သင်ၶၸဝ်ႈ ၽူႈၵွၼ်းၸႄႈဝဵင်း ဝဵင်းႁႅင် ႁူမ်ႈပီႈၼွင်ႉၵူၼ်းမိူင်းၼႂ်းပိုၼ်ႉတီႈ ၸတ်းႁဵတ်းပၢင် တေသၼႃ (ႁေႃး)ထမ်း ယွၼ်းသူးတိူင်ႇထိုင် ဝိၺၢၼ်ႇၶႂၼ်ငဝ်း ၸဝ်ႈႁေႃၶမ်းထႆး ။

Photo By - Shiridhamma Wieng Inn

ဝၼ်းတီႈ 20/10/2016 ၶၢဝ်းယၢမ်းၵၢင်ၶမ်ႈ သင်ၶၸဝ်ႈလႄႈ ၽူႈၵွၼ်းၸႄႈဝဵင်း ဝဵင်းႁႅင် ႁူမ်ႈၵၼ် တင်းၵူၼ်းမိူင်းၼႂ်းပိုၼ်ႉတီႈ ၸတ်းႁဵတ်းပၢင်တၢင်းလီ ယိူင်းၸူးၸဝ်ႈႁေႃၶမ်းထႆး သႂ်ႇၸိုဝ်ႈ ပၢင်ြတႃးဝႃႈ “ ထမ်းတႃႇၶုၼ်ႁေႃၶမ်း 10 ပိူင်” ။ ပၢင်တၢင်းလီ ယိူင်းၸူးထိုင် ဝိၺၼ်ႇၶႂၼ်ငဝ်း ၸဝ်ႈမုၼ်ယႂ်ႇၶုၼ်ႁေႃၶမ်း မိူင်းထႆး သင်ၶၸဝ်ႈ ၽူႈယႂ်ႇၵူၼ်းလူင် ၵူၼ်းၼႂ်းပိုၼ်ႉတီႈ ၶဝ်ႈႁူမ်ႈ တင်းမူတ်းမွၵ်ႈ 1,000 ၵေႃႉ ။


ၸဝ်ႈၶူးသီရိထမ်မ ဝတ်ႉၾႃႉဝဵင်းဢိၼ်း လၢတ်ႈဝႃႈ  - “ ၶႂ်ႈႁႂ်ႈပီႈၼွင်ႉတႆး ႁဵတ်းၸွမ်းၼင်ႇၶေႃႈသွၼ် ၸဝ်ႈႁေႃၶမ်းဢၼ်ဝႃႈ- လူဝ်ႇမေႃႁၵ်ႉႁူမ်ၸူမ်းပႅင်းၵၼ် ၸွႆႈထႅမ်ၵၼ် ယိုၼ်ႈမႅင်ႇၵၼ် မီးၼမ်ႉၸႂ်လီ တေႃႇၵၼ် ပေႃးႁဝ်းဢမ်ႇမႅၼ်ႈၵၼ် ဢမ်ႇႁၵ်ႉၵၼ် ၽိတ်းမေႃးၵၼ်ၸိုင် ဢၼ်တေတုၵ်ႉၶ ၶၢၼ်ၸႂ် တူၵ်းၽၢၼ် တႄႉပဵၼ်ၵူၼ်းမိူင်းလႄႈ ဝၢၼ်ႈမိူင်း ”- ဝႃႈၼႆ ။


ၸဝ်ႈမုၼ်ယႂ်ႇၶုၼ်ႁေႃၶမ်းထႆး ၽူးမိၽူလ်း ဢၻုလ်းယၻဵတ်ႇ  ၼင်ႈႁေႃ 70 ပီ ပၢႆ၊ ဢႃယုၸဝ်ႈ 89 ပီၼၼ်ႉ ၼွၼ်းၽႄး သဵင်ႈမုၼ်ၵႂႃႇ မိူဝ်ႈဝၼ်းတီႈ 13/10/2016 ၶၢဝ်းယၢမ်း 15:52 မူင်း၊ တီႈႁူင်းယႃသီရိရၢတ်ႉ ဝဵင်းလူင်မိူင်းၵွၵ်ႇ (ၵုင်းထဵပ်ႈ) ၸိုင်ႈထႆး။ ၶၢပ်ႈတူဝ်ၸဝ်ႈတေဝႆႉ တီႈဢေႇသုတ်း ပီၼိုင်ႈ။ လူင်ပွင်ၸိုင်ႈထႆး ပိုၼ်ၽၢဝ်ႇဝႆႉဝႃႈ ၶၢဝ်းတၢင်း30 ဝၼ်းတေလူတ်းတုင်းၸိူဝ်ႉၸၢတ်ႈ လူင်းၶိုင်ႈသဝ်သေ ၼႄလွင်ႈသဝ်ႈမွင်၊ ႁၢမ်ႈႁဵတ်းပွႆးၵျေႃႇပွႆးမူၼ်ႈ - ဝႃႈၼႆ ။