ႁူင်းႁဵၼ်း ဝၢၼ်ႈတေႃႉသၢင်ႇ ၸႄႈဝဵင်းၵျွၵ်ႉမႄး ပိုတ်ႇႁူင်းႁဵၼ်း ပဵၼ်တၢင်းၵၢၼ်ၶိုၼ်းယဝ်ႉသေတႃႉ လုၵ်ႈဢွၼ်ႇ ၸိူဝ်းပၢႆႈၽေးသိုၵ်းမႃးမီးၼႂ်း ဝဵင်းၵျွၵ်ႉမႄး ပႆႇႁတ်း ပွၵ်ႈမိူဝ်းၶိုၼ်ႈႁူင်းႁဵၼ်း တီႈဝၢၼ်ႈ ၶိုၼ်း ယွၼ်ႉပႆႇတမ်းဝၢင်းၸႂ် ငဝ်းလၢႆးပၢင်တိုၵ်း- ဝႃႈၼႆ ။

လုၵ်ႈဢွၼ်ႇႁဵၼ်း ၸိူဝ်းပၢႆႈၽေးသိုၵ်း မႃးမီးတီႈဝဵင်းၵျွၵ်ႉမႄးသေပႆႇႁတ်းမိူဝ်းၶိုၼ်းဝၢၼ်ႈ ၵိုတ်းယူႇ 300 ႁပ်ႉဢဝ်တၢင်းၸွႆႈထႅမ် ယူႇသဝ်းဝႆႉတီႈ တိူၵ်ႈယႃႈယႃသိူဝ်ႁႃႈတူဝ်၊ ဝတ်ႉဢွင်ႇသုပၢၼ်ႇလႄႈ ႁူင်းသဝ်းမဵတ်ႉတႃႇ ဢူင်းဝူၺ်ႇ ၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇသေ သိုပ်ႇၶိုၼ်ႈႁဵၼ်းဝႆႉတီႈ ၼႂ်းဝဵင်းၵျွၵ်ႉမႄး ။


ၸၢႆးထုၼ်းၺၢၼ်ႇ ၽူႈတႅၼ်းသၽႃးၸႄႈမိူင်း SNLD ၶဵတ်ႇလိူၵ်ႈတင်ႈ မၢႆ 2 ဝဵင်းၵျွၵ်ႉမႄး လၢတ်ႈဝႃႈ “ ယူႇတီႈၽူႈတႅၼ်းသၽႃးၸႄႈဝဵင်းၵျွၵ်ႉမႄးသေ တပ်ႉသိုၵ်းမၢၼ်ႈလႄႈ ၸုမ်းယိပ်းၵွင်ႈၵၢင်ႇ လႆႈဢုပ်ႇဢူဝ်းငူပ်ႉငိၵၼ်သေ ပိုတ်ႇပၼ်ႁူင်းႁဵၼ်း ၼႂ်းဝၢၼ်ႈတေႃႉသၢင်ႇၶိုၼ်းယဝ်ႉ။ ၵူၺ်းၵႃႈ ၵူၼ်းၼႂ်းပိုၼ်ႉ တီႈတႄႉ ယင်းတိုၵ်ႉမႆႈၸႂ်ယူႇ ယွၼ်ႉၵူဝ်ပဵၼ်ပၢင်တိုၵ်းၵိူတ်ႇၶိုၼ်ႈမႃးထႅင်ႈ၊ ယၢမ်းလဵဝ်  လုၵ်ႈႁဵၼ်းၸိူဝ်းပွၵ်ႈမိူဝ်းၶိုၼ်ႈ ႁူင်းႁဵၼ်းၶိုၼ်းတီႈဝၢၼ်ႈ တိုၵ်ႉမီး 60 ပၢႆ၊ လုၵ်ႈႁဵၼ်းၸိူဝ်း ၵိုတ်း ယင်းပႆႇႁတ်းပွၵ်ႈၶိုၼ်း” ဝႃႈၼႆ ။


တေႃႈလဵဝ် လုၵ်ႈႁဵၼ်း ပၢႆႈၽေးသိုၵ်းၼႆႉ ၸိူဝ်းယူႇသဝ်းၼႂ်းၸႄႈဝဵင်းၵျွၵ်ႉမႄး တိုၵ်ႉလူဝ်ႇ တၢင်းၸွႆႈထႅမ် တင်းၼမ် မိူၼ် ၶိူင်ႈၸႂ်ႉသွႆ ၼႂ်းၵၢၼ်ႁဵၼ်း ၸိူဝ်းၼႆႉ ဝႃႈၼႆ ။


ပၢင်တိုၵ်း ၸႄႈဝဵင်းၵျွၵ်ႉမႄး ၸိုင်ႈတႆး ပွတ်းႁွင်ႇ တႄႇဢဝ် မိူဝ်ႈပီ 2015-2016 ၼႆႉ ပဵၼ်ပၢင်တိုၵ်း ၼႂ်းၵႄႈ တပ်ႉသိုၵ်းလူင်ပွင်ၸိုင်ႈမိူင်းမၢၼ်ႈ၊ ၶွင်ႇသီႇဢဝ်ၶိုၼ်းၸိုင်ႈတႆး/တပ်ႉသိုၵ်းၸိုင်ႈတႆး RCSS/SSA လႄႈ တပ်ႉသိုၵ်းတဢၢင်း TNLA ။ ယွၼ်ႉပၢင်တိုၵ်းသေ ၵူၼ်းမိူင်း ၼႂ်းပိုၼ်ႉတီႈ ၸႄႈဝဵင်းၵျွၵ်ႉမႄး ၼပ်ႉႁူဝ်မိုၼ်ႇလႆႈဢွၼ်ၵၼ်ပၢႆႈၽေးသိုၵ်း၊ ၼႂ်းၼၼ်ႉ ၸိူဝ်း ပၢႆႈၵႂႃႇႁဵတ်း ၵၢၼ်တၢင်း မိူင်းၶႄႇ၊ မိူင်းထႆး၊ မိူင်းၶၢင်လႄႈ တၢင်ႇဝၢၼ်ႈတၢင်ႇဝဵင်း မီးတင်းၼမ် ဝႃႈၼႆ ။