ၽွင်းႁၢင်လိူၼ်ပူၼ်ႉ မႃးတေႃႇထိုင်ႁူဝ်လိူၼ် ၻီႊသႅမ်ႊၿိူဝ်ႊ (2015) ၼႆႉ ၵဵဝ်ႇၵပ်းလွင်ႈ ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) လႆႈပဵၼ်ပၢင်တိုၵ်း တၢင်းမိူင်းဝီး ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇၼၼ်ႉ ၸုမ်းၶၢဝ်ႇၽူႈတွႆႇႁွၵ်ႈ တွင်ႈထၢမ်သေ ၽူႈၶၢၼ်ပၢၵ်ႇ RCSS/SSA ၸဝ်ႈသိုၵ်းလူင်ၸၢႆးလႃႉ တွပ်ႇလၢတ်ႈၼင်ႇၼႆ ။

ထၢမ် - မိူဝ်ႈပူၼ်ႉမႃး 4-5 ဝၼ်း တေႃႇထိုင်မိူဝ်ႈဝႃး (02/12/2015) ၵေႃႈ လႆႈပဵၼ်ပၢင်တိုၵ်းၵၼ် တင်း TNLA ၶၢဝ်းယၢဝ်း ၊ မီး 4-5 ဝၼ်းယဝ်ႉ။ လွင်ႈလႆႈပဵၼ်ပၢင်တိုၵ်းၼၼ်ႉ ပဵၼ်ၸိူင်ႉႁိုဝ် ပိုင်ႈလၢတ်ႈၼႄၽွင်ႈၶႃႈ ?။


တွပ်ႇ - တေတႄႇလၢတ်ႈတီႈ ၼႃႈလိၼ်သိုၵ်း 701 ။ ၼႃႈလိၼ်သိုၵ်း 701 ၼႆႉ ႁဝ်းၶႃႈလႆႈၵႂႃႇပၵ်းယူႇသဝ်းဝႆႉတီႈ 701 ၼႆႉ ၸဵမ်မိူဝ်ႈပီ 2005 ၸိူဝ်းၼၼ်ႉ ။ ဢွၼ်ၼၼ်ႉၵေႃႈ ၸုမ်းၸဝ်ႈၸၢႆးယီႈ ဢၼ်မႃးႁူမ်ႈႁွမ်းႁဝ်းၶႃႈ RCSS/SSA ဢၼ်ပဵၼ် SSNA ၶဝ်ပၵ်းသဝ်းယူႇၸွမ်းၵေႃႈမီး ။ ၵွပ်ႈၼၼ် ႁဝ်းၶႃႈၶိုၼ်းယူႇၶိုၼ်းၼႃႈတီႈၵဝ်ႇႁဝ်း တီႈၼၼ်ႈသေ တင်ႈၸိုဝ်ႈမႃး ၼႃႈလိၼ်သိုၵ်း 701 ။ တီႈလူင်ပွင်ၸိုင်ႈမၢၼ်ႈၶဝ်ၵေႃႈ ၽွင်းႁဝ်းၵိုတ်းတိုၵ်းၵၼ်ၼၼ်ႉ ႁဝ်းလႆႈလၢတ်ႈၼႄ လူင်ပွင်ၸိုင်ႈဝႆႉယူႇဝႃႈ ႁဝ်းၶႃႈယူႇတီႈၼၼ်ႈ ။ ၶဝ်ၸဝ်ႈၵေႃႈပၼ်ႁဝ်းယူႇ ၊ ၵူၺ်းၵႃႈ ဝၢႆးၼၼ်ႉမႃး ႁဝ်းပဵၼ်ပၢင်တိုၵ်းၵၼ်သေ ႁဝ်းၶႃႈဢမ်ႇပဵၼ်ပၢင်သဝ်း ၊ ပဵၼ်လၢႆးသိုၵ်းမုတ်းသေယူႇဝႆႉ ။ လွင်ႈပဵၼ်မႃးၶွင် ၼႃႈလိၼ်သိုၵ်း 701 ၼႆႉ မီးၸိူင်ႉၼႆ ။


