ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ႁဵတ်းၸွမ်းၶူင်းၵၢၼ်လူင်ၽဵဝ်ႈမူၺ်ႉယႃႈမဝ်းၵမ်၊ တင်ႈတႄႇလိူၼ်ၵျူႊလၢႆႊမႃး ၵႂၢတ်ႇလၢင်ႉၽဵဝ်ႈမူၺ်ႉယႃႈမဝ်းၵမ်မႃးႁၢဝ်ႈႁႅင်း၊ ၵူတ်ႇထတ်းပႃးၸဵမ်ၵူၼ်းသိုၵ်း လႄႈၽူႈမီးၸၼ်ႉ ၼႂ်းတပ်ႉငဝ်ႈငုၼ်း ။

“ၽူႈၼမ်းၼႂ်း 3 SSPP/SSA ၸဝ်ႈႁၢၼ်ပႃႉထုၼ်းလၢတ်ႈဝႃႈ- ႁဝ်းၶႃႈလႆႈတႄႇၽဵဝ်ႈမူၺ်ႉယႃႈမႃးၸဵမ်မိူဝ်ႈ လိူၼ်ထူၼ်ႈ 7 ။ ဢွၼ်ၼႃႈၼႆႉၵေႃႈ ႁဝ်းၶႃႈလႆႈဢွၵ်ႇၶေႃႈပိုၼ်ၽၢဝ်ႇဝႆႉဢွၼ်တၢင်းယဝ်ႉဝႃႈ တေၵႂၢတ်ႇလၢင်ႉၽဵဝ်ႈမူၺ်ႉယႃႈမဝ်းၵမ်။ တႄႇဢဝ်ၼၼ်ႉမႃးႁဝ်းၶႃႈၵေႃႈလႆႈ ၵူတ်ႇထတ်းတူၺ်းၵူၼ်းသူႇသမ်း ၵိၼ်ယႃႈမဝ်းၵမ်၊ ပေႃးၺႃးၵေႃႈတီႉၺွပ်းသေ ၶိုၼ်းမူၼ်ႉမႄးတူဝ်ၸႂ်ပၼ်။ ဢၼ်ႁဝ်းၶႃႈလႆႈႁဵတ်းၵႂႃႇၼႆႉ ဢမ်ႇထိုင်တီႈထိုင်လႅၼ်သေတႃႉၵေႃႈ ၼႂ်းၼႃႈလိၼ်ဢၼ်ႁဝ်းၶႃႈတူင်ႉၼိုင်ၵႂႃႇမႃးယူႇၼႆႉ လႆႈဝႃႈၵႂၢတ်ႇလၢင်ႉ ၽဵဝ်ႈမူၺ်ႉလႆႈယူႇ။ ပေႃးႁဝ်းတီႉလႆႈၵူၼ်းၵိၼ်ယႃႈယဝ်ႉၵေႃႈ ႁဝ်းမႃးတိုတ်းပၼ်ယႃႈ၊ ပၼ်ပိုၼ်ႉႁူႉၵဵဝ်ႇၵပ်း ၽေးယႃႈမဝ်းၵမ်၊ မူၼ်ႉမႄးပၼ်တူဝ်ၸႂ်ၸိူဝ်းၼႆႉသေ ၸင်ႇၵွႆႈပွႆႇပၼ်ၶိုၼ်း။ ယၢမ်းလဵဝ်တႄႉ တီႈငဝ်ႈငုၼ်း ဝၢၼ်ႈႁႆးၵေႃႈ မီးပၢင်သွၼ်ယုၵ်ႉမုၼ်းၼမ်ႉၵတ်ႉၵူၼ်းသိုၵ်းလႄႈ ၽူႈမီးၸၼ်ႉၶဝ်၊ ၾၢႆႇၼိုင်ႈၵေႃႈ လႆႈၵူတ်ႇထတ်းပႃးယႃႈမဝ်းၵမ်- ဝႃႈၼႆ ။


