ၵူၼ်းၼုမ်ႇၸၢႆးတႆး ယူႇဝဵင်းလၢႆးၶႃႈ ၶီႇလူတ်ႉၶိူင်ႈဝႆးၽွင်းၵၢင်ၶမ်ႈၶိုၼ်း ၼႂ်းၵဵင်းမႆႇ၊ လူတ်ႉၶိူင်ႈပိၼ်ႈလူမ်ႉ တီႈတၢင်းၵူတ်ႉ လူႉတၢႆထင်တီႈ ၼႂ်းဢိူင်ႇမႄႈႁႄႉ မိူင်းၵဵင်းမႆႇ။

မိူဝ်ႈၶမ်ႈၶိုၼ်းဝၼ်းတီႈ 17/02/2017 ယၢမ်း 22:40 မူင်း၊ ၵူၼ်းဝၢၼ်ႈၽူၺ်းႁႆး ၸႄႈဝဵင်းလၢႆးၶႃႈ ၸိုင်ႈတႆးပွတ်းၸၢၼ်း၊ ၸိုဝ်ႈၸၢႆးထုၼ်း ဢႃယု 28 ပီ၊ ၶီႇလူတ်ႉၶိူင်ႈၵေႃႉလဵဝ်ၵႂႃႇသိုဝ်ႉၽၵ်းပွၵ်ႈမႃး ၶိုၼ်းတီႈႁွင်ႈၶၢတ်ႈ၊ ဢဝ်လူတ်ႉမႃးပိၼ်ႈလူမ်ႉတီႈတၢင်းၵူတ်ႉဢၼ်တေပွင်ႇသဵၼ်ႈတၢင်းလူင် တီႈဝၢၼ်ႈပႃႇၸီႉ ဢိူင်ႇမႄႈႁႄႉ ၸႄႈဝဵင်းမိူင်းၵဵင်းမႆႇ။ မၼ်းၸၢႆးလူႉတၢႆထင်တီႈၵႂႃႇ-ၼႆယဝ်ႉ။


ၵဵဝ်ႇၵပ်းလွင်ႈၼႆႉ ပီႈၼၢင်းၸၢႆးထုၼ်းၵေႃႉလူႉတၢႆ ၸိုဝ်ႈၼၢင်းယူင်ႇ ၵေႃႉႁဵတ်းၵၢၼ်သူၼ်မွၵ်ႇ တၢင်းမႄႈဝၢင်း လၢတ်ႈၼႄတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ- ၸၢႆးထုၼ်းၼႆႉ လူတ်ႉၶိူင်ႈပိၼ်ႈလူမ်ႉတၢႆထင်တီႈ။ လႆႈငိၼ်းဝႃႈ ၸဝ်ႈၼႃႈတီႈပလိၵ်ႈၵွင်မိူင်းၶဝ် တိတ်းတေႃႇထိုင်ၸဝ်ႈၼႃႈတီႈႁူင်းယႃသူၼ်ၻွၵ်ႇ၊ တူဝ်တၢႆမၼ်းၸၢႆးတႄႉ ၵႂႃႇဢဝ်ဢွၵ်ႇမႃးတီးႁူင်းယႃသူၼ်ၻွၵ်ႇ မိူဝ်ႈဝၼ်းတီႈ 18 ၊ ဢဝ်မႃးဝႆႉတီႈဝတ်ႉဢူႇၿူဝ်းသူတ်ႇၼႆႉသေ ႁႅၼ်းပၢင်ၸႃပၼပၼ်၊ တေပူၼ်ႉၶၢပ်ႈတူဝ်ဝၼ်းတီႈ 21/02/2017 ၼႆႉ-ဝႃႈၼႆ။


ပီႈၼၢင်းမၼ်းယင်းလၢတ်ႈၼႄပႃးဝႃႈ- လူတ်ႉၶိူင်ႈၵေႃႈဢမ်ႇၸႂ်ႈလူတ်ႉၶိူင်ႈမၼ်း၊ မၼ်းယိုမ်လူတ်ႉၶိူင်ႈတႆးၵေႃႉ မၼ်းၵႂႃႇ၊ လွင်ႈလူႉၵွႆၼၼ်ႉ ပေႃးမႄးၶိုၼ်းတေသဵင်ႈမွၵ်ႈ 3,000 ဝၢတ်ႇ။ ၸၢႆးထုၼ်းၼႆႉ ဢွၼ်ၼႃႈၼႆႉ ၼႃႈႁိူၼ်းမၼ်းလူႉၵႂႃႇလႆႈမွၵ်ႈ 2-3 လိူၼ်၊ မေးၼၢင်းမၼ်းဢဝ်လုၵ်ႈလၢင်းမၼ်းသေပၢႆႈပႅတ်ႈ ၽွင်းမၼ်းတိုၵ်ႉၵႂႃႇ ႁဵတ်းၵၢၼ်၊ မၼ်းဢမ်ႇတၼ်းႁၼ်မိူဝ်ႈမေးမၼ်းပၢႆႈပႅတ်ႈ၊ ပၢႆးၵႂႃႇယူႇတီႈလႂ်ၵေႃႈဢမ်ႇလႆႈႁူႉၸွမ်း၊ ၸိုဝ်ႈမေးမၼ်း ႁွင်ႉဝႃႈၼၢင်းၶိၼ်ႇ ၵူၼ်းဝၢၼ်ႈမွၼ်းလၢႆးၶႃႈ၊ ၶဝ်မီးလုၵ်ႈယိင်းႁူမ်ႈၵၼ်ၼိုင်ႈၵေႃႉ ဢႃယုတိုၵ်ႉလႆႈ 6 ၶူပ်ႇ ၸိုဝ်ႈၼွင်ႉမူၺ်။ ဝၢႆးမေးမၼ်းပၢႆႈပႅတ်ႈယဝ်ႉၵေႃႈ ဢဝ်ၸႂ်မၼ်းဢမ်ႇလီ၊ ၵႆႉၵႂႃႇၸွမ်းဢူၺ်းၵေႃႉဢႅဝ်ႇ ၵၢင်ၶမ်ႈၵၢင်ၶိုၼ်းမႃး- ဝႃႈၼႆ။


ၸၢႆးထုၼ်းၼႆႉ ၸိုဝ်ႈပေႃႈႁွင်ႉဝႃႈလုင်းပၢၼ်းဢွင်ႇ၊ ၸိုဝ်ႈမႄႈႁွင်ႉဝႃႈပႃႈသႅင်လူႇ၊ ပေႃႈမႄႈသွင်ထဝ်ႈမၼ်းၸၢႆးၼႆႉ တိုၵ်ႉမီးယူႇတီႈဝဵင်းလၢႆးၶႃႈ။ မီးပီႈၼွင်ႉႁူမ်ႈၵၼ် 5 ၵေႃႉ ၸၢႆးသၢမ်ယိင်းသွင်၊ ပဵၼ်ၵေႃႉထူၼ်ႈ 4 ။ ၼႂ်းပီႈၼွင်ႉ ႁႃႈၵေႃႉၼၼ်ႉ ပီႈဢၢႆႈလူင်ၸိုဝ်ႈၸၢႆးၸိၵ်းတ (ယူႇမိူင်းတႆး)၊ ၵေႃႉထူၼ်ႈသွင် ၸၢႆးမူၼ်း (မိူင်းတႆး)၊ ၼၢင်းယူင်ႇ၊ ၸၢႆးထုၼ်း၊ ၼၢင်းႁၢၼ်ႇ ၸိူဝ်းၼႆႉ။