ဝၢႆးသေႁဝ်းၶႃႈ လူင်းလၢႆးမိုဝ်းၵိုတ်းတိုၵ်း ပတ်းပိုၼ်ႉတူဝ်ႈမိူင်း (NCA) ယဝ်ႉ ႁႅင်းၵူၼ်းၵမ်ႈၽွင်ႈ မႃးသွၼ်ၵၢၼ် ၵဵဝ်ႇၵပ်းပေႃႇလသီႇ ၵဵဝ်ႇၵပ်းၵၢၼ်ၵိုတ်းတိုၵ်း ပတ်းပိုၼ်ႉတူဝ်ႈမိူင်းသေ ပွၵ်ႈၶိုၼ်းမိူဝ်း ။ ဝူင်ႈၵၢင်ၶိုၼ်းပွၵ်ႈမိူဝ်းတၢင်း ၼမ်ႉၶမ်းၼၼ်ႉ လႆႈထုၵ်ႇသိုၵ်း PSLF/TNLA ၸုမ်းပလွင်ႈၶဝ်  ပႂ်ႉတိုၵ်းယိုဝ်းၸွမ်းတၢင်းလႄႈ လႆႈပဵၼ်ပၢင်တိုၵ်းၵၼ်ၵႂႃႇ ။ ပၢင်တိုၵ်းတႄႇဝၼ်းတီႈ 27  ၽႄႈလၢမ်းမႃး တေႃႇထိုင်မိူဝ်ႈဝႃး ။


ထၢမ် - ဢၼ်လႆႈပဵၼ်ပၢင်တိုၵ်းၵၼ် ၼႂ်းပိုၼ်ႉတီႈၼႆႉၶႃႈလူး၊ ငဝ်းလၢႆးပဵၼ်ၸိူင်ႉႁိုဝ်ၶႃႈ ?။


တွပ်ႇ - တီႈၼၼ်ႈၼႆႉ တေႃႇထိုင်မိူဝ်ႈဝၼ်းတီႈ 01/12/2015 ၼႆႉ ဢၼ် TNLA ၶဝ်ပႂ်ႉမူၵ်းယိုဝ်းႁဝ်းၶႃႈ ၸွမ်းတႃႈၸွမ်းတၢင်းၼႆႉ ႁဵတ်းႁႂ်ႈၾၢႆႇ RCSS/SSA လႆႈတူၵ်းသုမ်းၵႂႃႇ 3 ၵေႃႉ ၊ ဝၢတ်ႇၸဵပ်းၵႂႃႇ 7 ၵေႃႉ ၊ ၼႂ်းၼႆႉ ဢၼ်ႁၢဝ်ႈႁႅင်း 2 ၵေႃႉ ၊ ဢိတ်းဢွတ်း 5 ၵေႃႉ ။ ႁၢႆလၢႆဝႆႉၼႂ်းပၢင်တိုၵ်း မိူၼ်တပ်ႉ TNLA တီႉၺွပ်းၵႂႃႇသေယဝ်ႉ ဢဝ်ၵႂႃႇၶႃႈတၢႆ ၊ ဢဝ်ဢွၵ်ႇၾၢင်ႁၢင်ႈ ဢၼ်ပႃးတင်းၸိူၵ်ႈမတ်ႉသေ ဢဝ်တၢႆဝႆႉ ၊ ၼႂ်းႁၢင်ႈဢၼ်ၵိုၵ်းၸွမ်းၶေႃႈပိုၼ်ၽၢဝ်ႇၶဝ် မိူဝ်ႈဝၼ်းတီႈ 01/12/2015 ၼၼ်ႉ ။ တင်းမူတ်းတင်းသဵင်ႈ ဢၼ်ႁဝ်းၶႃႈလႆႈလူႉသုမ်းၵႂႃႇတင်းဝၢတ်ႇၸဵပ်း တင်းႁၢႆလၢႆ တင်းတၢႆ မီးမွၵ်ႈ 10 ပၢႆ ။