ၸၢႆးထိင်း ဢၼ်ႁွတ်ႈၽႅဝ်တီႈငဝ်ႈငုၼ်း SSPP/SSA ဝၢၼ်ႈႁႆး ၵေႃႈလၢတ်ႈဝႃႈ- ဢၼ်ၸဝ်ႈၼႃႈတီႈၶဝ် ၵူတ်ႇထတ်းၼႆႉ ႁဝ်းၶႃႈလႆႈႁၼ်တေႃႇၼႃႈတေႃႇတႃ၊ ၵူတ်ႇထတ်းႁၢဝ်ႈႁႅင်းတႄႉတႄႉ။ ၵူတ်ႇထတ်းပႃးၸဵမ် ၵူၼ်းသိုၵ်းလႄႈ ၽူႈမီးၸၼ်ႉၶဝ်၊ ၵူတ်ႇထတ်းပႃးၵူၼ်းဝၢၼ်ႈၵူၼ်းမိူင်း ၸိူဝ်းၵႂႃႇမႃးၼိူဝ်သဵၼ်ႈတႃႈသၢႆတၢင်း ၸိူဝ်းၼၼ်ႉ။ ၵူၼ်းသူႇသမ်းၵိၼ်ယႃႈၸိူဝ်းၵူတ်ႇၺႃးၸိူဝ်းၼၼ်ႉ ဢမ်ႇဝႃႈၵူၼ်းၵႂႃႇတၢင်း၊ ၵူၼ်းႁိမ်းႁွမ်း ၸိူဝ်းၼၼ်ႉလႄႈ ဢၼ်တီႉၺွပ်းမႃးတၢင်ႇတီႈတၢင်ႇလႅၼ်ၸိူဝ်းၼႆႉ ဢဝ်မႃးသႂ်ႇဝႆႉၼႂ်းၶွၵ်ႈပေႃးၶႂ်ႈတဵမ်ပိၵ်းယဝ်ႉ။ ဢဝ်မႃးသႂ်ႇၶွၵ်ႈဝႆႉသေ ပၼ်ပိုၼ်ႉႁူႉလွင်ႈယႃႈမဝ်းၵမ်ယူႇ- လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ၼင်ႇၼႆ ။


ၸဝ်ႈႁၢၼ်ပႃႉထုၼ်း ယင်းလၢတ်ႈပႃးဝႃႈ- ၼင်ႇႁိုဝ်တေၽဵဝ်ႈမူၺ်ႉလႆႈယႃႈမဝ်းၵမ် ႁႂ်ႈထိုင်တီႈ ထိုင်လႅၼ်ၼၼ်ႉ ၵူႈၾၢႆႇၵူႈၸုမ်းတၵ်းတေလႆႈႁူမ်ႈမိုဝ်းၵၼ် ။


“ႁဝ်းၶႃႈၸုမ်းလဵဝ်ၽဵဝ်ႈမူၺ်ႉၵူၺ်းတႄႉ တေဢမ်ႇၸၢင်ႈၽဵဝ်ႈမူၺ်ႉ ႁႂ်ႈမူတ်းၵဵင်ႈလႆႈ၊ ၵွပ်ႈဝႃႈၼႂ်းၶူးယႂ်ႇဝဵင်းလူင် ၸိူဝ်းၼႆႉ ႁဝ်းၶႃႈဢမ်ႇယိုၼ်ႈမိုဝ်းထိုင်လႆႈ။ ႁဝ်းၶႃႈတီႉလႆႈၵႃႈႁိုဝ်ယဝ်ႉၼႆၵေႃႈ တေႃႇထိုင်မိူဝ်ႈလဵဝ် ယင်းပႆႇလႆႈႁူႉသဵၼ်ႈမၢႆမၼ်းတႅတ်ႈတေႃး၊ တိုၵ်ႉၵဵပ်းသဵၼ်ႈမၢႆမၼ်းယူႇတိၵ်းတိၵ်း။ မိူၼ်ၼင်ႇတၢင်းဝဵင်းသႅၼ်ဝီ ၸိူဝ်းၼႆႉၼႆၵေႃႈ တွၼ်ႈတႃႇၵူၼ်းသိုၵ်းႁဝ်းၶႃႈ တေလူင်းပိုၼ်ႉတီႈၽဵဝ်ႈမူၺ်ႉၼၼ်ႉ ၵွပ်ႈမၼ်းဢမ်ႇမီး လွင်ႈႁူမ်ႇလူမ်ႈတဵမ်ထူၼ်ႈလႄႈ လႆႈမႆႈၸႂ်ယူႇ၊ ၵူၺ်းၵႃႈ ႁဝ်းၶႃႈၵေႃႈလႆႈယိုၼ်ႈလိၵ်ႈထိုင်တီႈ ၸုမ်းယိပ်းၵွင်ႈၵၢင်ႇၵူႈမူႇၵူႈၸုမ်း ၸိူဝ်းတူင်ႉၼိုင်ဝႆႉယူႇ ၸွမ်းထုင်ႉၼႆႉယူႇ။ ပေႃးလႆႈတၢင်းႁူမ်ႈမိုဝ်းၵၼ်သေ ၽဵဝ်ႈမူၺ်ႉၵႂႃႇၼႆႉ မၼ်းၸင်ႇတေၸဵဝ်းထိုင်တီႈ ထိုင်လႅၼ်လႆႈ-ဝႃႈၼႆ ။


