ဢိင်ၼိူဝ် တပ်ႉသိုၵ်းၸိုင်ႈတႆး (RCSS/SSA) ၼႃႈလိၼ်သိုၵ်း 701 တင်း တပ်ႉသိုၵ်းပူတ်းပွႆႇမိူင်းပလွင်ႈ (PSLF/TNLA) ပဵၼ်ပၢင်တိုၵ်းၵၼ် ပွတ်းမိူင်းဝီးသေ ႁဵတ်းႁႂ်ႈသွင်ၾၢႆႇလႆႈ လူႉသုမ်းၼင်ႇၵၼ် ။ ၵူၼ်းမိူင်းလႆႈပၢႆႈၽေးဝႆႉပၢၵ်ႇပၢႆ ၊ ထုၵ်ႇတီႉၺွပ်းၵႂႃႇ 10 ပၢႆ ။

ၵဵဝ်ႇၵပ်းလွင်ႈလႆႈပဵၼ် ပၢင်တိုၵ်းၼႆႉ ၽူႈၶၢၼ်ပၢၵ်ႇ ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) ၸဝ်ႈသိုၵ်းလူင်ၸၢႆးလႃႉ လၢတ်ႈဝႃႈ - ဝၢႆးသေႁဝ်းၶႃႈ လူင်းလၢႆးမိုဝ်းၵိုတ်းတိုၵ်း ပတ်းပိုၼ်ႉတူဝ်ႈမိူင်း (NCA) ယဝ်ႉ ႁႅင်းၵူၼ်းၵမ်ႈၽွင်ႈ မႃးသွၼ်ၵၢၼ် ၵဵဝ်ႇၵပ်းပေႃႇလသီႇ ၵဵဝ်ႇၵပ်း ၵၢၼ်ၵိုတ်းတိုၵ်း ပတ်းပိုၼ်ႉတူဝ်ႈမိူင်းသေ ၶိုၼ်းပွၵ်ႈမိူဝ်း ။ ဝူင်ႈၵၢင်ၶိုၼ်းပွၵ်ႈမိူဝ်းတၢင်း ၼမ်ႉၶမ်းၼၼ်ႉ လႆႈထုၵ်ႇသိုၵ်း PSLF/TNLA ဢၼ်ပဵၼ်ၸုမ်းပလွင်ႈၶဝ် ပႂ်ႉတိုၵ်းၸွမ်းတၢင်း ၊ လႆႈပဵၼ်ပၢင်တိုၵ်းၵၼ်။ တင်ႈတႄႇဝၼ်းတီႈ 27  ၽႄႈလၢမ်းမႃး တေႃႇထိုင်မိူဝ်ႈဝႃး ။


သိုပ်ႇလၢတ်ႈဝႃႈ - တေႃႇထိုင်မိူဝ်ႈဝၼ်းတီႈ 01/12/2015 ၼႆႉ TNLA ၶဝ်ပႂ်ႉမူၵ်းယိုဝ်းႁဝ်းၶႃႈ ၸွမ်းတႃႈၸွမ်းတၢင်းလႄႈသွင်ၾၢႆႇ ပဵၼ်ပၢင်တိုၵ်းၵၼ်တင်ႈတႄႇ ဝၼ်းတီႈ 27-30/11/2015 မႃးတေႃႇထိုင်ႁူဝ်လိူၼ် ၼူဝ်ႊဝႅမ်ႊၿိူဝ်ႊၼႆႉ ။ ႁဵတ်းႁႂ်ႈၾၢႆႇ RCSS/SSA လႆႈတူၵ်းသုမ်းၵႂႃႇ 3 ၵေႃႉ ၊ လႆႈဝၢတ်ႇၸဵပ်းၵႂႃႇ 7 ၵေႃႉ ၊ ၼႂ်းၼႆႉ ဢၼ်ႁၢဝ်ႈႁႅင်း 2 ၵေႃႉ ၊ ဢိတ်းဢွတ်း 5 ၵေႃႉ ။ ႁၢႆလၢႆဝႆႉၼႂ်းပၢင်တိုၵ်းၵေႃႈမီး ၊ မိူၼ်တပ်ႉ TNLA တီႉၺွပ်းၵႂႃႇၶႃႈတၢႆ ၊ ဢဝ်ဢွၵ်ႇၾၢင်ႁၢင်ႈ ဢၼ်ပႃးတင်းၸိူၵ်ႈမတ်ႉသေ ဢဝ်တၢႆဝႆႉ ၊ ၼႂ်းႁၢင်ႈဢၼ်ၵိုၵ်းၸွမ်း ၶေႃႈပိုၼ်ၽၢဝ်ႇၶဝ် မိူဝ်ႈဝၼ်းတီႈ 01/12/2015 ၼၼ်ႉ ။ ဢၼ်ႁဝ်းၶႃႈလႆႈလူႉသုမ်းၵႂႃႇၼႆႉ တင်းဝၢတ်ႇၸဵပ်း ၊ တင်းႁၢႆလၢႆ တင်းတၢႆ တင်းမူတ်းမီးမွၵ်ႈ 10 ပၢႆ - ဝႃႈၼႆ ။


