သိုၵ်းလူင်ပွင်ၸိုင်ႈမၢၼ်ႈ ၸီႉသႂ်ႇႁႂ်ႈ SSPP/SSA ထွၼ်ဢွၵ်ႇတပ်ႉ ႁိမ်းဝဵင်းမိူင်းသူႈ သွင်ၾၢႆႇၶဵင်ႈၶႅင်ၵၢၼ်သိုၵ်းတေႃႇၵၼ်ၶိုၼ်း



တပ်ႉပၢင်သဝ်း SSPP/SSA တပ်ႉၼိုင်ႈ၊ ဢၼ်မီးႁိမ်းဝဵင်းမိူင်းသူႈ ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်းၼၼ်ႉ ၾၢႆႇသိုၵ်းမၢၼ်ႈၸီႉသင်ႇဝႃႈ တဵင်ႈဝၼ်းမိူဝ်ႈၼႆႉ ပဵၼ်ၶၢဝ်းလိုၼ်းသုတ်း၊ ႁႂ်ႈထွၼ်ဢွၵ်ႇပၼ်၊ ၵူၼ်းဝၢၼ်ႈၵူၼ်းသူၼ်ၵေႃႈ ႁႂ်ႈငိူင်ႉဝႄႈပၼ်။  ၵဵဝ်ႇၵပ်းလွင်ႈၼႆႉ ႁဵတ်းႁႂ်ႈသွင်ၾၢႆႇၶဵင်ႈၶႅင်ၵၢၼ်သိုၵ်းတေႃႇၵၼ်- ၶၢဝ်ႇၼႂ်းပိုၼ်ႉတီႈလၢတ်ႈ ။


ဝၢႆးလင်ၽူႈၵွၼ်းတိူင်းသိုၵ်းဝၼ်းဢွၵ်ႇၵၢင် (ၶူဝ်လမ်) တင်းတူဝ်တႅၼ်း ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA)  ႁူပ်ႉထူပ်းၵၼ်တီႈဝဵင်းၶူဝ်လမ် (ၶူဝ်ၶမ်း)ယဝ်ႉ ဝၢႆးၼၼ်ႉ ၾၢႆႇသိုၵ်းမၢၼ်ႈသူင်ႇႁႅင်းသိုၵ်း ၽိူမ်ႉထႅမ်မႃးၼႂ်းၸႄႈဝဵင်းမိူင်းသူႈ လၢႆလၢႆတပ်ႉၵွင်။ ၾၢႆႇၼိုင်ႈၵေႃႈ မိူဝ်ႈၼႆႉ 19/01/2017 ၸီႉသင်ႇဝႃႈ ႁႂ်ႈသိုၵ်းတႆး SSPP/SSA ထွၼ်ဢွၵ်ႇတပ်ႉပၢင်သဝ်းၼမ်ႉၼႅပ်ႇ ဢၼ်မီးတီႈႁိမ်းဝၢၼ်ႈၶူဝ်ၸူမ် ဢိူင်ႇပၢင်ႇၸွႆး ၸႄႈဝဵင်းမိူင်းသူႈ ။


လွင်ႈၼႆႉ ၽူႈၵွၼ်းတပ်ႉပိဝ်ႇႁႃႇ ဢၼ်ၵႂႃႇတူင်ႉၼိုင်ပွတ်းတွၼ်ႈၼၼ်ႉ ပဵၼ်ၵေႃႉၸီႉသင်ႇ။ ၸီႉသင်ႇပႃးၵူၼ်းဝၢၼ်ႈ ၵူၼ်းမိူင်းပွတ်းတွၼ်ႈၼၼ်ႉ ငိူင်ႉဢွၵ်ႇဝၢၼ်ႈပၼ်။ ၵဵဝ်ႇၵပ်းလွင်ႈၼႆႉ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်းမႆႈၸႂ်သေ မိူဝ်ႈလဵဝ်ၼႆႉ ဢွၼ်ၵၼ်ပႃးဢဝ်ၶူဝ်းႁိူၼ်းၶူဝ်းယေး ပၢႆႈၶဝ်ႈမႃးၸူးဝဵင်းမိူင်းသူႈ - ၼႆယဝ်ႉ ။


