ထုင်ႉႁူဝ်တိုဝ်ႉ မိူင်းယႆ ၸတ်းႁဵတ်းပၢင်သွၼ် ႁူင်းႁဵၼ်းထမ်မ လႄႈ လိၵ်ႈလၢႆးတႆး



ၶၢဝ်းဢိုတ်း ႁူင်းႁဵၼ်းလူင်ပွင်ၸိုင်ႈ ၶၢဝ်းမႆႈ ပီ ၼႆႉ ၸုမ်းသင်ၶလႄႈ မေႃသွၼ်ၶဝ်ႁူမ်ႈၵၼ်ဢွၼ်ႁူဝ် သေၸတ်းပဵၼ်ပၢင်သွၼ်ႁူင်းႁဵၼ်းထမ်မ လႄႈ ၾိင်ႈငႄႈပုတ်ႉထ လိၵ်ႈလၢႆးတႆး ၼႂ်းဢိူင်ႇႁူဝ်တိုဝ်ႉ ၸႄႈဝဵင်းမိူင်းယႆ ။


ဝၼ်းတီႈ 22/3/2017 ၼႂ်းဢိူင်ႇႁူဝ်တိုဝ်ႉ မိူင်းယႆ ၼၼ်ႉ ၸတ်းႁဵတ်းပၢင်သွၼ် တီႈဝိႁၢရ် ဝၢၼ်ႈၼမ်ႉလၢၼ်း။ လုၵ်ႈႁဵၼ်း 70 ပၢႆ ၸိူဝ်းယူႇ ၼႂ်းဝၢၼ်ႈၼမ်ႉလၢၼ်း ဝၢၼ်ႈၼမ်ႉႁူးပၢင်ၸူင်၊ ဝၢၼ်ႈၼႃးၸီႉ ၸိူဝ်းၼႆႉမႃးႁဵၼ်းဢဝ်ပၢႆးႁူႉပၢႆးႁၼ်။ မီးယူႇ 3 ၸၼ်ႉ၊ ၸၼ်ႉၼိုင်ႈတေႃႇ ၸၼ်ႉသၢမ်။ ၶူးပူင်သွၼ်သမ်ႉ ၸဝ်ႈသင်ၶတူၼ်ၼိုင်ႈ လႄႈမေႃသွၼ်သၢမ်ၵေႃႉ။


ၸဝ်ႈတူၼ်ၶူး ၽူႈပူင်သွၼ်ၼၼ်ႉ လၢတ်ႈဝႃႈ - “ ၶႂ်ႈႁႂ်ႈလုၵ်ႈဢွၼ်ႇတႆးႁဝ်းၶိုၼ်ႈယ်ႂ်ႇ ၊ ႁႂ်ႈၶဝ်မီးတၢင်းႁူႉ ၼမ်တၢင်းႁၼ်ၵႂၢင်ႈ၊ ႁႂ်ႈၶဝ်မေႃၵပ်းသိုပ်ႇၸွႆႈထႅမ် တူင်ႇဝူင်းၵူၼ်း၊ ၸွႆႈပူၵ်းပွင်ၵၢၼ်ၸိူဝ်ႉၸၢတ်ႈဝၢၼ်ႈ မိူင်း၊ ႁႂ်ႈႁူႉၵႂၢမ်းသင်ႇသွၼ်ပုတ်ႉထ” - ၸဵမ်ၸိူဝ်းၼႆႉ။


ပၢင်သွၼ်ၾိင်ႈငႄႈလိၵ်ႈလၢႆးတႆး ၶၢဝ်းမႆႈ တင်း ပၢင်သွၼ် ႁူင်းႁဵၼ်းထမ်မ ၾိင်ႈငႄႈပုတ်ႉထ  ၼႆႉ လႆႈႁဵတ်းသၢင်ႈမႃး ၸဵမ်မိူဝ်ႈပီ 2012 ။ မီးမႃးၶၢဝ်းတၢင်းႁႃႈပီ ။ ပၢင်သွၼ်ပီၼႆႉၶၢဝ်းတၢင်း 3 လိူၼ် တေဢၢၼ်းယဝ်ႉတူဝ်ႈ ၼႂ်းလုၵ်ႈလိူၼ် 6 ။ ပေႃႈဝၢၼ်ႈမႄႈမိူင်း ၼႂ်းပိုၼ်ႉတီႈတႄႉ ထတ်းသၢင်ဝႃႈ လႆႈႁၼ်ၽွၼ်းလီလုၵ်ႈဢွၼ်ႇ၊ ၵူၼ်းၼုမ်ႇတင်းၼမ် လၵ်းလႅမ်သႅမ်းၵႃႈမႃး ယူႇ ဝႃႈၼႆ။




 
© 2012 All Rights Reserved | Asean Celebrity | Fonts @ AtFonts | Free Templates