ပၢင်ပွႆးႁပ်ႉၸုမ်ႈၶူး ၸၼ်ႉၸွမ်မႁႃၸူလႃး မိူင်းၵွၵ်ႇ ၽွင်းၵၢင်လိူၼ်ၼႃႈ ၊ သင်ၶတႆး လႆႈႁပ်ႉပုၼ်ႈၽွၼ်းၶဝ်ႈပႃး ႁၢပ်ႇၼႃႈၵၢၼ် ၼပ်ႉသိပ်းၸဝ်ႈ လႆႈႁပ်ႉၸုမ်ႈၶူး ၊ ပႃးၸဵမ်ၵႅမ်ၸွမ်ၸိုင်ႈၵဝ်ႇ ၻွၵ်ႊတိူဝ်ႊၸၢႆးမွၵ်ႇၶမ်း ။

ပေႃးထိုင်မႃးၼႂ်းလိူၼ်မေႊ ဝၼ်းတီႈ 15/05/2016 ၼႆႉ တၢင်းၸၼ်ႉၸွမ်မႁႃၸူလႃး ၵုင်းထဵပ်ႈ (မိူင်းၵွၵ်ႇ) ၸိုင်ႈထႆး ၊ တေၸတ်းႁဵတ်းပၢင်ပွႆးမွပ်ႈၸုမ်ႈၶူးပၼ် လုၵ်ႈႁဵၼ်းၼႂ်းမိူင်းၼွၵ်ႈမိူင်း ၸိူဝ်းႁဵၼ်းယဝ်ႉၸၼ်ႉ Ph.D, M.A, B.A, ၸိူဝ်းၼႆႉ။ တီႈၼႂ်းပၢင်ႁပ်ႉၸုမ်ႈပီၼႆႉ တေမီးပႃးလုၵ်ႈႁဵၼ်းသင်ၶတႆး ဢၼ်ယဝ်ႉၸၼ်ႉ M.A, 3 ၸဝ်ႈလႄႈ B.A, 15 ၸဝ်ႈ ။


လိူဝ်သေၼၼ်ႉ တေမီးပႃးၵူၼ်းမိူင်း ၼႂ်းၸိုင်ႈမိူင်းႁူမ်ႈတုမ်မျၢၼ်ႇမႃႇ ၵမ်ႈၽွင်ႈ တေမႃးႁပ်ႉၸုမ်ႈၶူးၸွမ်း ၊ ၼႂ်းၼၼ်ႉပႃး ၻွၵ်ႊတိူဝ်ႊၸၢႆးမွၵ်ႇၶမ်း ၵႅမ်ၸွမ်ၸိုင်ႈၵဝ်ႇ ၵေႃႉၼိုင်ႈ ။ ၸုမ်ႈဢၼ်ၻွၵ်ႊတိူဝ်ႊၸၢႆးမွၵ်ႇၶမ်း တေလႆႈႁပ်ႉၼၼ်ႉ ပဵၼ်ၸၼ်ႉၶိုၵ်ႉတွၼ်း Ph.D, ။


ဢိင်ၼိူဝ်လွင်ႈၼႆႉသေ ၸုမ်းပွင်ၵၢၼ်ၸတ်းႁဵတ်းပၢင်ႁပ်ႉၸုမ်ႈၶူး တီႈၸၼ်ႉၸွမ်ၶဝ် ၸႅၵ်ႇၼႃႈၵၢၼ်ၵၼ် ႁႂ်ႈၸုမ်းသင်ၶတႆး လႆႈပဵၼ်ၽူႈၸွႆႈႁၢပ်ႇၵၢၼ်ၸုမ်းၼိုင်ႈ ။ ၵွပ်ႈၼၼ် ပူၼ်ႉမႃးမိူဝ်ႈဝၼ်းတီႈ 17/04/2016 ၼၼ်ႉ ၸုမ်းသင်ၶတႆး ၸင်ႇဢုပ်ႇၵုမ်ၵၼ်သေဝၢင်းၽႅၼ်ဝႆႉ လွင်ႈၼႃႈၵၢၼ်ၽႂ်မၼ်း ။ ထိုင်မႃးဝၼ်းတီႈ 24/04/2016 ၼၼ်ႉသမ်ႉ ၸင်ႇယိုၼ်ႈမိုဝ်းႁႃတၵ်ႉၵႃႇသတ်ႉထႃး လၢႆမူႇၸုမ်းၼႂ်းမိူင်းၵွၵ်ႇသေယဝ်ႉ ဢုပ်ႇၵၼ်ၵႂႃႇထႅင်ႈ တႃႇႁဵတ်းသၢင်ႈၼႃႈၵၢၼ်တႃငၢၼ်းလၢႆၸိူဝ်ႉလၢႆပိူင် ။


