ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ၸတ်းပၢင်ႁၢင်ႈႁႅၼ်း တႃႇဢုပ်ႇၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈတႆး တီႈမိူင်းၵွၵ်ႇတင်းရယွင်း၊ ႁူပ်ႉထူပ်းသပ်းလႅင်း တွင်ႈထၢမ်ၵၢင်ၸႂ်ပီႈၼွင်ႉတႆး ၸိူဝ်းလုၵ်ႉမိူင်းတႆး ၶဝ်ႈႁဵတ်းၵၢၼ်မိူင်းထႆး၊ ယိူင်းဢၢၼ်းပိူဝ်ႈတႃႇ ဢဝ်ၵႂႃႇတၢင်ႇလၢတ်ႈတီႈပၢင်ၵုမ်လူင် ႁူဝ်ပၢၵ်ႇပီ 21 ပၢင်လူင်၊ မီးပီႈၼွင်ႉၵူၼ်းမိူင်းတႆး ၶဝ်ႈႁူမ်ႈၼပ်ႉႁူဝ်ပၢၵ်ႇ။


မိူဝ်ႈဝၼ်းတီႈ 18/02/2017 တင်ႈတႄႇၶၢဝ်းယၢမ်း 9 မူင်းပွတ်းၼႂ်တေႃႇထိုင် 5 မူင်းႁူဝ်ၶမ်ႈ၊ ယူႇတီႈၵေႃပွင်ၵၢၼ် ၽွမ်ႉႁူမ်ႈၸိုင်ႈတႆး (CSSU) ဢွၼ်ႁူဝ်ၼမ်းၼႃႈသေ ၸတ်းပၢင်ႁၢင်ႈႁႅၼ်းတႃႇဢုပ်ႇၵုမ်ၵၢၼ်မိူင်း ၸၼ်ႉၸိူဝ်ႉၸၢတ်ႈ (ၸၢဝ်းၶိူဝ်းတႆး) တီႈၼႂ်းဝဵင်းလူင်မိူင်းၵွၵ်ႇ (ၵုင်းထဵပ်ႈ) ၸိုင်ႈထႆး။ တီႈမိူင်းၵွၵ်ႇၼႆႉ မီးပီႈၼွင်ႉတႆး ႁႅင်းၵၢၼ်ယၢၼ်မိူင်း ၶဝ်ႈႁူမ်ႈမွၵ်ႈႁိမ်းပၢၵ်ႇၵေႃႉ။ ထိုင်မႃးဝၼ်းတီႈ 19/02/2017 ၶၢဝ်းယၢမ်းလဵဝ်ၵၼ်ၼင်ႇၵဝ်ႇ ႁူပ်ႉထူပ်းပီႈၼွင်ႉတႆးတီႈရယွင်း၊ မီးပီႈၼွင်ႉၵူၼ်းမိူင်းတႆး မႃးၶဝ်ႈႁူမ်ႈမွၵ်ႈ 130 ၵေႃႉ-ၼႆယဝ်ႉ။


