ပၢင်ႁူပ်ႉထူပ်းပေႃႈမႄႈလုၵ်ႈႁဵၼ်း ၸၼ်ႉၸွမ် ၸတ်းႁဵတ်း ဝၼ်းတီႈ 31/05/2016 ယၢမ်း 16:30 မူင်း တီႈၵေႃလိၵ်ႈလၢႆးလႄႈၾိင်ႈငႄႈတႆး တူၼ်ႈတီး ။ ပဵၼ်လုၵ်ႈႁဵၼ်းၵဝ်ႇလႄႈလုၵ်ႈႁဵၼ်းမႂ်ႇ ဢၼ်ၸုမ်းၵေႃလိၵ်ႈလၢႆး ဝဵင်းတူၼ်ႈတီး ၵမ်ႉၸွႆႈတႃႇႁဵၼ်းလိၵ်ႈ - ဝႃႈၼႆ ။
ၼၢင်းၼူၼ်းမူဝ် ၽူႈပွင်ၵၢၼ်ၼႂ်းၸုမ်းၵေႃလိၵ်ႈလၢႆးလႄႈၾိင်ႈငႄႈတႆး တူၼ်ႈတီး လၢတ်ႈဝႃႈ “ ယူႇတီႈၵေႃလိၵ်ႈလၢႆး တူၼ်ႈတီးသေ ၵမ်ႉၸွႆႈပၼ် လုၵ်ႈဢွၼ်ႇတႆးႁဝ်း - ၸိူဝ်းပေႃႈမႄႈဢမ်ႇပွင်ပဵၼ်လႆႈ တႃႇသိုပ်ႇႁဵၼ်းလိၵ်ႈၸိူဝ်းၼၼ်ႉ ။ ယူႇတီႈၵေႃလိၵ်ႈလၢႆးသေ ပၼ်တီႈယူႇတီႈၵိၼ် တီႈလုမ်းၵေႃလိၵ်ႈလၢႆး တူၼ်ႈတီး ။ ယဝ်ႉၵေႃႈ ၵမ်ႉၸွႆႈငိုၼ်း ၵႃႈႁူင်းႁဵၼ်း တေႃႇပေႃးယဝ်ႉၸၼ်ႉၸွမ် ” ဝႃႈၼႆ ။
သိုပ်ႇလၢတ်ႈထႅင်ႈ လုၵ်ႈႁဵၼ်း ဢၼ်တေမႃးယူႇတီႈလုမ်းၵေႃလိၵ်ႈလၢႆးသေ ၶိုၼ်ႈၸၼ်ႉၸွမ်ၼႆႉ တၵ်းလႆႈဢဝ်လိၵ်ႈၵမ်ႉထႅမ်တီႈၽူႈယႂ်ႇၵူၼ်းလူင်ဝၢၼ်ႈ / ဢိူင်ႇၽႂ်မၼ်း မႃးပႃးၸွမ်း ဝႃႈၼႆ ။
ပီ 2016 ၼႆႉ လုၵ်ႈႁဵၼ်းတႆး ဢၼ်ၵေႃလိၵ်ႈလၢႆးလႄႈ ၾိင်ႈငႄႈတႆး တူၼ်ႈတီး ၵမ်ႉၸွႆႈပၢႆးပၺ်ၺႃ ၸုပ်ႈၵဝ်ႇ/မႂ်ႇ တင်းမူတ်းမီး 51 ၵေႃႉ ။ ပဵၼ်လုၵ်ႈႁဵၼ်းၸိူဝ်းၶႅၼ်ႇလိၵ်ႈလၢႆး ၊ ႁၵ်ႉၾိင်ႈထုင်းၸဝ်ႈၵဝ်ႇသေ ဢၼ်ပေႃႈမႄႈဢမ်ႇပွင်ပဵၼ်လႆႈတႃႇၵမ်ႉၸွႆႈသိုပ်ႇႁဵၼ်းလိၵ်ႈ ဝႃႈၼႆ ။
ၵေႃလိၵ်ႈလၢႆး ဝဵင်းတူၼ်ႈတီးၼႆႉ လႆႈၵမ်ႉၸွႆႈလုၵ်ႈႁဵၼ်းတႆးမႃး ၸဵမ်မိူဝ်ႈ 2012 တေႃႇထိုင် 2016 ပဵၼ်လုၵ်ႈႁဵၼ်းတၢင်း ႁူဝ်ပုင်း ၊ ၵဵင်းတုင် ၊ တႃႈၶီႈလဵၵ်း ၊ မိူင်းတူၼ် ၊ မိူင်းပွၼ် ၊ မိူင်းၶၢၵ်ႇ ၊ ပၢင်လွင်း လႄႈႁိမ်းသၢပ်ႇဝဵင်း တူၼ်ႈတီး ၸိူဝ်းၼႆႉ ။
ပီ 2015 ၼႆႉ လုၵ်ႈဢွၼ်ႇတႆး ဢၼ်လႆႈႁပ်ႉလွင်ႈၵမ်ႉၸွႆႈတီႈ ၵေႃလိၵ်ႈလၢႆး ဝဵင်းတူၼ်ႈတီး မီး 40 ပၢႆ ။