ၵူၼ်းမိူင်းလႄႈ သင်ၶၸဝ်ႈ ၸႄႈဝဵင်း ၵေးသီး ႁူမ်ႈၵၼ် ပႆတၢင်း ဢွၵ်ႇၼႄၵၢင်ၸႂ် သၢၼ်ၶတ်း ၵၢၼ်ၶုတ်းထၢၼ်ႇႁိၼ် တီႈၼႂ်းဢိူင်ႇမိူင်းၵၢဝ် ဢဵၼ်ႁႅင်းၵူၼ်းၶဝ်ႈႁူမ်ႈ 1600 ပၢႆ ။

ဝၼ်းတီႈ 22/07/2016 ယၢမ်း 13:00-16:30 မူင်း သင်ၶၸဝ်ႈ ၊ ပီႈၼွင်ႉၵူၼ်းမိူင်းလႄႈ ၸုမ်းၵေႃႁူမ်ႈသၢင်ႈ ၸဝ်ႈႁႆႈၸဝ်ႈၼႃး ၸိုင်းတႆး ဢွၼ်ၵၼ်ၶွၼ်ႈတုမ် တီႈဝတ်ႉမိူင်းၵၢဝ် ဢိူင်ႇမိူင်းၵၢဝ် ၸႄႈဝဵင်းၵေးသီး ၸိုင်ႈတႆး ပွတ်းၸၢၼ်း ႁူမ်ႈၵၼ် ပႆတၢင်း ဢွၵ်ႇၼႄၵၢင်ၸႂ် လွင်ႈၵၢၼ်ၶုတ်းထၢၼ်ႇႁိၼ် တီႈၼႂ်းၵႄႈဢိူင်ႇမိူင်းၵၢဝ်တင်း ၵေးသီး ၼႆယဝ်ႉ ။


ၸၢႆးၵေႃၶမ်း ၸုမ်းၵေႃႁူမ်ႈသၢင်ႈ ၸဝ်ႈႁႆႈၸဝ်ႈၼႃး ၸိုင်ႈတႆး လၢတ်ႈဝႃႈ “ ယၢမ်း 13:00 မူင်းပၢႆၼၼ်ႉ ႁဝ်းၶႃႈ ၵူၼ်းမိူင်းလႄႈ သင်ၶၸဝ်ႈ မႃးၶွၼ်ႈတုမ်ၵၼ်တီႈဝတ်ႉမိူင်းၵၢဝ် ယဝ်ႉၵေႃႈ ၸတ်းႁဵတ်းပၢင်ၵုမ် ထၢမ်ၵၢင်ၸႂ်ၵၼ် ဝႃႈ ၵူၼ်းၸိူဝ်းၵမ်ႉထႅမ်ၵၢၼ်ၶုတ်းထၢၼ်ႇႁိၼ်မီးၵႃႈႁိုဝ် ၊ ၵူၼ်းၸိူဝ်းဢမ်ႇၵမ်ႉထႅမ်သမ်ႉ မီးၵႃႈႁိုဝ် ၊ ႁဝ်းၶႃႈ လႆႈၸတ်းႁဵတ်းပၢင်တွတ်ႈၶႅပ်းၵၢင်ၸႂ်ၵၼ်၊ ၵမ်းလိုၼ်းမႃး ဢမ်ႇမီးၽႂ်ၵမ်ႉထႅမ်သေၵေႃႉ ၊ ႁဵတ်းၼၼ်သေ လႆႈၸႂ်ၵၼ်ဝႃႈ ဢွၼ်ၵၼ်ပူၵ်းပၢႆႉသေ ပႆတၢင်းဢွၵ်ႇၼႄၵၢင်ၸႂ် ဢမ်ႇႁႂ်ႈၶုတ်းထၢၼ်ႇႁိၼ် ” ဝႃႈၼႆ ။