ထၢမ် - ပေႃးဝႃႈႁဝ်းၶႃႈတူၺ်း ငဝ်းလၢႆးမိူဝ်ႈလဵဝ်ၼႆႉ မိူၼ်ၸိူင်ႉၼင်ႇၾၢႆႇ TNLA ၶဝ်ဝႃႈ ပဵၼ်ပိုၼ်ႉတီႈၶဝ်ၵုမ်းၵမ် ။ ၵဵဝ်ႇၵပ်းလွင်ႈ ပဵၼ်ပၼ်ႁႃၼႃႈလိၼ်ၼႆႉ တၢင်းRCSS/SSA ထတ်းသၢင် ႁၼ်ထိုင်ၸိူင်ႉႁိုဝ်ၶႃႈ ?။


တွပ်ႇ - မိူင်းၼမ်ႉၶမ်းၼႆႉ ယင်းပႆႇလႆႈငိၼ်းၽႂ်မၵ်းမၢႆဝႃႈ ပဵၼ်မိူင်းပလွင်ႈ ။ ၵွပ်ႈၼၼ် ၸႄႈဝဵင်းၼမ်ႉၶမ်းၼႆႉ ဢမ်ႇၸႂ်ႈၼႃႈလိၼ်ပလွင်ႈ ဢမ်ႇၸႂ်ႈမိူင်းပလွင်ႈ ။ မၼ်းပဵၼ်ၶွင်ၵူၼ်းမိူင်းတႆးႁဝ်းၶႃႈ ဢၼ်ယူႇသဝ်းၸွမ်းၵၼ်ဝႆႉ ။ ၵွပ်ႈၼၼ် မွၵ်ႈပိုၼ်ႉတီႈၼႃႈလိၼ်ၸိူဝ်းၼႆႉၵူၺ်း ၵူၼ်းမိူင်းတႆးႁဝ်းၶႃႈ ဢမ်ႇလီမႃးၸႅၵ်ႇၽႄၵၼ်သေ ဢဝ်မႃးႁဵတ်းလွင်ႈၽိတ်းၵၼ် တိုၵ်းယိုဝ်းၵၼ်ၸိူင်ႉၼင်ႇ ၸုမ်းပလွင်ႈၶဝ်ႁဵတ်းတေႃႇႁဝ်း ၸိူင်ႉၼႆ ။


ထၢမ်-ၸုမ်းပလွင်ႈၼႆႉ ၶဝ်ၵေႃႈတိုၵ်ႉမီးႁႅင်းမႃးၼႂ်း 2-3 ပီၼႆႉၵူၺ်း။ ၵွပ်ႈၼၼ်လႄႈ ဢၼ်ပဵၼ်ပၢင်တိုၵ်းၼႆႉ ၸွင်ႇတေမီးပယေႃးၵ ယူႇတၢင်းလင်မၼ်း၊ ၸွင်ႇတေမီးမိုဝ်းတီႈ 2 တီႈ 3 ယူႇတၢင်းလင်ပၼ်ႁႅင်း ၸိူဝ်းၼႆႉၶႃႈႁႃႉ?။

