ႁႅင်းၵၢၼ်ယၢၼ်မိူင်းတႆး ၺႃးၸဝ်ႈၼႃႈတီႈ ပလိၵ်ႈထႆး တီႉၺွပ်းသေ တၢင်ႇလူတ်ႉသူင်ႇပွၵ်ႈၶိုၼ်း မိူင်းတႆး တီႈလႅၼ်လိၼ်တႆး - ထႆးမိူဝ်ႈဝၼ်းတီႈ 29/9/2015 ။

ၸဝ်ႈၼႃႈတီႈပလိၵ်ႈၺွပ်းလႆႈ ႁႅင်းၵၢၼ်ယၢၼ်မိူင်းတႆး 6 ၵေႃႉ သူင်ႇပွၵ်ႈၶိုၼ်းတီႈလႅၼ်လိၼ် ၾၢႆႇထႆးတိတ်းၸပ်းဝၢၼ်ႈၼွင်ဢုၵ်း ၸႄႈဝဵင်းၵဵင်းလၢဝ် ၸႄႈတွၼ်ႈၵဵင်းမႆႇ ၊ တိတ်းၸပ်းၵၼ်တင်းဝဵင်းပုင်ႇပႃႇၶႅမ် ၸႄႈဝဵင်းမိူင်းတူၼ်ၸႄႈ တွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇ ။


ၵဵဝ်ႇၵပ်းလွင်ႈၼႆႉ ၵူၼ်းဢၼ်ၺႃးၺွပ်းၸိူဝ်းၼၼ်ႉ ယွၼ်ႉဢမ်ႇမီးဝတ်းဝႂ် (ၽၢတ်ႉသ်ပွတ်ႇ) ဢၼ်ၶဝ်ႈမိူင်းထုၵ်ႇမႅၼ်ႈၸွမ်းမၢႆမီႈၼႆယဝ်ႉ ။


ႁႅင်းၵၢၼ် 6 ၵေႃႉၼၼ်ႉပဵၼ် (1) လုင်းၽေႃးၵႃႉ (မိူင်းလၢႆးၶႃႈ) ၊ (2) ၸၢႆးသူႉၸိင်ႇတႃႇ (မိူင်းၼၢႆး) ၊ (3) ၸၢႆးတေႇယ (မိူင်းၼၢႆး) ၊ ထႅင်ႈသၢမ်ႉၵေႃႉဢမ်ႇၶႂ်ႈဢွၵ်ႇၸိုဝ်ႈ - ဝႃႈၼႆ ။


ၸၢႆးၽေႃးၵလၢတ်ႈဝႃႈ  - “ ပီႈၼွင်ႉၵူၼ်းမိူင်းတႆးပေႃးဝႃႈမီးငိုၼ်းၶမ်းပေႃးၸႂ်ႉ ၊ မီးတီႈႁဵတ်းႁႃၵိၼ်ၵုမ်ႇထူၼ်ႈယူႇၸိုင် ဢမ်ႇတၢပ်ႈမႃးၵေႃႈလီယဝ်ႉ ပေႃးဢမ်ႇမေႃၵႂၢမ်းပိူၼ်ႈ ဢမ်ႇမီးဝတ်းဝႂ်ၼႆႉ မၼ်းယူႇယၢပ်ႇၼႃႇတုၵ်ႉၶၼႃႇ ” ဝႃႈၼႆ ။


မၼ်းၸၢႆးသိုပ်ႇလၢတ်ႈထႅင်ႈဝႃႈ - “ ယၢမ်းလဵဝ်ၼႆႉ ႁဝ်းၵေႃႈဢမ်ႇႁူႉတေႁဵတ်းၸိူင်ႉႁိုဝ် တေမိူဝ်းၵေႃႈဢမ်ႇၸၢင်ႈ တေၵႂႃႇၵေႃႈဢမ်ႇၸၢင်ႈ ငိုၼ်းၵေႃႈဢမ်ႇမီး ၵၢၼ်ၵေႃႈဢမ်ႇလႆႈႁဵတ်း ယၢပ်ႇၸႂ်တႄႉၶႃႈ ” ဝႃႈၼႆ ။


ၵဵဝ်ႇလူၺ်ႈလွင်ႈႁႅင်းၵၢၼ်ၽိတ်းမၢႆမီႈၼႆႉသေ ၸွမ်းၼင်ႇပၵ်းပိူင်မၢႆမီႈၸိုင်ႈမိူင်းထႆးမ တ်ႉတႃ 63 တႅမ်ႈဝႆႉဝႃႈ သင်ၽႂ်ဢဝ်ၵူၼ်းၶဝ်ႈမိူင်းၽိတ်းမၢႆမီႈၸွႆႈထႅမ် ၊ ပၼ်တီႈယူႇသဝ်းၸွႆႈထႅမ်ၵူၼ်းၶဝ်ႈမိူင်းၽိတ်းမၢႆမီႈၸိူဝ်ၼႆႉ တေမီးတူတ်ႈတၢမ်ႇတူၵ်းၶွၵ်ႈဢမ်ႇယွမ်း 10 ပီမႆငိုၼ်းဢမ်ႇယွမ်း 100,000 ဝၢတ်ႇၼႆယဝ်ႉ ။