ယွၼ်ႉပၢင်တိုၵ်းသေ ဝၼ်းတီႈ 02/12/2015 မီးၵူၼ်းဝၢၼ်ႈၵူၼ်းမိူင်း ပွတ်းပိုၼ်ႉတီႈၼႃႈလိၼ် ဢၼ်ပဵၼ်ပၢင်တိုၵ်းၼႆႉ ပၢႆႈၽေးသိုၵ်းႁွတ်ႈထိုင်တီႈမိူင်းဝီး 200 ပၢႆ ။


ၵဵဝ်ႇၵပ်းလွင်ႈၼႆႉ ဝႅပ်ႊသၢႆႊ တႆးလွတ်ႈလႅဝ်း ၵေႃႈလၢတ်ႈဝႃႈ - သၢႆသိုၵ်းတပ်ႉသိုၵ်းၸိုင်ႈတႆး ၾၢႆႇၽွင်းငမ်း RCSS/SSA ၼႃႈလိၼ်သိုၵ်း 701 လုၵ်ႉတၢင်းပိုၼ်ႉတီႈ ၼႃႈလိၼ်ၵုမ်းၵမ် ပွတ်းထုင်ႉမၢဝ်းသေ မႃးလဵပ်ႈႁဵၼ်းၵၢၼ်သွၼ် ပိုၼ်ႉႁူႉၵူႈလွင်ႈလွင်ႈတီႈငဝ်ႈၸိုင်ႈသပ်းလႅင်းၼႄလွင်ႈ NCA ယဝ်ႉ ၶိုၼ်းပွၵ်ႈမိူဝ်း ၼႂ်းၼႃႈလိၼ်ထုင်ႉမၢဝ်း ။


ဢွၼ်ၼႃႈၼၼ်ႉ ၾၢႆႇ RCSS/SSA လႆႈၸႅင်ႈၶၢဝ်ႇလူင်ႈၼႃႈတီႈ တပ်ႉသိုၵ်းတဢၢင်းဝႃႈ RCSS/SSA တေလတ်းမိူဝ်းၼႂ်းပိုၼ်ႉတီႈၼႃႈလိၼ် ဢၼ်တပ်ႉသိုၵ်းတဢၢင်း ၵုမ်းၵမ်ဝႆႉ ၊ ၵူၺ်းၵႃႈ တပ်ႉသိုၵ်းတဢၢင်းၶဝ် ဢမ်ႇၶႂ်ႈပၼ် RCSS/SSA လတ်းၽၢၼ်ႇၼႂ်းၼႃႈလိၼ်ၵုမ်းၵမ်လႄႈ ပႂ်ႉမူၵ်းယိုဝ်း ။ သွင်ၾၢႆႇလႆႈပဵၼ်ပၢင်တိုၵ်းၵၼ် ႁိုင် 4 ပွၵ်ႈ၊ တင်ႈတႄႇဝၼ်းတီႈ 27 ထိုင်ဝၼ်းတီႈ 30/11/2015 ႁိုင် 4 ဝၼ်း - ၼႆယဝ်ႉ ။


ဝၼ်းတီႈ 27/11/2015 ၼၼ်ႉ မီးၵူၼ်းဝၢၼ်ႈၵူၼ်းမိူင်း ၸၢဝ်းၶိူဝ်းတႆး ထုၵ်ႇသိုၵ်းတဢၢင်း တီႉၺွပ်းၵႂႃႇ 12 ၵေႃႉ - 1. ၸၢႆးထုၼ်းၵျၢၼ်ႇ ဢႃယု 48 ပီ ။ 2. ၸၢႆးယီႈမူၼ်ႇ ဢႃယု 35 ။ 3. ၸၢႆးဢၢႆႈၸၢမ်ႇလႅင်း ဢႃယု 28 ။ 4. လုင်းၸၢႆးဢၢႆႈငေႃႉ ဢႃယု 55 ။ 5. လုင်းၽူဝ်းမွင်ႇ ဢႃယု 60 ။ 6. ၸၢႆးသၢမ်လူႇ ဢႃယု 20 ။ 7. လုင်းၸၢႆးသၢမ်ထုၼ်း ဢႃယု 57 ။ 8. ၸၢႆးသိူဝ် ဢႃယု 40 ။ 9.ၸၢႆးၶင်ႉ ဢႃယု 26 ။ 10. ၸၢႆးယီႈဢွင်ႇ ဢႃယု 29 ။ 11. ၸၢႆးဢၢႆႈၵု ဢႃယု 24 ။ 2. ၸၢႆးသႅင်လူႇ ဢႃယု 18 ၸိူဝ်းၼႆႉ ။ တေႃႇထိုင်မိူဝ်ႈလဵဝ် (ဝၼ်းတီႈ 01/12/2015) ဢဝ်ၵႂႃႇၶင်ဝႆႉတီႈလႂ်ၵေႃႈ ပႆႇလႆႈငိၼ်းၶၢဝ်ႇသင် - ၵူၼ်းၼႂ်းၸႄႈဝဵင်းၼမ်ႉၶမ်း ၵေႃႉၼိုင်ႈလၢတ်ႈၼင်ႇၼႆ ။