ပီႈၼွင်ႉၵူၼ်းမိူင်း ဢိူင်ႇမိူင်းလဵၼ်ႈလႄႈ ၸုမ်းတူင်ႉၼိုင်တူင်ႇဝူင်းတႆးလၢႆမူႇလၢႆၸုမ်း ႁူမ်ႈၵၼ်ၸတ်းႁဵတ်းပၢင်ဢုပ်ႇလၢတ်ႈတၢၼ်ႈၶႆႈ လိၵ်ႈလၢႆးပၢႆးႁၼ် တီႈဝတ်ႉႁူဝ်ၼမ်ႉ ဢိူင်ႇမိူင်းလဵၼ်း၊ မီးပီႈၼွင်ႉၵူၼ်းမိူင်းၶဝ်ႈႁူမ်ႈႁပ်ႉထွမ်ႇ/ လဵပ်ႈႁဵၼ်းတင်းၼမ်လၢႆ ။

ဝၼ်းတီႈ 27/07/2016 တင်ႈတႄႇယၢမ်း13:00-16:00 မူင်းပၢႆ၊ ပီႈၼွင်ႉၵူၼ်းမိူင်းဢိူင်ႇမိူင်းလဵၼ်းလႄႈ ၸုမ်းတူင်ႇဝူင်းတႆး ႁူမ်ႈၵၼ်ၸတ်းႁဵတ်းပၢင်ဢုပ်ႇလၢတ်ႈတၢၼ်ႈၶႆႈ ပွၵ်ႈၵမ်းႁႅၵ်ႈ တီႈဝတ်ႉ/ၵျွင်းၽြႃးလူင်ၵေႃးတမ ထၢတ်ႈၸွမ်ၸႅင်ႈၵမ်မထၢၼ်းႁူဝ်ၼမ်ႉ ဢိူင်ႇမိူင်းလဵၼ်း ၵိင်ႇၸႄႈဝဵင်းတႃႈလိူဝ်ႇ ၸႄႈတွၼ်ႈတႃႈၶီႈလဵၵ်း ၸိုင်ႈတႆးပွတ်းဢွၵ်ႇ။ ၸဝ်ႈတူၼ်ၶူးဝုၼ်းမီး မႃးမွၵ်ႇလၢတ်ႈၶေႃႈၵႂၢမ်းပိုတ်ႇပၢင်ၵႂႃႇ- ၼႆယဝ်ႉ ။


ၸဝ်ႈတူၼ်ၶူးဝုၼ်းမီး မွၵ်ႇလၢတ်ႈၶေႃႈၵႂၢမ်းပိုတ်ႇပၢင်ဝႃႈ- “ ၵဵဝ်ႇၵပ်းလူၺ်ႈလွင်ႈလိၵ်ႈလၢႆးၼႆႉ တႄႇဢဝ်ပၢၼ်ၽြႃးပဵၼ်ၸဝ်ႈမႃး ပေႃႈမႄႈပီႈၼွင်ႉၸၢဝ်းၶိူဝ်းႁဝ်း လႆႈဢွၼ်ၵၼ်ႁဵၼ်းလိၵ်ႈလၢႆးမႃး ၸွမ်းလိၵ်ႈထမ်မတြႃးၵၼ်မႃး။ လိူဝ်သေၼၼ်ႉ ပၢင်သွၼ်လိၵ်ႈလၢႆးတႆးၵေႃႈ လူဝ်ႇလႆႈသွၼ်ပႃးလိၵ်းထမ်မတြႃးၸွမ်းယူႇ”- ဝႃႈၼႆ ။


ၶူးပူင်သွၼ်လုင်းၸၢႆးၾႃႈလၢတ်ႈဝႃႈ- “ ၸိူဝ်းပဵၼ်ဢွၼ်ႇႁၢႆးၸၢႆးယိင်းတင်းသဵင်ႈ ထုၵ်ႇလႆႈဢွၼ်ၵၼ်ႁဵၼ်းလိၵ်ႈလၢႆးၼမ်ၼမ်၊ မိူဝ်ႈၵႃႈၵွၼ်ႇပူၼ်ႉမႃး ၸဵမ်ပၢၼ်ပေႃႈပၢၼ်မႄႈႁဝ်းမႃးၼၼ်ႉ ႁဝ်းၶႃးလႆႈယူႇမဝ်ၵိၼ်မၢင်ၵၼ်မႃး။ လိၵ်ႈလၢႆးၼႆႉ ႁဝ်းၵႂႃႇတီႈလႂ်ၵေႃႈၶၢဝ်းယၢမ်းမီးဢိတ်းၼိုင်ႈၵေႃႈ ႁဝ်းထုၵ်ႇလႆႈၶတ်းၸႂ်ႁႃၶတ်းၸႂ်ႁဵၼ်း ၶတ်းၸႂ်တႅမ်ႈ၊ မိူၼ်ၼင်ႇပပ်ႉၼႆႉၵေႃႈ ႁႂ်ႈဝႆႉမိူၼ်ၼင်ႇဢူၺ်းၵေႃႉႁဝ်း။ သင်ပဵၼ်ဢူၺ်းၵေႃႉႁဝ်း ပဵၼ်ၵူၼ်းၸိူင်ႉၸၢင်ႈမေႃၶႃႉၸိုဝ်ႈၶၢႆသဵင်ၵၼ်၊ ပေႃးပဵၼ်ပပ်ႉလိၵ်ႈလၢႆးၼႆတႄႉ ဢဝ်ၵႂႃႇတၢင်းလႂ်ၵေႃႈ မၼ်းပဵၼ်ဢူၺ်းၵေႃႉႁဝ်း၊ တၢင်းႁူႉတၢင်းႁၼ်ၵေႃႈမီးၼႂ်းမၼ်းဝႆႉ”- ဝႃႈၼႆ ။


