ၸုမ်းတဢၢင်း သပ်းၸႅင်ႈၶၢဝ်ႇ ဝႃႈသိုၵ်းတႆး ပူၼ်ႉပႅၼ်သုၼ်ႇလႆႈၵူၼ်း- တၵ်းလႆႈႁႃလၢႆးတၢင်းၵႄႈ လိတ်ႈဝႆးဝႆး



ဝၼ်းတီႈ 28/09/2016 ၸုမ်းတူင်ႉၼိုင်တူင်ႇဝူင်း တဢၢင်း လၢႆမူႇလၢႆၸုမ်း ႁူမ်ႈၵၼ် ၸတ်းႁဵတ်း ပၢင်သပ်းၸႅင်ႈၶၢဝ်ႇ တီႈဝဵင်းတႃႈၵုင်ႈ ။

Photo: DVB
ဢွၵ်ႇပႃးၶေႃႈပိုၼ်ၽၢဝ်ႇ 5 ၶေႃႈ။ ၼႂ်းၼၼ်ႉပႃးဝႆႉဝႃႈ ၶွင်ႇသီႇဢဝ်ၶိုၼ်း ၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA၊ ဢမ်ႇပၼ်ပိုတ်ႇႁူင်းႁဵၼ်း၊ ၵဵပ်းသိုၵ်းမႂ်ႇ၊ လၵ်ႉ/ၸူၼ်ဢဝ်ၶူဝ်းၶွင် ၵူၼ်းမိူင်း။ တၵ်းလႆႈႁႃလၢႆးတၢင်း တႃႇဢုပ်ႇဢူဝ်းၵၼ် ဝႆးဝႆး- ဝႃႈၼႆ ။


ၵဵဝ်ႇၵပ်းလွင်ႈၼႆႉ ၸဝ်ႈသိုၵ်းလူင် ၸၢႆးလ ၽူႈၶၢၼ်ပၢၵ်ႇ ၶွင်ႇသီႇဢဝ်ၶိုၼ်းၸိုင်ႈတႆး/ တပ်ႉသိုၵ်းၸိုင်ႈတႆး RCSS/SSA လၢတ်ႈဝႃႈ “ တႃႇတေၵႄႈလိတ်ႈပၼ်ႁႃၵေႃႈႁၼ်လၢႆး တၢင်းမၼ်းယဝ်ႉ၊ ၽွင်းမိူဝ်ႈၶၢဝ်းယၢမ်းႁဝ်း တိုၵ်ႉႁႃ ၶတ်းၸႂ်တႃႇတေဢုပ်ႇၵုမ် ၵႄႈလိတ်ႈ ပၼ်ႁႃၼႆႉယူႇ၊ ယူႇတီႈတၢင်းၾၢႆႇ တဢၢင်း ၶဝ်သမ်ႉ ဢမ်ႇၶတ်းၸႂ်ႁႂ်ႈပၼ်ႁႃယွမ်းလူင်းသေ၊ ၶဝ်သမ်ႉၶိုၼ်းမႃး ၸတ်းႁဵတ်းပၢင်သပ်းၸႅင်ႈၶၢဝ်ႇ မႄႇလၢတ်ႈ/လွင်ႈဢမ်ႇၸိုဝ်ႈဢမ်ႇၸႂ်ႈ ႁဝ်းၸိူင်ႉၼႆၼႆႉ ဢမ်ႇထုၵ်ႇလီပဵၼ်” ဝႃႈၼႆ ။


ၼႂ်းၶေႃႈပိုၼ်ၽၢဝ်ႇ ၶေႃႈတီႈ 5 ၼၼ်ႉ ယူႇတီႈၸုမ်းတူင်ႉၼိုင်တူင်ႇဝူင်းတဢၢင်း တုၵ်းယွၼ်း ႁႂ်ႈၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA ထွႆထွၼ်သိုၵ်း ၵႂႃႇတၢင်းပွတ်းၸၢၼ်း ၽႂ်းၽႂ်း၊ လွင်ႈၶီႇၼဵၵ်းတဵၵ်းတဵင်ပေႉ ၵိၼ်ၵူၼ်း မိူင်း ၵူႈသမ်ႇသႅၼ်ပိူင်ၼၼ်ႉ ႁႂ်ႈၵိုတ်းယင်ႉသေၵမ်း၊ ပၼ်ႁႃ ၼႂ်းၵႄႈတပ်ႉသိုၵ်းတင်းသွင်ၾၢႆႇ RCSS/SSA တင်း TNLA ၼႆႉ ႁႂ်ႈၵိုတ်းယင်ႉသေ ႁူပ်ႉထူပ်းဢုပ်ႇဢူဝ်းၵၼ် ၽႂ်းၽႂ်း၊ ႁူင်းႁဵၼ်းၵေႃႈ ႁႂ်ႈလႆႈပိုတ်ႇသွၼ်ၶိုၼ်း လွတ်ႈလွတ်ႈလႅဝ်းလႅဝ်း၊ ယႃႇၵဵပ်းသိုၵ်း၊ ယႃႇၵဵပ်းငိုၼ်း၊ ယႃႇ တီႉၺွပ်းၵူၼ်းဢမ်ႇမီးတင်းၽိတ်း။  ႁႂ်ႈ RCSS/SSA ႁဵတ်းၸွမ်းၼင်ႇ ၶေႃႈလူင်းလၢႆးမိုဝ်းၵိုတ်းတိုၵ်းပတ်းပိုၼ်ႉတူဝ်ႈ မိူင်း NCA သေၵမ်း ဝႃႈၼႆ ။


တႄႇႁၢင်ပီ 2015 ၼႆႉမႃး တပ်ႉသိုၵ်းတဢၢင်း TNLA တင်း RCSS/SSA လႆႈပဵၼ်ပၢင် တိုၵ်းၵၼ်မႃး ၼႂ်းၸိုင်ႈတႆးပွတ်းႁွင်ႇ မိူၼ်ၼင်ႇ ၸႄႈဝဵင်းၵျွၵ်ႉမႄး၊ ၼမ်ႉၶမ်း၊ မၢၼ်ႈတူင်ႈလႄႈ လၢႆလၢႆ ၸႄႈဝဵင်း ၵူၼ်းမိူင်းပၢႆႈၽေးသိုၵ်း ၼပ်ႉႁူဝ်မိုၼ်ႇ ထိုင်ယၢမ်းလဵဝ် ယင်းပႆႇလႆႈပွၵ်ႈ ၶိုၼ်းႁိူၼ်းယေးၸဝ်ႈၵဝ်ႇၵေႃႈတိုၵ်ႉၵိုတ်းတင်းၼမ် ဝႃႈၼႆ ။


တႃႇႁႃလၢႆးတၢင်းၵႄႈလိတ်ႈပၼ်ႁႃ ၼႂ်းၵႄႈတပ်ႉသိုၵ်းတဢၢင်းလႄႈ သိုၵ်းတႆးၼႆသေ ဝၼ်းတီႈ 12/09/2016 ၼၼ်ႉ  တူဝ်တႅၼ်း သင်ၶၸဝ်ႈတင်းပႃႇတီႇတဢၢင်း လႄႈ ၶွင်ႇ သီႇဢဝ် ၶိုၼ်းၸိုင်ႈ တႆး/တပ်ႉသိုၵ်းၸိုင်ႈတႆး RCSS/SSA  ႁူပ်ႉထူပ်းဢုပ်ႇၵၼ်  တီႈဝဵင်းၵဵင်းမႆႇ ၸိုင်ႈထႆး ။




 
© 2012 All Rights Reserved | Asean Celebrity | Fonts @ AtFonts | Free Templates