ပၢင်ဢုပ်ႇဢူဝ်းၵိူဝ်းၵုမ်ၵၼ် ပိူဝ်ႈတႃႇ သၢင်ႈလွင်ႈဢွမ်ႇလွမ်ႈၽွမ်ႉၵၼ် ပွၵ်ႈၵမ်းသၢမ် ဢၼ်ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ဢွၼ်ႁူဝ်ၸတ်းႁဵတ်းမႃးၼၼ်ႉ လၢႆမူႇလၢႆၸုမ်း တေႁူမ်ႈၵၼ်ထတ်းထွင် ပၵ်းပိူင်မၢႆမီႈတင်းၸိုဝ်ႈထႅ်ႈၵမ်းၼိုင်ႈ ၼႂ်းလိူၼ်ၼႃႈ ။

ၸွမ်းၼင်ႇၶေႃႈတႅပ်းတတ်း ပၢင်ၵုမ်လိူၼ်ၵွၼ်ႇသေ ပၢင်ဢုပ်ႇဢူဝ်းၵိူဝ်းၵုမ်ၵၼ် ပိူဝ်ႈတႃႇ သၢင်ႈလွင်ႈဢွမ်ႇလွမ်ႈၽွမ်ႉၵၼ် ပွၵ်ႈတီႈ 3 ၼႆႉ လႆႈၸတ်းႁဵတ်း မိူဝ်ႈဝၼ်းဢႃးတိတ်ႉ တီႈ 24/07/2016 တင်ႈတႄႇဝၢႆးဝၼ်း ယၢမ်း 1 မူင်းထိုင်ႁူဝ်ၶမ်ႈ 4 မူင်း ၊ တီႈလုမ်း ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ (ဝတ်ႉၵူႇတဝ်ႈ) ၊ ဢိူင်ႇသီၽုမ်း ဝဵင်းၵဵင်းမႆႇ ၸိုင်ႈထႆး ။ ပွၵ်ႈၼႆႉ ႁူဝ်ပဝ်ႈၵေႃလိၵ်ႈလၢႆးလႄႈ ၾိင်ႈငႄႈတႆး ၵဵင်းမႆႇ ၸၢႆးသႅင်ယ လႆႈၶဵၼ်ႇတႅမ်ႈဢွၵ်ႇမႃး ယုၵ်းယၢင်ႇမၢႆမီႈ ပိူဝ်ႈတႃႇတႅဝ်းႁူမ်ႈ မိူဝ်းၼႃႈသေ လႆႈဢၢၼ်ႇၼႄလႄႈ သပ်းလႅင်းၼႄၵႂႃႇ ၼႂ်းပၢင်ၵုမ် ။


ပၢင်ၵုမ်ပွၵ်ႈၵမ်း 3 ၼႆႉ လႆႈၸႂ်ၵၼ်ဝႆႉဝႃႈ ပၵ်းပိူင်ယုၵ်းယၢင်ႇ ဢၼ်ၸႅၵ်ႇဝႆႉပၼ်တူဝ်တႅၼ်း ၽူႈၶဝ်ႈႁူမ်ႈလၢႆမူႇလၢႆၸုမ်းၼၼ်ႉ ႁႂ်ႈမိူဝ်းၼႄမူႇၸုမ်းၽႂ်မၼ်းသေ ၶႂ်ႈထႅမ်ထွၼ်ၸိူင်ႉႁိုဝ်ၵေႃႈ ၶိုၼ်းမႃးတၢင်ႇလၢတ်ႈ တီႈပၢင်ၵုမ်တၢင်းၼႃႈ ။ လိူၼ်ၼႃႈ ဝၼ်းတီႈ 21/08/2016 မီးပၢင်ၵုမ်ပွၵ်ႈၵမ်း 4 တႃႇၵေႃႇတင်ႈတႅဝ်းႁူမ်ႈ ႁႂ်ႈၵူႈမူႇၵူႈၸုမ်း သူင်ႇတူဝ်တႅၼ်း ဢၼ်တႅပ်းတတ်းလႆႈ မႃးၶဝ်ႈႁူမ်ႈ ။ ဝၼ်းမႄႈ ဝၼ်းတီႈ 12 လိူၼ်ဢေႃႊၵတ်ႊသ်ၼႆႉ လၢႆမူႇလၢႆၸုမ်း တေၶွၼ်ႈတုမ်ႁူမ်ႈၵၼ် ႁဵတ်းၵၢၼ်တူင်ႉၼိုင် ၵႂႃႇႁူမ်ႈယွၼ်းပွၼ်းပၼ် ၸုတ်ႇတဵၼ်းၸႆး ၾႃႉၼၢင်းၸဝ်ႈႁေႃၶမ်း- ၼႆယဝ်ႉ ။