ၸဝ်ႈႁၢၼ်သိူဝ် မွၵ်ႇလၢတ်ႈၶေႃႈၵႂၢမ်းမိူဝ်ႈပိုတ်ႇပၢင် ႁူပ်ႉထူပ်းၵူၼ်းမိူင်း တီႈဝဵင်းရယွင်းဝႃႈ- ၵဵဝ်ႇလူၺ်ႈလွင်ႈ ပၢင်ႁူပ်ႉထူပ်းၼႂ်းဝၼ်းမိူဝ်ႈၼႆႉ မၼ်းပဵၼ်ၶၵ်ႉတွၼ်ႈ ဢၼ်လူင်းလၢႆးမိုဝ်းတူဝ်ႈမိူင်း NCA ၊ ႁဝ်းၶႃႈပီႈၼွင်ႉလႆႈမႃး ႁူပ်ႉထူပ်းၵၼ် ပိူဝ်ႈတႃႇတေမႃးႁူမ်ႈၵၼ်ဝူၼ်ႉ ႁူမ်ႈၵၼ်ႁဵတ်းပိူဝ်ႈတႃႇၸိူဝ်ႉၸၢတ်ႈၸိူဝ်ႉၶိူဝ်းႁဝ်း။ ၶေႃႈယိူင်းဢၢၼ်း ဢၼ်ႁဝ်းၶႃႈမႃးႁူပ်ႉထူပ်းပေႃႈမႄႈပီႈၼွင်ႉ တီႈရယွင်းၼႆႉ ပိူင်လူင်မၼ်းမီး 4 ၶေႃႈ- 1.ပိူဝ်ႈတႃႇပီႈၼွင်ႉႁဝ်းၶႃႈ ပေႃးလႆႈႁူႉထိုင်လွင်ႈၶၵ်ႉၵၢၼ်ငမ်းယဵၼ် လႄႈႁႂ်ႈပေႃးၸၢင်ႈၶဝ်ႈႁူမ်ႈပၼ်ႁႅင်း ႁဵတ်းသၢင်ႈၸွမ်း။ 2.ႁႂ်ႈပေႃးႁူႉၸွမ်း လွင်ႈၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး CSSU ပဵၼ်မႃးၸိူင်ႉႁိုဝ်လႄႈ ႁႂ်ႈပေႃးၸၢင်ႈပဵၼ်ႁႅင်း တႃႇတေၵေႃႇသၢင်ႈ လွင်ႈၽွမ်ႉႁူမ်ႈတႆးႁဝ်း ႁႂ်ႈပေႃးပဵၼ်သဵင်လဵဝ်ၵၼ်။ 3.ႁႂ်ႈပေႃႈမႄႈၵူၼ်းမိူင်းႁဝ်းၶႃႈ ပေႃးလႆႈႁူႉပွင်ႇလွင်ႈ ပၢင်ဢုပ်ႇဢူဝ်း ၸၼ်ႉၸိူဝ်ႉၸၢတ်ႈ၊ တႃႇတေမီးတွၼ်ႈၸၢဝ်းၶိူဝ်း တွၼ်ႈပိုၼ်ႉတီႈ တွၼ်ႈလွင်ႈတၢင်း။ လိူဝ်သေၼၼ်ႉ 4.ၸွမ်းၼင်ႇ 5 ႁူဝ်ၶေႃႈ မိူၼ်ၼင်ႇၵၢၼ်မိူင်း၊ ၵၢၼ်ႁူမ်ႇလူမ်ႈ၊ ၵၢၼ်ပၢႆးမၢၵ်ႈမီး၊ ၵၢၼ်တူင်ႇဝူင်းၵူၼ်း၊ ပိူင်ၵၢၼ်တီႈလိၼ်ၽုၵ်ႇသွမ်ႈလႄႈ သၽႃႇဝၾိင်ႈတိုၼ်းပဵၼ်ၸိူဝ်းၼႆႉ ႁႂ်ႈႁဝ်းၶႃႈပေႃးၸၢင်ႈ ၵဵပ်းႁွမ်တွမ်တုမ်ၶေႃႈၵၢင်ၸႂ် တၢင်းႁၼ်ထိုင် ပၢႆးဝူၼ်ႉပေႃႈမႄႈပီႈၼွင်ႉႁဝ်းၶႃႈသေ ပိူဝ်ႈတႃႇဢဝ်မိူဝ်းတၢင်ႇလၢတ်ႈ ၼႂ်းပၢင်ၵုမ်လူင် လွင်ႈငမ်းယဵၼ်မိူင်းႁူမ်ႈတုမ် ဢၼ်တေၸတ်းႁဵတ်းၵႂႃႇၶၢဝ်းၼႃႈ- ဝႃႈၼႆ။


ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ၼႆႉ ပေႃးထိုင်မႃးဝၼ်းတီႈ 25/02/2017 ၼႆႉ တေႁူပ်ႉထူပ်းၵူၼ်းမိူင်းတႆး ၸိူဝ်းၶဝ်ႈႁဵတ်းၵၢၼ်ၼႂ်းမိူင်းထႆးထႅင်ႈ တီႈဝတ်ႉၻွၼ်းၵျၼ်ႇ (တွၼ်းၸၼ်ႇ) ဢိူင်ႇတႃႈသႃလႃး မိူင်းၵဵင်းမႆႇထႅင်ႈ။ ၵဵဝ်ႇၵပ်းလွင်ႈၼႆႉ တေမီးၵၢၼ်ႁူပ်ႉထူပ်းဢုပ်ႇဢူဝ်းၵၼ် ႁၢင်ႈႁႅၼ်းၵၢၼ်ထႅင်ႈ လႆႈႁူႉၼင်ႇၼႆ။


