တပ်ႉသိုၵ်းမၢၼ်ႈ သူင်ႇႁႅင်းသိုၵ်းၶိုၼ်ႈထႅမ်တၢင်းလွႆၸေးလွႆလၢၼ်း ၊ ၼႂ်းၸႄႈဝဵင်းတၢင်ႉယၢၼ်း ၸိုင်ႈတႆး ပွတ်းႁွင်ႇ ၊ ပွတ်းတွၼ်ႈၾၢႆႇတူၵ်းၶူင်း ဢၼ်မီးတပ်ႉပၢင်သဝ်း SSPP/SSA ပၵ်းသဝ်းဝႆႉသေ ၾၢႆႇသိုၵ်းမၢၼ်ႈ ၸႂ်ႉထွၼ်သိုၵ်းဢွၵ်ႇပၼ် - ၾၢႆႇပွင်ႇၶၢဝ်ႇ တပ်ႉသိုၵ်းၸိုင်ႈတႆး လၢတ်ႈ ။


ပူၼ်ႉမႃးမိူဝ်ႈဝၼ်းတီႈ 24/04/2016 ဢၼ်ပဵၼ်ဝၼ်းၵိူတ်ႇ ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၶွပ်ႈၶူပ်ႇတဵမ် 52 ပီလႄႈ SSPP/SSA ၸတ်းႁဵတ်းပၢင်ပွႆး ၶုၵ်းထူပ်းတီႈငဝ်ႈငုၼ်းဝၢၼ်ႈႁႆးၼၼ်ႉ ၾၢႆႇၼိုင်ႈတၢင်းၼိုင်ႈၵေႃႈ ၾၢႆႇတပ်ႉသိုၵ်းမၢၼ်ႈ (တပ်ႉမတေႃႇ) ထႅမ်ႁႅင်းသိုၵ်းၶိုၼ်ႈ တၢင်းတၢင်ႉယၢၼ်း ၊ လူတ်ႉၵႃးသိုၵ်း 10 လမ်းပၢႆ ။

ၵၢၼ်တူင်ႉၼိုင်ၵၢၼ်သိုၵ်း မိူဝ်ႈပၢင်ပွႆးၶုၵ်းထူပ်း ဝၼ်းၵေႃႇတင်ႈ တပ်ႉသိုၵ်းၸိုင်ႈတႆး ၶွပ်ႈၶူပ်ႇ 52 ပီ တီႈငဝ်ႈငုၼ်းဝၢၼ်ႈႁႆး

ၵဵဝ်ႇၵပ်းလွင်ႈၼႆႉ ၽွင်းၼႂ်းလိူၼ်ဢေႊပရိူဝ်ႊလ် ဝူင်ႈတီႈ 3 ၊ ၾၢႆႇတပ်ႉသိုၵ်းမၢၼ်ႈ ၽူႈၵွၼ်းတိူင်းသိုၵ်း ၸဵင်ႇႁွင်ႇဝၼ်းဢွၵ်ႇ (ၶမယ) လႃႈသဵဝ်ႈ၊ ၸီႉသင်ႇႁႂ်ႈ SSPP/SSA ထွၼ်ထွႆဢွၵ်ႇ တပ်ႉပၢင်သဝ်း ဢၼ်ပၵ်းၼိူဝ်သၼ်လွႆၸေးလွႆလၢၼ်း ။ ပူၼ်ႉမႃးမိူဝ်ႈဝၼ်းတီႈ 22/04/2016 ႁႂ်ႈပဵၼ်ဝၼ်းလိုၼ်းသုတ်း ႁႂ်ႈၶၢႆႉထွၼ်သိုၵ်းဢွၵ်ႇပၼ် ။


ၵူၺ်းၵႃႈ ထိုင်မႃးမိူဝ်ႈဝၼ်းတီႈ 22/04/2016 ၊ ဢၼ်တတ်းမၵ်းဝႆႉ ႁႂ်ႈပဵၼ်ဝၼ်းလိုၼ်းသုတ်း ႁႂ်ႈၶၢႆႉထွၼ်သိုၵ်း ဢွၵ်ႇပၼ်ၼႆႉ ယူႇတီႈတူဝ်ၽူႈၵွၼ်းတိူင်းသိုၵ်း လႃႈသဵဝ်ႈ ၶိုၼ်းႁွင်ႉႁူပ်ႉထူပ်း ၽူႈၼင်ႈလုမ်း ၾၢႆႇၵပ်းသၢၼ် SSPP/SSA ဢၼ်ပၵ်းတီႈလႃႈသဵဝ်ႈ (ၸိုင်ႈတႆးပွတ်းႁွင်ႇ) သေလၢတ်ႈဝႃႈ - ၼႂ်းဝၼ်းတီႈ 27 ၼႆႉ ၶႂ်ႈႁႂ်ႈၽူႈၵွၼ်းတပ်ႉ ၽူႈၵွၼ်းၽႅၼ်ၵၢၼ်လၢႆးတိုၵ်း (ပိဝ်ႇႁႃႇမူး) ၼႂ်းပိုၼ်ႉတီႈတင်းသွင်ၾၢႆႇ လႆႈႁူမ်ႈမိုဝ်းၵၼ်သေ လူင်းၵူတ်ႇထတ်း တပ်ႉပၢင်သဝ်း ၼႂ်းပိုၼ်ႉတီႈၸွမ်းၵၼ် ။