တွပ်ႇ - ယွၼ်ႉပိူဝ်ႈၸုမ်းပလွင်ႈၶဝ်ၼႆႉ ၶဝ်ၶဝ်ႈပႃးဝႆႉၼႂ်းၸုမ်းဢူၺ်းလီ (မႁႃမိတ်ႈ) လၢႆတီႈလၢႆတၢင်းသေ ႁဵတ်းႁႂ်ႈႁႅင်းၶဝ်ၵေႃႈ ယႂ်ႇၶိုၼ်ႈမႃး ။ မိူဝ်ႈႁႅင်းၶဝ်ပႆႇယႂ်ႇၼၼ်ႉ တၢင်းၼႃႈလိၼ်သိုၵ်း 701 ၼႆႉ ၵူၼ်းသိုၵ်းတေႃႇၵူၼ်းသိုၵ်း ၊ ၽူႈမီးပုၼ်ႈၽွၼ်းၼႂ်းၼႃႈတီႈၼၼ်ႉ ၶဝ်ၵေႃႈလဵၼ်ႈၵေႃႉၵၼ် ၵပ်းသိုပ်ႇၵၼ် ၊ ၶဵင်ႇပိၼ်ႇပႆႇၸွႆႈထႅမ်ၵၼ်မႃးယူႇတႃႇသေႇ ။ ၵူၺ်းၵႃႈ ၵမ်းၼႆႉ ႁဝ်းၵေႃႈဢမ်ႇဝူၼ်ႉဝႃႈ ၶဝ်မၵ်းမၢႆႁဝ်းပဵၼ်ၽူႈၶဵၼ်ၶဝ်သေ ပႂ်ႉတိုၵ်းႁဝ်း ၊ ၵွပ်ႈၼၼ် ႁဝ်းၵေႃႈဢမ်ႇလႆႈႁၢင်ႈႁႅၼ်းသင်သေၶိုၼ်ႈမိူဝ်း ၵႂႃႇၶိုၼ်းၼႃႈတီႈႁဝ်းပွတ်းၼမ်ၶမ်း ။


ၶဝ်မႃးပႂ်ႉတိုၵ်းႁဝ်းၼႆႉ ႁဵတ်းႁႂ်ႈႁဝ်းတူၵ်းၸႂ်ပႅတ်ႈ။ ဢေႃး..ၶဝ်ၼႆႉ ၵွပ်ႈသင်မႃးတိုၵ်းႁဝ်း ၊ ယဝ်ႉၵေႃႈဢွၵ်ႇလိၵ်ႈပိုၼ်ၽၢဝ်ႇ ပဵၼ်တၢင်းၵၢၼ်ဝႃႈ ႁဝ်းၵႂႃႇႁိမ်ၼႃႈတီႈၶဝ် ၊ ႁဝ်းပဵၼ်ၽူႈၶဵၼ်ၶဝ်ၸိူဝ်းၼႆႉ ။ လွင်ႈၼႆႉ ႁဵတ်းႁႂ်ႈႁဝ်းပႅၵ်ႇၸႂ်လႄႈ ဢၢမ်းလူင်လၢင်ယူႇတႄႉတႄႉဝႃႈဝႃႈ ။ ႁဵတ်းသင်ပလွင်ႈမၵ်းမၢႆတႆးပဵၼ်ၽူႈၶဵၼ်ၶဝ်ယဝ်ႉႁႃႉ ၊ ၼႆႉပဵၼ်ၶေႃႈထၢမ်ပုၼ်ႈတႃႇႁဝ်းဢၼ်ၼိုင်ႈ ။


ထၢမ် - ပေႃးႁဝ်းၶႃႈတူၺ်း မၼ်းပဵၼ်ပၼ်ႁႃၸၢဝ်းၶိူဝ်းၼႂ်းမိူင်းတႆး ။ ၵွပ်ႈၼၼ် ပၼ်ႁႃဢၼ်ၼႆႉ သင်ၸိူဝ်ႉဝႃႈဢမ်ႇၵႄႈလိတ်ႈၶိုတ်းတၼ်းၼႆ ၸၢင်ႈတုမ်ႉတိူဝ်ႉလွင်ႈၽွမ်ႉႁူမ်ႈ ၼႂ်းၸိုင်ႈတႆးၵႂႃႇႁၢဝ်ႈႁႅင်း ။ ၵွပ်ႈၼႆ လွၵ်းလၢႆးၵႄႈလိတ်ႈမၼ်း တေမီးၸိူင်ႉႁိုဝ်ၽွင်ႈၶႃႈ ?။