တႃႇတေၽဵဝ်ႈမူၺ်ႉယႃႈမဝ်းၵမ်ၼႆႉ ပႃႇတီႇမႂ်ႇသုင်ၸိုင်ႈတႆး/ တပ်ႉသိုၵ်းၸိုင်ႈတႆး (SSPP/SSA) ၵေႃႈ လႆႈပိုၼ်ၽၢဝ်ႇဝႆႉ ၸဵမ်မိူဝ်ႈၵွၼ်ႇပႆႇထိုင်လိူၼ်ၵျူႊလၢႆႊ (2016)။ ၼႂ်းၶေႃႈပိုၼ်ၽၢဝ်ႇၵေႃႈပႃးဝႆႉဝႃႈ ယႃႈမဝ်းၵမ်ၼႆႉပဵၼ်ၽေးၶဵၼ်လူင် တွၼ်ႈတႃႇၼႂ်းလုမ်ႈၾႃႉ၊ ပဵၼ်ၽေးၶဵၼ်လူင်တႃႇၼႂ်းၼႃႈႁိူၼ်းတႃယေး ၵူၼ်းမိူင်း ၵူၺ်းဢမ်ႇၵႃး ၸၢင်ႈတုမ်ႉတိူဝ်ႉပႃးလွင်ႈႁူမ်ႇလူမ်ႈၸိုင်ႈမိူင်း။ ၵွပ်ႈၼႆလႄႈ ၼင်ႇႁိုဝ်တေၽဵဝ်ႈမူၺ်ႉ ယႃႈမဝ်းၵမ် ႁႂ်ႈႁၢႆလႆႈၼႆႉ တၢင်းၾၢႆႇသင်ၶရႁၼ်းၶဝ်ၸဝ်ႈလႄႈသင်၊ တၢင်းပေႃႈမႄႈၵူၼ်းမိူင်းလႄႈသင် လႆႈတုၵ်းယွၼ်းမႃးတီႈ SSPP/SSA ႁႂ်ႈၵႂၢတ်ႇလၢင်ႉၽဵဝ်ႈမူၺ်ႉလႄႈ တင်ႈတႄႇႁူဝ်လိူၼ်ၵျူႊလၢႆႊမႃး ၸင်ႇလႆႈၵႂၢတ်ႇလၢင်ႉၽဵဝ်ႈမူၺ်ႉယႃႈမဝ်းၵမ်မႃး။ ပေႃးဝႃႈတီႉၺွပ်းလႆႈ ၵူၼ်းသူႇသမ်းၵိၼ်ယႃႈမဝ်းၵမ်လႄႈသင်၊ ၵႃႉၶၢႆလႄႈသင်၊ ၵူၼ်းၸိူဝ်းမီးဝႆႉၼႂ်းမိုဝ်းၸိူဝ်းၼႆႉလႄႈသင် တေပၼ်တူတ်ႈတၢမ်ႇႁၢဝ်ႈႁႅင်းၼႆၵေႃႈ လႆႈလၢတ်ႈဝႆႉၼႂ်းလိၵ်ႈပိုၼ်ၽၢဝ်ႇ ။