ၾၢႆႇတပ်ႉပလိၵ်ႈၵဵင်းမႆႇ ပိုၼ်ၽၢဝ်ႇဝႃႈ ႁၢတ်ႈႁၢႆးတႆး 6 ၵေႃႉ ၶဝ်ႈႁွင်ႈသေၶႃႈႁႅမ်ၵူၼ်းတၢႆၵေႃႉၼိုင်ႈ ၵေႃႉတၢႆ ပဵၼ်ၵူၼ်းၼမ်ႉၸၢင် မႃးႁႃႁဵတ်းၵၢၼ်တီႈၵဵင်းမႆႇ ။

Photo: chiangmainews.co.th

ဝၼ်းတီႈ 24/08/2016 ယၢမ်းၵၢင်ၼႂ် ၸၢႆးၺႃႇလိင်ႇ (ၸၢႆးမိူင်း) ဢႃယု 29 ပီ ပဵၼ်ၵူၼ်း ဢိူင်ႇဝၢၼ်ႈယိူင်း ၸႄႈဝဵင်းလၢႆးၶႃႈ ၸိုင်ႈတႆး ပွတ်းၸၢၼ်း ၶဝ်ႈမႃးႁဵတ်းၵၢၼ် ၼႂ်းၵဵင်းမႆႇ မီး 7 ပီပၢႆ။ မၼ်းၸၢႆး ၶၢတ်ႈႁွင်ႈယူႇသဝ်း တီႈသဵၼ်ႈတၢင်း ၵႅဝ်ႈၼဝရတ်ႉ မူႇဝၢၼ်ႈဝတ်ႉၵဵတ်ႇ ဝဵင်းၵဵင်းမႆႇ ၸိုင်ႈထႆး ထုၵ်ႇၵူၼ်းႁၢႆႉ လုၵ်ႈဢွၼ်ႇႁၢတ်ႈႁၢႆး လၢႆလၢႆၵေႃႉ ၶဝ်ႈႁွင်ႈသေ ၶႃႈႁႅမ်မၼ်းၸၢႆး တၢႆထင်တီႈ ၼႂ်းႁွင်ႈ သဝ်း မၼ်းၵမ်းသိုဝ်ႈ ၼႆယဝ်ႉ ။


ၸဝ်ႈၼႃႈတီႈပလိၵ်ႈ ႁူင်းပလိၵ်ႈမႄႈပိင်း ၵဵင်းမႆႇ သပ်းၸႅင်ႈၶၢဝ်ႇၵႂႃႇ မိူဝ်ႈဝၼ်းတီႈ 25 ၼၼ်ႉ ယၢမ်း 12:30 မူင်း ဝႃႈတီႉၺွပ်းလႆႈ ၵူၼ်းႁၢႆႉ ဢၼ်ၶႃႈႁႅမ်တၢႆ ၸၢႆးမိူင်း၊ ပဵၼ် ၸၢႆးၸၢမ်ႇ လႄႈ ၸၢႆးဝုၼ်း သႅၼ်း ဢႃယု 18-19 ပီ တင်းသွင်ၵေႃႉ။ ၸဝ်ႈၼႃႈတီႈပလိၵ်ႈၵူတ်ႇထတ်း တွင်ႈထၢမ် လႆႈႁပ်ႉႁူႉဝႃႈ ၵူၼ်းၶႃႈႁႅမ် ၸၢႆးမိူင်းတၢႆ တင်းမူတ်း တေဢမ်ႇယွမ်း 6 ၵေႃႉ ၵိုတ်းထႅင်ႈ 4 ၵေႃႉ ၸဝ်ႈၼႃႈတီႈ ပလိၵ်ႈထႆးတိုၵ်ႉ သိုပ်ႇသေႃႉႁႃတူဝ်ၶဝ်ယူႇ ဝႃႈၼႆ ။


ၸၢႆးၼုမ်ႇ ဢူၺ်းၵေႃႉၸမ်ၸႂ်တင်းၸၢႆးမိူင်း လၢတ်ႈတီႈၸုမ်းၶၢဝ်ႇၽူႈတွႆႇႁွၵ်ႈဝႃႈ “ ဢူၺ်းၵေႃႉ ၶႃႈႁဝ်း ၸၢႆးမိူင်းၼႆႉ မၼ်းႁဵတ်းႁိုဝ်သမ်ႉ ၺႃးၶႃႈတၢႆ ၶႃႈၵေႃႈ ဢမ်ႇလႆႈႁပ်ႉႁူႉ ၸွမ်းလွင်ႈမၼ်းလီ၊ တၢင်းယၢမ်း ဢူၺ်းၵေႃႉၶႃႈႁဝ်းတႄႉ ပဵၼ်ၵူၼ်းၸႂ်ဢူၼ်ႈဢွၼ်ႇ၊ ၾၢင်ႁၢင်ႈ မိူၼ်ၽူႈမႄႈ၊ ဢမ်ႇမီးမေး၊ ယူႇသဝ်းၵေႃႉလဵဝ် ပဵၼ်ၵူၼ်းၸႂ်လီ ႁဵတ်းသင်လႄႈ ၺႃးၶႃႈႁႅမ်တၢႆၼႆ ၶႃႈပေႃးဢၢမ်း လူင်ၵႂႃႇၵမ်းလဵဝ် မၼ်းၸၢႆးၼႆႉ ဢမ်ႇမေႃၵႂႃႇၽိတ်းၽႅၵ်ႇပိူၼ်ႈ။ မိူဝ်ႈလိူၼ်ႁႃႈ (ၶၢဝ်းသွၼ်းၼမ်ႉ) ၼၼ်ႉ ႁဝ်းတိုၵ်ႉၵႂႃႇဢႅဝ်ႇ ၸွမ်းၵၼ်ယူႇ” ဝႃႈၼႆ ။