တွပ်ႇ - တႃႇတေၵႄႈလိတ်ႈလွင်ႈၼႆႉ ႁဝ်းၶႃႈတီႈငဝ်ႈငုၼ်း တေဢုပ်ႇဢူဝ်းၵၼ်ၼႂ်းပၢင်ၵုမ်ၶွပ်ႈပီႁဝ်းၶႃႈယူႇ ။ ၵဵဝ်ႇၵပ်းပေႃႇလသီႇၸၢဝ်းၶိူဝ်းၼႆႉ ပေႃးႁဝ်းၶႃႈမႃးတူၺ်း ႁဝ်းၶႃႈဝႆႉပဵၼ်တီႈၼိုင်ႈယဝ်ႉ ၊ ၵၢၼ်ၽွမ်ႉႁူမ်ႈၶွင်ၸိူဝ်ႉၶိူဝ်းႁဝ်း ၵူၼ်းမိူင်းတႆးႁဝ်း ပဵၼ်တီႈၼိုင်ႈ ။ ၵူၺ်းၵႃႈ ၵၢၼ်ႁဵတ်းသၢင်ႈၼၼ်ႉ မၼ်းဢမ်ႇမိူၼ်ႁဝ်းဝႆႉတေႃႇ ပေႃႇလသီႇၸၢဝ်းၶိူဝ်း ၊ ၸၢဝ်းၶိူဝ်းသမ်ႉတိုၵ်းႁဝ်းယူႇတိၵ်းတိၵ်းၼၼ်ႉ ႁဝ်းၶႃႈထုၵ်ႇလီႁဵတ်းႁိုဝ်ၼႆၼၼ်ႉ ႁဝ်းၶႃႈတေၶိုၼ်းဢုပ်ႇဢူဝ်းၵၼ် ၼႂ်းပၢင်ၵုမ်ၶွပ်ႈပီႁဝ်းၶႃႈယူႇ ။


ထၢမ် - ပေႃးဝႃႈႁဝ်းၶႃႈတူၺ်း ငဝ်းလၢႆးပၢင်တိုၵ်းၼႆႉ ပိုၼ်ႉတီႈၼႆႉ ပဵၼ်ပိုၼ်ႉတီႈဢၼ်ပဵၼ်ၽေးယူႇ ။ ၵွပ်ႈပိူဝ်ႈဝႃႈ ပေႃးတူၺ်းၼႂ်းပိုၼ်း RCSS ၵေႃႈ မိူၼ်ၸိူင်ႉၼင်ႇၸုမ်း ၸဝ်ႈၶုၼ်ၵျေႃႇ ဢွၼ်ဢဝ်ဢဵၼ်ႁႅင်းသိုၵ်းသေမိူဝ်းပွတ်းႁွင်ႇ ၵမ်ႈၽွင်ႈၵေႃႈ ထိုင်တီႈလႆႈတူၵ်းတူင်ႇႁႅဝ်ႉသေ ထိုင်တီႈပေႃးလႆႈဝၢင်းၶိူင်ႈၵႂႃႇ ။ ၵမ်းလိုၼ်းသုတ်းၵေႃႈ ၼႄးဝႃႈပဵၼ်ၵူၼ်းႁၢႆႉၵူၼ်းၵဝ်းၼႆသေ ပၼ်တူတ်ႈ (တၢမ်ႇ) ၶွၵ်ႈ / တၢႆလၢႆၵမ်း ။ ၵွပ်ႈၼၼ်လႄႈ ငႃးသိုၵ်းဢၼ်ၵႂႃႇႁွတ်ႈဝႆႉယူႇ ပွတ်းတွၼ်ႈၼၼ်ႉၶႃႈလူး ၸွင်ႇတေမီးၽေးလွင်ႈလႆႈမႆႈၸႂ်ၸိူင်ႉၼၼ် ယူႇၶႃႈႁႃႉ ?။


