ဝၼ်းတီႈ 25/04/2016 ၸဝ်ႈၼႃႈတီႈပလိၵ်ႈထႆး  မႄႈသၢႆလႄႈမႄႈၸၼ်း ၸႄႈတွၼ်ႈ ၵဵင်းႁၢႆး ၸိုင်ႈထႆးပွတ်းႁွင်ႇ တီႉၺွပ်းလႆႈၵူၼ်းၵႃႉယႃႈ ဢၼ်လုၵ်ႉတၢင်းမိူင်းမၢၼ်ႈမႃး 2 ၵေႃႉ ။ ပဵၼ်တႆးတၢင်းသွင် ။

ပလိၵ်ႈထႆးတီႉၺွပ်း ၼၢင်းၶမ်းမူဝ် (Nan Kham Mo) ဢႃယု 32 ပီ  ၶီႇရူတ်ႉတူႈ လုၵ်ႉမႄႈသၢႆ တေၵႂႃႇၵဵင်းႁၢႆး  လူၺ်ႈ ယႃဢၢႆႉသ် 2 ၵီႊလူဝ်ႊ  သႂ်ႇဝႆႉလေႃးၵၼ်တၢင်း ထူင်ၽၵ်းသူမ်ႈမွင်   လႄႈငိုၼ်းထႆး 20,000 ၿၢတ်ႇ ။


ဝၼ်းလဵဝ်ၵၼ်ၼၼ်ႉၵူၺ်း ၸဝ်ႈၼႃႈတီႈ ႁူင်းပလိၵ်ႈတီႈမႄႈသၢႆၵေႃႈ တီႉၺွပ်း  လႆႈယႃႈမ 3760 မဵတ်ႉၼႂ်းမိုဝ်း ၸၢႆးၶမ်း (SAI KHAN) ဢႃယု 28 ပီ ။


ၶၢဝ်ႇထႆး  Manager Online ဢွၵ်ႇဝႆႉဝႃႈ တၢင်းသွင်ၵေႃႉၼႆႉပဵၼ်ၸၢဝ်းတႆး ၊ ၵူၼ်းမိူင်းမၢၼ်ႈ ။ ယၢမ်းလဵဝ် ၶဝ်သွင်ၵေႃႉၼႆႉ ၸဝ်ႈၼႃႈတီႈ တီႉဝႆႉယဝ်ႉသေတေပၼ်တူတ်ႈတၢမ်ႇၵႂႃႇ ၸွမ်းၼင်ႇပၵ်းပိူင်ဝၢၼ်ႈမိူင်းမီးၼၼ်ႉဝႃႈၼႆ ။


မိူဝ်ႈ ဝၼ်းတီႈ 26 /03/2016 ၼၼ်ႉၵေႃႈၸဝ်ႈၼႃႈတီႈပလိၵ်ႈထႆး  ပႂ်ႉၵူတ်ႇထတ်း ၼိူဝ် သဵၼ်ႈတၢင်း ဝၢၼ်ႈလဝ်ႉလိဝ်ႇ ၸႄႈဝဵင်းမႄႈၾႃႉလူင် ၸႄႈတွၼ်ႈၵဵင်းႁၢႆး ၸိုင်ႈထႆး ပွတ်း ႁွင်ႇ ၊ ၺွပ်းလႆႈယႃႈမႃႉမိၵ်ႈ 999 တႃႇ 24 မတ်ႉ ၊ ၼိုင်ႈမတ်ႉလႂ်မီး 2,000 မဵတ်ႉႁူမ်ႈ တင်း သဵင်ႈ 48,000 မဵတ်ႉ ။ ၵူၺ်းၵႃႈ ၵူၼ်းၵႃႉတႄႉပၢႆႈလွတ်ႈ ဝႆႉဝႃႈၼႆ ။


ၶေႃႈမုလ်းတီႈ MGR Online