ပီႈၼွင်ႉတႆးလိုဝ်ႉ တၢင်းပွတ်းဢွၵ်ႇ ၸတ်းႁဵတ်းပၢင် ယွင်ႈၵုၼ်းမုၼ် ၽူႈၵတ်ႉၶႅၼ်ႇလိၵ်ႈ



ပီႈၼွင်ႉတႆးလိုဝ်ႉ တၢင်းပွတ်းဢွၵ်ႇၶူင်း ၸတ်းႁဵတ်း ပၢင်ယွင်ႈၵုၼ်းမုၼ် ၽူႈၵတ်ႉၶႅၼ်ႇလိၵ်ႈ ဢၼ်တွပ်ႇလိၵ်ႈ ၶၢမ်ႈပူၼ်ႉၸၼ်ႉသိပ်း ၼႂ်းပီ 2015 တီႈႁူင်းႁေႃး တႆးလိုဝ်ႉ ဝဵင်းၵဵင်းတုင် ၸိုင်ႈတႆးပွတ်းဢွၵ်ႇ ။


ပူၼ်ႉမႃး မိူဝ်ႈဝၼ်းတီႈ 30/06/2015 ၶၢဝ်းယၢမ်း 15.00 မူင်း ထိုင် 20.00 မူင်း ပီႈၼွင်ႉတႆးလိုဝ်ႉ တၢင်းပွတ်းဢွၵ်ႇၶူင်း ၸတ်းႁဵတ်းပၢင်ယွင်ႈၵုၼ်းမုၼ် ၽူႈၵတ်ႉၶႅၼ်ႇလိၵ်ႈ ဢၼ်တွပ်ႇၶၢမ်ႈပူၼ်ႉၸၼ်ႉသိပ်း ၼႂ်းပီ 2015 ၊ တီႈႁူင်းႁေႃးတႆးလိုဝ်ႉ ဝၢၼ်ႈၼွင်ၶမ်း ပွၵ်ႉ(3) ဝဵင်းၵဵင်းတုင် ၸိုင်းတႆး ပွတ်းဢွၵ်ႇၶူင်း။ ဢၼ်လႆႈၸတ်းႁဵတ်းပွႆးယွင်ႈၵုၼ်းမုၼ်ၼႆႉ ၼင်ႇႁိုဝ် လုၵ်ႈဢွၼ်ႇပေႃးတေၶတ်းၸႂ်ႁဵၼ်းလိူဝ်ၵဝ်ႇမႃးထႅင်ႈ တေႃႈလဵဝ်ၼႆႉ ယွၼ်ႉလုၵ်ႈဢွၼ်ႇ ယူႇႁၢင်ႇၵႆၵၢၼ်ႁဵၼ်းၵၢၼ်သွၼ် ၼႆယဝ်ႉ။


ပၢင်ယွင်ႈၵုၼ်းမုၼ်ၼႆႉ မီးၽူႈယႂ်ႇၵူၼ်းလူင် မိူၼ် ႁူဝ်ပဝ်ႈတႆးလိုဝ်ႉ လုင်းၸၢႆးယွတ်ႈ လႄႈၾၢႆႇပၢႆးပၺ်ၺႃ ၼႂ်းလူင်ပွင်ၸိုင်ႈ ၵဵင်းတုင် ၵၢဝ်ႇလၢတ်ႈၶေႃႈၵႂၢမ်းတိုၵ်းသူၼ်းပၼ်လုၵ်ႈဢွၼ်ႇတႆး ႁႂ်ႈလႆႈၶတ်းၸႂ်ႁဵၼ်းသွၼ်ၵႂႃႇ။ လိူဝ်ၼၼ်ႉတွၼ်ႈသူးရၢင်းဝလ်း ပၼ်လုၵ်ႈဢွၼ်ႇဢၼ်တွပ်ႇလိၵ်ႈ ၶၢမ်ႈပူၼ်ႉၸၼ်ႉသိပ်း ပီ 2015 တင်းမူတ်း 39 ၵေႃႉ၊ တွၼ်ႈ ရၢင်းဝလ်း (သူး) ငိုၼ်း တင်းမူတ်းမႅၼ်ႈငိုၼ်း 54,0000 ပျႃး ၸဝ်ႈတႃႇၼ ၵမ်ႉထႅမ်ၸွႆႈသမ်ႉ ပဵၼ် SYF Co. လုင်းၸၢႆးယွတ်ႈ ။


လုၵ်ႈဢွၼ်ႇဢၼ်လႆႈ လၢဝ်ၸွင်ႈ 6 လုၵ်ႈ  1 ၵေႃႉ၊  5 လုၵ်ႈ 3 ၵေႃႉ၊ 3 လုၵ်ႈ 1 ၵေႃႉ၊ 1 လုၵ်ႈ 10 ၵေႃႉ၊ လိူဝ်ၼၼ်ႉၵေႃႈ တွပ်ႇၶၢမ်ႈပူၼ်ႉၸၼ်ႉလၢႆလၢႆၵူၺ်း တင်းမူတ်းမီး 39 ၵေႃႉ၊  လုၵ်ႈဢွၼ်ႇဢၼ်မႃးႁပ်ႉရၢင်းဝလ်း(သူး) ဝဵင်းတႃႈၶီႈလဵၵ်း၊ မိူင်းယွင်း၊ မိူင်းၽျႅၵ်ႈ  လႄႈ ဝဵင်းၵဵင်းတုင် ။


ပၢင်ယွင်ႈၵုၼ်းမုၼ် ၽူႈၵတ်ႉၶႅၼ်ႇလိၵ်ႈၶၢမ်ႈပူၼ်ႉၸၼ်ႉသိပ်းၼႆႉ လႆႈၸတ်းႁဵတ်းမႃးပဵၼ်ပွၵ်ႈၵမ်းတီႈ (6)၊ တင်းမူတ်းမီးၽူႈၶဝ်ႈႁူမ်ႈ မွၵ်ႈ 300 ၵေႃႉပၢႆ၊ မီးပႃႊတီႊၵၢၼ်မိူင်း၊ ၸုမ်းၵေႃလိၵ်ႈလၢႆးလႄႈၾိင်ႈငႄႈတႆး ၵဵင်းတုင် လႄႈၵူၼ်းမိူင်း ၸဵမ်ၸိူဝ်းၼႆႉ။





 
© 2012 All Rights Reserved | Asean Celebrity | Fonts @ AtFonts | Free Templates