တပ်ႉသိုၵ်းတဢၢင်း (TNLA) တင်း တပ်ႉသိုၵ်းတႆး (RCSS/SSA) ၼႃႈလိၼ်သိုၵ်း 701 ပဵၼ်ပၢင်တိုၵ်းၵၼ် ပွတ်းမိူင်းဝီး ၸိုင်ႈတႆးပွတ်းႁွင်ႇ 4 ပွၵ်ႈ ၊ ႁိုင် 4 ဝၼ်း ။

ၶိူင်ႈၵွင်ႈၵၢင်ႇ မၢၵ်ႇမိုဝ်ႈၸိုၼ်းယၢမ်း ၶူဝ်းၶွင်တင်းသွင်ၾၢႆႇ ဢၼ်လူႉသုမ်းၼႂ်းပၢင်တိုၵ်း

မိူဝ်ႈဝၼ်းတီႈ 27/11/2015 တပ်ႉသိုၵ်းပူတ်းပွႆႇၸိူဝ်ႉၸၢတ်ႈ တဢၢင်း (PSLF/TNLA) တင်း တပ်ႉသိုၵ်း ၸိုင်ႈတႆး (RCSS/SSA)  လႆႈပဵၼ်ပၢင်တိုၵ်းၵၼ်တီႈ ဝၢၼ်ႈပၢင်ၵႆႇ ၊ ဝူင်ႈၵၢင်မိူင်းဝုၺ်းလႄႈမိူင်းမေႃႇ ၊ ဢိူင်ႇမိူင်းဝီး ၸႄႈဝဵင်းၼမ်ႉၶမ်း ၸိုင်ႈတႆးပွတ်းႁွင်ႇ ။ သွင်ၾၢႆႇပဵၼ်ပၢင်တိုၵ်းၵၼ် တင်ႈတႄႇဝၼ်းတီႈ 27-30/11/2015 ။


ယွၼ်ႉသွင်ၾၢႆႇပဵၼ်ပၢင်တိုၵ်းၵၼ်သေ ဝၼ်းတီႈ 02/12/2015 (မိူဝ်ႈၼႆႉ) မီးၵူၼ်းဝၢၼ်ႈၵူၼ်းမိူင်း ပွတ်းပိုၼ်ႉတီႈၼႃႈလိၼ် ဢၼ်ပဵၼ်ပၢင်တိုၵ်းၼႆႉ ပၢႆႈၽေးသိုၵ်းႁွတ်ႈထိုင်တီႈမိူင်းဝီး 200 ပၢႆ ။


ၵဵဝ်ႇၵပ်းလွင်ႈၼႆႉ ဝႅပ်ႊသၢႆႊ တႆးလွတ်ႈလႅဝ်း ၵေႃႈလၢတ်ႈဝႃႈ - သၢႆသိုၵ်းတပ်ႉသိုၵ်းၸိုင်ႈတႆး ၾၢႆႇၽွင်းငမ်း RCSS/SSA ၼႃႈလိၼ်သိုၵ်း 701 လုၵ်ႉတၢင်းပိုၼ်ႉတီႈ ၼႃႈလိၼ်ၵုမ်းၵမ် ပွတ်းထုင်ႉမၢဝ်းသေ မႃးလဵပ်ႈႁဵၼ်းၵၢၼ်သွၼ် ပိုၼ်ႉႁူႉၵူႈလွင်ႈလွင်ႈလႄႈ မႃးၶိုၼ်ႈထွမ်ႇ ဢၼ်တီႈငဝ်ႈၸိုင်ႈသပ်းလႅင်းၼႄလွင်ႈ NCA ယဝ်ႉ ၶိုၼ်းပွၵ်ႈမိူဝ်း ၼႂ်းၼႃႈလိၼ်ထုင်ႉမၢဝ်း ။


