ၸွမ်ၽွင်းလူင်မိူင်းတႆး ဢႅဝ်ႇယဵမ်ႈသူႇၸႂ်း ပီႈၼွင်ႉၵူၼ်းမိူင်းၵဵင်းတုင် ပွၵ်ႈၵမ်းႁႅၵ်ႈ



ၸွမ်ၽွင်းလူင်မိူင်းတႆး ၻွၵ်ႊတိူဝ်ႊဢူးလိၼ်းထုတ်ႉ ႁူပ်ႉထူပ်းသူႇၸႂ်းပီႈၼွင်ႉၵူၼ်းမိူင်း ၸႄႈဝဵင်းၵဵင်းတုင် ပဵၼ်ပွၵ်ႈၵမ်းႁႅၵ်ႈ၊ ၼင်ႇႁိုဝ်တေမိုတ်ႈၵိုဝ်းႁူႉၸၵ်း တင်းပီႈၼွင်ႉၵူၼ်းမိူင်း ပွတ်းဢွၵ်ႇၶူင်း ။


ဝၼ်းတီႈ 27/07/2016 ယၢမ်း09:00 မူင်းပၢႆ ၸွမ်ၽွင်းလူင်ၻွၵ်ႊတိူဝ်ႊဢူးလိၼ်းထုတ်ႉ ႁူပ်ႉထူပ်းမိုတ်ႈၵိုဝ်းႁူႉၸၵ်း ပီႈၼွင်ႉပေႃႈမႄႈၵူၼ်းမိူင်း တီႈႁူင်းႁေႃ (မဵဝ်ႉတေႃႇၶၢၼ်းမ) ၸႄႈဝဵင်းၵဵင်းတုင် ၸိုင်ႈတႆးပွတ်းဢွၵ်ႇၶူင်း ပဵၼ်ပွၵ်ႈၵမ်းႁႅၵ်ႈ၊ မီးၸုမ်းတူင်ႉၼိုင်တူင်ႇဝူင်းၵူၼ်း၊ ၸုမ်းပႃႇတီႇၵၢၼ်မိူင်းလႄႈ ၶႃႈႁၢပ်ႇၵၢၼ်ၶုၼ်လူင်ပွင်ၸိုင်ႈ ၸဵမ်ၸိူဝ်းၼႆႉ မႃးၶဝ်ႈႁူမ်ႈႁူပ်ႉထူပ်းတင်းၼမ်လၢႆ ။


ၼၢင်းမူၼ်းတုၺ်ႈ ၽူႈပွင်ၵၢၼ်ပႃႇတီႇႁူဝ်သိူဝ် လၢတ်ႈဝႃႈ- “ ယူႇတီႈၸွမ်ၽွင်းလူင်မိူင်းတႆး ၻွၵ်ႊတိူဝ်ႊလိၼ်းထုတ်ႉ ဢၼ်မႃးႁူပ်ႉထူပ်းသူႇၸႂ်းၵူၼ်းမိူင်း သပ်းလႅင်းလၢတ်ႈၼႄ ၼႂ်းၵၢၼ်လူင်ပွင်ၸိုင်ႈမိူင်းတႆး၊ ၽႂ်ႁၢပ်ႇၵၢၼ်ႁပ်ႉပုၼ်ႈၽွၼ်းၼႃႈတီႈၾၢႆႇသင်လၢႆလၢႆ။ ယူႇတီႈၸွမ်ၽွင်းလူင် လၢတ်ႈပႃးဝႃႈ ယၢမ်းလဵဝ်ၼႆႉ ႁဝ်းၶႃႈၶဝ်တိုၵ်ႉပဵၼ်လူင်ပွင်ၸိုင်ႈမႂ်ႇ ၶိုၼ်ႈမႃးၵူၺ်းလႄႈ ပႆႇႁဵတ်းၵၢၼ်သင်လႆႈလီလီ” -ဝႃႈၼႆ ။