ၽူႈမီးၸၼ်ႉတီႈႁွင်ႈၵၢၼ်ၾၢႆႇၶၢဝ်ႇ ငဝ်ႈငုၼ်းဝၢၼ်ႈႁႆး ၸဝ်ႈၼိုင်ႈၵေႃႈလၢတ်ႈဝႃႈ- ပေႃးဢဝ်ၾၢႆႇသိုၵ်းမၢၼ်ႈဝႃႈ ဝၼ်းတီႈ 20 ၼႆႉ ၾၢႆႇ SSPP/SSA လႆႈၸႂ် ဢမ်ႇလႆႈၸႂ်ၵေႃႈယဝ်ႉ သိုၵ်းၶဝ်တိုၼ်းတေတိုၼ်းၶဝ်ႈမႃး ဝႃႈၼႆ။ မိူဝ်ႈၼႆႉၼႆႉ ၸႂ်ႉၵူၼ်းဝၢၼ်ႈငိူင်ႉဢွၵ်ႇဝၢၼ်ႈၵူၺ်းဢမ်ႇၵႃး ၸႂ်ႉႁႂ်ႈတပ်ႉ SSPP/SSA ဢၼ်မီးႁိမ်းၼၼ်ႉ ထွၼ်ဢွၵ်ႇ။ မိူဝ်ႈလဵဝ်ၼႆႉ ပၢင်တိုၵ်းဝူင်ႈၵၢင်သွင်ၾၢႆႇၸၢင်ႈၵိူတ်ႇၶိုၼ်ႈမႃး၊ ပေႃးပဵၼ်လၢႆးၼႆႉတႄႉ ပၢင်တိုၵ်းတိုၼ်းတေၵိူတ်ႇၶိုၼ်ႈဢမ်ႇႁၢင်ႉ- ဝႃႈၼႆ ။


မိူဝ်ႈလဵဝ် ၼွၵ်ႈၼိူဝ်သေသိုၵ်းလူင်ပွင်ၸိုင်ႈ တပ်ႉမတေႃႇ ဢၼ်မီးဝႆႉၵဝ်ႇၵဝ်ႇၼႆႉ ဢၼ်ထႅမ်ႁႅင်းသိုၵ်းမႃး ၽိူမ်ႉထႅမ်ထႅင်ႈ ပဵၼ်တႂ်ႈတိူင်းသိုၵ်း ယလၶ ၶူဝ်လမ်၊ မိူၼ်ၼင်ႇတပ်ႉ 151 မိူင်းၸၢင်၊ တပ်ႉ 150 ၵႃလိ၊ တပ်ႉ 524 ၵုၼ်ႁဵင် လႄႈတင်းတပ်ႉႁူမ်ႇလူမ်ႈတိူင်းသိုၵ်း ယလၶ 2 တပ်ႉၵွင်ၸိူဝ်းၼႆႉ ၽိူမ်ႉထႅမ်ႁႅင်းသိုၵ်းၶဝ်ႈမႃး မီးယူႇႁိမ်းဝဵင်းမိူင်းသူႈ ။


ၾၢႆႇၼိုင်ႈၵေႃႈ တပ်ႉပႃႈတႂ်ႈတိူင်းသိုၵ်းၸဵင်ႇႁွင်ႇဝၼ်းဢွၵ်ႇ (ယမၶ) လႃႈသဵဝ်ႈ၊ ဢၼ်မီးတႂ်ႈတပ်ႉပိဝ်ႇႁႃႇ တၢင်ႉယၢၼ်းၵုမ်းၵမ် မိူၼ်ၼင်ႇတပ်ႉၶလယ 33 ၊ ၶလယ 66 ၸိူဝ်းၼႆႉၵေႃႈ ထႅမ်ႁႅင်းသိုၵ်း လုၵ်ႉတၢင်းမိူင်းၵၢဝ် မႃးတၢင်းၼမ်ႉလဝ်း ဢိူမ်ႈမႃးတၢင်းပွတ်းလွႆၸေး ၸိူဝ်းၼႆႉ ။


