ၵူၼ်း2ၵေႃႉၺႃးမၢတ်ႇၸဵပ်း ယွၼ်ႉမၢၵ်ႇတႅၵ်ႇ မိူဝ်ႈဝၼ်းတီႈ 20 /10/2016 တီႈဝဵင်းမူႇၸႄႈ ၸိုင်ႈတႆးပွတ်းႁွင်ႇ ။

ၸၢႆးႁိၼ်လဵၵ်း ၵူၼ်းၼႂ်းပိုၼ်ႉတီႈလၢတ်ႈဝႃႈ- “ မၢၵ်ႇဢၼ်တႅၵ်ႇၼႆႉ ပဵၼ်တီႈ ပွၵ်ႉမႂ်ႇ ဢိူင်ႇၸႄႈ လၢၼ်ႉ ၸႄႈဝဵင်း မူႇၸႄႈ ။ မၢၵ်ႇပွမ်းၸိူဝ်းၼႆႉ ၵူၼ်းဝၢၼ်ႈၵႂႃႇသူၼ်သေ ၵႂႃႇႁၼ်လႄႈ ၵႂႃႇလၢတ်ႈတီႈၽူႈၵွၼ်းဢိူင်ႇ ၽူႈၵွၼ်းဢိူင်ႇၵေႃႈၵႂႃႇလၢတ်ႈတီႈ သိုၵ်းပိူဝ်ႈတႃႇ မႃးၽဵဝ်ႈပႅတ်ႈ” ။


ၵူၼ်း 2 ၵေႃႉဢၼ်ၺႃးမၢၵ်ႇတႅၵ်ႇၼႆႉတႄႉပဵၼ်   သိုၵ်းမၢၼ်ႈ 1ၵေႃႉလႄႈ ၵူၼ်ၶႄၾႆး1ၵေႃႉ ၸၢႆးယီႈသွင်းၶမ်း ၵူၼ်းၶႄၾႆး ၺႃးမၢတ်ႇၸဵပ်းတီႈၶႃၾၢႆႇသၢႆႉ။
ၸၢႆးႁိၼ်လဵၵ်း လၢတ်ႈဝႃႈ “မိူဝ်ႈဝႃႈၼႆႉမၢၵ်ႇတႅၵ်ႇ 5 ၵမ်း မိူဝ်ႈၼႆႉၵၢင်ၼႂ်တႅၵ်ႇထႅင်ႈၵမ်းၼိုင်ႈ  လိူဝ်သေၼၼ်ႉ ဢၼ် ၶဝ်မႃးၽဵဝ်ႈ သေဢမ်ႇတႅၵ်ႇ မီးထႅင်ႈ3 လုၵ်ႈ။ ၵူၼ်းၼႂ်းပိုၼ်ႉတီႈလၢတ်ႈဝႃႈ  မၢၵ်ႇသႅၼ်းဢၼ်တႅၵ်ႇၼႆႉ ပဵၼ်မၢၵ်ႇ ဢၼ်ပိူၼ်ႈၵၢင်ဝႆႉ ”။


မိူဝ်ႈပီၵၢႆ ၸုမ်းၶၢဝ်ႇ Myanmar times ၵေႃႈယၢမ်းႁၢႆးငၢၼ်းဝႃႈ မိူဝ်ႈဝၼ်းတီႈ 24/08/2016 တီႈၼႂ်းဝဵင်းမူႇၸႄႈ မီး ၵူၼ်းဢဝ်မၢၵ်ႇပွမ်းမႃးဝိုတ်ႉသႂ်ႇၼႃႈယေးငိုၼ်း (Bank) မိူဝ်ႈၼၼ်ႉၵေႃႈၶဝ် ၼႄးဝႃႈ  ပဵၼ်ၸုမ်းယိပ်းၵွင်ႈၵၢင်ႇၸၢဝ်းၶိူဝ်းၵဵဝ်ႇၶွင်ႈၸွမ်း လွင်ႈမၢၵ်ႇတႅၵ်ႇ ။


ၸုမ်းတူင်ႉၼိုင်သၢၼ်ၶတ်းလွင်ႈမၢၵ်ႇတႅၵ်ႇလုမ်ႈၾႃႉ ပိုၼ်ၽၢဝ်ႇႁၢႆးငၢၼ်းမိူဝ်ႈ 25/11/2015  ဝႃႈတင်ႈတႄႇပီ 1999 -2014  ၼၼ်ႉၵူၼ်းမိူင်း ဢၼ်ၺႃးၸၢၵ်ႇမၢၵ်ႇ မီး 3745 ၵေႃႉ ဢၼ်တၢႆယွၼ်ႉမၢၵ်ႇမီး  396 ၵေႃႉ မၢတ်ႇၸဵပ်း3145 ၵေႃႉ-  ဝႃႈၼႆ ။