ၸၢႆးလူင် ၽူႈၶဝ်ႈႁူမ်ႈပၢင်ႁူပ်ႉထူပ်းၸွမ်ၽွင်းလူင် လၢတ်ႈဝႃႈ- “ၸွမ်ၽွင်းလူင်မိူင်းတႆး မႃးႁူပ်ႉထူပ်းၵူၼ်းမိူင်းပွၵ်ႈၼႆႉ ယူႇတီႈၵူၼ်းမိူင်း၊ ၸုမ်းပႃႇတီႇၵၢၼ်မိူင်းၸဵမ်ၸိူဝ်းၼႆႉ တၢင်ႇလၢတ်ႈၼႄလွင်ႈတၢင်း ဢၼ်ပဵၼ်ယူႇၼႂ်းၵဵင်းတုင် မိူၼ်ၼင်ၾႆးၾႃႉ၊ သဵၼ်ႈတႃႈသၢႆတၢင်း၊ ပၢႆးပၺ်ၺႃ၊ လွင်ႈၼမ်ႉၵိၼ်/ၼမ်ႉၸႂ်ႉ၊ ၵၢၼ်မိူင်း၊ ၵၢၼ်ပူၵ်းပွင်ၶိုၼ်ႈယႂ်ႇၼႂ်းပိုၼ်ႉတီႈ တင်းၼမ်တင်းလၢႆ- ဝႃႈၼႆ ။


ၸွမ်ၽွင်းလူင်မိူင်းတႆး ၻွၵ်ႊတိူဝ်ႊလိၼ်းထုတ်ႉ မႃးသူႇၸႂ်းဢႅဝ်ႇယဵမ်ႈ ပီႈၼွင်ႉၵူၼ်းမိူင်း ပွတ်းဢွၵ်ႇၶူင်းပွၵ်ႈၼႆႉ ပဵၼ်ပွၵ်ႈၵမ်းႁႅၵ်ႈ တႄႇဢဝ်ဝၼ်းတီႈ 24-27/07/2016 ႁူပ်ႉထူပ်းပီႈၼွင်ႉၵူၼ်းမိူင်း မိူင်းသၢတ်ႇ၊ မိူင်းတူၼ်၊ တႃႈၶီႈလဵၵ်းလႄႈ ၵဵင်းတုင် ၸဵမ်ၸိူဝ်းၼႆႉ- ဝႃႈၼႆ ။


တွၵ်ႊတိူဝ်ႊလိၼ်းထုတ်ႉၼႆႉ ၸႃႇတိတီႈၵိူတ်ႇ ဝဵင်းတႃႈၵုင်ႈ၊ ပဵၼ်မေႃယႃ ယၢမ်ႈႁၢပ်ႇၵၢၼ်ထိုင် ဝဵင်းၵူတ်ႉၶၢႆ၊ လႃႈသဵဝ်ႈ။ ၶိုၼ်ႈၶူၺ်ပီႈၼွင်ႉတႆးဝဵင်းလႃႈသဵဝ်ႈသေ ႁၢပ်ႇၵိုတ်ႉၵၢၼ်ပႃႇတီႇၼူၵ်ႉယုင်း ဢၼ်ၼၢင်းဢွင်ႇသၢၼ်းၸုၵျီႇ ဢွၼ်ႁူဝ်။ ဢိင်ၼိူဝ်မၼ်းၸၢႆးပေႉပၢင်လိူၵ်ႈတင်ႈ 2015 ၼၼ်ႉသေ လႆႈပဵၼ်ၽူႈတႅၼ်းသၽႃးမိူင်းတႆး။ ၼၢင်းဢွင်ႇသၢၼ်းယုၵ်ႇတၢင်ႇမၼ်းၸၢႆး ၶိုၼ်ႈပဵၼ်ၸွမ်ၽွင်းလူင် မိူင်းတႆး ဝႆႉ ၼႂ်းပၢၼ်လူင်ပွင်ၸိုင်ႈ 2016 – 2020 ။




 
© 2012 All Rights Reserved | Asean Celebrity | Fonts @ AtFonts | Free Templates