ၽူႈမီးၸၼ်ႉ ဢၼ်ၵႂႃႇႁူပ်ႉဢူးတဵင်းၸေႃႇ တီႈတႃႈၵုင်ႈ ၸဝ်ႈၼိုင်ႈၵေႃႈလၢတ်ႈတီႈ ၸုမ်းၶၢဝ်ႇၽူႈတွႆႇႁွၵ်ႈ ဝႃႈ- ႁဝ်းၶႃႈဢမ်ႇၶႂ်ႈႁႂ်ႈပဵၼ်ပၢင်တိုၵ်း၊ ႁဝ်းၶႃႈၵေႃႈၵႂႃႇတုၵ်းယွၼ်း ယႃႇပေၸႂ်ႉႁႂ်ႈသိုၵ်းမႃးႁဵတ်းတၢင်း။ သဵၼ်ႈတၢင်းဢၼ်ၾၢႆႇသိုၵ်းၶႂ်ႈႁဵတ်းၶႂ်ႈသိူဝ်ႇၼၼ်ႉ ႁႂ်ႈပဵၼ်ၵူၼ်းမိူင်းသိူဝ်ႇ၊ ပေႃးပဵၼ်ၵူၼ်းမိူင်းသိူဝ်ႇတႄႉ မၼ်းၵေႃႈတေဢမ်ႇမီးပၼ်ႁႃ၊ ၵူၺ်းၵႃႈ ၾၢႆႇသိုၵ်းသမ်ႉဢမ်ႇၽွမ်ႉ။ ၵွပ်ႈၶႂ်ႈဢဝ်လၢႆးၵၢၼ်မိူင်းၵႄႈလိတ်ႈလႄႈ ႁဝ်းၶႃႈၶပ်းၶိုင်သေမႃးႁူပ်ႉဢူးတဵင်းၸေႃႇ တီႈတႃႈၵုင်ႈ။ မိူဝ်ႈပူၼ်ႉမႃးလၢႆဝၼ်းၼႆႉၵေႃႈ ႁၢင်ႈႁႅၼ်းတႃႇတေၵႂႃႇ ႁူပ်ႉထူပ်း ၸွမ်သိုၵ်းလူင်ယႃႇပျေႉ တီႈၼေႇပျီႇတေႃႇ၊ ၵူၺ်းၵႃႈ ၾၢႆႇၸွမ်သိုၵ်းလူင်ယႃႇပျေႉ ဢမ်ႇယွမ်းႁပ်ႉႁူပ်ႉထူပ်း။ ယွၼ်ႉပိူဝ်ႈၼႆ လႆႈလူင်းၵႂႃႇႁူပ်ႉဢူးတဵင်းၸေႃႇ။ ပၼ်ႁႃၵၢၼ်မိူင်းဢၼ်ဝႃႈၼႆႉ တၵ်းလႆႈဢဝ်လၢႆးၵၢၼ်မိူင်းၵႄႈလိတ်ႈ၊ ပေႃးဝႃႈဢဝ်ဢဵၼ်ႁႅင်းသေၵႄႈလိတ်ႈတႄႉ ပၢင်တိုၵ်းၼႆႉ တိုၼ်းတေဢမ်ႇယဝ်ႉဢမ်ႇတူဝ်ႈ၊ ၵူၼ်းမိူင်းၵေႃႈ တေတုၵ်ႉၶၸွမ်းယွၼ်ႉသိုၵ်းသိူဝ်ဢမ်ႇႁၢင်ႉ- ဝႃႈၼႆ ။