ဢွၼ်ၼႃႈၼႆႉ ဢၼ်ႁူပ်ႉထူပ်းၵၼ်ၼႂ်းၵဵင်းမႆႇ မိူဝ်ႈဝၼ်းတီႈ 15-16/02/2017 ၶၢဝ်းတၢင်းသွင်ဝၼ်းၼၼ်ႉ ယူႇတီႈၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU) ဢွၼ်ႁူဝ်ၼမ်းၼႃႈသေ ၵမ်ႈၼမ်ပဵၼ်တူဝ်တႅၼ်း CSSU ၼႂ်းၵဵင်းမႆႇ၊ မႄႈႁွင်ႈသွၼ်၊ မိူင်းပၢႆး၊ ၵဵင်းႁၢႆး၊ မႄႈသၢႆ၊ ၶျႆးပရႃႇၵၢၼ်း၊ မိူင်းၾၢင်၊ မႄႈဢၢႆး၊ ဝဵင်းႁႅင်၊ ၵဵင်းလၢဝ်၊ ဢိၵ်ႇပီႈၼွင်ႉႁႅင်းၵၢၼ်ယၢၼ်မိူင်းၼႂ်းၵဵင်းမႆႇ ၸိူဝ်းၼႆႉၵမ်ႈၽွင်ႈမႃးၶဝ်ႈႁူမ်ႈ ဝၼ်းလႂ်မွၵ်ႈ 60- 70 ၵေႃႉၵူၺ်း-ၼႆယဝ်ႉ။


"တီႈၼႂ်းၵဵင်းမႆႇၼႆႉ ပီႈၼွင်ႉႁႅင်းၵၢၼ်ယၢၼ်မိူင်း ဢၼ်လုၵ်ႉမိူင်းတႆးႁဝ်းမႃးယူႇသဝ်းႁဵတ်းၵၢၼ်ၵေႃႈၼမ်၊ ၶဝ်ယူႇသဝ်းၵိၼ်သၢင်ႈဝႆႉယူႇၸိူင်ႉႁိုဝ်၊ ၶဝ်ၶႂ်ႈလႆႈၶႂ်ႈပဵၼ်ၸိူင်ႉႁိုဝ်ၸိူဝ်းၼႆႉ လူင်းႁူပ်ႉထူပ်းသေ ဢုပ်ႇဢူဝ်း တွင်ႈထၢမ်ၵၢင်ၸႂ်ၶဝ်ၵႂႃႇ။ မိူဝ်ႈလဵဝ်ၼႆႉ တိုၵ်ႉမီးၶၢဝ်းတၢင်းၵႂႃႇလူင်းပိုၼ်ႉတီႈ တီႈၼႂ်းၵုင်းထဵပ်ႈ (မိူင်းၵွၵ်ႇ) လႄႈတီႈရၼွင်းထႅင်ႈယူႇ။ ပဵၵ်ႉသမ်ႉၶဝ်ပဵၼ်ႁႅင်းၵၢၼ်ယၢၼ်မိူင်းဝႆႉၵေႃႈ မိူင်းတီႈၵိူတ်ႇၶဝ်ၼၼ်ႉ ၶဝ်ၶႂ်ႈႁႂ်ႈမၼ်း ပဵၼ်ၸိူင်ႉႁိုဝ်ၸိူဝ်းၼႆႉ ပေႃးဝႃႈပွၵ်ႈမႃးယဝ်ႉ ၸင်ႇမႃးႁူပ်ႉထူပ်းသပ်းလႅင်း တွင်ႈထၢမ်ၵၢင်ၸႂ်ၶဝ်ထႅင်ႈၵမ်းၼိုင်ႈ"- ၸဝ်ႈႁၢၼ်သိူဝ် CSSU ၵေႃႉဢွၼ်ႁူဝ်ၼမ်းၼႃႈ ၶၢဝ်းတၢင်းၼႂ်းမိူင်းထႆး လၢတ်ႈ။


ပၢင်ဢုပ်ႇဢူဝ်းၶၢဝ်း 2 ဝၼ်းၼႆႉ ဢုပ်ႇၵုမ်သပ်းလႅင်းၵႂႃႇ လွင်ႈတီႈလိၼ်၊ ပၢႆးမၢၵ်ႈမီး၊ ပၢႆးပၺ်ၺႃ၊ လွင်ႈၵၢၼ်မိူင်း၊ လွင်ႈၶူဝ်းႁႄႈၶူဝ်းတိုၼ်း သၽႃႇဝလႄႈၵၢၼ်ၽုၵ်ႇသွမ်ႈ၊ လွင်ႈၵၢၼ်တူင်ႇဝူင်းၵူၼ်း၊ ငဝ်းလၢႆးလွင်ႈငမ်းယဵၼ်၊ ငဝ်းလၢႆးလွင်ႈ CSSU လႆႈမႃးထူပ်းပီႈၼွင်ႉတႆး တၢင်းၵဵင်းမႆႇ၊ လွင်ႈတေသိုပ်ႇၵႂႃႇၵုင်းထဵပ်ႈ လႄႈရယွင်းၸိူဝ်းၼႆႉ။


