ႁူမ်ႈလူႇတၢၼ်း သိုပ်ႇၸႆးတႃလူင် ၼႂ်းတိုဝ်ႉတၢင်းၶွပ်ႈ 67 ပီ ဝၼ်းၵိူတ်ႇၸဝ်ႈၶူးၿႃးၸၼ်ထရင်းသီ ဝတ်ႉၵူႇတဝ်ႈ ဝဵင်းၵဵင်းမႆႇ ၸိုင်ႈထႆး ။

ဝၼ်းတီႈ 1-2/10/2559(2016) ၼႆႉတီႈဝတ်ႉၵူႇတဝ်ႈ မီးပၢင်သိုပ်ႇၸႆးတႃလူင် ၼႂ်းတိုဝ်ႉတၢင်းၶွပ်ႈ ဝၼ်းၵိူတ်ႇ ၸဝ်ႈၶူးၿႃးၸၼ်ထရင်းသီ လႄႈတေလူႇတၢၼ်းယၢတ်ႇၼမ်ႉႁဵတ်းၼႃးၿုၼ်ၽႄႇၵုသူလ် ပိူဝ်ႈပဵၼ်မင်းၵလ တီႈဝတ်ႉ ၵူႇတဝ်ႈ ဢိူင်ႇသီၽုမ်း ၸႄႈဝဵင်းမိူင်း ၸႄႈတွၼ်ႈၵဵင်းမႆႇ ၸိုင်ႈထႆး ဢၼ်ပဵၼ်တီႈပၵ်းတင်ႈ ႁွင်ႈၵၢၼ်ၵေႃလိၵ်ႈလၢႆး လႄႈၾိင်ႈငႄႈတႆး ၵဵင်းမႆႇ ဢိၵ်ႇတင်း သမႃးၶူမ်းပၢႆးပၺ်ၺႃလႄႈၾိင်ႈငႄႈတႆး ။


ပိူင်ၼိုင်ႈၵေႃႈ ယွၼ်ႉလူၺ်ႈ ၸဝ်ႈၶူးၿႃးၸၼ်ထရင်းသီ ပဵၼ်ၽူႈႁၵ်ႉလႄႈမႅတ်ႇပႅင်းပႂ်ႉပႃး ၵၢၼ်ၾိင်ႈငႄႈတႆးၸဝ်ႈၼိုင်ႈ ၸင်ႇဢၼုၺၢတ်ႈပၼ်ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ဢိၵ်ႇတင်း သမႃးၶူမ်းပၢႆးပၺ်ၺႃလႄႈ ၾိင်ႈငႄႈတႆး လႆႈတင်ႈပၵ်းဢွင်ႈတီႈႁဵတ်းၵၢၼ်တီႈၼႂ်းဝတ်ႉၵူႇတဝ်ႈမႃး။ လိူဝ်သေၼၼ်ႉယင်းဢၼုၺၢတ်ႈပၼ်ဢွင်ႈတီႈ ၵေႃလိၵ်ႈ လၢႆးလႄႈၾိင်ႈငႄႈတႆးၵဵင်းမႆႇ ႁဵတ်းပွႆးပီမႂ်ႇတႆးမႃးၵူႈပီလႄႈဢွၼ်ႁဵတ်းပွႆးဢွၵ်ႇဝႃႇသႃ ပွႆးသၢင်ႇလွင်း ပၼ်တႃႇပီႈၼွင်ႉ တႆး ၸိူဝ်းၶဝ်ႈမႃးႁဵတ်းၵၢၼ်လႄႈ ပၵ်းသဝ်းယူႇၼႂ်းမိူင်းထႆးမႃးၵူႈပီ တေႃႇပေႃးပဵၼ်တီႈၵိုၵ်းပိုၼ်း လဝ်ႈၶၢၼ်ၵၼ်သေ တၢင်းၾၢႆႇၵၢၼ်ဢႅဝ်ႇတွင်ႈတဵဝ်းၸိုင်ႈထႆး ပေႃးဢဝ်သႂ်ႇဝႆႉၼႂ်းပၵ်းယဵမ်ႈဝၼ်းပဵၼ်တီႈမၢႆတွင်း လႄႈတီႈဢႅဝ်ႇတွင်ႈတဵဝ်း ။

