လုၵ်ႈဢွၼ်ႇယိင်းၸၢႆး ဝဵင်းၵျွၵ်ႉမႄး ဢႅဝ်ႇလဵၼ်ႈၼႂ်းသူၼ် ယဵပ်းၺႃးမၢၵ်ႇတၢႆ 1 ၵေႃႉမၢတ်ႇၸဵပ်း 1 ၵေႃႉ ၵူၼ်းၼႂ်းပိုၼ်ႉတီႈလၢတ်ႈ ။


ဝၼ်းတီႈ 22/04/2016 ယၢမ်း 17:00 မူင်း လုၵ်ႈဢွၼ်ႇၸၢႆးလႄႈယိင်းၵႂႃႇလႄႇလဵၼ်ႈတီႈသူၼ် မၢၵ်ႇၶိူဝ်ၼႂ်းဝၢၼ်ႈသေ ၵႂႃႇယဵပ်ႇၺႃးမၢၵ်ႇ ႁဵတ်းႁႂ်ႈတၢႆထင်တီႈ 1 ၵေႃႉ မၢတ်ႇၸဵပ်းၼိုင်ႈၵေႃႉ ယိင်းၸႃႇၸႃႇလႅင်ႇ ဢႃယု 12 ပီ ၵေႃႉပဵၼ်လုၵ်ႈယိင်း ၸၢႆးပီး လႄႈ ၼၢင်းငူၺ်ႇၶႅင်ႇ တၢႆထင်တီႈ ၊ ၸၢႆးဢွင်ႇဢွင်ႇ လုၵ်ႈၸၢႆး လုင်းထုၼ်းငူၺ်ႇ မၢတ်ႇၸဵပ်း ။ တီႈဝၢၼ်ႈပၢင်ၸလွပ်ႈ ယူႇၼႂ်းၵႄႈၵၢင် ဝၢၼ်ႈၼမ်ႉလိၼ်းပူင်း လႄႈ ဝၢၼ်ႈလွႆၵူင် ဢိူင်ႇလွႆၵူင် ၸႄႈဝဵင်းၵျွၵ်ႉမႄး ၸိုင်ႈတႆးပွတ်းႁွင်ႇ ။

ၵူၼ်းၼႂ်းပိုၼ်ႉတီႈ လၢတ်ႈဝႃႈ - “ လုၵ်ႈဢွၼ်ႇယိင်းၸၢႆးၼႆႉၶဝ်ဢွၼ်ၵၼ်ၵႂႃႇလဵၼ်ႈၼႂ်းသူၼ်မၢၵ်ႇ ၶိူဝ်သေ ၵႂႃႇယဵပ်ႇၺႃးမၢၵ်ႇဢၼ်သိုၵ်းမၢၼ်ႈ မႃးလိုဝ်ႈၼႂ်းဝၢၼ်ႈ ဝၼ်းတီႈ 12 – 21 /04/2016 တီႈမၢၵ်ႇတမ်းဝႆႉလႄႈတီႈဢၼ်ၶဝ်ပႂ်ႉယၢမ်း ယၢၼ်ၵၼ်မွၵ်ႈ 5 – 10 ဝႃး ၵူၼ်းဝၢၼ်ႈ တႄႉထၢင်ႇ ထိူမ်ဝႃႈၶဝ်ၾင်ဝႆႉသေလိုမ်းသိမ်းၶိုၼ်း ” ၼႆယဝ်ႉ ။


ၵူၼ်းၼႂ်းပိုၼ်ႉတီႈဢမ်ႇၶႂ်ႈဢွၵ်ႇၸိုဝ်ႈၵေႃႉၼိုင်ႈလၢတ်ႈထႅင်ႈဝႃႈ - “ ပီႈၼွင်ႉၵူၼ်းဝၢၼ်ႈထုၵ်ႇလီၾၢင်ႉ လွင်ႈၵႂႃႇလွင်ႈပႆၼမ်ၼမ်ယူႇ ၵၢင်ၶမ်ႈၵၢင်ႈၶိုၼ်းႁႂ်ႈၸႂ်ႉတိုဝ်းၾႆးသၢႆလႅင်းလီသေဢွၵ်ႇတင်းၼွၵ်ႈပေႃး ၵႂႃႇလႄႇထိူၼ်ႇၸိုင် ယႃႇပေၵႂႃႇၸပ်းၵၼ်ၸမ်ၵၼ်ၼႃႇပူၼ်ႉတီႈ ႁႂ်ႈယူႇႁၢင်ႇၵႆၵၼ်ဝႆႉ ယွၼ်ႉပိူဝ်ႈ မၢၵ်ႇဢၼ်ႁၢင်ႈဝႆႉၼၼ်ႉ ဢမ်ႇႁူႉဝႃႈတေမီးၸွၵ်ႉလႂ်ၸဵင်ႇလႂ် ။ သင်ဝႃႈယူႇႁၢင်ႇၵႆၵၼ်ၸိုင်ပေႃး ၽႃႇၺႃးမၢၵ်ႇတႅၵ်ႇတေဢမ်ႇတိူဝ်ႉၵူႈၵေႃႉ လႄႈတေၸၢင်ႈတူၺ်းထိုင် ၵၼ်ၶိုတ်းၶၢဝ်းယၢမ်းလႆႈ မၢၵ်ႇၵၢပ်ႈပၢၼ်ယၢမ်းလဵဝ် ၵမ်ႉၼမ်တေၸႂ်ႉတိုဝ်းလီးမုတ်ႇၶွၼ်ႇထရူဝ်း ပေႃးၽုၺ်ႇၽူင်းမိုဝ်းထိုဝ် ဢမ်ႇၼၼ် ဢွမ်မွင်းၵေႃႈ မၢၵ်ႇဢၼ်ႁၢင်ႈဝႆႉၼၼ်ႉတေဢဝ်သဵင်မၼ်းဢမ်ႇၼၼ်ထၢတ်ႈမၼ်း သေတေၸၢင်ႈတႅၵ်ႇငၢႆႈ ” ဝႃႈၼႆ ။


မိူဝ်ႈပီ 2015/11/30 ၼၼ်ႉၵေႃႈ မုၼ်ၸၢင်း 2 တူၼ် ၊ ၸဝ်ႈသၢင်ႇ 2 တူၼ် ၊ ယူႇဝတ်ႉ / ၵျွင်းၵုင်း တေႃႇ ဝၢၼ်ႈၼႃးၵၢင်း ဢိူင်ႇၼႃးၵၢင်း ၸႄႈဝဵင်းမိူင်းၼွင် ယေႃးတူဝ်ၵႂႃႇဢၢပ်ႇၼမ်ႉတီႈၼမ်ႉႁွင်ႈ လု (လွၼ်ႇ) ၵႂႃႇ 1 တူၼ်ႈမၢတ်ႇၸဵပ်း 4 တူၼ် ႁွင်ႈလူင် ၾၢႆႇဢွၵ်ႇဝတ်ႉ ၊ ဢၼ်မီးၾၢႆႇတူၵ်းဝဵင်း မိူင်းၼွင် ။ ၵွပ်ႈတၢင်းႁူၵ်ႉလႄႈ လႆႈယဵပ်ႇၺႃးမၢၵ်ႇတႅၵ်ႇ ဢၼ်မီးၵၢၼ်ႁၢင်ႈၵၢင်ဝႆႉ ၊ လႆႈတိူဝ်ႉဝၢတ်ႇ ၸဵပ်းတင်း 4 တူၼ် – ၼႆယဝ်ႉ ။