ၵေႃပွင်ၵၢၼ်ၽွမ်ႉႁူမ်ႈၸိုင်ႈတႆး (CSSU)ၼႆႉ ပူၼ်ႉမႃးမိူဝ်ႈဝၼ်းတီႈ 23-27/01/2017 ၶၢဝ်းတၢင်း 5 ဝၼ်းၼၼ်ႉ လႆႈၸတ်းႁဵတ်းပၢင်ၵုမ်ႁၢင်ႈႁႅၼ်း တႃႇပၢင်ၵုမ်လူင်ၵၢၼ်မိူင်း ၸၼ်ႉၸိူဝ်ႉၸၢတ်ႈတႆး ယဝ်ႉတူဝ်ႈၵႂႃႇယဝ်ႉပွၵ်ႈၼိုင်ႈ။ မိူဝ်ႈၼၼ်ႉ ၸတ်းႁဵတ်းလၢႆႁူဝ်ၶေႃႈသေ ၸႅၵ်ႇႁဵတ်းဝႆႉလၢႆတီႈသေ ဢုပ်ႇၵုမ်ၵၼ်၊ မိူၼ်ၼင်ႇႁူဝ်ၶေႃႈၾၢႆႇၵၢၼ်မိူင်း၊ ၾၢႆႇပၢႆးမၢၵ်ႈမီး၊ ၾၢႆႇပၢႆးပိူင်ၵူၼ်း၊ ၾၢႆႇႁူမ်ႇလူမ်ႈဝၢၼ်ႈမိူင်း၊ ၾၢႆႇတီႈလိၼ်လႄႈ ၶူဝ်းႁႄႈၶူဝ်းတိုၼ်း ၸဵမ်ၸိူဝ်းၼႆႉတင်းမူတ်းမီး 6 ႁူဝ်ၶေႃႈ။


ပၢင်ဢုပ်ႇၵုမ်ပွၵ်ႈၼႆႉ ၸႅၵ်ႇပဵၼ် 15 ၸုမ်းသေ လူင်းပိုၼ်ႉတီႈႁူပ်ႉထူပ်းပေႃႈမႄႈၵူၼ်းမိူင်း ၼႂ်းမိူင်းတႆး ၵူၺ်းဢမ်ႇၵႃး ၼွၵ်ႈမိူင်းတႆး မိူၼ်ၼင်ႇၼႂ်းမိူင်းၶၢင်၊ မိူင်းမၢၼ်ႈ၊ မိူင်းယၢင်း ၼႂ်းပိုၼ်ႉတီႈတွၼ်ႈလိၼ် ဢၼ်မီးပီႈၼွင်ႉတႆးယူႇသဝ်းၼမ် လၢႆလၢႆတီႈၼၼ်ႉၵေႃႈ တေလူင်းႁူပ်ႉထူပ်းတွင်ႈထၢမ်ၵၢင်ၸႂ်။ ၶေႃႈလႆႈၸႂ် ဢၼ်လႆႈမႃးတီႈၵူၼ်းမိူင်းၼၼ်ႉ တေတႅမ်ႈမၢႆမႃးသေ တေဢဝ်ၶဝ်ႈဢုပ်ႇဢူဝ်း ၼႂ်းပၢင်ၵုမ်ၵၢၼ်မိူင်း ၸိူဝ်ႉၸၢတ်ႈတႆး၊ ဢၼ်လႆႈမႃးၽွၼ်းပၢင်ႈ ၶေႃႈလႆႈၸႂ်ၵဵဝ်ႇၵပ်းၵၢၼ်မိူင်းၼၼ်ႉ တေၼမ်းဢဝ်ၵႂႃႇဢုပ်ႇဢူဝ်း ၼႂ်းပၢင်ၵုမ်လူင်ၵၢၼ်မိူင်း ဢမ်ႇၼၼ် ပၢင်ၵုမ်လူင်ႁူဝ်ပၢၵ်ႇပီ 21 ပၢင်လူင် ၵမ်းထူၼ်ႈ 2 ဢၼ်ၼၢင်းဢွင်ႇသၢၼ်းၸုၵျီႇ တေဢွၼ်ႁူဝ်ၸတ်းႁဵတ်း တၢင်းၼႃႈ။