ၶွင်ႊသီႊဢဝ်ၶိုၼ်းၸိုင်ႈတႆး (RCSS) ပိုၼ်ၽၢဝ်ႇ ပွင်ႇလႅင်းထိုင် ပႃႊတီႊၵၢၼ်မိူင်းၶဝ် လူင်းသူၼ်းတုမ်ႁႃသဵင် ၵၢၼ်လိူၵ်ႈတင်ႈ ၼႂ်းပိုၼ်ႉတီႈၼႃႈလိၼ် RCSS/SSA ၵုမ်းၵမ်လႆႈ၊ ဝၢႆးသေ ႁႄႉႁၢမ်ႈမႃး ၶၢဝ်းတၢင်းမွၵ်ႈၽၢၵ်ႇလိူၼ် ယွၼ်ႉပဵၼ်ပၢင်တိုၵ်း ဢမ်ႇမီးလွင်ႈႁူမ်ႈလူမ်ႈ ။

မိူဝ်ႈဝၼ်းတီႈ 01/10/2015 ၼႆႉ ၵေႃၵမ်ၵၢၼ် ပွင်ၵၢၼ်လူင်ငဝ်ႈၸိုင်ႈ ၶွင်ႊသီႊဢဝ်ၶိုၼ်းၸိုင်ႈတႆး / တပ်ႉသိုၵ်းၸိုင်ႈတႆး (RCSS/SSA) လႆႈဢွၵ်ႇၶေႃႈပိုၼ်ၽၢဝ်ႇ လွင်ႈငဝ်းလၢႆး လႄႈ ပွင်ႇလႅင်းထိုင် ပႃႊတီႊၵၢၼ်မိူင်းၶဝ် ၊ ပိူဝ်ႈတႃႇ ၼႃႈၵၢၼ်လူင်းသူၼ်းတုမ်ႁႃသဵင် ၶွင်ပႃႊတီႊၵၢၼ်မိူင်း ၼႂ်းပိုၼ်ႉတီႈၼႃႈလိၼ် RCSS/SSA ၵုမ်းၵမ်။ ၼႂ်းလိၵ်ႈပိုၼ်ၽၢဝ်ႇ လၢတ်ႈဝႆႉၼင်ႇၼႆ ။


1. ၸွမ်းၼင်ႇ ၶွင်ႊသီႊဢဝ်ၶိုၼ်းၸိုင်ႈတႆး (RCSS) လႆႈဢွၵ်ႇၶေႃႈပိုၼ်ၽၢဝ်ႇဝႆႉ မိူဝ်ႈဝၼ်းတီႈ 16/09/2015 ၵဵဝ်ႇၵပ်းလွင်ႈငၢဝ်းလၢႆး ပၢင်တိုၵ်းၼႂ်းၼႃႈလိၼ် RCSS သေ လၢႆႈႁၢမ်ႈၸုမ်းပႃႊတီႊၵၢၼ်မိူင်း ၸိူဝ်းတေလူင်းသူၼ်းတုမ် ႁႃသဵင်ၵၢၼ်လိူၵ်ႈတင်ႈ ၼႂ်းပိုၼ်ႉတီႈၼႃႈလိၼ် RCSS ၵုမ်းၵမ်ဝႆႉၼၼ်ႉ လႆႈပိုၼ်ၽၢဝ်ႇသပ်းၸႅင်ႈ ပၼ်ၶိုၼ်း လွင်ႈငဝ်းလၢႆးမႃးၼင်ႇၼႆ ။


