လိၵ်ႈႁူမ်ႈမၢႆၵိုတ်းတိုၵ်းတူဝ်ႈမိူင်း (NCA) ဢၼ်ဝႃႈၼၼ်ႉ တႃႇႁႂ်ႈၸုမ်းယိပ်းၵွင်ႈၵၢင်ႇၸၢဝ်းၶိူဝ်းတင်းလၢႆ မႃးလူင်းလၢႆးမိုဝ်း၊ တၵ်းလႆႈမီးလွင်ႈႁပ်ႉႁွင်းၼႅၼ်ႈၼႃၵွၼ်ႇ- ၽူႈၼမ်းၼႂ်း 2 ပႃႇတီႇႁူဝ်သိူဝ် ၸၢႆးၵျေႃႇၺုၼ်ႉ လၢတ်ႈ။

ဝၼ်းတီႈ 22-24/02/2017 ၼႆႉ ၸုမ်းယိပ်းၵွင်ႈၵၢင်ႇၸၢဝ်းၶိူဝ်းလုၵ်ႉၽိုၼ်ႉ ၸိူဝ်းဢၼ်ပႆႇလူင်းလၢႆးမိုဝ်း ၵၢၼ်ၵိုတ်းယိုဝ်းတူဝ်ႈမိူင်း (NCA) တီႈဢေႇသုတ်း 10 ၸုမ်းပၢႆ၊ ႁူပ်ႉဢုပ်ႇဢူဝ်းၵၼ်တီႈပၢင်သၢင်း ၼႃႈလိၼ်ၽွင်းငမ်းတူဝ်ၵဝ်ႇဝႃႉသေ ဢုပ်ႇဢူဝ်းၵၼ်ပႃးလွင်ႈ NCA ၊ ဢုပ်ႇဢူဝ်းပႃးလွင်ႈတႃႇတေၶဝ်ႈႁူမ်ႈ ပၢင်ၵုမ်လူင်ႁူဝ်ပၢၵ်ႇပီ 21 ၵမ်းထူၼ်ႈ 2 ။ ဢိင်ၼိူဝ်တိုဝ်ႉတၢင်းၼႆႉသေ ၽူႈၼမ်းၼႂ်း 2 ငဝ်ႈငုၼ်း တီႇမူဝ်ႇၶရေႇၸီႇၸိူဝ်ႉၶိူဝ်းတႆး ႁိုဝ် ပႃႇတီႇႁူဝ်သိူဝ် (SNLD) ၸၢႆးၵျေႃႇၺုၼ်ႉ ဢၼ်ပဵၼ်ပႃးၸုမ်းၽူႈၼမ်းၼႂ်း ၵေႃပွင်ပဵၼ်ပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် လၢတ်ႈ။


မၼ်းၸၢႆးလၢတ်ႈဝႃႈ- "ၸၢဝ်းၶိူဝ်းၸိူဝ်းဢမ်ႇၸႂ်ႈမၢၼ်ႈသေ ယိပ်းၵွင်ႈၵၢင်ႇလုၵ်ႉၽိုၼ်ႉတင်းလၢႆၼႆႉ ၶဝ်လႆႈၺႃးၸၢၵ်ႇမႃး 60 ပီပၢႆယဝ်ႉ၊ ၵွပ်ႈၼၼ် မၼ်းမီးလွင်ႈထၢင်ႇထိူမ်ငမ်းငဝ်းၼိူဝ်ၵၼ်မႃးတႃႇသေႇ၊ ၵွပ်ႈၼၼ် ပေႃးၶဝ်တေလူင်းလၢႆးမိုဝ်း တၵ်းလႆႈမီးလွင်ႈႁပ်ႉႁွင်း"- ဝႃႈၼႆ။


"တႃႇတေမႃးလူင်းလၢႆးမိုဝ်း NCA လႆႈၼၼ်ႉ သွင်ၾၢႆႇတေလႆႈမီးလွင်ႈဢုပ်ႇၵုမ်ၵၼ် သွင်ၾၢႆႇယုမ်ႇယမ်ၼိူဝ်ၵၼ်။ မိူၼ်ၼင်ႇၾၢႆႇ UNFC တၢင်ႇလၢတ်ႈမႃးၼႆၵေႃႈ ၶေႃႈၸိူဝ်းၼႆႉႁပ်ႉလႆႈ၊ ၶေႃႈၸိူဝ်းၼႆႉႁပ်ႉလႆႈမွၵ်ႈ 50% ၊ ၶေႃႈၸိူဝ်းၼႆႉဢမ်ႇႁပ်ႉလႆႈၸိူဝ်းၼႆႉ မိူၼ်ၼင်ႇၾၢႆႇလူင်ပွင်ၸိုင်ႈၼႆၵေႃႈ တေလႆႈလၢတ်ႈတႅၵ်ႇတႅၵ်ႇလႅင်းလႅင်း၊ ပေႃးလၢတ်ႈၸိူင်ႉၼႆၵွၼ်ႇ သွင်ၾၢႆႇၼႆႉတေယုမ်ႇယမ်ၵၼ်မႃးသေ တေၵႂႃႇလႆႈတၢင်းၼႃႈ"- ၸၢႆးၵျေႃႇၺုၼ်ႉ သိုပ်ႇလၢတ်ႈ။