သိုပ်ႇလၢတ်ႈထႅင်ႈဝႃႈ တီႈပၢႆႉဢၼ်ႁဝ်းၶႃႈ ဢွၼ်ၵၼ် ယိပ်းသေပႆၸွမ်းတၢင်းၼၼ်ႉ ၵမ်းၼမ်တေ တႅမ်ႈဝႆႉဝႃႈ ၵိုတ်း ၶူင်းၵၢၼ်ၶုတ်းထၢၼ်ႇႁိၼ်၊ သင်ဢမ်ႇလႆႈၶႂၢင်ႉသင်ၶၸဝ်ႈလႄႈ ပေႃႈမႄႈၵူၼ်း မိူင်းၸိုင် တေဢမ်ႇလႆႈမႃးၶုတ်းထၢၼ်ႇႁိၼ် ဝႃႈၼႆ။  လုၵ်ႉဢဝ်တီႈဝတ်ႉမိူင်းၵၢဝ် ပႆတၢင်းထိုင် ဢွင်ႈတီႈဢွၵ်ႇထၢၼ်ႇႁိၼ်ၾၢႆႇၸၢၼ်း ၸႄႈဝဵင်းၵေးသီး ” ဝႃႈၼႆ ။


ၸၢႆးထုၼ်းဢွင်ႇ ၵေႃႉၶဝ်ႈပႃးပၢင်ၼႄၵၢင်ၸႂ်ၼၼ်ႉလၢတ်ႈဝႃႈ “ လွင်ႈဢၼ်ႁဝ်းၶႃႈ ၵူၼ်းမိူင်း ႁူမ်ႈဢဵၼ်ႁူမ်ႈႁႅင်းၵၼ်သေ ဢွၵ်ႇၼႄၵၢင်ၸႂ်ၼႆႉ ယွၼ်ႉဝႃႈ မၼ်းတေတုမ်ႉတိူဝ်ႉသၽႃဝ ၼမ်ႉလိၼ် ႁိၼ်ၽႃ ၵူၼ်းမိူင်းႁဝ်း ၊ ယဝ်ႉၵေႃႈ ၼႃးႁဝ်းၶႃႈ ၸိူဝ်းဢၼ်ပိုင်ႈဢိင် မႄႈၼမ်ႉႁႅၼ်ၸိူဝ်းၼၼ်ႉ တေ ဢမ်ႇၸၢင်ႈၽုၵ်ႇသွမ်ႈႁဵတ်းၵိၼ်လဵင်ႉတွင်ႉ ႁဝ်းၶႃႈလႆႈယဝ်ႉ” ဝႃႈၼႆ ။


ၵဵဝ်ႇၵပ်းလူၺ်ႈၵၢၼ်တေၶုတ်းထၢၼ်ႇႁိၼ် ၼႂ်းၸႄႈဝဵင်းၵေးသီးၼႆႉ သဵၼ်ႈသၢႆမၢႆ ဢၼ်တေတုမ်ႉ တိူဝ်ႉ ၶူဝ်းၶွင် သူၼ်ႁႆႈၼႃးၵူၼ်းမိူင်း မိူၼ်ၼင်ႇ ဝၢၼ်ႈမိူင်းၵၢဝ် 381 ဢေႊၵႃႊ ၊ မိူင်းၼိမ် 525 ဢေႊၵႃႊ ၊ ၼႂ်းဝဵင်း(6) ပွၵ်ႉ 749 ဢေႊၵႃႊ ၊ ဝၢၼ်ႈၽုၺ်း 529 ဢေႊၵႃႊလႄႈ ဝၢၼ်ႈဝၢပ်ႈ 173 ဢေႊၵႃႊ ႁူမ်ႈၵၼ်တင်းမူတ်း 2357 ဢေႊၵႃႊ ၊ ပေႃးၶုတ်းထၢၼ်ႇႁိၼ်လႄႈ ၼမ်ႉႁွင်ႈၼမ်ႉၵေး လူႉၵွႆ ႁႅင်ႈႁိူတ်ႇၵႂႃႇၸိုင် ၼႃး 3000 ဢေႊၵႃႊၵေႃႈ တေဢမ်ႇၸၢင်ႈႁဵတ်းယဝ်ႉ ဝႃႈၼႆ ။


ပူၼ်ႉမႃး ပီ 2004 ၼၼ်ႉ မီးၶွမ်ႊပၼီႊ လၢႆဢၼ် ဢၢင်ႈမႃးၶုတ်းထၢၼ်ႇႁိၼ် ယူႇတီႈၵူၼ်းမိူင်းလႄႈသင်ၶၸဝ်ႈၼ်ႂ်းၵေးသီး ဢွၼ်ၵၼ်သၢၼ်းၶတ်းလႄႈ ၵိုတ်းယင်ႉၵႂႃႇ ၵမ်းၼိုင်ႈ ၸၢႆးၵေႃၶမ်း လၢတ်ႈၼင်ႇၼႆ ။