ၾူၼ်လူင်တူၵ်းႁႅင်းၼမ်ႉမၢဝ်းတွင်ႈၾင်ႇလႄႈ သဝ်ၾႆးၾႃႉလူမ်ႉ ၵူၼ်းမိူင်းထုင်ႉမၢဝ်း ထူပ်းတၢင်းယၢပ်ႇ



လူမ်းထွင်းပတ်ႉ ၾူၼ်တူၵ်းႁႅင်းလႄႈ ႁဵတ်းႁႂ်ႈၼမ်ႉမၢဝ်းၼွင်းလူၼ်ႉတွင်ႈၾင်ႇ သဝ်ၾႆးၾႃႉဢၼ် ပၵ်းသႅမ်းၶၢင်ႈၾင်ႇၼမ်ႉမၢဝ်းလူမ်ႉ ၾႆးၾႃႉၶၢတ်ႇ ၵူၼ်းမိူင်းယၢပ်ႇၽိုတ်ႇ ။


မိူဝ်ႈဝၼ်းတီႈ 23/08/2016 ၶၢဝ်းယၢမ်း 08:00 ၼႆႉၾူၼ်တူၵ်းႁၢဝ်ႈႁႅင်း ၼမ်ႉမၢဝ်းၼွင်းတွင်ႈၾင်ႇ လၵ်းၾႆး ဢၼ်ၵၢႆႇမႃး တၢင်းၼမ်ႉၶမ်းၼၼ်ႉလူမ်ႉ လၵ်းၾႆးမၢင်ဢၼ်တူၵ်းၼမ်ႉမၢဝ်း၊ ႁဵတ်းႁႂ်ႈ ဝဵင်းမူႇၸႄႈ၊ ဝဵင်းပၢင်သၢႆး ၾႆးမွတ်ႇ လႆႈပၼ်ႇပုတ်ႈမႅင်ႇၵၼ်ၸႂ်ႉ ။


 “ၾၢႆႇၾႆးၾႃႉၶဝ်တႄႉလၢတ်ႈဝႃႈ သဝ်ၾႆးသၢႆၾႆးၸိူဝ်းတူၵ်းၵႂႃႇၼႂ်းၼမ်ႉၼၼ်ႉ ယၢပ်ႇၽိုတ်ႇတႃႇတေ လူင်းၶူၼ်ႉႁႃ ၵူၺ်းၵႃႈႁဝ်းၶႃႈတေသိုပ်ႇၶတ်းၸႂ်ၵႂႃႇယူႇ ပေႃးႁဵတ်းသဝ်ၾႆးၾႃႉထႅင်ႈတႄႉ တေႁႂ်ႈယၢၼ်ၵႆ ၼမ်ႉမၢဝ်းမွၵ်ႈ 100 ပေႇ ၵူၺ်းၵႃႈတေပၵ်းၼႂ်းၼႃးၵူၼ်းဝၢၼ်ႈၵူၺ်းၶႃႈယဝ်ႉ ပေႃးပဵၼ်ပၵ်းၼႂ်းၼႃးၵူၼ်းဝၢၼ်ႈၵေႃႈ တေသၢႆႈတႅၼ်းပၼ်ၵႃႈလူႉသုမ်းယူႇ”ၸၢႆးဢွင်ႇ ၵူၼ်းၼႂ်းပိုၼ်ႉ တီႈလၢတ်ႈ ။


ၸၢႆးလဵၵ်း ၵူၼ်းၼုမ်ႇမူႇၸႄႈလၢတ်ႈဝႃႈ - “ တီႈဝဵင်းမူႇၸႄႈၼႆႉပၢင်တေႃႇပၢင်လွင်းၵေႃႈၼမ် ၊ ၵူၼ်းလဵၼ်ႈယႃႈမဝ်းၵမ်ၵေႃႈၼမ် ပေႃးၾႆးလပ်းၸိုင် ၵူၼ်းလၵ်ႉၵူၼ်းၸူၼ်ၵေႃႈတေတိူဝ်းၼမ်မႃး ၵွပ်ႈၼၼ်ႁဝ်းၶႃႈမႆႈၸႂ်တႄႉၶႃႈ။ မိူဝ်းလဵဝ်ၼႆႉ ႁဝ်းၶႃႈၸႅၵ်ႇပၼ်ႇပုတ်ႈၵၼ်ၸႂ်ႉၵူၺ်းၶႃႈ ၾႆးၾႃႉၼႆႉ” ဝႃႈၼႆ ။


ၼမ်ႉမၢဝ်းတွၼ်ႈၼိူဝ် ၼႂ်းမိူင်းတႆး မီးႁူင်းၾႆးၾႃႉ2 တီႈ ႁူင်းၾႆးၾႃႉမၢၼ်ႈတၢပ်ႈလႄႈ တၢတ်ႇၽီႁၢႆႉ ဢၼ်လႆႈမႃးၾႆးၾႃႉတင်းသဵင်ႈလူင်ပွင်ၸိုင်ႈမၢၼ်ႈသူင်ႇၶၢႆမိူင်းၶႄႇ ၵူၼ်းမိူင်းတႆးသမ်ႉလႆႈသိုဝ်ႉဢဝ် တီႈၶႄႇသေဢဝ်မႃးၸႂ်ႉၶိုၼ်း ။


တႄႇၵၢင်လိူၼ်ဢေႃႊၵတ်ႉသ်မႃးၼႆႉ ၸိုင်ႈတႆးပွတ်းႁွင်ႇ၊ ပွတ်းၸၢၼ်းလႄႈပွတ်းဢွၵ်ႇ ထူပ်းၺႃး ၽေးၼမ်ႉထူမ်ႈ  မိူၼ်ႈၼင်ႇ ၸႄႈဝဵင်းႁူဝ်ပၢင်ႇ ၊မိူင်းမိတ်ႈ၊ မိူင်းပၼ်ႇ၊ မိူင်းတူၼ်၊ လၢင်းၶိူဝ်း၊ၵဵင်းတုင်၊ ၵဵင်းတွင်း ၸိူဝ်းၼႆႉ ။




 
© 2012 All Rights Reserved | Asean Celebrity | Fonts @ AtFonts | Free Templates