ၼႂ်းပၢင်ပွႆးဝၼ်းၵိူတ်ႇၸဝ်ႈၶူးၿႃးၸၼ်ထရင်းသီၼႆႉ

ဝၼ်းတီႈ 1/10/2559(2016) ဝၼ်းသဝ်

- မီးၵၢၼ်သိုပ်ႇၸႆးတႃပဵၼ်လႄႈသူတ်ႇထမ်းပဵၼ်ၽွလ်းမင်းၵလ(ၵၢင်ဝၼ်း / ၵၢင်ၶိုၼ်း)
- ၵၢင်ဝၼ်း မီးသုမ်ႉၸႃႇၵ(ႁူင်းထၢၼ်း)လဵင်းၽဵလ်း(ၵၢပ်ႈသွမ်း)သင်ၶၸဝ်ႈလႄႈၽူႈမႃးႁူမ်ႈလူႇတၢၼ်း
- ၵၢင်ဝၼ်း / ၵၢင်ၶမ်ႈ မီးၵၢၼ်ၵႃႈ ႁွင်ႉၽဵင်းၵႂၢမ်းလႄႈၸိူင်းၸၢတ်ႈထႆး
  - ဝူင်းႁႆႇတိုင်ႈၶိူင်ႈလဵၼ်ႈၾိင်ႈငႄႈထႆး
  - ၵၢၼ်ႁႆႇတိုင်ႈႁွင်ႉၽဵင်းၵႂၢမ်းတႆး / ထႆး
  - ၵၢၼ်ၵႃႈဝႅၼ် လၢႆးၸိူင်း / လၢႆးယိူင်းတႆး / ထႆး

ဝၼ်းတီႈ 2/10/2559(2016) ဝၼ်းဢႃးတိတ်ႉ

- မီးၵၢၼ်သိုပ်ႇၸႆးတႃလူင်လႄႈသူတ်ႇထမ်းပဵၼ်ၽွလ်းမင်းၵလ(ၵၢင်ဝၼ်း/ၵၢင်ၶိုၼ်း)
- ၵၢင်ဝၼ်း မီးသုမ်ႉၸႃႇၵ(ႁူင်းထၢၼ်း)လဵင်ႉၽဵလ်း(ၵၢပ်ႈသွမ်း)သင်ၶၸဝ်ႈလႄႈႁူမ်ႈလူႇတၢၼ်းယၢတ်ႇၼမ်ႉ
- မီးၵၢၼ်ၵႃႈ / ႁွင်ႉၽဵင်းၵႂၢမ်းလႄႈၸိူင်းၸၢတ်ႈထႆး လဝ်ႇမူၼ်ႈတူၼ်ႈၸႂ်
  - ဝူင်းႁႆႇတိုင်ႈၶိူင်ႈလဵၼ်ႈၾိင်ႈငႄႈထႆး
  - ၵၢၼ်ႁႆႇတိုင်ႈႁွင်ႉၽဵင်းၵႂၢမ်း
  - ၵၢၼ်ၵႃႈဝႅၼ်လၢႆးၸိူင်း/လၢႆးယိူင်းတႆး/တႆး

မၢႆတွင်း***
ပီႈၼွင်ႉတႆးႁဝ်း ၽူႈလႂ်ၶႂ်ႈမႃးႁဵတ်းၵုသူလ်လူႇတၢၼ်းၸႃႇၵ(ႁူင်းထၢၼ်း)မႃးၸႅင်ႈၸိုဝ်ႈပၼ်ဝႆႉတီႈသင်ၶၸဝ်ႈ ဝတ်ႉၵူႇတဝ်ႈၵေႃႈလႆႈ ဢမ်ႇၼၼ် တီႈၵေႃလိၵ်ႈလၢႆးၵေႃႈလႆႈလႄႈၾိင်ႈငႄႈတႆးၵဵင်းမႆႇၵေႃႈလႆႈ၊ လိူဝ်ၼၼ်ႉ ၸုမ်း ပီႈၼွင်ႉတႆးႁဝ်းၸုမ်းလႂ် ၶႂ်ႈမႃးၵႃႈဝႅၼ်ပဵၼ်ၵၢၼ်ၵုသူလ် ၼႂ်းတိုဝ်ႉတၢင်းဝၼ်းၵိူတ်ႇၸဝ်ႈၶူးၿႃးပီၼႆႉၵေႃႈ ယိၼ်းၸူမ်း ႁပ်ႉတွၼ်ႈယူႇၼႆဢေႃႈ။