ၵေႃႉပဵၼ်ႁူဝ်ပဝ်ႈပႃႇတီႇၸိူဝ်ႉၸၢတ်ႈမွၼ်း ၼၢႆႇငူၺ်ႇတဵင်း ၵေႃႈလၢတ်ႈဝႃႈ- ပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် ၵမ်းထူၼ်ႈ 2 ၼႆႉ ၶႂ်ႈႁႂ်ႈပႃႇတီႇၵၢၼ်မိူင်း ၸုမ်းယိပ်းၵွင်ႈၵၢင်ႇ လႆႈၶဝ်ႈပႃးၵူႈမူႇၵူႈၸုမ်း၊ လွင်ႈၼႆႉၶႂ်ႈႁႂ်ႈၽူႈမီး ပုၼ်ႈၽွၼ်းၶဝ် ၶတ်းသၢင်ႈႁၢင်ႈပွင်ပၼ်။ ၼင်ႇႁိုဝ်ပေႃးတေလႆႈၶေႃႈတႅပ်းတတ်းသေဢၼ်ဢၼ်ၵေႃႈ ၶႂ်ႈႁႂ်ႈၶတ်းသၢင်ႈၶိုင်ပွင်ပၼ်။ ၾၢႆႇၼိုင်ႈၵေႃႈ ၵေႃႇသၢင်ႈလွင်ႈငမ်းယဵၼ်ယူႇ၊ ၾၢႆႇၼိုင်ႈၵေႃႈ သမ်ႉပိုတ်ႇၼႃႈသိုၵ်း ႁဵတ်းပၢင်တိုၵ်းတေႃးၵၼ်ယူႇၸိူဝ်းၼႆႉ မၼ်းမီးလွင်ႈထၢင်ႇထိူမ်ငမ်းငဝ်းၼိူဝ်ၵၼ်၊ မိူၼ်ၸိူင်ႉၼင်ႇၵေႃႉပဵၼ် ၽူႈၵွၼ်းသိုၵ်းသုင်သုတ်း မိၼ်းဢွင်ႇလၢႆႇၵေႃႈ လီလႆႈပိုၼ်ၽၢဝ်ႇၵိုတ်းၵၢၼ်တိုၵ်းတေႃး၊ ပေႃးဝႃႈၾၢႆႇလူင်ပွင်ၸိုင်ႈပိုၼ်ၽၢဝ်ႇၵိုတ်းၼႆၵေႃႈ မၼ်းတႅတ်ႈတေႃးယဝ်ႉ၊ ၾၢႆႇၸၢဝ်းၶိူဝ်းၵေႃႈ တေၵိုတ်းတိုၵ်းၵႂႃႇၵူၺ်း- ဝႃႈၼႆ။


ၵေႃႉပဵၼ်ၽူႈၼမ်းၼႂ်းပႃႇတီႇၽလူင်ႇသဝေႃး ၻီႊမူဝ်ႊၶရႅတ်ႊတိၵ်ႊ (PSDP) သေႃးၵျီႇလိၼ်း ၵေႃႈလၢတ်ႈဝႃႈ- ပေႃးႁဝ်းၶႃႈလဵပ်ႈႁဵၼ်းတူၺ်းတႄႉ တႃႇတေၵိုတ်းသိုၵ်းၾၢႆႇလဵဝ်ၼၼ်ႉ မၼ်းဢမ်ႇပဵၼ်လႆႈ၊ ၵႃႈလႆႈဢုပ်ႇၵၼ် တင်းၵိုတ်းတင်းဢုပ်ႇ ႁၼ်ထိုင်ၸိူင်ႉၼႆ။ ပိူင်လူင်မၼ်းတႄႉ ထုၵ်ႇလီလႆႈႁူပ်ႉထူပ်းဢုပ်ႇဢူဝ်းၵၼ်ၼၼ်ႉယဝ်ႉ၊ ပေႃးဝႃႈႁူပ်ႉထူပ်းဢုပ်ႇဢူဝ်းၵၼ်ၵွၼ်ႇ ၸင်ႇတေၵႄႈလိတ်ႈလႆႈပၼ်ႁႃ ဢၼ်ပဵၼ်ယူႇၸိူဝ်းၼၼ်ႉ- ဝႃႈၼႆ။


ၸွမ်းၼင်ႇၼႂ်းၶေႃႈလႆႈၸႂ် NCA မီးဝႆႉၼၼ်ႉ ပေႃးဝႃႈလူင်းလၢႆးမိုဝ်းလိၵ်ႈၵိၼ်ၵႅၼ်ႇ NCA ယဝ်ႉ ၼႂ်းၶၢဝ်းတၢင်း 60 ဝၼ်း တၵ်းတေလႆႈၶဵၼ်ႇတႅမ်ႈယူင်ႉၶၢပ်ႈၵၢၼ်မိူင်း။ ၼႂ်းၶၢဝ်းတၢင်း 90 ဝၼ်း တေလႆႈတႄႇဢုပ်ႇဢူဝ်းၵၢၼ်မိူင်း ႁိုဝ် ၸတ်းႁဵတ်းပၢင်ၵုမ်လူင်ၸၼ်ႉမိူင်းႁူမ်ႈတုမ်။ ၵူၺ်းၵႃႈမိူဝ်လဵဝ် ၸုမ်းယိပ်းၵွင်ႈၵၢင်ႇၸၢဝ်းၶိူဝ်း 21 ၸုမ်းၼႆႉ ဢၼ်လူင်းလၢႆးမိုဝ်း NCA တိုၵ်ႉမီး 8 ၸုမ်းၵူၺ်း၊ ဢၼ်ပႆႇလူင်းလၢႆးမိုဝ်းတိုၵ်ႉၵိုတ်းယူႇ 13 ၸုမ်း။