ႁွင်ႈၵၢၼ်ၾၢႆႇသႃသၼႃ မိူင်းႁူမ်ႈတုမ်မၢၼ်ႈ တေဢွၼ်ႁူဝ်ၸတ်းႁဵတ်းပၢင်ပွၼ်ႈထမ်း တီႈဝဵင်းတႃႈ ၵုင်ႈ ၸဝ်ႈတူၼ်ၶူး Dr. ၶမ်းမၢႆထမ်မသႃမိ တေယေႃးမုၼ်ပွၼ်ႈထမ်း - ဝႃႈၼႆ ။

ဝၼ်းတီႈ 01/11/2016 ၶၢဝ်းယၢမ်းၵၢင်ၶမ်ႈ 07 မူင်းၼႆႉ ႁွင်ႈၵၢၼ်ၾၢႆႇသႃသၼႃ တေဢွၼ် ၸတ်းႁဵတ်းပၢင်ပွၼ်ႈထမ်းတြႃး တေပၢင်းဢဝ်ၸဝ်ႈတူၼ်ၶူးလူင် Dr.ၶမ်းမၢႆ ထမ်မသႃမိ ၽူႈၵေႃႇတင်ႈ ၸၼ်ႉၸွမ်ပုတ်ႉထ မိူင်းတႆး ယေႃးမုၼ်မႃး ပွၼ်ႈထမ်း ၼိူဝ်ႁူဝ်ၶေႃႈဝႃႈ - “ၼဵၼ်မူၼ်ႈသိူဝ်းမီးတီႈလႂ်” ( Where is the switch ? ) တီႈ ၸမ်ပျူႇသီႇရီႉ ပွၵ်ႉတတႃးလေး ၸႄႈဝဵင်း မယၢၼ်းၵူင်း ဝဵင်းတႃႈၵုင်ႈ ။


ၸဝ်ႈတူၼ်ၶူးထမ်မသႃမိၼႆႉ 1. လႆႈႁပ်ႉၸုမ်ႈၶူး ပဵၼ်ၻွၵ်းတိူဝ်ႊၼႂ်းသင်ၶၸဝ်ႈတူၼ်လဵဝ်၊ ဢၼ်ယဝ်ႉၵၢၼ်ႁဵၼ်းတီႈ ၸၼ်ႉၸွမ် ဢွၵ်ႊၾိူတ်ႊသ် (Oxford) မိူင်းဢိၼ်ႊၵလႅၼ်ႊ ။ 2.ပဵၼ်လုၵ်ႈ ၸုမ်းသုၼ်ၵၢင် ဢွၵ်ႊၾိူတ်ႊၾၢႆႇလဵပ်ႈႁဵၼ်း ပုတ်ႉထသႃသၼႃ (Fellow, Oxford Center for Buddhist Studies) ။ 3.ပဵၼ်ၾၢႆႇပုတ်ႉထသႃသၼႃ ဢွၵ်ႊၾိူတ်ႊ (Buddhish chaplain, Oxford) ဢၼ်ပေႃးမီး လွင်ႈၵိူတ်ႇလွင်ႈတၢႆ ၸၢဝ်းပုတ်ႉထ ဢွၼ်ၵၼ်ၶဝ်ႈႁႃပိုင်ႈ ဢိင်မၼ်းၸဝ်ႈ ။


ၼွၵ်ႈသေၼၼ်ႉ ပဵၼ်ၽူႈၼမ်းၼႂ်း ၸၼ်ႉၸွမ်တူင်ႇဝူင်းပုတ်ႉထ သႃသၼႃၵူႈၸိုင်ႈမိူင်း (Executive Secretary International Association of Buddhist Universities-ESIABU) ဢၼ်ၸဝ်ႈ တူၼ်ၶူးလူင် ၽြႃႉထမ်းမၵူဝ်းသႃၵျၢၼ်း မိူင်းထႆး ပဵၼ်ႁူဝ်ပဝ်ႈ ။


မိူဝ်ႈႁၢင်ပီ 2014 ၼၼ်ႉၵေႃႈ ၸဝ်ႈတူၼ်ၶူးလူင် ထမ်မသႃမိ ဢွၼ်ႁူဝ်သင်ၶၸဝ်ႈ၊ ၸွမ်ၽွင်း လူင်မိူင်းတႆး ၸဝ်ႈဢွင်ႇမျၢတ်ႈလႄႈ တၵ်ႉၵႃႇသတ်ႉထႃးတင်းလၢႆသေ ပူၵ်းတင်ႈၸၼ်ႉၸွမ်ပုတ်ႉထ  တွၵ်ႇသဝ်ႁိၼ်ပၵ်းလၵ်းသဝ်ဢဵၵ်ႇ ၸၼ်ႉၸွမ်ပုတ်ႉထမိူင်းတႆး ဝဵင်းလူင်တူၼ်ႈတီး ။