ၸွင်ႇမၢၼ်ႈတေတိုၵ်းဝႃႉတႄႉႁိုဝ် ?



ဢိင်ၼိူဝ်သိုၵ်းမၢၼ်ႈတင်းသိုၵ်းဝႃႉ ၶဵင်ႈၶႅင်ၵၢၼ်သိုၵ်း တေႃႇၵၼ် ယွၼ်ႉပၼ်ႁႃတႅပ်းမႆႉ ၼႂ်းဝူဝ်ႇႁူၺ်ႈၼမ်ႉသႂ် ထုင်ႉမိူင်းၶိတ်ႈ ၸႄႈဝဵင်းမိူင်းတူၼ် ၸႄႈတွၼ်ႈမိူင်းသၢတ်ႇ ၸိုင်ႈတႆးပွတ်းဢွၵ်ႇၶူင်းၼၼ်ႉသေ ပဵၵ်ႉသမ်ႉ မီးၶၢဝ်ႇဝႃႈ သွင်ၾၢႆႇႁူပ်ႉထူပ်းဢုပ်ႇဢူဝ်း ၵႄႈလိတ်ႈၵၼ် လၢႆပွၵ်ႈလၢႆၵမ်းယဝ်ႉၵေႃႈ သွင်ၾၢႆႇယင်းတိုၵ်ႉ မိူၼ်ထၢၼ်ႇၾႆးမူၵ်းတဝ်ႈဝႆႉ၊ တိုၵ်ႉမိူၼ်ၵမ်တႃမိုဝ်းမူၵ်းထွင်း တေႃႇၵၼ်ယူႇ။


တပ်ႉသိုၵ်းဝႃႉ လႄႈ တပ်ႉသိုၵ်းမၢၼ်ႈ
လွင်ႈၸုမ်းဝႃႉၶဝ်ႈတႅပ်းမႆႉ ၼႂ်းထိူၼ်ႇႁူၺ်ႈၼမ်ႉသႂ် ထုင်ႉမိူင်းၶိတ်ႈ၊ ဢၼ်မၢၼ်ႈဝႃႈ ပဵၼ်ထိူၼ်ႇမႆႉ ဢၼ်လူင်ပွင်ၸိုင်ႈမၢၼ်ႈ ၵုမ်းၵမ်ဝႆႉၼႆႉသေ ၾၢႆႇသိုၵ်းမၢၼ်ႈ တင်းပလိၵ်ႈမၢၼ်ႈ ၶဝ်ႈတီႉၺွပ်းၵႂႃႇ ၵူၼ်းၸုမ်းဝႃႉ 16 ၵေႃႉ၊ မႆႉ 300 တၼ်ႊ။ မီးၶၢဝ်ႇဝႃႈ ပွႆႇပၼ်ၶိုၼ်းၵူၼ်းဝႃႉ 10 ၵေႃႉ၊ ၵူၼ်းတႃႇ 6 ၵေႃႉၼၼ်ႉ သမ်ႉထုၵ်ႇၸီႉၼႄးဝႃႈ ပဵၼ်ၵူၼ်းၶႄႇသေ တေႃႇထိုင်မိူဝ်ႈလဵဝ် ယင်းပႆႇပွႆႇပၼ်။

ၾၢႆႇၼိုင်ႈၵေႃႈ ပိူဝ်ႈတႃႇလႆႈၶိုၼ်းၵူၼ်းၸုမ်းဝႃႉ ၸၢဝ်းၶႄႇ 6 ၵေႃႉ တင်းမႆႉ ဢၼ်ၾၢႆႇမၢၼ်ႈတီႉၺွပ်းၵႂႃႇ ၼၼ်ႉသေ ၾၢႆႇတပ်ႉသိုၵ်းဝႃႉ လႆႈၽိူမ်ႉထႅမ်ႁႅင်းသိုၵ်း ၼႄဢမ်းၼၢၸ်ႈ(ဢႃႇၼႃႇ)မုၼ်ငဝ်းၸုမ်းဝႃႉ။ ၵူၺ်းၵႃႈ လွင်ႈၼႆႉ ႁဵတ်းႁႂ်ႈပဵၼ်လွင်ႈၶၢမ်ႈၼႃႈၶၢမ်ႈတႃသိုၵ်းသေ ပဵၼ်တီႈၵၢႆးၼႃႈၵၢႆးတႃမၢၼ်ႈမႃး။