2. ၸွမ်းၼင်ႇၽူႈမီးပုၼ်ႈၽွၼ်း လုမ်းၵပ်းသၢၼ် ၶွင်ႊသီႊဢဝ်ၶိုၼ်းၸိုင်ႈတႆး (ဝဵင်းၶူဝ်လမ်) လႆႈၵႂႃႇႁူပ်ႉထူပ်း ဢုပ်ႇဢူဝ်းတင်း ၽူႈၵွၼ်းတိူင်းသိုၵ်း ဝၼ်းဢွၵ်ႇၵၢင် ၸွမ်ႁၢၼ် ဝိၼ်းမိၼ်းထုၼ်း မိူဝ်ႈဝၼ်းတီႈ 30/09/2015 ယၢမ်း 09:30 မူင်း ၊  တီႈဝဵင်းၵုၼ်ႁဵင်ၼၼ်ႉ ဢုပ်ႇဢူဝ်းလႆႈၸႂ်ၵၼ်ဝႃႈ ၾၢႆႇတပ်ႉသိုၵ်းမၢၼ်ႈ တေၶတ်းၸႂ်ၵုမ်းၵမ် ၾၢႆႇသိုၵ်းမၢၼ်ႈၶဝ် ၼင်ႇႁိုဝ်တေဢမ်ႇပဵၼ် ပၢင်တိုၵ်းၼႂ်းပိုၼ်ႉတီႈ RCSS ထႅင်ႈ ၊ သွင်ၾၢႆႇၵုမ်းၵမ် ယႃႇႁႂ်ႈမီးပၢင်တိုၵ်းတေႃႇၵၼ် လႄႈ ပႂ်ႉပႃး လွင်ႈမၼ်ႈၼိမ် ၼႂ်းၼႃႈလိၼ်ၵၼ်ၵႂႃႇ ။ ၵဵဝ်ႇလူၺ်ႈပိုၼ်ႉတီႈၼႃႈလိၼ် ဢၼ်မီးပၼ်ႁႃၵၼ်ၸိူဝ်းၼၼ်ႉ တေၶတ်းၸႂ်ဢုပ်ႇဢူဝ်းၵိူဝ်းၵုမ်ၵၼ်သေ ၵႄႈလိတ်ႈၵၼ်ၵႂႃႇ ၵတ်းၵတ်း ယဵၼ်ယဵၼ် ။


3. ဢိင်ၼိူဝ် ၶေႃႈဢုပ်ႇဢူဝ်း ၽူႈၵွၼ်းတိူင်းသိုၵ်းဝၼ်းဢွၵ်ႇၵၢင် ၸွမ်ႁၢၼ် ဝိၼ်းမိၼ်းထုၼ်း လႆႈလၢတ်ႈပဵၼ်တၢင်းၵၢၼ်ၼႆႉ ၶွင်ႊသီႊဢဝ်ၶိုၼ်းၸိုင်ႈတႆး (RCSS) ယုမ်ႇယမ်ဝႃႈ ၾၢႆႇတပ်ႉသိုၵ်းမၢၼ်ႈ တေၸွမ်းၶေႃႈမၼ်ႈၵႅၼ်ႇ ဢၼ်လၢတ်ႈၼႆႉသေ တင်ႈတႄႇဝၼ်းဢွၵ်ႇၶေႃႈပိုၼ်ၽၢဝ်ႇ 01/10/2015 ၼႆႉ တူဝ်တႅၼ်းပႃႊတီႊလႄႈသင် ၊ သုၼ်ႇတူဝ် ပုၵ်ႉၵလ ၽူႈတေလူင်းသူၼ်းတုမ် ၶဝ်ႈလိူၵ်ႈတင်ႈၸိူဝ်းၼၼ်ႉ လႄႈသင် တိတ်းတေႃႇၵပ်းသိုပ်ႇ ပွင်ႇလႅင်းတီႈၸဝ်ႈၼႃႈတီႈ လုမ်းၵပ်းသၢၼ် RCSS သေ လူင်းႁဵတ်းၵၢၼ်သူၼ်းတုမ် ၵၢၼ်လိူၵ်ႈတင်ႈ ၵႂႃႇလႆႈထၢင်ႇႁၢင်ႈလွတ်ႈလႅဝ်းၶိုၼ်း ယူႇၼႆ ၸင်ႇလႆႈ ဢွၵ်ႇၶေႃႈပိုၼ်ၽၢဝ်ႇ ပွင်ႇလႅင်းသပ်းၸႅင်ႈ လွင်ႈငဝ်းလၢႆးပၼ်ၶိုၼ်း ၼင်ႇၼႆယူႇယဝ်ႉ ။