ႁိုၼ်း(ၵႃယၢင်း) လၢတ်ႈဝႃႈ- “ ၵူၼ်းမိူင်းႁဝ်းၶႃႈၼႆႉ ႁၢမ်းသုၼ်ႇလႆႈသုၼ်ႇပဵၼ်ၸဵမ်မိူဝ်ႈပီ 1947 ၼၼ်ႉမႃး၊ ယွၼ်ႉႁဝ်းၶႃႈဢမ်ႇလူင်ႉလႅၼ်ႇပိုၼ်း ထုၵ်ႇပိူၼ်ႈလႅၼ်ႁဝ်းမႃး။ မိူၼ်ၸိူင်ႉၼင်ႇ ပိူၼ်ႈမႃးၶုတ်းၶမ်းတီႈလွႆၶမ်းလူင် တီႈတႃႈလိူဝ်ႇမိူင်းလဵၼ်းၼႆႉ။ လုၵ်ႉဢဝ်တီႈထၢတ်ႈႁူဝ်ၼမ်ႉၼႆႉတူၺ်းၸိုင် မၼ်းတေႃႇၼႃႈၵၼ်ဝႆႉ။ ပေႃးမႃးတူၺ်းၶိုၼ်းၸိုင် ၼႂ်းသုၼ်ႇလႆႈၵူၼ်းမိူင်းႁဝ်းၼႆႉပႆႇမီးသင်။ ၶွမ်ႊပၼီႊၶဝ်မႃးၶုတ်းဢဝ်ၶမ်း။ ပိူၼ်ႈၶုတ်းဢဝ်ၶမ်းသေ ပွၵ်ႈမိူဝ်းယဝ်ႉ။ ၵမ်းၼႆႉၶီႈလိၼ်ၶီႈငႂ်ႈဢၼ်မႃးထူမ်ၼႃး/ႁႆႈၸိူဝ်းၼႆႉ မၼ်းပဵၼ်ၽွၼ်းႁၢႆႉလူင် တႃႇဝၢၼ်ႈမိူင်းႁဝ်းၸဵမ်ၸိူဝ်းၼႆႉ ႁဝ်းၶႃႈတိုၵ်ႉမီးသုၼ်ႇႁၢမ်းဝႆႉယူႇ”- ဝႃႈၼႆ ။


ပၢင်ဢုပ်ႇလၢတ်ႈတၢၼ်ႈၶႆႈၼႆႉ မီးၽူႈလူင်ႉလႅၼ်ႇမီးတၢင်းႁူႉၶဝ် မႃးဢုပ်ႇလၢတ်ႈတၢၼ်ႈၶႆႈၼႄ မိူၼ်ၶူးပူင်သွၼ်ၸၢႆးၾႃႈ၊ ၶူးႁိုၼ်း(ၵႃယၢင်း)လႄႈ ၶုၼ်ယုင်းၶဵဝ် ၸဵမ်ၸိူဝ်းၼႆႉ ။


ပီ 2016 ၼႆႉ ဢၼ်လႆႈၸတ်းႁဵတ်းပၢင်ဢုပ်ႇလၢတ်ႈတၢၼ်ႈၶႆႈ တၢင်းပွတ်းဢွၵ်ႇၶူင်း ပဵၼ်ပွၵ်ႈၵမ်းႁႅၵ်ႈ တႄႇဢဝ်ဝၼ်တီႈ 26/07/2016 ဢုပ်ႇလၢတ်ႈတီႈဝတ်ႉႁွင်ႈလိုၵ်ႉ ဝဵင်းတႃႈၶီႈလဵၵ်း၊ ဝၼ်းတီႈ27/07/2016 တီႈဝတ်ႉ/ၵျွင်းၽြႃးလူင်ၵေႃးတမ ထၢတ်ႈၸွမ်ၸႅင်ႈၵမ်မထၢၼ်းႁူဝ်ၼမ်ႉ ဢိူင်ႇမိူင်းလဵၼ်း၊ ဝၼ်းတီႈ 28/07/2016 ပဵၼ်တီႈဝတ်ႉပႃႇဝူင်း ဢိူင်ႇမၢၵ်ႇယၢင်း ၸႄႈဝဵင်းတႃႈၶီႈလဵၵ်းလႄႈ 29-31/07/2016 သမ်ႉတေသိုပ်ႇၸတ်းႁဵတ်းတီႈ မိူင်းၽျၢၵ်ႈလႄႈၵဵင်းတုင်။ ၼွၵ်ႈလိူဝ်ၼၼ်ႉ ဝၼ်းတီႈ 06/08/2016 သမ်ႉတေၸတ်းႁဵတ်း တီႈၵႃလိ ၸိုင်ႈတႆးပွတ်းၸၢၼ်း- ၼႆယဝ်ႉ ။