ၵဵဝ်ႇၵပ်းလွင်ႈၸိူဝ်းၼႆႉ သွင်ၾၢႆႇ လႆႈႁူပ်ႉထူပ်းဢုပ်ႇဢူဝ်းၵၼ် တီႈပုင်ႇပႃႇၶႅမ် မိူဝ်ႈဝၼ်းတီႈ 05/06/2015 လႄႈ မိူဝ်ႈဝၼ်းတီႈ 08/06/2015 ။ ဢုပ်ႇဢူဝ်းၵၼ် တီႈမိူင်းတူၼ် မိူဝ်ႈဝၼ်းတီႈ 19/06/2015 ၸိူဝ်းၼႆႉယူႇ၊ ၵူၺ်းၵႃႈ ပၼ်ႁႃၸိူဝ်းၼႆႉ ဢမ်ႇယဝ်ႉဢမ်ႇတူဝ်ႈသေ ၽႅဝ်ၵႂႃႇထိုင်တီႈၼေႇပျီႇတေႃႇ။ ၵွပ်ႈၼၼ်လႄႈ ၼေႇပျီႇတေႃႇၵေႃႈ လႆႈႁွင်ႉဢဝ်ၽူႈမီးၸၼ်ႉ ၸုမ်းဝႃႉၵႂႃႇတီႈၼေႇပျီႇတေႃႇသေ ဢုပ်ႇဢူဝ်းၵၼ်လၢႆၶေႃႈ။

ၼႂ်းၼၼ်ႉ ပိူင်လူင်မၼ်း ၶေႃႈတီႈ 1.မႆႉဢၼ်ၾၢႆႇမၢၼ်ႈ တေပၼ်ဝႃႉ (ႁပ်ႉသိုဝ်ႉ)ၼၼ်ႉၵေႃႈ ဢမ်ႇပၼ်ယဝ်ႉ။ 2.ၸၢဝ်းၶႄႇ 6 ၵေႃႉ ဢၼ်တေပွႆႇပၼ်ၼၼ်ႉၵေႃႈ  ဢမ်ႇပွႆႇပၼ်ၵူၺ်းပႆႇပေႃး ၸွမ်းၼင်ႇပၵ်းပိူင်ဝၢၼ်ႈမိူင်း မီးၼၼ်ႉ တေပၼ်တူတ်ႈ(တၢမ်ႇ) ၸိူဝ်းၶဝ်ၵႂႃႇ။

ၾၢႆႇၼိုင်ႈ ယင်းမီးၶၢဝ်ႇဝႃႈ ၸွမ်သိုၵ်းလူင် မိၼ်းဢွင်ႇလၢႆႇ ယင်းလၢတ်ႈတီႈၸုမ်းဝႃႉဝႃႈ- မိၼ်းဢွင်ႇလၢႆႇ ဢၼ်ဝႃႈၼႆႉ မၼ်းဢမ်ႇၸႂ်ႈၸွမ်သိုၵ်းလူင်တၢၼ်းသူၺ်ႇ၊ လၢတ်ႈၵႂၢမ်းၸိူင်ႉႁိုဝ်ၵေႃႈ ႁဵတ်းၸိူင်ႉၼၼ်ၵူၺ်း။ ႁၼ်ယူႇဢမ်ႇၸႂ်ႈႁိုဝ် ပၼ်ႁႃၵူဝ်းၵၢင်ႉ ႁဵတ်းႁိုဝ်သင်ႇသွၼ်မႃး။ မိူဝ်ႈတႄႇပဵၼ်ပၢင်တိုၵ်း တၢင်းၵူဝ်းၵၢင်ႉၼႆႉ သဵင်တႆး သဵင်ဝႃႉၸိူဝ်းၼႆႉ ပေႃးပၼ်းလူင်ၵႂႃႇၼႂ်းပၢင်တိုၵ်း၊ ၵမ်းၼႆႉတႄႉ ယဵၼ်ၸိပ်းမူတ်း၊ ၸွင်ႇၽႂ်ႁတ်းတူင်ႉၸွမ်းယဝ်ႉ ယဝ်ႉႁိုဝ်၊ လႆႈႁၼ်ယဝ်ႉၼႄႇ ၶေႃႈသင်ႇသွၼ်တၢင်းၵူဝ်းၵၢင်ႉ။ ၵွပ်ႈၼၼ်လႄႈ ဢၼ်ယူႇၼိူဝ်ၽႅၼ်ႇလိၼ်ဝၢၼ်ႈမိူင်း ဢၼ်ဢႃႇၼႃႇၸၢၵ်ႈ ၶွင်လူင်ပွင်ၸိုင်ႈ ၵုမ်းၵမ်ဝႆႉၼႆႉ၊ ၽႂ်ၶတ်းၶႂၢင်လူင်ပွင်ၸိုင်ႈ ဢမ်ႇလႆႈ၊ ၽႂ်ၶတ်းၶႂၢင်ၵေႃႈ တိုၼ်းတေလႆႈၺႃး ၵၢၼ်တွပ်ႇတႅၼ်းၶိုၼ်း ဢၼ်ၵိုင်ႇၵႃႈၵိုင်ႇႁူဝ်မၼ်းၼၼ်ႉယဝ်ႉ- ဝႃႈၼႆ။