တွပ်ႇ - ၵွပ်ႈပိူဝ်ႈဢမ်ႇၶႂ်ႈတိုၵ်းသိုၵ်း ၊ ဢမ်ႇၶႂ်ႈဢဝ်ၵၢၼ်သိုၵ်းသေ ၵႄႈလိတ်ႈပၼ်ႁႃၵၢၼ်မိူင်း ၵၢၼ်ၵူႈပိူင်ပိူင်လႄႈ ႁဝ်းၶႃႈၸင်ႇၵွႆႈဢဝ်တိုဝ်ႉတၢင်း ဢၼ်တီႈလူင်ပွင်ၸိုင်ႈပၼ်မႃးဝႃႈ ၾိင်ႈၵၢၼ်မိူင်းဢၼ်မႂ်ႇ။ ဢဝ်လၢႆးယဵၼ်ႇငႄႈၵၢၼ်မိူင်းသေ ၵႄႈၶႆပၼ်ႁႃၵၢၼ်မိူင်းၵႂႃႇလူၺ်ႈ လၢႆးၵတ်းယဵၼ်။ ပုၼ်ႈသုၼ်ႇလႆႈ ဢၼ်ပၼ်ဝႆႉၼႂ်း NCA မီးဝႆႉၸိူင်ႉၼၼ်လႄႈ ႁဝ်းၶႃႈၸင်ႇလႆႈလူင်းလၢႆးမိုဝ်း NCA သေ ႁႂ်ႈပေႃးလႆႈၸႂ်ႉသုၼ်ႇပုၼ်ႈ ဢၼ်ဝႃႈ ၵႄႈၶႆပၼ်ႁႃၵၢၼ်မိူင်းၵၼ် လူၺ်ႈပၼ်ႁႃၵၢၼ်မိူင်း ၊ လူၺ်ႈလၢႆးၵတ်းယဵၼ်ၼႆၼၼ်ႉ ။


ၵွပ်ႈၼၼ်လႄႈ ႁႂ်ႈႁဝ်းၶႃႈ ၶႂ်ႈပဵၼ်သိုၵ်းပဵၼ်သိူဝ်သေ တိုၵ်းသိုၵ်းၵၼ်ၼႆႉ ၼႂ်းပေႃႇလသီႇၶွင် ၶွင်ႊသီႊဢဝ်ၶိုၼ်းၸိုင်ႈတႆး ဢမ်ႇမီးယဝ်ႉ ။ ၵွပ်ႈၼၼ်လႄႈ ႁဝ်းၶႃႈၶႂ်ႈယူႇသဝ်းၸွမ်းၵၼ် ၵတ်းၵတ်းယဵၼ်ယဵၼ်သေ ၵႄႈၶႆပၼ်ႁႃႁဝ်းၵႂႃႇၵတ်းၵတ်းယဵၼ်ယဵၼ် ။ ၼႆႉပဵၼ်ၶေႃႈယိူင်းဢၢၼ်း ပေႃႇလသီႇတီႈၼိုင်ႈၶွင် ႁဝ်းၶႃႈ လူင်းလၢႆးမိုဝ်း NCA ၶွင် ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး ယဝ်ႉ ။ ၵွပ်ႈၼၼ် ၼင်ႇႁိုဝ်ပေႃးတေဢမ်ႇပဵၼ်ပၢင်တိုၵ်းသေ တိုၵ်းၵၼ်ယိုဝ်းၵၼ် ၊ ယႃႇႁႂ်ႈၵဝ်လႆႈယိုဝ်းမႂ်း - မႂ်းလႆႈယိုဝ်းၵဝ် ၊ ယႃႇပေႁႂ်ႈလႆႈတီႉၺွပ်းၵၼ်သေၶႃႈတၢႆ ၊ တီႉၺွပ်းၵၼ်သေ သႂ်ႇၶၻီး (ဢမု) ၵၼ်ၼၵ်းၼႃၸိူဝ်းၼႆႉ ႁဝ်းၶႃႈၸင်ႇႁႃတၢင်းဢွၵ်ႇမၼ်း ပဵၼ်လၢႆး NCA ၼႆႉ ။ ၵွပ်ႈၼၼ် သိုပ်ႇၵႂႃႇၵေႃႈ ၼင်ႇႁိုဝ်ပေႃးတေဢမ်ႇၵိူတ်ႇပၼ်ႁႃ မိူၼ်ၸိူင်ႉၼင်ႇ ဢၼ်ပဵၼ်ပူၼ်ႉမႃးၸိူဝ်းၼၼ်ႉ ႁဝ်းၶႃႈတေႁႃလၢႆး ၸႂ်ႉသုၼ်ႇပုၼ်ႈၼႂ်း NCA သေ ႁဵတ်းသၢင်ႈၵၢၼ်ငၢၼ်းႁဝ်းၶႃႈ ၵႂႃႇထႅင်ႈယူႇ ။


