆႉ။ ၵူၼ်းဝၢၼ်ႈၶဝ် ပႃးၸဵမ်ၵူၼ်းလူင်ဝၢၼ်ႈ ၵူၼ်းလူင်ဢိူင်ႇၸိူဝ်းၼႆႉ ၶဝ်ၵေႃႈမႃးပၼ်တၢင်းႁၼ်ထိုင်တီႈလုမ်း ၶွမ်ႊမသျိၼ်ႊၵၢၼ်လိူၵ်ႈတင်ႈ။ ၶဝ်မႃးလၢတ်ႈၼႄတၢင်းႁၼ်ထိုင်ၶဝ်ဝႃႈ ပၢင်လိူၵ်ႈတင်ႈတီႈၼႂ်း 3 ဢိူင်ႇၼႆႉ ဢမ်ႇထုၵ်ႇလီပူတ်းယႃႉ၊ ယွၼ်ႉၼၼ် ႁဝ်းၶႃႈၵေႃႈလႆႈဢဝ်မိူဝ်းဢုပ်ႇၵုမ်ၵၼ်သေ လႆႈၸႂ်တူၵ်းလူင်းၵၼ်ယဝ်ႉ ၸင်ႇမႃးပိုၼ်ၽၢဝ်ႇဝႃႈ တေဢမ်ႇပူတ်းယႃႉပၢင်လိူၵ်ႈတင်ႈယဝ်ႉ။ ၼႂ်းဢိူင်ႇ 3 ဢိူင်ႇၼႆႉ ၵူၼ်းမီးသုၼ်ႇတွတ်ႈၶႅပ်းၵၢင်ၸႂ်မီး 4 ႁဵင်ပၢႆ၊ မီး 10% ၶွင်ၽူႈမီးသုၼ်ႇတွတ်ႈၶႅပ်း ၼႂ်းၸႄႈဝဵင်းမိူင်းသူႈ။ ၸင်ႇဝႃႈလီပိုတ်ႇႁူင်းတွတ်ႈၶႅပ်း ႁႂ်ႈၶဝ်လႆႈတွတ်ႈၶႅပ်း- ဝႃႈၼႆ။


လွင်ႈတၢင်းဢၼ်ပႃႇတီႇ NLD တၢင်ႇလိၵ်ႈတုၵ်းယွၼ်း ႁႂ်ႈပူတ်းယႃႉ၊ ဢမ်ႇထုၵ်ႇလီႁဵတ်းပၢင်လိူၵ်ႈတင်ႈသွမ်ႈ ၼႂ်း 3 ဢိူင်ႇၼႆၼၼ်ႉ ပိူင်လူင်မၼ်း ယွၼ်ႉပိူဝ်ႈလွင်ႈႁူမ်ႇလူမ်ႈ၊ ႁၼ်ဝႃႈပဵၼ်ၼႃႈလိၼ်ပိုၼ်ႉတီႈ ၸုမ်းယိပ်းၵွင်ႈၵၢင်ႇၵုမ်းၵမ်။


ၵဵဝ်ႇၵပ်းလွင်ႈၼႆႉ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ၵေႃႈ ပိုၼ်ၽၢဝ်ႇဝႆႉဝႃႈ- SSPP/SSA ၼႆႉ ႁူမ်ၸူမ်းႁပ်ႉတွၼ်ႈၵၢၼ်လိူၵ်ႈတင်ႈ၊ ၼႂ်းၼႃႈလိၼ်ဢၼ် SSPP/SSA ၵုမ်းၵမ်ၼႆႉ ပႃႇတီႇၵၢၼ်မိူင်းပႃႇတီႇလႂ်သေဢမ်ႇဝႃႈ ပေႃးဝႃႈလူင်းသဵၼ်ႈၸိုဝ်ႈဝႆႉ ပဵၼ်တၢင်းၵၢၼ်ယဝ်ႉ၊ ႁႂ်ႈၸႅင်ႈလၢတ်ႈသေ မႃးသူၼ်းတုမ်ႁႃသဵင်လႆႈမႃးၸတ်းပၢင်လိူၵ်ႈတင်ႈလႆႈ လွတ်ႈလွတ်ႈလႅဝ်းလႅဝ်း ၼႂ်းပိုၼ်ႉတီႈၼႃႈလိၼ် SSPP/SSA ၵုမ်းၵမ်ဝႆႉ။ လွင်ႈၼႆႉ SSPP/SSA ဢွၵ်ႇလိၵ်ႈပိုၼ်ၽၢဝ်ႇပူၼ်ႉမႃး မိူဝ်ႈဝၼ်းတီႈ 25 လိူၼ်ၾႅပ်ႊၿိဝ်ႊရီႊၼင်ႇၼႆ။