ဢွၼ်ၼႃႈၼၼ်ႉ ၾၢႆႇ RCSS/SSA လႆႈၸႅင်ႈၶၢဝ်ႇလူင်ႈၼႃႈတီႈ တပ်ႉသိုၵ်းတဢၢင်းဝႃႈ RCSS/SSA တေလတ်းမိူဝ်းၼႂ်းပိုၼ်ႉတီႈၼႃႈလိၼ် ဢၼ်တပ်ႉသိုၵ်းတဢၢင်း ၵုမ်းၵမ်ဝႆႉ ၊ ၵူၺ်းၵႃႈ တပ်ႉသိုၵ်းတဢၢင်းၶဝ် ဢမ်ႇၶႂ်ႈပၼ် RCSS/SSA လတ်းၽၢၼ်ႇၼႂ်းၼႃႈလိၼ်ၵုမ်းၵမ်လႄႈ ပႂ်ႉမူၵ်းယိုဝ်းၸွမ်းတၢင်း ။ ၾၢႆႇသိုၵ်း တဢၢင်း ၸတ်းသိုၵ်းဝႅတ်ႉလွမ်ႉ ပႂ်ႉမူၵ်းယိုဝ်းသိုၵ်းတႆးဢွၼ်တၢင်းသေ သွင်ၾၢႆႇလႆႈပဵၼ်ပၢင်တိုၵ်းၵၼ် ႁိုင် 4 ပွၵ်ႈ ၊ တင်ႈတႄႇဝၼ်းတီႈ 27 ထိုင်ဝၼ်းတီႈ 30/11/2015 ႁိုင် 4 ဝၼ်း - ၼႆယဝ်ႉ ။


ဝၼ်းတီႈ 28-30 ၼၼ်ႉ ၸုမ်းသိုၵ်းတဢၢင်း သိုပ်ႇထႅမ်ႁႅင်းသိုၵ်းမွၵ်ႈ 300 ၵေႃႉသေ ဝႅတ်ႉလွမ်ႉႁူဝ်လွမ်ႉႁၢင် သၢႆသိုၵ်းတပ်ႉသိုၵ်းၸိုင်ႈတႆး တီႈၾၢႆႇတူၵ်းဝၢၼ်ႈပဵင်းၵႆႇ ဢိူင်ႇဝၢၼ်ႈတုင်သေ လမ်းယိုဝ်းၸွမ်းတၢင်းလင်ထႅင်ႈ ၊ ႁဵတ်းႁႂ်ႈ တပ်ႉသိုၵ်းၸိုင်ႈတႆး လႆႈတိူဝ်ႉဝၢတ်ႇၸဵပ်းၵမ်ႈၽွင်ႈသေ လႆႈတူၵ်းသုမ်းၵႂႃႇ 3 ၵေႃႉ - ၼႆယဝ်ႉ ။


ၵဵဝ်ႇၵပ်းလွင်ႈ ပဵၼ်ပၢင်တိုၵ်းၵၼ်ၼႆႉ ၾၢႆႇTNLA ဝႃႈ - သိုၵ်းတႆး RCSS/SSA ႁူမ်ႈၵၼ်တင်း သိုၵ်းမၢၼ်ႈသေ ၵႂႃႇယိုဝ်း TNLA ။ သိုၵ်းမၢၼ်ႈယူႇၾၢႆႇလင်သေ ယိုဝ်းၵွင်ႈလူင်ၸွႆႈသိုၵ်းတႆး ။ ၵူၺ်းၵႃႈ  ၾၢႆႇတပ်ႉသိုၵ်းၸိုင်ႈတႆး RCSS/SSA လၢတ်ႈဝႃႈ - လွင်ႈၼႆႉ သိုၵ်းမၢၼ်ႈတႄႉထၢမ်ၸွႆႈယူႇ ၊ ၵူၺ်းၵႃႈၾၢႆႇ RCSS/SSA ဢမ်ႇယွမ်းႁပ်ႉ - ၼႆယဝ်ႉ ။