လုၵ်ႈႁဵၼ်းသင်ၶတႆး ၸၼ်ႉၸွမ်မိူင်းထႆး ၸတ်းပၢင်လိူၵ်ႈတင်ႈႁူဝ်ပဝ်ႈလႄႈ ၽူႈပွင်ၵၢၼ် ၵေႃလုၵ်ႈႁဵၼ်းသင်ၶ တႆး ၸၼ်ႉၸွမ်မိူင်းထႆး ပွၵ်ႈၵမ်း 13 မီးၽူႈၶဝ်ႈလိူၵ်ႈတင်ႈပဵၼ်ႁူဝ်ပဝ်ႈ 6 ၸဝ်ႈ ၊ ၽူႈပွင်ၵၢၼ် 27 ၸဝ်ႈ ။

Photo: Seng Sai

ဝၼ်းတီႈ 18/02/2017 လုၵ်ႈႁဵၼ်းသင်ၶတႆး ၸၼ်ႉၸွမ်မိူင်းထႆး Tai Sangha University Students Association ၸတ်းပၢင်လိူၵ်ႈတင်ႈ ႁူဝ်ပဝ်ႈလႄႈၽူႈပွင်ၵၢၼ်မႂ်ႇ ပွၵ်ႈၵမ်း13 ။ ၽူႈၶဝ်ႈ လိူၵ်ႈတင်ႈ တႃႇပဵၼ်ႁူဝ်ပဝ်ႈ မီး 6 ၸဝ်ႈ။  မိူၼ်ၼင်ႇ - 1.ၸဝ်ႈတႆးၼုမ်ႇ ပိၼ်ႇတေႃးလ ၵုၼ်ႁဵင် ပီ(3 ) (ပၢႆးပုတ်ႉ) 2.ၸဝ်ႈဝူင်းလိူၼ် ဝိလႃႇသ ထုင်ႉပူင်း ပီ (3 ) ပၢႆးၾိင်ႈၵူၼ်း၊ 3. ၸဝ်ႈဢုတ်ႉတရ ၶမ်း မိူင်းပွၼ် ပီ(3) ပၢႆးပုတ်ႉ၊ 4.ၸဝ်ႈမွၼ်းၶိူဝ်း ပၺ်ႇၺႃႇ ၼၼ်ႇတ မိူင်းၼွင် ပီ (2) ပၢႆးၾိင်ႈၵူၼ်း၊ 5.ၸဝ်ႈမႁႃလူႇ မိူင်းသၢတ်ႇ ၊6.ၸဝ်ႈလႅင်းႁိူင်းသႂ် ဝိၸိတ်ႉသႃႇရ တၢင်ႉယၢၼ်း ပီ(2) ပၢႆးပုတ်ႉ- ၸဵမ်ၸိူဝ်းၼႆႉ။


ၽူႈၶဝ်ႈလိူၵ်ႈတင်ႈပဵၼ်ၽူႈပွင်ၵၢၼ်မီး 27 ၸဝ်ႈ ၊ သင်ၶၸဝ်ႈ ၶဝ်ႈႁူမ်ႈတွတ်ႈၶႅပ်းၵၢင်ၸႂ်လိူၵ်ႈတင်ႈမီး 100 ၸဝ်ႈ။ ပၢင်လိူၵ်ႈတင်ႈ ၸတ်းႁဵတ်းတီႈ ဝတ်ႉမႂ်ႇ မိူင်းၵွၵ်ႇ ၸိုင်ႈထႆး ။


ၸဝ်ႈတႆးၼုမ်ႇ ပိၼ်ႇတေႃးလ ၵုၼ်ႁဵင် လုၵ်ႈႁဵၼ်းၸၼ်ႉၸွမ်မႁႃၵျူးလႃး ပီသၢမ် (ပၢႆးပုတ်ႉ) လႆႈသဵင် 51 သဵင် သေ ထုၵ်ႇလိူၵ်ႈပဵၼ်ႁူဝ်ၼႃႈမႂ်ႇ မုၵ်ႉၸုမ်းသင်ၶတႆး လုၵ်ႈႁဵၼ်းၸၼ်ႉၸွမ်မိူင်းၵွၵ်ႇ ၸုပ်ႈတီႈ13 ပီ 2017။


