ၸဝ်ႈသၢင်ႇၸဝ်ႈၸၢင်း 4 တူၼ် ဝတ်ႉ / ၵျွင်းၵုင်းတေႃႇ တူင်ႇဝဵင်းမိူင်းၼွင် ၊ ယေႃးတူဝ်ၵႂႃႇဢၢပ်ႇၼမ်ႉ ၊ တၢင်းႁူၵ်ႉသေ ယဵပ်ႇၺႃးမၢၵ်ႇတႅၵ်ႇ ဝၢတ်ႇၸဵပ်းလိူဝ်ႁႅင်း၊ တႃႇ 3 တူၼ် လႆႈသူင်ႇယူတ်းယႃ ထိုင်ႁူင်းယႃဢွင်ႇပၢၼ်း ။

မိူဝ်ႈဝၼ်းတီႈ 30/11/2015 ယၢမ်း 17:00 မူင်း ၊ မုၼ်ၸၢင်း 2 တူၼ် ၊ ၸဝ်ႈသၢင်ႇ 2 တူၼ် ၊ ယူႇဝတ်ႉ / ၵျွင်းၵုင်းတေႃႇ ဝၢၼ်ႈၼႃးၵၢင်း ဢိူင်ႇၼႃးၵၢင်း ၸႄႈဝဵင်းမိူင်းၼွင် ယေႃးတူဝ်ၵႂႃႇဢၢပ်ႇၼမ်ႉ တီႈၼမ်ႉႁွင်ႈလူင် ၾၢႆႇဢွၵ်ႇဝတ်ႉ ၊ ဢၼ်မီးၾၢႆႇတူၵ်းဝဵင်းမိူင်းၼွင် ။ ၵွပ်ႈတၢင်းႁူၵ်ႉလႄႈ လႆႈယဵပ်ႇၺႃးမၢၵ်ႇတႅၵ်ႇ ဢၼ်မီးၵၢၼ်ႁၢင်ႈၵၢင်ဝႆႉ ၊ လႆႈတိူဝ်ႉဝၢတ်ႇၸဵပ်းတင်း 4 တူၼ် - ၼႆယဝ်ႉ ။


ၼႂ်း 4 တူၼ်ၼၼ်ႉ 1. ၸဝ်ႈသၢင်ႇၵေႃးသလ်လ ၊ ဢႃယု 13 ပီ ။ ၸိုဝ်ႈပေႃႈမႄႈ လုင်းဢေႃး ၼၢင်းလႅင် ၊ ၶိုၼ်ႈႁူင်းယႃမိူင်းၼွင် ။ 2. ၸဝ်ႈသၢင်ႇၸႃႇရိၼ်ႇတ ၊ ဢႃယု 17 ပီ ၊ ၸိုဝ်ႈပေႃႈမႄႈ လုင်းဢွင်ႇ ပႃႈၼူၼ်း ။ 3. ၸဝ်ႈၸၢင်း ၸဝၼ ဢႃယု 20 ပီ ၊ ပေႃႈမႄႈ လုင်းသု ပႃႈဢွင်ႇ ။ ၸဝ်ႈၸၢင်းသီႁ ဢႃယု 25 ပီ ၊ ပေႃႈမႄႈ လုင်းသု ပႃႈသႃႇ ။


တႃႇ 3 တူၼ် ၊ ၸဝ်ႈၸၢင်းတူၼ်ၼိုင်ႈ လႄႈ ၸဝ်ႈသၢင်ႇသွင်တူၼ်ၼၼ်ႉ တိူဝ်ႉဝၢတ်ႇၸဵပ်းလိူဝ်ႁႅင်း ၊ ယူတ်းယႃႈတီႈမိူင်းၼွင်ဢမ်ႇလႆႈ ၊ တႃႇတူၼ်ၼိုင်ႈ တေလႆႈတႅပ်းၶႃလႄႈ လႆႈသူင်ႇၵႂႃႇႁူင်းယႃလွႆလႅမ် မိူဝ်ႈဝႃးတင်းၶိုၼ်း ။ ဝၢႆးဝၼ်းမိူဝ်ႈၼႆႉ တင်းသၢမ်တူၼ်ၼႆႉ ႁွတ်ႈၽႅဝ်ဝႆႉတီႈ ႁူင်းယႃ ဢွင်ႇပၢၼ်းယဝ်ႉ - ၽူႈၸွႆႈထႅမ်ၵူၼ်းပၢႆႈၽေးၵေႃႉၼိုင်ႈ တီႈမိူင်းၼွင် လၢတ်ႈ ။


ဝၢၼ်ႈၼႃးၵၢင်း (ဝတ်ႉၵုင်းတေႃႇ) ဢိူင်ႇၼႃးၵၢင်းၼႆႉ ယူႇၼႂ်းၸႄႈဝဵင်းမိူင်းၼွင် ၸႄႈတွၼ်ႈလွႆလႅမ် ၸိုင်ႈတႆးပွတ်းၸၢၼ်း ။