ၵဵဝ်ႇၵပ်းလွင်ႈၼႆႉ ၽူႈၶၢၼ်ပၢၵ်ႇ SSPP/SSA ၸဝ်ႈသိုၵ်းလူင်ၸၢႆးလႃႉ လၢတ်ႈဝႃႈ - ဢၼ်ၶဝ်တုၵ်းယွၼ်းမႃးဝႃႈ ႁႂ်ႈလူင်းၵူတ်ႇထတ်းပိုၼ်ႉတီႈၼႃႈလိၼ်ၸွမ်းၵၼ် ဢၼ်ဝႃႈၼၼ်ႉ ၾၢႆႇႁဝ်းပႆႇလႆႈတုမ်ႉတွပ်ႇလၢတ်ႈပၼ်ၶိုၼ်း ၊ ႁဝ်းၶႃႈတေလႆႈႁဵတ်းပၢင်ၵုမ် ၶွမ်ႊမတီႊငဝ်ႈငုၼ်းၵွၼ်ႇ ၊ တေထွၼ်ပၼ် ဢမ်ႇထွၼ်ပၼ်ၼၼ်ႉ ယင်းပႆႇလႆႈတႅပ်းတတ်း ။ ပေႃးႁဝ်းထွၼ်ပၼ်တိၵ်းတိၵ်းၵေႃႈ ႁဝ်းဢမ်ႇမီးတီႈယူႇယ ဝ်ႉ၊ ၵွပ်ႈၼၼ် တီႈလွႆၸေးလွႆလၢၼ်းၼႆႉ တႃႇတေထွၼ်ထွႆပၼ်ဢမ်ႇမီး ။


သိုပ်ႇလၢတ်ႈဝႃႈ - ပေႃးတူၺ်းၵူႈပွၵ်ႈပူၼ်ႉမႃးၵေႃႈ ပေႃးၶဝ်လၢတ်ႈၸိူင်ႉၼႆယဝ်ႉ ၶဝ်တိုၼ်းႁၢင်ႈႁႅၼ်း သိုၵ်းၶိုၼ်ႈမႃးလေႃႇတိုၵ်းႁဝ်း ။ ၵွပ်ႈၼၼ် ၸိူင်ႉၼင်ႇငဝ်းလၢႆးတေႃႈလဵဝ်ၼႆႉ ႁဝ်းၵေႃႈလႆႈႁၢင်ႈႁႅၼ်းဝႆႉ ဢဵၼ်ႁႅင်းသိုၵ်းႁဝ်းယဝ်ႉ ။ ပေႃးဢဝ်ၵၢင်ၸႂ်တပ်ႉမတေႃႇၶဝ်တႄႉ ၶႂ်ႈႁႂ်ႈႁဝ်းယူႇသဝ်းတီႈဝၢၼ်ႈႁႆးၵူၺ်း။ ဢၼ်ႁဝ်းပႆႇတုမ်ႉတွပ်ႇပၼ်ၶိုၼ်း လွင်ႈထွၼ်ပၼ် ဢမ်ႇထွၼ်ပၼ်ၼၼ်ႉ  ယွၼ်ႉပိူဝ်ႈဝႃႈ ႁဝ်းတင်းၶဝ် သွင်ၾၢႆႇ ပႆႇလႆႈတႅပ်းတတ်းမၵ်းမၼ်ႈၵၼ်ဝႃႈ တေလႆႈယူႇတီႈၼၼ်ႈတီႈၼႆႈ ။ ႁဝ်းၵေႃႈယူႇမႃးတီႈၼႆႈၼႆႉ လႆႈ 50 ပီပၢႆယဝ်ႉလူး - ဝႃႈၼႆ ။