ယိူင်းဢၢၼ်းဢၼ်လႆႈၸတ်းႁဵတ်း ပၢင်လိူၵ်ႈႁူဝ်ၼႃႈၼိုင်ႈပီၼိုင်ႈပွၵ်ႈၼႆႉ 1 တႃႇၾိုၵ်းႁႂ်ႈမေႃပွင်ၵၢၼ် လႄႈၾိုၵ်းႁႂ်ႈၽူႈဢွၼ်ႁူဝ် ဢွၵ်ႇမႃးလႆႈၼမ်ၼမ် ။ 2 ယိူင်းဢၢၼ်းႁႂ်ႈသင်ၶလုၵ်ႈႁဵၼ်းတႆး မီးၵၢၼ် တူဝ်ထူပ်းလွင်ႈပၼ်သဵင်(တွၼ်ႈမႄး) ၵွပ်ႈမၼ်းလမ်ႇလွင်ႈပုၼ်ႈတႃႇၸိူဝ်ႉၸၢတ်ႈ ။ ႁႂ်ႈသင်ၶလႄႈ လုၵ်ႈႁဵၼ်းတႆးၶဝ်ႈၸႂ်ဝႆႉၼၵ်းၼႂ်းၵၢၼ်လိူၵ်ႈတင်ႈၸိူဝ်းၼႆႉဝႃႈၼႆ။


ၸဝ်ႈတႆးၼုမ်ႇ ပိၼ်ႇတေႃးလ ၵုၼ်ႁဵင် လၢတ်ႈဝႃႈ - “လိၵ်ႈလၢႆး ပၢႆးပၺ်ၺႃၼႆႉ မၼ်းလမ်ႇလွင်ႈၼႃႇ မိူဝ်ႈလဵဝ် ၼႆႉ။ ၼႃႈၵၢၼ်သင်သေဢမ်ႇဝႃႈ ပိူၼ်ႈဢဝ်ပၢႆးပၺ်ၺႃ ပဵၼ်လွင်ႈယႂ်ႇ တႅပ်းတတ်းယဝ်ႉ ။ ပေႃးႁဝ်းဢမ်ႇ မေႃပၺ်ၺႃၸိုင် ၵၢၼ်မိူင်း ၊ ၵၢၼ်ၸိူဝ်ႉၶိူဝ်း၊ ၵၢၼ်ပၢႆးမၢၵ်ႈမီး ၵၢၼ်ၵူႈလွင်ႈလွင်ႈ ၸိူဝ်းၼႆႉၵေႃႈ တေဢမ်ႇၶိုတ်း ပိူၼ်ႈယဝ်ႉ ။ ၵွပ်ႈပိူဝ်ႈၼၼ်ႉလႄႈ ႁႂ်ႈဢွၼ်ၵၼ်ၶတ်းၸႂ်ႁဵၼ်းႁႃပၺ်ၺႃၵၼ်ၵူႈၵေႃႉသေၵမ်း” ဝႃႈၼႆ။


တႃႇတေပဵၼ်မႃးလုၵ်ႈႁဵၼ်းသင်ၶတႆး ၸၼ်ႉၸွမ်မိူင်းထႆးၼႆႉ ၸဝ်ႈၶူးလူင် Prof. Dr ၶမ်းမၢႆ ထမ်မသႃမိ လႆႈၼႄတၢင်းပၼ် ယၢမ်းလဵဝ်သင်ၶတႆးဢွၵ်ႇမိူင်းႁႃႁဵၼ်းလိၵ်ႈ မီးၸွတ်ႇၵႂႃႇၵူႈမိူင်း မိူၼ်ၼင်ႇ မႃႊလေႊ သီႊယိူဝ်ႊ ၊ ၵျႃႊပၢၼ်ႊ ၊ မိူင်းသီႇႁူဝ် ၊ မိူင်းဢိင်းၵလဵတ်ႈ ၊ မိူင်းဢမေႊရီႊၶိူဝ်ႊ ၊ သိင်ႊၶၿူဝ်ႊ ၊ ဢိၼ်ႊတီႊယိူဝ်ႊ ၊ ၵူဝ်ႊလီႊယိူဝ်ႊ ၸဵမ်ၸိူဝ်းၼႆႉ။ တီႈမိူင်းထႆးသမ်ႉ တႄႇပီ 2004 မႃးထိုင်ယၢမ်းလဵဝ် လုၵ်ႈႁဵၼ်းတႆး ဢၼ်ႁဵၼ်း ယဝ်ႉၵႂႃႇမီး 2 ႁဵင်ပၢႆ ဢၼ်တိုၵ်ႉႁဵၼ်းယူႇယၢမ်းလဵဝ်မီး မွၵ်ႈ 150 ၸဝ်ႈပၢႆ  ။


ႁူဝ်ပဝ်ႈလႄႈ ၽူႈပွင်ၵၢၼ်လုၵ်ႈႁဵၼ်းသင်ၶတႆး ၸၼ်ႉၸွမ်မိူင်းထႆးၼႆႉ ၼိုင်ႈၸုပ်ႈလႆႈႁၢပ်ႇၵၢၼ် 1 ပီ။ ပေႃးၶွပ်ႈ 1 ပီ ၶိုၼ်းမေးလိူၵ်ႈတင်ႈမႂ်ႇထႅင်ႈၼိုင်ႈၵမ်း။ ပီၼႆႉပဵၼ်ၵမ်းထူၼ်ႈ  13 ယဝ်ႉ- ဝႃႈၼႆ။