ၵဵဝ်ႇၵပ်းလွင်ႈဢွၵ်ႇလိၵ်ႈပိုၼ်ၽၢဝ်ႇၼႆႉ တၢင်းၸုမ်းၶၢဝ်ႇၽူႈတွႆႇႁွၵ်ႈ လႆႈၶတ်းၸႂ်တိတ်းတေႃႇ တွင်ႈထၢမ် ၽူႈၶၢၼ်ပၢၵ်ႇ RCSS/SSA ၸဝ်ႈသိုၵ်းလူင်ၸၢႆးလႃႉ တင်း ၽူႈမီးပုၼ်ႈၽွၼ်းၼႂ်း RCSS/SSA ယူႇသေတႃႉ ဢမ်ႇလႆႈတိုဝ်ႉတၢင်း တွင်ႈထၢမ် ပိူဝ်ႈတႃႇလႆႈၶေႃႈတွပ်ႇၶိုၼ်း ။


ၵဵဝ်ႇၵပ်းလွင်ႈၼႆႉ တင်ႈတႄႇ ပူၼ်ႉမႃးမိူဝ်ႈဝၼ်းတီႈ 16/09/2015 ယူႇတီႈ RCSS/SSA လႆႈဢွၵ်ႇလိၵ်ႈပိုၼ်ၽၢဝ်ႇဝႃႈ ယွၼ်ႉသိုၵ်းမၢၼ်ႈဢဝ်ႁႅင်းသိုၵ်းၵႂၢတ်ႇလၢင်ႉ လမ်းယိုဝ်း RCSS/SSA သေ ႁဵတ်းႁႂ်ႈၵူၼ်းဝၢၼ်ႈၵူၼ်းမိူင်း ဢမ်ႇမီးလွင်ႈႁူမ်ႇလူမ်ႈ ၊ ၾၢႆႇၼိုင်ႈၵေႃႈ ၵူၼ်းဝၢၼ်ႈၵူၼ်းမိူင်း ထုၵ်ႇသိုၵ်းမၢၼ်ႈ ပူၼ်ႉပႅၼ်လူလၢႆသုၼ်ႇလႆႈၵူၼ်း ၊ ထုၵ်ႇသိုၵ်းမၢၼ်ႈ တီႉၺွပ်းၵႂႃႇၸွမ်းငႃးသိုၵ်း ၊ ဢဝ်ၵွင်ႈလူင်ယိုဝ်းပွႆႇသႂ်ႇ တီႈမူႇၾုင်ၵူၼ်းယူႇၸိူဝ်းၼႆႉသေ ႁဵတ်းႁႂ်ႈၵူၼ်းဝၢၼ်ႈ လႆႈဝၢတ်ႇၸဵပ်းလူႉတၢႆ ။ ဢိင်ၼိူဝ် ဢမ်ႇမီးလွင်ႈႁူမ်ႇလူမ်ႈသေ RCSS/SSA ၸင်ႇလႆႈဢွၵ်ႇလိၵ်ႈပိုၼ်ၽၢဝ်ႇ ၾၢင်ႉတိူၼ်ပႃႊတီႊၵၢၼ်မိူင်း ႁႂ်ႈၵိုတ်းယင်ႉၵၢၼ်ႁူၺ်းသူၼ်းႁႃသဵင် ၸူဝ်ႈၵႅပ်ႉၸူဝ်ႈၶၢဝ်း - ၼႆယဝ်ႉ ။


