ၼႂ်းၸိုင်ႈတႆးပွတ်းႁွင်ႇ ၸႄႈဝဵင်းမိူင်းယႆ ၼမ်ႉႁူးလိူတ်ႇ ဢိူင်ႇတိုဝ်ႉၸၢင်ႉ ယၼ်ၵႆ ဝဵင်း 15 လၵ်းၼၼ်ႉ ၸဝ်ႈၸၢင်း 2 တူၼ် တင်း ၸဝ်ႈသၢင်ႇ 1 တူၼ် ၵႂႃႇဢၢပ်ႇၼမ်ႉသေ ၸူမ်ၼမ်ႉ သဵင်ႈသုတ်းမုၼ် လူႉလွၼ်ႇၵႂႃႇ တင်း သၢမ်တူၼ်။

ဝၼ်းတီႈ 25/3/2017 ယၢမ်းဝၢႆးဝၼ်း 3 မူင်းၼၼ်ႉ ၸဝ်ႈၸၢင်းဝႃႇယႃႇမ ၊ ၸဝ်ႈၸၢင်းၵႃႇလိင်ႇတ ၊ ၸဝ်ႈသၢင်ႇထုၼ်း ၶဝ် 3 ၸဝ်ႈ ဝတ်ႉဝႃႇသူဝ်ႇ (ၵျွင်းမိူင်းယႆ) ၼၼ်ႉ  ၶဝ်ၸဝ်ႈၸူဝ်းၵၼ်ၵႂုႇဢၢပ်ႇၼမ်ႉ တီႈၼမ်ႉႁူးလိူတ်ႇ (ႁွင်ႉ) ၵူတ်ႉတွင်ႉလေႃး တီႈၼမ်ႉလၼ်းလႄႈၼမ်ႉလွင်း လႆမႃးၶဝ်ႈၸူးၵၼ်။ ယၢမ်း ဝၢႆးဝၼ်း 4 မူင်းပၢႆ ၵူၼ်းႁႃၽၵ်း ၵႂႃႇႁၼ်တူဝ်တၢႆ ၸဝ်ႈသၢင်ႇ တီႈႁိမ်းႁၢတ်ႇ သူပ်းၼမ်ႉလၼ်း။


ၸဝ်ႈတူၼ်ႈၶူး ဝတ်ႉၼႃးလၼ်ႇ - ပႃႇၵၢင်း ဢၼ်လႆႈၵႂႃႇႁပ်ႉတၢင်းလီ သုၽၶဝ်ၸဝ်ႈၼၼ်ႉလၢတ်ႈဝႃႈ- “ပေႃးတူၺ်းတႄႉ ၸဝ်ႈသၢင်ႇဢွၼ်ႇ ဢၢပ်ႇၼမ်ႉသေ ၵႂႃႇယူႇၼိူဝ်တၢင်ႉၼမ်ႉတူၵ်း ဝႅၼ်တူၵ်း။ လဵၼ်ႈၼမ်ႉသေၸူမ်။ ၸဝ်ႈၸၢင်းသွင်တူၼ်သမ်ႉ လႅပ်ႈၵႂႃႇၸွႆႈဢဝ် ၸဝ်ႈသၢင်ႇ၊ ဢဝ်ဢမ်ႇလႆႈလႄႈ ပႃးၵၼ်ၸူမ်တၢႆ ၸိူင်ႉၼၼ်” - ဝႃႈၼႆ။


ၶၢပ်ႈတူဝ် ၶဝ်ၸဝ်ႈတင်းသၢမ် တႄႉ သၢင်းၵျူဝ်ႇ ၽဝ်ၾႆး မိူဝ်ႈဝၼ်းတီႈ 26/3/2017 ယၢမ်းဝၢႆးဝၼ်း 2 မူင်း၊ ဝၼ်းတီႈ 27/3/2017 တင်ႈတႄႇယၢမ်း 10 မူင်းတေႃႇထိုင် 12 ၼၼ်ႉ ၵူၼ်းမိူင်းၼႂ်းပိုၼ်ႉတီႈ ၼိမၼ်တၼဢဝ် သင်ၶၸဝ်ႈ လၢႆလၢႆဝတ်ႉသေ (ၺၢပ်ႈၵမ်ႉၽဝႃႇ) မႃးႁဵတ်းၵၢၼ်တၢင်းလီ တီႈဢၼ်ၶဝ်ၸဝ်ႈ ၸူမ်ၼမ်ႉ သေ လႆႈလူႉသဵင်ႈ သုတ်းမုၼ်ၵႂႃႇၼၼ်ႉ ဝႃႈၼႆ။


ႁိမ်းႁွမ်းတီႈဢၼ် ၸဝ်ႈသၢင်ႇ ၸဝ်ႈၸၢင်း 3 တူၼ် ၸူမ်ၼမ်ႉတၢႆၼႆႉ ပဵၼ်ပွတ်းတွၼ်ႈ ၼမ်ႉလင်း တင်း ၼမ်ႉလွင်းၶွႆၵၼ် တီႈဢၼ်တင်းၼမ်ႁူႉဝႃႈ ၵူတ်ႉတွင်းလေႃး ၼမ်ႉႁူးလိူတ်ႇ (ၼမ်ႉဢုၼ်ႇ) - ၸိူဝ်းၼႆႉ ၵူၼ်းၼႂ်းပိုၼ်ႉတီႈ ယုမ်ႇယမ်ဝႃႈ ၸဝ်ႈပႂ်ႉၼမ်ႉပႂ်ႉတီႈ ႁၢႆႉ(ၽီႁၢႆႉ) ၊ ၵူၼ်းၵႂႃႇပွႆႇပႃ၊ ႁႃပႃ လမ်ၼမ်ႉ ၸိူဝ်းၼႆႉ ၵေႃႈ ၵႆႉၵႆႉတၢႆ - ဝႃႈၼႆ။