လုၵ်ႇဢွၼ်ႇၸၢႆးဝဵင်းၼမ်ႉၶမ်း ဢႃယု 17 ပီ ၵေႃႉၵႂႃႇဢႅဝ်ႇၽွင်းပွႆးသွၼ်းၼမ်ႉ ဝႄႉလဵၼ်ႈၼမ်ႉ မၢဝ်းလွင်လႆၸွမ်းၼမ်ႉၸူမ်တၢႆ - လႆႈႁႃတူဝ်တၢႆလၢႆဝၼ်း ။


ဝၼ်းတီႈ 12/04/2016 ယၢမ်း 10 မူင်းပၢႆ ၸၢႆးလူႇလႅင်း တင်းဢူၺ်းၵေႃႉသိပ်းပၢႆ ဢွၼ်ၵႂႃႇႁႃမွၵ်ႇ ၵေႃႇသွႆး ၼႃးၶၢဝ်းႁူတ်းၼမ်ႉ ဝႄႉလဵၼ်ႈၼမ်ႉ တီႈတႃႈႁိူဝ်းႁူဝ်လွင်း (ပၢင်ႇဝၢၼ်ႇ) ၼမ်ႉမၢဝ်း ၾၢႆႇႁွင်ႇ ဝဵင်းၼမ်ႉၶမ်း လႆႈၸူမ်ႁၢႆလူႉတၢႆၵႂႃႇ ။

ဢူၺ်းၵေႃႉ ဢၼ်ၵႂႃႇၸွမ်းၵေႃႉၼိုင်ႈလၢတ်ႈဝႃႈ “ ႁဝ်းၶႃႈလႆႈႁၼ်မၼ်းၸၢႆးလွၼ်ႈၶူဝ်းလဵင်းမၼ်းဝႆႉ သေလုၵ်ႉတီႈပႃႈတႂ်ႈထဵင်တႃႈႁိူဝ်း လမ်းၸွမ်းပႃလူင် ဢၼ်မၼ်းၸၢႆးႁၼ်ၼႂ်းတႃမၼ်းလမ်းၵႂႃႇ ၸွမ်းပႃၼႆဝႃႈ တီႈဢၼ်မၼ်းတူၵ်းတၢႆၼၼ်ႉ တိုင်းၼမ်ႉလိုၵ်ႉၵႂၢင်ႈႁဝ်းၶႃႈ သွင်သၢမ်ၵေႃႉ လမ်းၸွမ်း လင်မၼ်းၸၢႆးၵေႃႈ ဢမ်ႇၶိုတ်း မၼ်းၸၢႆးတႄႉတူၵ်းၵႂႃႇတီႈၼႂ်းတိုင်းၼၼ်ႉ ဢမ်ႇႁၼ် တူဝ်တၢႆ / တူဝ်လိပ်းၽူးၶိုၼ်ႈမႃး သေဢိတ်းၶႃႈ ။ ၼႂ်းတႃမၼ်းသမ်ႉႁၼ်ပႃလူင်သေ လမ်းၵႂႃႇၼႆ ႁဝ်းၶႃႈသမ်ႉ ဢမ်ႇႁၼ်ပႃသေတူဝ် ” ဝႃႈၼႆ ။


ၸၢႆးဢွၼ်ပိုၼ်တႆး ၵူၼ်းပိုၼ်ႉတီႈတႄႉလၢတ်ႈဝႃႈ “ ၵူၼ်းဝၢၼ်ႈႁွင်းလူင်လႄႈ ၸိူဝ်ႉၶိူဝ်းပီႈၼွင်ႉ ၸၢႆးလူႇလႅင်း ဢွၼ်ၵၼ်ႁႃၶၢပ်ႈတူဝ်တၢႆမၼ်းၸၢႆး လၢႆလၢႆဝၼ်းဢမ်ႇႁၼ်၊ ထိုင်မႃးဝၼ်းတီႈ 16/04/2016 ယၢမ်း 11 မူင်း ၸင်ႇတေႁၼ်ၶၢပ်ႈတူဝ်တၢႆမၼ်းၸၢႆး ၾၢႆႇတႂ်ႈ ၼၼ်ႉ ” ဝႃႈၼႆ ။


ထိုင်မႃး ဝၼ်းတီႈ 17 သမ်ႉၸွမ်းၼင်ႇႁိတ်ႈႁွႆး ပုတ်ႉထသႃသၼႃသေ ဢွၼ်ၵၼ်ႁၢင်ႈႁႅၼ်းလူႇ တၢၼ်းယၢတ်ႇၼမ်ႉၶႂမ်ႈတဝ်ႈ တီႈႁိူၼ်းၶိင်းသွႆႈၶမ်းႁိူင်းၸၢႆးမိၼ်ႉလႄႈ ၼၢႆးသွႆႈၶမ်းႁိူင်းထူၺ်းၶမ်း ဝၢၼ်ႈႁွင်းလူင် ၸႄႈဝဵင်းၼမ်ႉၶမ်း ၼႆယဝ်ႉ ။


ၸၢႆးလူႇလႅင်းၼႆႉ ဢႃယုလႆႈ 17 ပီ ပဵၼ်လုၵ်ႈၸၢႆး ၸၢႆးမိၼ်ႉ လႄႈ ၼၢင်းထူၺ်းၶမ်းယူႇဝၢၼ်ႈ ႁွင်းလူင် ဝဵင်းၼမ်ႉၶမ်း ႁဵတ်းၵၢၼ်ႁေႃႈရူတ်ႉ / ၵႃး တင်ႇၵုၼ်ႇမိူင်းၶႄႇလႄႈ မိူင်းမၢၼ်ႈ ၼႆယဝ်ႉ ။