ဝၼ်းတီႈ 06/06/2016 ၶၢဝ်းယၢမ်း 16:00-18:00 ၸုမ်းတူင်ႇဝူင်းၵူၼ်း Civil Society Organization (CSOs) ၸတ်းႁဵတ်းပၢင်ၵုမ်တႃႇႁၢင်ႈႁႅၼ်းၶဝ်ႈႁူမ်ႈပၢင်ၵုမ်လူင်21 ႁူဝ်ပၢၵ်ႇပီႈ တီႈ ႁွင်ႈပၢင် (ၵျွင်းၽြႃး) ၶရိတ်ႉယၼ်ႇ Tedim Baptist Church ၼိူဝ်ၸဵင်ႇသဵၼ်ႈတၢင်း ၿႃးၵယႃႇလႄႈ ပႁူဝ် ဝဵင်းတႃႈၵုင်ႈ ၽူႈၶဝ်ႈႁူမ်ႈမွၵ်ႈ 30 ၵေႃႉ ။
ပၢင်ၵုမ်ၼႆႉဢုပ်ႇၵုမ်ၵၼ်ပိူဝ်ႈတႃႇႁၢင်ႈႁႅၼ်းတႃႇၶဝ်ႈႁူမ်ႈ တၢင်ႇလၢတ်ႈၼႂ်းပၢင်ၵုမ်လူင်ပၢင်လူင် 21 ႁူဝ်ပၢၵ်ႇပီ မိူၼ်ၼင်ႇ လွင်ႈတူင်ႇဝူင်းၵူၼ်း၊ ပၢႆးမၢၵ်ႈမီး၊ ၶူဝ်းၶွင်ႈၾိင်ႈတိုၼ်းဢၼ်ဢွၵ်ႇၼိူဝ်လိၼ်တႂ်ႈ လိၼ်လႄႈလွင်ႈသၽႃႇဝ သိင်ႇဝႅတ်ႉလွမ်ႉၸဵမ်ၸိူဝ်းၼႆႉ ။
ၸၢႆးဢွင်ႇမိၼ်ႉဢူး ႁူဝ်ၼႃႈၵူၼ်းၼုမ်ႇ တႃႈၵုင်ႈ လၢတ်ႈဝႃႈ - “ၵူၼ်းၼုမ်ႇၵူၼ်းမိူင်းတႆးႁဝ်းၵူႈၵေႃႉ မိူၼ်ၼင်ႇၸုမ်းၵူၼ်းၼုမ်ႇ ၊ ပႃႊတီႊၵၢၼ်မိူင်း ၊ ၵေႃႁူမ်ႈသၢင်ႈၵူၼ်းၼုမ်ႇတႆး ၸိူဝ်းၼႆႉထုၵ်ႇလီၶဝ်ႈ ပႃးၼႂ်းၸုမ်း တူင်ႇဝူင်းၵူၼ်း CSO’s (ၸၼ်ႉမိူင်းႁူမ်ႈတုမ်) ပေႃးဢမ်ႇၼၼ်တႄႉႁဝ်းတေဢမ်ႇ လႆႈၶဝ်ႈပႃးၼႂ်းၶၵ်ႉၵၢၼ်ၵေႃႇသၢင်ႈလွင်ႈငမ်းယဵၼ်ယဝ်ႉဝႃႈၼႆ ”။
ၸုမ်းၵူၼ်းၼုမ်ႇမိူင်းမၢၼ်ႈပတ်းပိုၼ်ႉ Civil Society Organization (CSO’s) မီးၸုမ်းၸၢဝ်းၶိူဝ်း ႁူမ်ႈၵၼ်သေၶွတ်ႇၽွတ်ႇမႃး။ ယၢမ်းလဵဝ်မီးလုၵ်ႈၸုမ်းမွၵ်ႈ 20 ၸုမ်းပၢႆတူင်ႉၼိုင်ၼႂ်းတူင်ႇဝူင်းၵူၼ်း မိူၼ်ၼင်ႇပၼ်တၢင်းႁူႉၵူၼ်းဝၢၼ်ႈ၊ လွင်ႈပၢႆးပၺ်ၺႃႇ၊ ပၢႆးယူႇလီ၊ ပၢႆးမၢၵ်ႈမီး ၊ ပူၵ်းပွင်ၽဝၵူၼ်းမိူင်း၊ ပၼ်တၢင်းႁူႉတၢင်းႁၼ်ၵဵဝ်ႇၵပ်းၵၢၼ်ပႅင်းမႅတ်ႇႁၵ်ႉသႃတူၺ်းလူထိူၼ်ႇၶိူဝ်းၽိူဝ်မႆႉသိင်ႇဝႅတ်ႉလွမ်ႉ ႁိမ်းႁွမ်းၸဝ်ႈၵဝ်ႇ ၸဵမ်ၸိူဝ်းၼႆႉ ။