ၵဵဝ်ႇၵပ်းလွင်ႈၼႆႉ ၽူႈၵွၼ်းလုမ်းမိူင်းႁူမ်ႈတုမ် (PI) ၸဝ်ႈၶိုၼ်းသႂ် ၵေႃႈလၢတ်ႈဝႃႈ - ပေႃးတူၺ်းငဝ်းလၢႆး မၼ်းၸိုင် ၵႃႈၸူဝ်ႈပႆႇဢုပ်ႇဢူဝ်းၵၢၼ်မိူင်းၵၼ် ၼႂ်းပၢၼ်လူင်ပွင်ၸိုင်ႈမႂ်ႇၼႆႉ  ၾၢႆႇသိုၵ်းတပ်ႉမတေႃႇမၢၼ်ႈ ၶဝ် လွင်ႈႁူမ်ႇငမ်းၵုမ်းၵမ်လႆႈပိုၼ်ႉတီႈၼႃႈလိၼ်ၼႆႉ လႆႈဝႆႉၵႃႈႁိုဝ်ၵေႃႈၶဝ်ၶႂ်ႈဢဝ်ဝႆႉတိၵ်းတိၵ်း ။ ၵူၺ်းၵႃႈ ပေႃးႁဵတ်းၸိူင်ႉၼႆ မၼ်းၸၢင်ႈတုမ်ႉတိူဝ်ႉလွင်ႈယုမ်ႇယမ်ၵၼ် - ဝႃႈၼႆ ။


ၽူႈၵွၼ်းသိုၵ်း SSPP/SSA ၼႂ်းပိုၼ်ႉတီႈၸဝ်ႈၼိုင်ႈ ၵေႃႈလၢတ်ႈဝႃႈ - ပူၼ်ႉမႃးမိူဝ်ႈၼႂ်းပီ 2012 ၼၼ်ႉၵေႃႈ ၾၢႆႇသိုၵ်းမၢၼ်ႈၶဝ်ယိုၼ်ႈယွၼ်းမႃးဝႃႈ တေၶႂ်ႈမႃးၵူတ်ႇထတ်း / လတ်းၽၢၼ်ႇၼႂ်းပိုၼ်ႉတီႈ ၊ ဝၢႆးၼၼ်ႉၵေႃႈ ႁႅၼ်းသိုၵ်းမႃးလေႃႇတိုၵ်းတပ်ႉသိုၵ်းၸိုင်ႈတႆး တီႈတႃႈသၢမ်ပူး ။ ထိုင်မႃးၼႂ်းပီ 2014 တီႈတႃႈၽႃသွင်ႇ ဢၼ်မီးၼႂ်းၵႄႈၵၢင်ၵေးသီး - သီႇပေႃႉၵေႃႈ တေႃႈၼင်ႇၼၼ် ၊ ၾၢႆႇသိုၵ်းမၢၼ်ႈၶဝ်ယွၼ်းမႃးၵူတ်ႇထတ်း ၼႂ်းပိုၼ်ႉတီႈသေ ဢမ်ႇႁိုင်ဢမ်ႇၼၢၼ်းၵေႃႈ ႁႅၼ်းသိုၵ်းမႃးလေႃႇတိုၵ်း ၊ ယိုဝ်းၵွင်ႈလူင်သႂ်ႇ - ဝႃႈၼႆ ။


ပႃႊတီႊမႂ်ႇသုင်ၸိုင်ႈတႆး / တပ်ႉသိုၵ်းၸိုင်ႈတႆး (SSPP/SSA) ၼႆႉ ႁူမ်ႈဝႃႈဢမ်ႇလူင်းလၢႆးမိုဝ်း ၵိုတ်းယိုဝ်း တူဝ်ႈမိူင်း (NCA) သေတႃႉၵေႃႈ ပဵၼ်ၸုမ်းဢၼ်ၶဝ်ႈပႃး ၼႂ်းၸုမ်းၶဵၼ်ႇတႅမ်ႈၶေႃႈၵိၼ်ၵႅၼ်ႇ လိၵ်ႈႁူမ်ႈမၢႆ NCA ။ လိူဝ်သေၼၼ်ႉ မိူဝ်ႈပၢၼ်လူင်ပွင်ၸိုင်ႈတဵင်းၸဵင်ႇ ယိုၼ်ႈယွၼ်းမႃးတႃႇဢုပ်ႇဢူဝ်း ၵေႃႇသၢင်ႈလွင်ႈငမ်းယဵၼ် ၼၼ်ႉၵေႃႈ လႆႈလူင်းလၢႆးမိုဝ်း ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ်ဝႆႉ ။