ၸုမ်းၼေႃႇတႅၼ်းၶိူဝ်း “တႆးၵိုင်ႇမိူင်း”လႄႈ “ၽွင်ႇတေးသျိၼ်းၵုၼ်ႁဵင်” ႁူမ်ႈၵၼ်ၸတ်းႁဵတ်း ပွႆးလူင်း ပၢင်သွၼ် Computer ပွၵ်ႈၵမ်းႁႅၵ်ႈ တီႈဝဵင်းမိူင်းပၼ်ႇ ၸိုင်ႈတႆးပွတ်းၸၢၼ်း မီးၽူႈၶဝ်ႈႁူမ်ႈမွၵ်ႈ 30 ၵေႃႉ ။

ဝၼ်းတီႈ 30/09/2016 ၸုမ်းၼေႃႇတႅၼ်းၶိူဝ်း “တႆးၵိုင်ႇမိူင်း”လႄႈ ၽွင်ႇတေးသျိၼ်းၵုၼ်ႁဵင် ႁူမ်ႈၵၼ်ၸတ်းႁဵတ်း ပွႆးလူင်းပၢင်သွၼ် Computer တီႈႁိူၼ်း ၸၢႆးလႅင်းပၢင်ႇ + ၼၢင်းမူၺ်ၽွင် ဝဵင်းမႂ်ႇ ဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း မီးၽူႈယႂ်ႇၵူၼ်းလူင် ၼႂ်းၵေႃလိၵ်ႈ လၢႆးလႄႈၾိင်ႈငႄႈတႆး ၊ ပႃႇတီႇသိူဝ်ၽိူၵ်ႇ SNDP ၽူႈယႂ်ႇၵူၼ်းလူင်ၼႂ်းဢိူင်ႇဝၢၼ်ႈ၊ ပေႃႈမႄႈလုၵ်ႈ ႁဵၼ်းၵူၼ်းၼႂ်းပိုၼ်ႉတီႈ ဢိၵ်ႇၶူးသွၼ်လႄႈလုၵ်ႈႁဵၼ်းၶဝ်ႈႁူမ်ႈ 30 ၵေႃႉ ။


ၸၢႆးပူဝ်ႇပူဝ်ႇလၢႆႇ ၽူႈပွင်ၵၢၼ် ၼႂ်းၸုမ်းၼေႃႇတႅၼ်းၶိူဝ်း “တႆးၵိုင်ႇမိူင်း” လၢတ်ႈဝႃႈ- “ ယိၼ်းၸူမ်း ယႂ်ႇၼမ်ထိုင် ၵူႈၵေႃႉဢၼ်လႆႈၸွႆႈထႅမ်ၵူႈလွင်ႈသေ ၶိုင်သၢင်ႈႁၢင်ႈပွင်ပဵၼ်မႃး ပၢင်သွၼ် Computer တေႃႇပေႃး ယဝ်ႉတူဝ်ႈၵႂႃႇလီငၢမ်း လိူဝ်ၼၼ်ႉ မိူဝ်းၼႃႈမႃးၵေႃႈ ၶႂ်ႈႁႂ်ႈၽူႈယႂ်ႇၵူၼ်းလူင်ၸွႆႈၶိုင် ၸတ်းႁဵတ်းပၢင်သွၼ်ၸိူင်ႉၼႆထႅင်ႈသေၵမ်း ”  ဝႃႈၼႆ ။


လုင်းၸၢႆးမူဝ်ၵီႈ ႁူဝ်ပဝ်ႈပႃႇတီႇသိူဝ်ၽိူၵ်ႇ ဝဵင်းမိူင်းပၼ်ႇ လၢတ်ႈဝႃႈ “ပၢင်သွၼ်ၸိူင်ႉၼႆၼႆႉ ဢမ်ႇတွၼ်ႉယၢမ်ႈမီးမႃး သေပွၵ်ႈ ၼင်ႇႁိုဝ်မိူဝ်းၼႃႈတေၶိုၼ်ႈယႂ်ႇမႃးၼၼ်ႉ ႁႂ်ႈၵူၼ်းၼုမ်ႇဢွၼ် ၵၼ်သိုပ်ႇၶတ်းၸႂ်ၵႂႃႇ သေၵမ်း ” ဝႃႈၼႆ ။


ၼၢင်းလႃႉဝႅင်း လုၵ်ႈႁဵၼ်း Computer ဢၼ်မႃးၶိုၼ်ႈႁဵၼ်းၼၼ်ႉ လၢတ်ႈဝႃႈ - “ ဢၼ်လႆႈမႃးၶိုၼ်ႈႁဵၼ်းၼႆႉ ပဵၼ်ဢၼ်မီးၽွၼ်းလီတႄႉတႄႉၶႃႈ လႆႈတၢင်းႁူႉလွင်ႈၶွမ်ႊယဝ်ႉၵေႃႈ မီးတၢင်းသိူဝ်းၸႂ် လႆႈဢူၺ်း ၵေႃႉမႂ်ႇ ဢမ်ႇဝႃႈယူႇဝၢၼ်ႈလႂ်မိူင်းလႂ်ၵေႃႈ လႆႈၵပ်းသိုပ်ႇၵၼ် ပဵၼ်ဢၼ်ယိၼ်းၸူမ်းတႄႉၶႃႈ ယဝ်ႉၵေႃႈ ၶႂ်ႈၾၢၵ်ႇထိုင် ဢူၺ်းၵေႃႉၶဝ်ဝႃႈ ယႃႇယွမ်းၵၢၼ်ႉ ႁႂ်ႈဢွၼ်ၵၼ်လဵပ်ႈႁဵၼ်းတၢင်းႁူႉ တၢင်းႁၼ်ၼမ်ၼမ်သေၵမ်း” - ဝႃႈၼႆ ။


ပၢင်သွၼ်ၶွမ်ႊၼႆႉ တႄႇဝၼ်းတီႈ 01-30 / 09/2016 ၶၢဝ်းတၢင်း 1 လိူၼ် ပူင်သွၼ်ပၼ် ပိုၼ်ႉထၢၼ်ၵၢၼ်ႁဵၼ်းလွင်ႈၶွမ်ႊ Basic Computer Training ၶူးပူင်သွၼ်ပဵၼ်ၸၢႆး ယွတ်ႈၵွၼ်ၼုမ်ႇ၊ ၸၢႆးပူဝ်ႇပူဝ်ႇလၢႆႇ၊ ၸၢႆးမွၼ်းၶမ်း မီးၸုမ်းၵူၼ်းၼုမ်ႇ ၼႂ်းၸႄႈဝဵင်းမိူင်းပၼ်ႇ မႃးၶိုၼ်ႈႁဵၼ်းဢဝ်ၸမ်20 ၵေႃႉ။ ၸတ်းႁဵတ်းၵႂႃႇတီႈ ဝဵင်းမႂ်ႇ ၸႄႈဝဵင်းမိူင်းပၼ်ႇ ၸႄႈတွၼ်ႈလၢင်းၶိူဝ်း ၸိုင်ႈတႆးပွတ်းၸၢၼ်း ။