ၵူၼ်းၼုမ်ႇဝဵင်းလႃႈသဵဝ်ႈ ႁူမ်ႈၵၼ်ၽုၵ်ႇတူၼ်ႈမႆႉ 455 တူၼ်ႈ ပွၵ်ႈၵမ်းႁႅၵ်ႈ



ၵူၼ်းၼုမ်ႇပွတ်းႁွင်ႇ ႁူမ်ႈၵၼ်ၽုၵ်ႇတူၼ်ႈမွၵ်ႇၵွၼ်တႃႇ 455တူၼ်ႈ ၼႂ်းဝၢင်းဝတ်ႉလၢႆတီႈ ပိူဝ်ႈ ႁႂ်ႈဝၢၼ်ႈမိူင်းယူႇမူၼ်ႈ ၵတ်းယဵၼ် လိၼ်ၸမ်ႉၼမ်ႉလိူင်ႇ ။

Photo Sai Hseng Soum & Sai Like
ဝၼ်းတီႈ 11-19/02/2017  ၸၢႆးဢၢႆႈသိူဝ်၊ ၸၢႆးလဵၵ်ႉ၊ ၼၢင်းပဝ်းသႅင်၊ ၼၢင်းၶမ်းၶွင်ႇ၊ ၼၢင်းမူဝ်ႁွမ် ဢွၼ်ႁူဝ်ၸုမ်းၵူၼ်းၼုမ်ႇ ၼႂ်းၸိုင်ႈတႆးပွတ်းႁွင်ႇ လၢႆၸုမ်းမိူၼ်ၼင်ႇ ၸုမ်းၸဵင်ၼုမ်ႇ (လႃႈသဵဝ်ႈ)၊ ၸုမ်းၵူၼ်းၼုမ်ႇသႅၼ်ဝီ၊ ၸုမ်းၶမ်းၵူႇ၊ ၸုမ်းၵူၼ်းၼုမ်ႇဝၼ်းတူၵ်းလွင်း ဢိၵ်ႇၵူၼ်းၼႂ်းပိုၼ်ႉတီႈ ႁူမ်ႈ100ပၢႆ ဢွၼ်ၵၼ်ၽုၵ်ႇတူၼ်ႈၵွၼ်တႃႇ 455တူၼ်ႈ တီႈၼႂ်းဝိႁၢရ်လၢႆတီႈ မိူၼ်ၼင်ႇ ဝိႁၢရ်တႃႈ ယၢဝ်၊ ဝိႁၢရ်ၵျွင်းမိူင်းတဵမ်၊ မူၺ်ႇတေႃႇမိူင်းတဵမ်၊ ဝိႁၢရ်ၵျွင်းတႃႈပုင်ႇ၊ ဝိႁၢရ်ၵျွင်းၵုင်းသႃႇ၊ ဝိႁၢရ်ၵျွင်း သီႇရိမင်ၵလႃႇဝၢၼ်ႈသူႈတႆး၊ ဝိႁၢရ်ၵျွင်းႁူဝ်ပိုၵ်ႉ၊ ဝိၺၢရ်ၵျွင်းၵုၼ်ၶမ်း ၸိူဝ်းၼႆႉ ။


ယိူင်းဢၢၼ်းဢၼ်လႆႈၽုၵ်ႇတူၼ်ႈၵွၼ်တႄႉ 1. တႃႇႁႂ်ႈပဵၼ်လွင်ႈၶုၵ်းထူပ်း ၶွပ်ႈထိုင်ၵုင်ႇမုၼ် ၶူးပူင် သွၼ်လူင် ပႃႈၼၢင်းလၢဝ်သႂ်ယိင်း ၵေႃႉသဵင်ႈၵမ်ၵႂႃႇၶွပ်ႈၶူပ်ႇ2ပီ။2 တႃႇႁႂ်ႈၵူၼ်းမိူင်းလႆႈႁူႉၸၵ်း ၸမ်ၸႂ်ၵၼ်လႄႈ ၸွႆႈထႅမ်ၵၼ်ၶိုင်သၢင်ႈႁၢင်ႈပွင် တႃႇႁႂ်ႈဝၢၼ်ႈမိူင်းၶိုၼ်ႈယႂ်ႇၵတ်းယဵၼ်၊ ပႃႇမႆႉထိူၼ်ႇ ၶိူဝ်းၶဵဝ်ၸမ်ႉၼမ်ႉလိူင်ႇ - ဝႃႈၼႆ ။