သိုပ်ႇလၢတ်ႈထႅင်ႈဝႃႈ “ ၶႃႈႁဝ်း ဢမ်ႇယိုၼ်ယၼ်လႆႈလီလီ ၵွၼ်ႇဢူၺ်းၵေႃႉၶႃႈတေတၢႆၼႆႉ ဢူၺ်းၵေႃႉ ဢၼ်မၼ်းလဵၼ်ႈၵေႃႉ ထႅင်ႈၵေႃႉၼိုင်ႈၼၼ်ႉ ၶႃႈၵေႃႈဢမ်ႇလႆႈႁူႉၸၵ်း ၵေႃႉၼၼ်ႉ မၼ်းသမ်ႉၵႆႉမႃးလဵၼ်ႈၵေႃႉၸၢႆးမိူင်း တီႈႁွင်ႈသဝ်းမၼ်း ႁဵတ်းၼၼ်သေ ငိုၼ်းၸၢႆးမိူင်း သမ်ႉႁၢႆ ယူႇတီႈၸၢႆးမိူင်းသေ သမ်ႉထူဝ်းႁႃတီႈဢူၺ်းၵေႃႉမၼ်းၵေႃႉၼၼ်ႉ လွင်ႈငိုၼ်းႁၢႆသေ၊ ဢူၺ်း ၵေႃႉ ဢၼ်မၼ်းလဵၼ်ႈၵေႃႉမၼ်းၼၼ်ႉသမ်ႉ ဢမ်ႇႁၢၼ်ႉၸႂ်ၼိူဝ်မၼ်းဝႆႉ” ဝႃႈၼႆ ။


ၵဵဝ်ႇၵပ်းလွင်ႈၵၢၼ်တၢႆၼႆႉသေ ၶၢဝ်ႇထႆး ၵဵင်းမႆႇၼိဝ်း ChiangMaiNews ဢွၵ်ႇဝႆႉဝႃႈ ၸဝ်ႈၶွင်ၽူႈ လုမ်းလႃးႁွင်ႈသဝ်းမႃး ႁၼ်ၼႃႈႁွင်ႈၼွၼ်းမီးလိူတ်ႈတူၵ်း မိူဝ်ဝႆႉသေၸင်ႇလႆႈ သိုပ်ႇၾူၼ်းၸႅင်ႈ ၸဝ်ႈၼႃႈ တီႈပလိၵ်ႈၶဝ်ႈၵူတ်ႇ ထတ်း လႆႈႁပ်ႉႁူႉဝႃႈ ၸၢႆးမိူင်း ၺႃးၶႃႈႁႅမ်တၢႆ။ ပိူင်ပဵၼ် ၼႂ်းႁွင်ႈသဝ်းမီးႁွႆး မိူၼ်ႁၢင်ႈၽိတ်းၽႅၵ်ႇၵၼ်လႄႈ ၺႃးၶႃႈႁႅမ်တၢႆ မႃးႁိုင်မွၵ်ႈ 12 ၸူဝ်ႈမူင်း မၼ်းၸၢႆး မႃးၶၢတ်ႈႁွင်ႈယူႇသဝ်း တီႈ ၼိူဝ်သဵၼ်ႈတၢင်းၵႅဝ်ႈၼဝရတ်ႉ တိုၵ်ႉမီးမွၵ်ႈသွင်လိူၼ်ပၢႆ ဝႃႈၼႆ ။


ဝၼ်းတီႈ 26 ၼႆႉၸဵမ်ဢူၺ်းၵေႃႉ ဢူၺ်းသေႈ ႁူမ်ႈၵၼ်သေ ၼမ်းဢဝ်တူဝ်တၢႆ ၸၢႆးမိူင်း မႃးဝႆႉတီႈ ဝတ်ႉပႃႇပဝ်ႈ ၵဵင်းမႆႇ ၸိုင်ႈထႆး တေပူၼ်ႉၶၢပ်ႈတူဝ် ႁွပ်ႇႁူဝ်ၶဝ်ႈႁဵဝ်ႈ ဝၼ်းဢႃးတိတ်ႉတီႈ 28/08/2016 - ၼႆယဝ်ႉ။


ၸၢႆးမိူင်းၼႆႉ မႃးႁဵတ်းၵၢၼ်ၼႂ်းမိူင်းထႆး မီး 7 ပီပၢႆ ပဵၼ်ၵူၼ်းၸႃတိ ဢိူင်ႇဝၢၼ်ႈယိူင်း ၸႄႈဝဵင်းလၢႆးၶႃႈ ၸိုင်ႈတႆး ပွတ်းၸၢၼ်း မၼ်းၸၢႆးႁဵတ်း ၵၢၼ်တီႈလၢၼ်ႉၶၢႆရူတ်ႉ(ၵႃး) တီႈသဵၼ်ႈတၢင်း ၵႅဝ်ႈၼဝရတ်ႉ မူႇဝၢၼ်ႈဝတ်ႉၵဵတ်ႇ ဝဵင်းၵဵင်းမႆႇ ၸိုင်ႈထႆး ဝႃႈၼႆ ။