ပၢင်ၵုမ် သၢင်ႈလွင်ႈဢွမ်ႇလွမ်ႈၽွမ်ႉၵၼ် ပွၵ်ႈတီႈ 1 ဢၼ်ၸတ်းႁဵတ်း ပူၼ်ႉမႃးမိူဝ်ႈဝၼ်းတီႈ 29/05/2016 လႄႈ ပၢင်ၵုမ်ပွၵ်ႈၵမ်း 2 မိူဝ်ႈဝၼ်းတီႈ 26/06/2016 ၼၼ်ႉ မူႇၸုမ်းၸိူဝ်းၶဝ်ႈႁူမ်ႈမီး မိူၼ်ၼင်ႇ -

1.ၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ။
2.ၵွင်တိုၼ်းၸွႆႈၸၢတ်ႈ။
3.ၸုမ်းၼၢင်းယိင်းၶွင်ႊသီႊဢဝ်ၶိုၼ်းၸိုင်ႈတႆး (RCSS/SSA)
4.မုၵ်ႉၸုမ်းၸၢဝ်းၶိူဝ်းတႆး ၵဵင်းမႆႇ။
5.ၸုမ်းငဝ်းႁၢင်ႈသဵင်တႆး Tai TV ၵဵင်းမႆႇ။
6.ၸုမ်းၶၢဝ်ႇၽူႈတွႆႇႁွၵ်ႈ (SHAN) ။
7.ၸုမ်းၼုမ်ႇတႆးၵတ်းယဵၼ်။
8.ၸုမ်းၼၢင်းယိင်းတႆး ၸိုင်ႈထႆး။
9.ၸုမ်းမွၵ်ႇႁူမ်ႈႁႅင်း (ပၢႆးမွၼ်း)။
10.ႁူမ်ႈတုမ်ႁႅင်းၵၢၼ်ယၢၼ်မိူင်း။
11.ၸုမ်းႁႅင်းၵၢၼ်ၽွမ်ႉႁူမ်ႈ။
12.သိူဝ်ၶွၼ်ႈႁႅင်းဝဵင်းမိူင်းၼၢႆး ၸိူဝ်းၼႆႉ။
13.ၸုမ်း ပၢင်သွၼ်လိၵ်ႈတႆး ဝတ်ႉပႃႇပဝ်ႈ။
14. MLC (သုၼ်ၵၢၼ်ႁဵၼ်းႁႅင်းၵၢၼ်ယၢၼ်မိူင်း)။ 15. M.W.F ။ 15.မူႇၸုမ်းၸွႆႈလိူဝ်ၵူၼ်းပၢႆႈၽေးမိူင်းၸိုင်ႈတႆး ၸိူဝ်းၼႆႉ ။


ၵူၺ်းၵႃႈ ပၢင်ၵုမ်ပွၵ်ႈၵမ်းၼႆႉ ဢိင်ၼိူဝ်မီးၵၢၼ်ဢွၵ်ႇတႃႈဢွၵ်ႇတၢင်းသေ တူဝ်တႅၼ်းမၢင်မူႇၸုမ်း ဢမ်ႇလႆႈမႃးၶဝ်ႈႁူမ်ႈ ။


ၵဵဝ်ႇၵပ်းလွင်ႈၼႆႉ ႁူဝ်ပဝ်ႈၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းမႆႇ ၊ ၸၢႆးသႅင်ယ ယၢမ်ႈလၢတ်ႈဝႃႈ - ၵၢၼ်ၽွမ်ႉႁွမ်းမိုဝ်း ၶဝ်ႈႁူမ်ႈသၢင်ႈလွင်ႈယုမ်ႇယမ်ၸမ်ၸႂ်ၵၼ်ၼႆႉ ပိူဝ်ႈတႃႇ ႁႂ်ႈမီးတႅဝ်းႁူမ်ႈ ဢၼ်တေတွမ်ႁွမ်းၶွၼ်ႈႁႅင်း ၵၢၼ်တူင်ႉၼိုင်တႃႇပုၼ်ႈ သၢင်ႈၸိုဝ်ႈသဵင်လီၼႂ်းမိူင်းထႆး၊ ပုၼ်ႈတႃႇတူင်ႇဝူင်းၵူၼ်းတႆး ၊ တႃႇပုၼ်ႈၸိူဝ်ႉၸၢတ်ႈတႆး ႁူမ်ႈတင်းၵၢၼ်ၵပ်းသၢၼ်ၾၢႆႇၸဝ်ႈၼႃႈတီႈၼႂ်းမိူင်းတႆး ၸိူဝ်းၼႆႉ - ဝႃႈၼႆ ။