ထၢမ် - မိူဝ်ႈလဵဝ်ၼႆႉ ဢၼ်ႁွင်ႉႁူပ်ႉထူပ်းတင်းၽူႈယႂ်ႇၵူၼ်းလူင် တဢၢင်းၶႃႈလူး ၊ ၸွင်ႇပႃႈမီးသေၵမ်းၶႃႈ တင်ႈတႄႇပဵၼ်ပၢင်တိုၵ်းၵၼ် မႃးၼႆႉ ?။


တွပ်ႇ - လွင်ႈၼႆႉ ႁဝ်းၶႃႈပႆႇလႆႈဢုပ်ႇဢူဝ်းၵၼ် ။ ၵွပ်ႈပိူဝ်ႈ မၼ်းပဵၼ်ၵၢၼ်ယႂ်ႇလႄႈ ႁဵတ်းႁိုဝ်ၵေႃႈ တေလႆႈဢုပ်ႇဢူဝ်းၵၼ် ၼႂ်းငဝ်ႈငုၼ်းႁဝ်းၶႃႈ ၵမ်းၼိုင်ႈၵွၼ်ႇ ?။


ထၢမ် - ဢိင်ၼိူဝ် ဢၼ်လႆႈပဵၼ်ပၢင်တိုၵ်း မႃးၸိူဝ်းၼႆႉ RCSS သေ ၶႂ်ႈသင်ႇလၢတ်ႈသင် ထိုင်တီႈပီႈၼွင်ႉၵူၼ်းမိူင်းတႆး ပႃးၸဵမ်ၸၢဝ်းတဢၢင်းၶဝ် ၸိူင်ႉႁိုဝ်ၽွင်ႈၶႃႈ ?။