ၸၢႆးသႅင်သွမ်ႇ ၵေႃႉဢွၼ်ႁူဝ်ၽုၵ်ႇတူၼ်ႈၵွၼ်လၢတ်ႈဝႃႈ -“တူၼ်ႈမႆႉၼႆႉ ပဵၼ်ဢူၺ်းလီၵူၼ်းႁဝ်းၵေႃႈ ဝႃႈလႆႈ ပဵၼ်ၽူႈၵႅတ်ႇၵင်ႈပႂ်ႉပႃး ပၢႆးယူႇလီၵူၼ်းႁဝ်း၊ တူၼ်ႈမႆႉၼႆႉၸွႆႈႁႄႉၵင်ႈ ပၼ်တၢင်းမႆႈႁႅင်း၊ ၾူၼ်တူၵ်းႁႅင်း၊ မိူၼ်ၼင်ႇၵႂၢမ်းထုင်းႁဝ်းမီးဝႃႈ “မႆႉလီမီးၼိုင်ႈတူၼ်ႈ ၼူၵ်ႉမူၼ်ႈမိုၼ်ႇသႅၼ်တူဝ် ” ထႅင်ႈလွင်ႈၼိုင်ႈသမ်ႉ တူၼ်ႈၵွၼ်ၼႆႉပဵၼ်မွၵ်ႇတၢင်ၶိူဝ်းတႆးမိူင်းတႆး ၵူၺ်းၵႃႈမွၵ်ႇၵွၼ်ၼႂ်းမိူင်းတႆး သမ်ႉ ဢမ်ႇပေႃးၼမ်လႄႈ ၵူၼ်းမိူင်းတႆးၵူႈတီႈ ၵူၼ်းၼုမ်ႇတႆးၵူႈတၢင်း ႁႂ်ႈဢွၼ်ၵၼ်ႁူမ်ႈၵၼ်ၽုၵ်ႇ တူၼ်ႈၵွၼ် ၸွမ်းဝတ်ႉ၊ ၸွမ်းဢိူင်ႇ ၊ၸွမ်းဝဵင်းႁဝ်းၵူႈတီႈ ၸွႆႈႁၢင်ႈၶိူင်ႈပၼ် မိူင်းသၼ်လွႆၸိုင်ႈတႆး ႁဝ်း ႁႂ်ႈႁၢင်ႈလီၵတ်းယဵၼ်သေၵမ်း ”- ဝႃႈၼႆ ။


ပိူဝ်ႈတႃႇႁႂ်ႈပဵၼ် လွင်ႈမႅတ်ႇပႅင်းပႂ်ႉပႃး သိင်ႇဝႅတ်ႉလွမ်ႉ ၼမ်ႉလိၼ်ႁိၼ်ၽႃၼႆသေ ၵူၼ်းၼုမ်ႇလႄႈ ၵူၼ်းမိူင်းလၢႆဝဵင်း မိူၼ်ၼင်ႇ လၢႆးၶႃႈ၊ မိူင်းၼၢႆး၊ ၵဵင်းတွင်း၊ မိူင်းၵိုင်၊ သႅၼ်ဝီ ဢွၼ်ၵၼ်ၽုၵ်ႇတူၼ်ႈမႆႉ မိူၼ်ၼင်ႇ တူၼ်ႈၵွၼ်၊ မႆႉသၵ်း၊ မႆႉၶီႈလဵၵ်း(ၸီႇလီႇ)၊ မႆႉသၢမ်သႃ၊ မႆႉယူႇၵလိတ်ႉ ၊ မႆႉတိုင်း ၸိူဝ်းၼႆႉ။




 
© 2012 All Rights Reserved | Asean Celebrity | Fonts @ AtFonts | Free Templates