ႁွင်ႈၵၢၼ်ၾၢႆႇတေႃႉသူင်ႇမိူင်းထႆးပိုၼ်ၽၢဝ်ႇၶဵင်ႈၶႅင်ၵၢၼ်ႁေႃႈရူတ်ႉၵႃးၼိူဝ်သဵၼ်ႈတႃႈသၢႆတၢင်းဢွၵ်ႇပိူင်ၽူႈတေႁဵတ်းဝႂ်ၶပ်းၶီႇရူတ်ႉၵႃးတေလႆႈတွပ်ႇၶေႃႈထၢမ်လႆႈ 100% လႄႈတေလႆႈမီးဝႂ်ႁပ်ႉႁွင်းတီႈ ႁူင်းႁဵၼ်းသွၼ်ၶပ်းရူတ်ႉ ။

ဝၼ်းတီႈ 19/04/2016 ဢႃးၶူမ်း တိူမ်းၽိထယႃႊၽႆႊသိတ်ႇ ၽွင်းလူင်ႁွင်ႈၵၢၼ် ၾၢႆႇတေႃႉသူင်ႇ ဢွၵ်ႇပိုၼ်ၽၢဝ်ႇဝၢႆးလင်လႆႈၶဝ်ႈႁူမ်ႈပၢင်ၵုမ်သၽႃးဝႃႈ - ၸွမ်သိုၵ်းလူင်ပရႃႊယုတ်ႊ ၸၼ်ႊဢူဝ်ႊၶျႃး ၸွမ်ၽွင်းလူင်မိူင်းထႆးသင်ႇႁႂ်ႈႁွင်ႈၵၢၼ်ၾၢႆႇတေႃႉသူင်ႇမိူင်းထႆးၶဵင်ႈၶႅင်ၵၢၼ်ႁဵတ်းဢွၵ်ႇပၼ်ဝႂ်ၶပ်းၶီႇ ႁေႃႈရူတ်ႉၵႃးၵူႈၸိူဝ်းပိူဝ်ႈလူတ်းယွမ်းၽေးၵိုင်ႉၵၢင်ႉၼိူဝ်သဵၼ်ႈတႃႈသၢႆတၢင်း ။


ယိူင်းဢၢၼ်းဢၼ်ဢွၵ်ႇပၵ်းပိူင်ဢၼ်ၼႆႉတႄႉၼင်ႇႁိုဝ်ၵူၼ်းဝၢၼ်ႈၵူၼ်းမိူင်းပေႃးတေဝႆႉၼၵ်းၼႃၼိူဝ်ၵၢၼ်ႁေႃႈရူတ်ႉၵႃးၼႆယဝ်ႉ ။ ထႅင်ႈလွင်ႈၼိုင်ႈၵေႃႈယွၼ်ႉပိူဝ်ႈဝႃႈမိူဝ်ႈပၢင်ပွႆးသွၼ်းၼမ်ႉပူၼ်ႉမႃးၼႆႉ မီးၽေးၵိုင်ႉၵၢင်ႉၼိူဝ်သဵၼ်ႈတႃႈသၢႆတၢင်းၼမ်တႄႉတႄႉ ။ ၵမ်ႈၼမ်ယွၼ်ႉၵူၼ်း မဝ်းလဝ်ႈ ၊ လပ်းၼႂ်းလႄႈၶပ်းရူတ်ႉဝႆးပူၼ်ႉတီႈဝႃႈၼႆ ။


ဢႃးၶူမ်းသိုပ်ႇလၢတ်ႈဝႃႈလႆႈၸီႉသင်ႇၵႂႃႇတီႈႁွင်ႈၵၢၼ်ၾၢႆတေႃႉသူင်ႇယဝ်ႉဝႃႈႁႂ်ႈထတ်းသၢင်တူၺ်းၶိုၼ်းပိူင်တႃႇတေႁဵတ်းပၼ်ဝႂ်ၶႂၢင်ႉႁေႃႈရူတ်ႉၵႃးမိူၼ်ၼင်ႇလုၵ်ႉတီႈ 90% ပဵၼ် 100 % ၸိူဝ်းဢၼ် ၵႂႃႇတေႃႇမၼ်းၵေႃႈတေလႆႈၶိုၼ်းတွပ်ႇၶေႃႈထၢမ်ထႅင်ႈဝႃႈၼႆ ။


လိူဝ်သေၼၼ်ႉတေဢွၵ်ႇပၵ်းပိူင်ႁႂ်ႈၽူႈတီႈတေယိုၼ်ႈယွၼ်းဝႂ်ဢၼုၺၢတ်ႉၼၼ်ႉတေလႆႈမီးဝႂ်ႁပ်ႉႁွင်းတီႈႁူင်းႁဵၼ်းသွၼ်ၶပ်းရူတ်ႉၵႃးၸွမ်း။သင်ဢမ်ႇမီးဝႂ်ၼႆတေဢမ်ႇပၼ်ဝႂ်ၶႂၢင်ႉၶပ်းရူတ်ႉၼႆယဝ်ႉ ။ ပၵ်းပိူင်ၼႆႉၸွမ်ၽွင်းလူင်ၸိုင်ႈထႆးႁႂ်ႈၶပ်းၶိုင်ၼႂ်းၶၢဝ်းတၢင်း 3 လိူၼ်ဝႃႈၼႆ ။


ဢွၼ်တၢင်းသုတ်းတႄႉတေၵႄႈလိတ်ႈပၼ်ႁႃရူတ်ႉၶိူင်ႈပဵၼ်ပိူင်လူင်ယွၼ်ႉဝႃႈပဵၼ်ၽေးၵိုင်ႉၵၢင်ႉၼမ်လိူဝ်ပိူၼ်ႈယၢမ်းလဵဝ်ၵူၼ်းၸႂ်ႉရူတ်ႉၶိူင်ႈပတ်းပိုၼ်ႉမိူင်းထႆးမီး 20 လၢၼ်ႉၵေႃႉဢၼ်မီးဝႂ်ၶပ်းၶီႇမီး 50% ဢမ်ႇၼၼ် 10 လၢၼ်ႉၵေႃႉၵူၺ်းၵွပ်ႈ ၼၼ်သိုပ်ႇၼႆႉၵႂႃႇ ၸဝ်ႈၼႃႈတီႈ တေၵူတ်ႇ ထတ်းၵႂႃႇႁၢဝ်ႈ ႁႅင်းၼႆယဝ်ႉ ။


ၶေႃႈမုလ်းတီႈ Matichon