မိူဝ်ႈဝၼ်းတီႈ 17/01/2017 ၼၼ်ႉ ၾၢႆႇတပ်ႉသိုၵ်းမၢၼ်ႈလၢတ်ႈဝႃႈ ၽူႈၵွၼ်းတိူင်း ယလၶ ၶူဝ်လမ် တေမႃးမိူင်းၼွင်၊ တေသိုပ်ႇလူင်းပိုၼ်ႉတီႈၵႂႃႇလဵပ်ႈတူၺ်း တၢင်းတႃႈၵွင်းမူး ၼမ်ႉပၢင်၊ လၢတ်ႈဝႃႈတေႁူပ်ႉ ၽူႈမီးပုၼ်ႈၽွၼ်း SSPP/SSA တီႈမိူင်းၼွင် ဝႃႈၼႆ။ ၵူၺ်းၵႃႈ ၾၢႆႇၽူႈမီးပုၼ်ႈၽွၼ်း SSPP/SSA ၵႂႃႇပႂ်ႉႁူပ်ႉယူႇၵေႃႈ ၾၢႆႇၽူႈၵွၼ်းတိူင်းဢမ်ႇမႃးႁူပ်ႉသေ သွင်ၾၢႆႇဢမ်ႇလႆႈႁူပ်ႉၵၼ်- ၼႆယဝ်ႉ ။


ၵူၼ်းၼႂ်းပႃႇတီႇၵၢၼ်မိူင်း ပူႇလွႆလၢႆးယွတ်ႈ မိူင်းသူႈ ၵေႃႈလၢတ်ႈဝႃႈ- သိုၵ်းလူင်ပွင်ၸိုင်ႈၼႆႉ ၶႂ်ႈယႃႉပၢင်လိူၵ်ႈတင်ႈၵူၺ်းဢမ်ႇၵႃး ၾၢႆႇၼိုင်ႈၵေႃႈ ၶႂ်ႈသိူဝ်ႇသဵၼ်ႈတၢင်း၊ ႁႂ်ႈတူဝ်ႈတၼ်းတႃႇမုင်ႈၸူး ၼႃႈလိၼ်ဝႃႉၵုမ်းၵမ်၊ ၶႂ်ႈၶိုင်ႈႁႂ်ႈၼႃႈၵၢၼ်သွင်လွင်ႈသွင်တၢင်းယဝ်ႉၸွမ်းၵၼ် ႁၼ်ထိုင်ၸိူင်ႉၼႆ- ဝႃႈၼႆ ။


မိူဝ်ႈပၢင်လိူၵ်ႈတင်ႈပတ်းပိုၼ်ႉတူဝ်ႈမိူင်း ပီ 2015 ၼၼ်ႉ ယွၼ်ႉပိူဝ်ႈသိုၵ်းလူင်ပွင်ၸိုင်ႈမၢၼ်ႈ ႁၢင်ႈသိုၵ်းလေႃႇတိုၵ်း SSPP/SSA ၼႂ်းၸႄႈဝဵင်းၵေးသီး၊ မိူင်းသူႈၸိူဝ်းၼႆႉသေ သွင်ၾၢႆႇလႆႈပဵၼ်ပၢင်တိုၵ်းၵၼ်။ ၵူၼ်းဝၢၼ်ႈၵူၼ်းမိူင်း ၸိူဝ်းယူႇၼႂ်းၸႄႈဝဵင်း တၢင်ႉယၢၼ်း၊ ၵေးသီး၊ မိူင်းသူႈၸိူဝ်းၼႆႉ ႁူဝ်ၵူၼ်းႁိမ်းသႅၼ် ဢမ်ႇလႆႈတွတ်ႈၶႅပ်းၵၢင်ၸႂ်။ ၵွပ်ႈၼၼ် ပိူဝ်ႈတႃႇတေလိူၵ်ႈတင်ႈၶိုၼ်း ပွတ်းတွၼ်ႈၼၼ်ႉ ပၢင်လိူၵ်ႈတင်ႈသွမ်ႈ ဢၼ်တေၸတ်းႁဵတ်း ၼႂ်းလုၵ်ႈလိူၼ်ဢေႊပရိူဝ်ႊ တေမႃးၼႆႉၵေႃႈ ယိူင်းဢၢၼ်းပိူဝ်ႈတႃႇလိူၵ်ႈတင်ႈ ၽူႈတႅၼ်းၵူၼ်းမိူင်းတႃႇ 6 ၵေႃႉ ၼႂ်းၸႄႈဝဵင်းမိူင်းသူႈတင်းၵေးသီး ။




 
© 2012 All Rights Reserved | Asean Celebrity | Fonts @ AtFonts | Free Templates