ဢၼ် RCSS/SSA ႁၢမ်ႈပႃႊတီႊၵၢၼ်မိူင်းၶဝ် လူင်းႁႃသဵင်ၸူဝ်ႈၶၢဝ်းဝႆႉၼၼ်ႉ ပဵၼ်ၼႂ်း 16 ပိုၼ်ႉတီႈ မိူၼ်ၼင်ႇၼႂ်းၸႄႈဝဵင်းၼမ်ႉၶမ်း ၊ ၼမ်ႉတူႈ ၊ ၵျွၵ်ႉမႄး ၊ ၼွင်ၶဵဝ် ၊ သီႇပေႃႉ ၊ မိူင်းၵိုင် ၊ လၢႆးၶႃႈ ၊ ပၢင်လူင် ၊ ၵေးသီး ၊ မိူင်းၼၢႆး ၊ လၢင်းၶိူဝ်း ၊ မွၵ်ႇမႆႇ ၊ မိူင်းယွၼ်း (ၸႄႈဝဵင်းႁူဝ်ပူင်း) ၊ ၵုၼ်ႁဵင် ၊ မိူင်းတူၼ် ၊ မိူင်းယွင်း (ၸႄႈဝဵင်းမိူင်းပဵင်း) ၸိူဝ်းၼႆႉ ။


တပ်ႉသိုၵ်းၸိုင်ႈတႆး RCSS/SSA ၼႆႉ လူင်းလၢႆးမိုဝ်းၵိုတ်းတိုၵ်း ၵၼ်တင်းလူင်ပွင်ၸိုင်ႈမၢၼ်ႈ ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ် သွင်ၶၵ်ႉတွၼ်ႈၵူၺ်းပႆႇပေႃး ၊ မိူဝ်ႈဝၼ်း ၸိုင်ႈမိူင်းႁူမ်ႈတုမ် (12/02/2015) ၶွပ်ႈၶူပ်ႇ 68 ပီၼၼ်ႉၵေႃႈ တူဝ်ၸွမ်သိုၵ်းယွတ်ႈသိုၵ်း ႁွတ်ႈၽႅဝ်ၵႂႃႇတီႈၼေႇပျီႇတေႃႇသေ ၵႂႃႇလူင်းလၢႆးမိုဝ်းလိၵ်ႈၵိၼ်ၵႅၼ်ႇ တင်း ၸွမ်ၸိုင်ႈတဵင်းၸဵင်ႇ ဝႃႈတေႁူမ်ႈၵၼ်သၢင်ႈလွင်ႈငမ်းယဵၼ်လႄႈ တေႁူမ်ႈၵၼ်သၢင်ႈ လွင်ႈၶိုၼ်းလီၵၼ်ၼႂ်းၸိူဝ်ႉၸၢတ်ႈ ၸိူဝ်းၼႆႉ ။


RCSS/SSA ၼႆႉ ယင်းလႆႈထုၵ်ႇတၢင်ႇမူႇတၢင်ႇၸုမ်း ၸီႉၼႄးဝႃႈ ၼႂ်းၸုမ်းၸၢဝ်းၶိူဝ်း ယိပ်းၵွင်ႈၵၢင်ႇလုၵ်ႉၽိုၼ်ႉၼႆႉ ပဵၼ်ၸုမ်းဢၼ်ၸမ်ၸႂ်လူင်ပွင်ၸိုင်ႈမၢၼ်ႈ တင်းသိုၵ်းမၢၼ်ႈလိူဝ်တၢင်ႇၸုမ်း ။ ၼွၵ်ႈသေၼၼ်ႉ ၸွမ်းၼင်ႇၶေႃႈပိုၼ်ၽၢဝ်ႇၸုမ်းၸၢဝ်းၶိူဝ်း ယိပ်းၵွင်ႈၵၢင်ႇ  မိူၼ်ၼင်ႇၸုမ်းယၢင်း KNU, DKBA, KNU/KNLA-PC တင်း RCSS/SSA လႆႈၸႂ်ႁူမ်ႈၵၼ်ဢွၵ်ႇဝႆႉမိူဝ်ႈ ဝၼ်းတီႈ 16/08/2015 ၼၼ်ႉ RCSS/SSA ယင်းႁၢင်ႈႁႅၼ်းတူဝ်ႈတၼ်းဝႆႉ ပိူဝ်ႈတႃႇလူင်းလၢႆးမိုဝ်းၵိုတ်းတိုၵ်း ပတ်းပိုၼ်ႉတူဝ်ႈမိူင်း (NCA) ။