ၵေႃလိၵ်ႈလၢႆးလႄႈၾိင်ႈငႄႈတႆး ဢိၵ်ႇ ၸုမ်းၵူၼ်းၼုမ်ႇ ဝဵင်းပၢင်လူင် ဢွၼ်ႁူဝ်ၼမ်းၼႃႈ ပီႈၼွင်ႉၵူၼ်းမိူင်း ႁဵတ်းသၢင်ႈပိုတ်ႇပၢႆႉတၢင်းၶဝ်ႈဝဵင်းဢွၵ်ႇဝဵင်း ဢဝ်ၽႃသႃလိၵ်ႈတႆး ၼမ်းၼႃႈ ။

မိူဝ်ႈဝၼ်းတီႈ 24/09/2016 ယူႇတီႈၸုမ်း ၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းပၢင်လူင် တင်းၸုမ်းၵူၼ်းၼုမ်ႇ ဝဵင်းပၢင်လူင် ႁူမ်ႈၵၼ်ဢွၼ်ႁူဝ်ၼမ်းၼႃႈ ပေႃႈမႄႈပီႈၼွင်ႉၵူၼ်းမိူင်း ၼႂ်းၸႄႈဝဵင်းပၢင်လူင် ၸတ်းႁဵတ်း ပၢင်ပွႆးပိုတ်ႇပၢႆႉမႂ်ႇ တၢင်းၶဝ်ႈဝဵင်းဢွၵ်ႇဝဵင်း။ မီးပီႈၼွင်ႉၵူၼ်းဝၢၼ်ႈၵူၼ်းမိူင်း မႃးၶဝ်ႈႁူမ်ႈတင်းၼမ်- ၼႆယဝ်ႉ ။


ၵႅမ်ၽူႈၼမ်းၼႂ်းၵေႃလိၵ်ႈလၢႆးလႄႈၾိင်ႈငႄႈတႆး ဝဵင်းပၢင်လူင် ၸၢႆးသုၼ်ယုၵ်ႉ လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈ ဝႃႈ- ယွၼ်ႉပိူဝ်ႈဝႃႈ လႆႈၶေႃႈပူင်လူင်ပွင်ၸိုင်ႈမိူင်းတႆးသေ ပၢႆႉတၢင်းၶဝ်ႈဝဵင်းဢွၵ်ႇဝဵင်းၼႆႉ ႁဝ်းၵေႃႈၶတ်းၸႂ် သႂ်ႇႁႅင်းသေႁဵတ်းမႃး။ ဢၼ်ႁဵတ်းမႃးၸိူဝ်းၼႆႉ ႁဝ်းဢဝ်ၼမ်ႉၸႂ်ၸေႇတၼႃႇ ၽူႈႁၵ်ႉၸိူဝ်ႉၶိူဝ်း ၾိင်ႈငႄႈလိၵ်ႈလၢႆး ၼႂ်းတူင်ႇဝဵင်းပၢင်လူင်သေႁဵတ်းၵူၺ်း၊ ဢမ်ႇယွၼ်းတၢင်းၸွႆႈထႅမ်တီႈႁွင်ႈၵၢၼ်ၾၢႆႇလိူမ်ႈလႆႇ မိူင်းတႆး၊ ႁဝ်းႁဵတ်းတၢင်းႁွင်ႇဝဵင်းဢၼ်ၼိုင်ႈ တၢင်းၸၢၼ်းဝဵင်းဢၼ်ၼိုင်ႈ- ဝႃႈၼႆ ။


ပၢႆႉမႂ်ႇၶဝ်ႈဝဵင်းဢွၵ်ႇဝဵင်းၼႆႉ တႅမ်ႈဝႆႉ 3 ၽႃသႃ၊ တႆး မၢၼ်ႈ ဢိင်းၵလဵတ်ႈ။ တႄႇႁဵတ်းမိူဝ်ႈဝၼ်းတီႈ 15/06/2016 သေ ယဝ်ႉတူဝ်ႈၵႂႃႇမိူဝ်ႈၼႂ်းလိူၼ်ဢေႃႊၵတ်ႊသ်၊ ၵူၼ်းၼႂ်းဝဵင်းပၢင်လူင် ႁူမ်ႈၵၼ်သႂ်ႇငိုၼ်းသေ ႁဵတ်းသၢင်ႈမႃး။ တူၵ်းမႅၼ်ႈငိုၼ်းမၢၼ်ႈတင်းမူတ်း 79 သႅၼ် ။


