ႁူဝ်ပဝ်ႈပႃႊတီႊသိူဝ်ၽိူၵ်ႇ (SNDP) လုင်းၸၢႆးဢၢႆႈပဝ်း လၢတ်ႈဝႃႈ ပေႃးလူင်းလၢႆးမိုဝ်းပတ်းပိုၼ်ႉတူဝ်ႈမိူင်း (NCA) ယဝ်ႉ တေမီးလွင်ႈငမ်းယဵၼ် ။ လွင်ႈဢၼ်ပဵၼ်ပၢင်တိုၵ်းၼၼ်ႉ ဢမ်ႇၵတ်ႉၵၢၼ်မိူင်းလႄႈ ဢမ်ႇၶႂ်ႈထတ်းသၢင် ။ လွင်ႈၼႆႉ ၸုမ်းၶၢဝ်ႇၽူႈတွႆႇႁွၵ်ႈ လႆႈတွင်ႈထၢမ်ဝႆႉၼင်ႇၼႆ ။

ထၢမ် - ႁူဝ်ပဝ်ႈႁဝ်း ဢမ်ႇဢိမ်ႇဢိူဝ်ႇမိူဝ်ႇၸၢၼ်ႈ ၼိူဝ်ၵၢၼ်မိူင်းၶႃႈႁႃႉ ?။


တွပ်ႇ - ဢမ်ႇဢိမ်ႇၸၢၼ်ႈ ။ မိူၼ်ၼင်ႇႁဝ်းလၢတ်ႈ ႁဝ်းပဵၼ်တႆးၵေႃႉၼိုင်ႈ ။ ပေႃးဝႃႈႁဝ်းတူၺ်းတႄႉ ၵိုင်ႇလီဢိမ်ႇၸၢၼ်ႈယူႇ ၊ ၵွပ်ႈမၼ်းဢမ်ႇပဵၼ် Free and Fair ( လွင်ႈထၢင်ႇႁၢင်ႈလွတ်ႈလႅဝ်းလႄႈ ပဵၼ်ထမ်း ) ။ ၵူၺ်းၵႃႈ မၼ်းဢမ်ႇပဵၼ် Free and Fair ၵေႃႈ ၼင်ႇႁိုဝ်မၼ်းတေပဵၼ် Free and Fair ၼၼ်ႉ လၢႆးမၼ်းသမ်ႉမီးယူႇ ။ လၢႆးမၼ်းၼႆႉ ပေႃးလႆႈၵတ်းယဵၼ်ၼႆ မၼ်းပဵၼ် Free and Fair ယဝ်ႉ ။


ပေႃးဝႃႈလူင်းလၢႆးမိုဝ်း NCA ယဝ်ႉ ပေႃးႁဵတ်း ပေႃးလၢတ်ႈ ဢၼ်ဢမ်ႇၸိုဝ်ႈဢမ်ႇၸႂ်ႈ ႁဝ်းတိူင်ႇလႆႈၵမ်းလဵဝ်။ ပေႃးဝႃႈလူင်းလၢႆးမိုဝ်း NCA ယဝ်ႉတင်းမူတ်း မၼ်းတေၵတ်းယဵၼ်မႃးယဝ်ႉ ။


ထၢမ် - ပေႃးၸိူင်ႉၼၼ် ဢၼ်ပဵၼ်ပၢင်တိုၵ်းယူႇ မိူဝ်ႈလဵဝ်ၼႆႉ (ၽွင်း SSPP/SSA တင်းသိုၵ်းမၢၼ်ႈယိုဝ်းၵၼ်) ႁူဝ်ပဝ်ႈသမ်ႉႁၼ်ထိုင်ၸိူင်ႉႁိုဝ်ၶႃႈ ?။


တွပ်ႇ - ပၢင်တိုၵ်းၼႆႉထုၵ်ႇလႆႈၵိုတ်း ၊ တိုၵ်းၵၼ်မႃးၼႆႉ ဢမ်ႇၸႂ်ႈမိူဝ်ႈဝႃးမိူဝ်ႈသိုၼ်းၵူၺ်း ၊ တိုၵ်းၵၼ်မႃး 50-60 ပီမိူင်းယဝ်ႉ ၊ မိူင်းတႆး တႄႇပဵၼ်ပွႆးတိုၵ်းမႃးပီ 1958 ။


ထၢမ် - ဢၼ်ပဵၼ်ပၢင်တိုၵ်းၵၼ်မႃး လိူၼ်ပၢႆၼႆႉၶႃႈလူး ၊ ၶႂ်ႈထတ်းသၢင်ၸိူင်ႉႁိုဝ်ၶႃႈ ၊ ယွၼ်ႉသင်လႄႈပဵၼ်မႃးၶႃႈ ?။


တွပ်ႇ - ဢၼ်ၼႆႉ ႁဝ်းၵေႃႈဢမ်ႇႁူႉ ၊ ႁဝ်းဢမ်ႇၵတ်ႉၵၢၼ်သိုၵ်း ။ ပၢင်တိုၵ်းၼႆႉ မၼ်းဢမ်ႇၵိုင်ႇလီပဵၼ် ၊ လွင်ႈၼႆႉ ႁဝ်းဢမ်ႇႁူႉလီလီ ၊ ၵွပ်ႈဢမ်ႇႁူႉလီလီလႄႈ ၵႂႃႇထတ်းသၢင်ၼႆႉ မၼ်းၸၢင်ႈၽိတ်း ။ ပွႆးတိုၵ်းၼႆႉ ပဵၼ်တီႈလႂ်ၵေႃႈလီ ၊ တီႈမိူင်းၶၢင်ၵေႃႈလီ ၊ ပဵၼ်တီႈမိူင်းတႆးၵေႃႈလီ ပေႃႈမႄႈၵူၼ်းမိူင်းတုၵ်ႉၶၵူၺ်း ။