ၼႂ်းဝၼ်းတီႈ 24 ၼၼ်ႉၵူၺ်းၼင်ႇၵဝ်ႇ ၸုမ်းသင်ၶၸဝ်ႈဢွၼ်ႁူဝ်ဢဝ်ပုၼ်ႈၽွၼ်းသေ ဝွၵ်ႇၸိူၼ်း(ၽိတ်ႈမွၵ်ႇ) ထိုင်ၸုမ်းတႆး ၼႂ်းၵုင်းထဵပ်ႈ (မိူင်းၵွၵ်ႇ) 31 ၸုမ်း မႃးၶဝ်ႈႁူမ်ႈလႄႈ ၶဝ်ႈၸွႆႈၵၢၼ်ၼႂ်းပၢင်ပွႆး ။ ၼႂ်းၵဵင်းမႆႇၵေႃႈ လႆႈမွၵ်ႇထိုင်ဝႆႉပႃး 15 ၸုမ်း ႁႂ်ႈမႃးၶဝ်ႈႁူမ်ႈပၢင်ပွႆး - ၼႆယူႇ ။


ၼႂ်းပၢင်ပွႆးႁပ်ႉၸုမ်ႈၶူးပီၼႆႉ တေၸတ်းႁဵတ်းၶိုၵ်ႉၶၢႆးလိူဝ်ၵူႈပီ။ ဝၼ်းတီႈ 15/05/2016 ၶၢဝ်းယၢမ်းၵၢင်ၼႂ် တေႃႇထိုင် 3 မူင်းဝၢႆးဝၼ်း ၊ တေမီးပၢင်ၵႃႈဝႅၼ် ၼႄၾိင်ႈႁိတ်ႈႁွႆးတႆး ၊ ႁူမ်ၸူမ်းၸွမ်းၽူႈႁပ်ႉၸုမ်ႈၶူးၶဝ် ၸွမ်းၼင်ႇႁဵတ်းၵူႈပီ ။ ၶၢဝ်းယၢမ်း 4 မူင်းႁူဝ်ၶမ်ႈ တေမီးပၢင်ယွင်ႈၵုၼ်းမုၼ် ၻွၵ်ႊတိူဝ်ႊၸၢႆးမွၵ်ႇၶမ်း ၼႂ်းႁွင်ႈပၢင်ၵုမ် Meeting room D Classroom ၊ ၽူႈၶဝ်ႈႁူမ်ႈပၢင်ၵုမ်ၼၼ်ႉ တေမီးၽူႈယႂ်ႇၵူၼ်းလူင် ၼႂ်းၸၼ်ႉၸွမ်လၢႆလၢႆၸဝ်ႈလႄႈ ၽူႈယႂ်ႇၵူၼ်းလူင်ၾၢႆႇထႆးၾၢႆႇမၢၼ်ႈ လၢႆၵေႃႉတေမႃးၶဝ်ႈႁူမ်ႈ ။


ၽူႈၵွၼ်း ၸၼ်ႉၸွမ်မႁႃၸူလႃး ၽရႃႉၽရူမ်းပၼ်းၻိတ်ႇ พระพรหมบัณฑิต (ประยูรธมฺมจิตฺโตป.ธ.๙, ศ.,ดร.) တေမႃးပဵၼ်ၽူႈပိုတ်ႇပၢင်ၵုမ်ပၼ်သေ ၵၢဝ်ႇလၢတ်ႈၶေႃႈၵႂၢမ်း ။


ၼႂ်းပၢင်ယွင်ႈၵုၼ်းမုၼ် ၻွၵ်ႊတိူဝ်ႊၸၢႆးမွၵ်ႇၶမ်းၼၼ်ႉ တေမီးၽူႈလူင်ႉလႅၼ်ႇ ပႃမွၵ်ႉၶ ၸဝ်ႈတူၼ်ၶူးလူင်ထမ်းမသႃမိ လႄႈ ဢူးဝိၼ်းဢွင်ႇ (ၸဝ်ႈၼႃႈတီႈႁွင်ႈၵၢၼ်ႁိူၼ်းၽွင်းတၢင်မၢၼ်ႈ ၼႂ်းမိူင်းၵွၵ်ႇ) ၸိူဝ်းၼႆႉ မႃးၵၢဝ်ႇလၢတ်ႈၶေႃႈၵႂၢမ်း ။