တွပ်ႇ - ၽႅၼ်ႇလိၼ်မိူင်းတႆးၼႆႉ မၼ်းပဵၼ်ၶွင်ၵူၼ်းမိူင်းတႆးတင်းမူတ်း ။ ဢမ်ႇၸႂ်ႈၸၢဝ်းၶိူဝ်းလႂ် ၸၢဝ်းၶိူဝ်းၼိုင်ႈၽွင်းငမ်းၵူၺ်း ။ မိူဝ်ႈပၢၼ်ၸဝ်ႈၾႃႉႁဝ်းၶႃႈၵေႃႈ တႃႇပလွင်ႈၵေႃႈမီးၸဝ်ႈၾႃႉပလွင်ႈယူႇသဝ်းတွၼ်ႈပလွင်ႈ ။ တႃႇပဢူဝ်းၵေႃႈ မီးၸဝ်ႈၾႃႉပဢူဝ်းယူႇသဝ်းၵႂႃႇႁင်းၵူၺ်း ။ တႃႇမိူင်းဝႃႉၵေႃႈ မီးၸဝ်ႈၾႃႉမိူင်းဝႃႉ ၽွင်းငမ်းမိူင်းဝႃႉ ၊ မၼ်းပဵၼ်ပိူင်ဢၼ် ႁဝ်းၶႃႈယူႇသဝ်းၸွမ်းၵၼ်လႆႈမႃး ၵတ်းၵတ်းယဵၼ်ယဵၼ် ။ ပၢၼ်ၼႆႉၵေႃႈ ႁဝ်းၶႃႈႁႃလၢႆး ႁႂ်ႈႁဝ်းပေႃးလႆႈယူႇသဝ်းၵတ်းယဵၼ် လႆႈၸွမ်းၵၼ်ၼၼ်ႉ ႁဝ်းၶႃႈမီးပုၼ်ႈၽွၼ်းၵူႈၵေႃႉယူႇ ။ ယႃႇပေၸႂ်ႉလၢႆးႁုၵ်းႁၢႆႉ လၢႆးသိုၵ်းသိူဝ်သေတိုၵ်းၵၼ် ၊ ဢဝ်ၵၢၼ်မိူင်းသေ ဢုပ်ႇဢူဝ်းၵၼ် ၶဝ်ႈႁႃၵၼ် ၊ ႁႃလွၵ်းလၢႆးဢၼ် ႁႂ်ႈႁဝ်းၶႃႈ ပေႃးၸၢင်ႈယူႇသဝ်းၸွမ်းၵၼ် ၵတ်းၵတ်းယဵၼ်ယဵၼ် မိူၼ်ၼင်ႇမိူဝ်ႈၵူႈပွၵ်ႈပူၼ်ႉမႃး ၊ မၼ်းတေပဵၼ်ပုၼ်ႈတႃႇၽွၼ်းလီႁဝ်းၶႃႈ ၵူႈၵေႃႉယူႇၼႆ ႁဝ်းၶႃႈႁၼ်ထိုင်ၸိူင်ႉၼႆ ။


ထၢမ် - ပၢင်ၵုမ်ငဝ်ႈငုၼ်း ဢၼ်တေဢုပ်ႇလွင်ႈၸိူဝ်းၼႆႉ သမ်ႉတေပဵၼ်မိူဝ်ႈလႂ်ၶႃႈ ?။


တွပ်ႇ - မွၵ်ႈၼႂ်းႁၢင်လိူၼ် (ၻီႊသႅမ်ႊၿိူဝ်ႊ) မွၵ်ႈဝူင်ႈတီႈ 4 ၼႆႉ ။


ထၢမ် - ငိၼ်းဝႃႈ ၶဝ်တီႉၵူၼ်းမိူင်းၵႂႃႇ 12 ၵေႃႉ ၊ လွင်ႈၼႆႉၶႃႈလူး ၸွင်ႇလႆႈႁူႉၽွင်ႈၶႃႈ ?။


တွပ်ႇ - မီးၶၢဝ်ႇငၢဝ်းမႃးယူႇ ၊ ၵူၺ်းၵႃႈ တိုၵ်ႉတိတ်းတၢမ်တူၺ်းဝႃႈ ၸွင်ႇၸိုဝ်ႈၸႂ်ႈတႄႉ ။ ၵူၼ်းမိူင်းၵေႃႈ တၢင်ႇထိုင်တီႈႁဝ်းၶႃႈယူႇဝႃႈ မီးသိုၵ်းၸုမ်းလႂ်ဢမ်ႇႁူႉ မႃးတီႉၺွပ်းၵူၼ်းမိူင်းၵႂႃႇ ၊ တီႈတႄႉမၼ်း ပဵၼ်ၸုမ်း TNLA ၶဝ်မႃးၺွပ်းၵႂႃႇၵူၺ်း လႆႈႁူႉၶၢဝ်ႇငၢဝ်းဝႆႉတီႈၵူၼ်းမိူင်းမီးၸိူင်ႉၼႆ ။ လွင်ႈၼႆႉၵေႃႈ ႁဝ်းၶႃႈတေဢဝ်ဢုပ်ႇဢူဝ်းၵၼ် ပႃးတီႈငဝ်ႈငုၼ်းသေ တေႁႃလၢႆးၵႄႈၶႆမၼ်းယူႇ ။