ပႃႇတီႇၵွင်ၸႆး ESSDDP ႁူပ်ႉထူပ်း ၵူၼ်းၼုမ်ႇတႆး ဝဵင်းၵဵင်းတုင်
ပႃႇတီႇၵွင်ၸႆး ESSDDP ၸတ်းႁဵတ်းပၢင်ႁူပ်ႉထူပ်းၵူၼ်းၼုမ်ႇတႆး လၢႆမူႇလၢႆၸုမ်း ၼႂ်းၵဵင်းတုင် ႁၢင်ႈႁႅၼ်းႁႃတၢင်းၶိုၼ်ႈယႂ်ႇ ။
Photo: Sai Lat Mike
|
ၸၢႆးသၢမ်တိပ်ႉသိူဝ် ၵႅမ်ႁူဝ်ပဝ်ႈပႃႇတီႇၵွင်ၸႆး လၢတ်ႈဝႃႈ “ ယိူင်းဢၢၼ်းဢၼ်လႆႈၸတ်းႁဵတ်း ပၢင်ႁူပ်ႉထူပ်းၵူၼ်းၼုမ်ႇၼႆႉ ၼင်ႇႁိုဝ်ၵူၼ်းၼုမ်ႇတႆးႁဝ်း တေႁတ်းတူင်ႉၼိုင်၊ မေႃပူၵ်းပွင် ၵၢၼ်ၶိုၼ်ႈယႂ်ႇ၊ ၾိုၵ်းပၼ်ႁႂ်ႈၶဝ် မေႃၵၢၼ်မိူင်း ႁူႉၵၢၼ်မိူင်း၊ မေႃၶဝ်ႈၵႄႈၵူၼ်းတင်းၼမ်၊ ႁႂ်ႈပေႃးမီးၼေႃႇတႅၼ်းၶိူဝ်းမႃး သင်ဝႃႈႁဝ်းၵူၼ်း ထဝ်ႈဢမ်ႇမီးယဝ်ႉ ႁႂ်ႈၶဝ်မႃးပုတ်ႈ တႅၼ်းတၢင်ႁဝ်းၵႂႃႇ၊ ယဝ်ႉၵေႃႈ ထၢမ်တူၺ်းၵၢင်ၸႂ်ၶဝ် ၶဝ်ၶႂ်ႈႁဵတ်းဢီႈသင်တႄႉတႄႉ ယိူင်းဢၢၼ်းၶဝ်သမ်ႉမီးဝႆႉၸိူင်ႉႁိုဝ် ၸဵမ်ၸိူဝ်းၼႆႉ” ဝႃႈၼႆ ။
ပၢင်ႁူပ်ႉထူပ်းၵူၼ်းၼုမ်ႇၼႆႉ မီးၽူႈယႂ်ႇၵူၼ်းလူင် မွၵ်ႇလၢတ်ႈၶေႃႈၵႂၢမ်းပၼ်ႁႅင်းၵူၼ်းၼုမ်ႇတႆး မိူၼ်ၼင်ႇ လုင်းၸၢႆးႁွင်ၶမ်း၊ ၸဝ်ႈပိုၼ်ၶမ်း၊ လုင်းၸၢႆးယီႈတိပ်ႉ၊ လုင်းၸၢႆးသၢမ်တိပ်ႉသိူဝ် လႄႈ ၶူးပူင်သွၼ် ႁူင်းႁဵၼ်းၸိူဝ်ႉၸၢတ်ႈၵဵင်းတုင် ၸဵမ်ၸိူဝ်းၼႆႉ ဝႃႈၼႆ ။
ၸုမ်းၵူၼ်းၼုမ်ႇၸိူဝ်းၶဝ်ႈႁူမ်ႈသမ်ႉ မိူၼ် လုၵ်ႈႁဵၼ်းၸၼ်ႉၸွမ် ဝဵင်းၵဵင်းတုင်၊ လုၵ်းႁဵၼ်းၸိူဝ်ႉ ၸၢတ်ႈ ၵဵင်းတုင်၊ ၸုမ်းပၢႆးမွၼ်း၊ ၸုမ်းၵူၼ်းၼုမ်ႇ TYO ၸုမ်းတူင်ႇဝူင်းၵူၼ်း ၸဵမ်ၸိူဝ်းၼႆႉ။ လိူဝ်သေ ၼၼ်ႉ တူဝ်တႅၼ်း လုမ်းၵပ်းသၢၼ် RCSS/SSA ၊ ၸုမ်းပႃႇတီႇၵွင်ၸႆးၵေႃႈၶဝ်ႈႁူမ်ႈ မီးၽူႈၶဝ်ႈႁူမ်ႈ တင်းမူတ်း ႁိမ်း 100 ၵေႃႉ ဝႃႈၼႆ ။
Tags: General, News