ၸၢႆးသုၼ်ယုၵ်ႉ သိုပ်ႇလၢတ်ႈထႅင်ႈဝႃႈ- ပေႃးႁဝ်းၸႂ်ႉတိုဝ်းလိၵ်ႈတႆးၵေႃႈ လိၵ်ႈတႆးတေၶိုၼ်ႈယႂ်ႇမႂ်ႇသုင် ႁဝ်းၶႃႈယုမ်ႇယမ်ၸိူင်ႉၼၼ်။ ၵွပ်ႈၼၼ်လႄႈ မိူင်းတႆးတင်းလိၵ်ႈတႆးၼႆႉ မၼ်းယၢၼ်ၵၼ်ဢမ်ႇလႆႈ။ ၵွပ်ႈပိူဝ်ႈႁဝ်းယူႇၼႂ်းသိုင်ႇတိူင်းမိူင်းၽွမ်ႉႁူမ်ႈမိူင်းမၢၼ်ႈၼႆလႄႈ လိၵ်ႈမၢၼ်ႈၼႆႉၵေႃႈ ဢမ်ႇပႃးၵေႃႈဢမ်ႇပဵၼ်။ ၽႃသႃဢင်းၵိတ်ႉၼႆၵေႃႈ ၵွပ်ႈဝႃႈၸႂ်ႉၵၼ်တင်းလုမ်ႈၾႃႉလႄႈ ပေႃးတၢင်ႇၶိူဝ်းမႃးဢႅဝ်ႇမိူင်းၵေႃႈႁႂ်ႈလႆႈႁၼ်၊ ၵွပ်ႈၼၼ် ႁဝ်းလႆႈႁဵတ်းသၢင်ႈသႂ်ႇတင်း 3 ၽႃသႃ ။


ပၢႆႉဢၼ်ႁဵတ်းယူႇၵူႈဝဵင်းဝဵင်းၼႆႉ မိူင်းတႆးၼႆၵေႃႈ လႆႈႁၼ်လိၵ်ႈတႆးလႄႈ မီးတၢင်းႁူမ်ၸူမ်းသိူဝ်းတႄႉတႄႉ။ ပီႈၼွင်ႉတႆးႁဝ်းတင်းသဵင်ႈၼႆၵေႃႈ မိူင်းၽႂ်မိူင်းမၼ်း၊ ၸွမ်းဝၢၼ်ႈ ၸွမ်းသဵၼ်ႈတႃႈသၢႆတၢင်းၸိူဝ်းၼႆႉၵေႃႈ ထုၵ်ႇလႆႈတႅမ်ႈလိၵ်ႈႁဝ်း၊ ႁဝ်းထုၵ်ႇလီယုၵ်ႉယွင်ႈလိၵ်ႈလၢႆးႁဝ်း ၵွပ်ႈဝႃႈမၼ်းပဵၼ်ပုၼ်ႈၽွၼ်းပိုၼ်း။ ႁဝ်းပဵၼ်တႆး ႁဝ်းထုၵ်ႇလီမေႃလၢတ်ႈၵႂၢမ်းတႆး ႁၵ်ႉလိၵ်ႈလၢႆးတႆး ၸႂ်ႉတိုဝ်းလိၵ်ႈတႆး ၵွပ်ႈမၼ်းလမ်ႇလွင်ႈ တႃႇၸိူဝ်ႉၶိူဝ်းႁဝ်း။ ပေႃးလိၵ်ႈႁၢႆၵေႃႈၶိူဝ်းတၢႆ။ ၵွပ်ႈၼၼ် လိၵ်ႈၵေႃႈယႃႇႁႂ်ႈတၢႆၶိူဝ်းတေဢမ်ႇတၢႆၼႆႉ ႁဝ်းထုၵ်ႇလီမေႃၸႂ်ႉၵၼ်။ ယႃႇထၢင်ႇလဵၵ်ႉၶိုၼ်းလိၵ်ႈလၢႆးၸဝ်ႈၵဝ်ႇ လႄႈၸိူဝ်ႉၶိူဝ်းၸဝ်ႈၵဝ်ႇ- ဝႃႈၼႆ ။


ဝဵင်းပၢင်လူင်ၼႆႉ ပဵၼ်ၸၼ်ႉၵိင်ႇၸႄႈဝဵင်း ယူႇၼႂ်းၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ။


တင်ႈတႄႇၽွင်းႁူဝ်လိူၼ်ၵျူၼ်ႊ 2016 ၼႆႉမႃး ၸွမ်းၼင်ႇလူင်ပွင်ၸိုင်ႈၸႄႈမိူင်းတႆး ႁွင်ႈၵၢၼ်လူင် ၾၢႆႇလိူမ်ႈလႆႇ ၽွင်းလူင်ၾၢႆႇလိူမ်ႈလႆႇ ၸၢႆးသူမ်ၶျၢႆး လႆႈပိုၼ်ၽၢဝ်ႇဢၼုၺၢတ်ႈပၼ် တႅမ်ႈပၢႆႉတၢင်းၶဝ်ႈဝဵင်း ဢွၵ်ႇဝဵင်း ၶဝ်ႈဝၢၼ်ႈဢွၵ်ႇဝၢၼ်ႈ ၸွမ်းသဵၼ်ႈတႃႈသၢႆတၢင်းၸိူဝ်းၼႆႉ ပဵၼ်ၽႃသႃလိၵ်ႈလၢႆးၸၢဝ်းၶိူဝ်းၽႂ်မၼ်း ဢၼ်ယူႇသဝ်းၼႂ်းပိုၼ်ႉတီႈၼႆလႄႈ လၢႆလၢႆၸႄႈဝဵင်းၼႂ်းၸိုင်ႈတႆး လႆႈတႅမ်ႈလိၵ်ႈတႆးမႃး ။