ဢိင်ၼိူဝ်ဢၼ်ဝႃႈ တေတုမ်ႉတွပ်ႇၶိုၼ်းၸိူဝ်းၼႆႉႁိုဝ်တႄႉ ဢမ်ႇႁူႉ၊ သိုၵ်းမၢၼ်ႈၼႆႉ သူင်ႇတပ်ႉၸုမ်းလူင် (တပ်ႉမ) 55 ဢၼ်ပၵ်းတီႈ ဝဵင်းၵၢတ်ႇလေႃႉ (ၵလေႃး) ၼႂ်းၸိုင်ႈတႆးပွတ်းၸၢၼ်း၊ ပႃႈတႂ်ႈတိူင်းသိုၵ်းဝၼ်းဢွၵ်ႇ (ယပၶ) တူၼ်ႈတီး သူင်ႇမႃးတၢင်း ၼႃႈလိၼ်ဝႃႉၵုမ်းၵမ် တွၼ်ႈပွတ်းဢွၵ်ႇၶူင်းၼႆႉ ရူတ်ႉၵႃးသိုၵ်း 50 လမ်းပၢႆ။ ၼႂ်းၼၼ်ႉ ပႃးႁိူဝ်းဢၼ်လႅၼ်ႈၼိူဝ်ၽိဝ်ၼမ်ႉ လၢႆလၢႆလမ်း။ လိူဝ်သေၼၼ်ႉ ပႃးၶိူင်ႈၵွင်ႈၵၢင်ႇမၢၵ်ႇမိုဝ်ႈ ၸိုၼ်းယၢမ်း တင်းၼမ်သေ ၶၢမ်ႈၶူင်းတၢင်းတႃႈသူပ်းပၢတ်ႈ (ဢမ်ႇၶၢမ်ႈတီႈ ၶူဝ်လူင်တႃႈသၢင်း)။ (ၵမ်ႈၽွင်ႈ ၸိူဝ်းပႂ်ႉဢၢၼ်ႇသိုဝ်ႈၼႃႈတၼ်းတႃ ယင်းလၢတ်ႈဝႃႈ ရူတ်ႉၵႃးသိုၵ်းမၢၼ်ႈ ဢၼ်မႃးတၢင်းဢွၵ်ႇၶူင်းၼၼ်ႉ တင်းမူတ်းမီး 72 လမ်း ၼႆလူးၵွၼ်ႇ။

ၵဵဝ်ႇၵပ်းလွင်ႈ ပၼ်ႁႃဝႃႉတင်းမၢၼ်ႈၼႆႉၽူႈၶၢၼ်ပၢၵ်ႇလႄႈ ၽူႈၵွၼ်းၵၢၼ်လုမ်း (UWSA) ဢူးဢွင်ႇမိၼ်ႉၵေႃႈ လၢတ်ႈတီႈၸုမ်းသိုဝ်ႇၶၢဝ်ႇ (Media) ဝႃႈ- ပၼ်ႁႃဢၼ်တႄႇမႃး ၸဵမ်မိူဝ်ႈလိူၼ်ၵျုၼ်ႊၼၼ်ႉ တေႃႇထိုင်မိူဝ်ႈလဵဝ် တင်းသွင်ၾၢႆႇယင်းပႆႇမီး ဢၼ်ထွၼ်ၶိုၼ်း။ ႁဝ်းၶႃႈတႄႉ ဢၼ်ၶဵင်ႈၶႅင်ၵၢၼ်သိုၵ်း ၵၼ်ယူႇၼႆႉ ဢမ်ႇၶႂ်ႈႁႂ်ႈမၼ်းပဵၼ်ပၢင်တိုၵ်း၊ တေဢဝ်လၢႆးၵတ်းယဵၼ်သေ ၵႄႈလိတ်ႈၵႂႃႇ- ဝႃႈၼႆ။

ၸၢႆးၼႃႉ ၵူၼ်းမိူင်းတူၼ် လၢတ်ႈဝႃႈ- လွင်ႈသိုၵ်းမၢၼ်ႈ တင်းသိုၵ်းဝႃႉ ၶဵင်ႈၶႅင်ၵၢၼ်သိုၵ်းတေႃႇၵၼ်ၼႆႉ ထိုင်ၸၼ်ႉလႂ် ႁဝ်းၶႃႈတႄႉဢမ်ႇႁူႉ၊ ၵူၼ်းၼႂ်းမိူင်းတူၼ်ႁဝ်းၶႃႈၵေႃႈ ၵႂႃႇၵႂႃႇမႃးမႃးမိူၼ်ၵဝ်ႇယူႇ။ ၵူၺ်းၵႃႈ ဢၼ်လၢၵ်ႇလၢႆးတႄႉ မီးဢၼ်ၼိုင်ႈ၊ ၽူႈယႂ်ႇၵူၼ်းလူင် ၼႂ်းသိုၵ်းမၢၼ်ႈၵေႃႉၼိုင်ႈၼႆႉ မိူၼ်ၼင်ႇယွၵ်ႇလဵၼ်ႈသေ မႃးလၢတ်ႈႁဝ်းၶႃႈဝႃႈ ငဝ်းလၢႆးဢမ်ႇပေႃးလီ၊ ၶုတ်းလုၵ်းထႅၼ်ႉလုၵ်းပဵမ်ႇဝႆႉ ၸွမ်းႁိူၼ်းၵူႈႁိူၼ်းလႃႈ၊ မႃးလၢတ်ႈၸိူင်ႉၼႆ၊ လၢတ်ႈတႄႉႁိုဝ်လၢတ်ႈလဵၼ်ႈၼၼ်ႉ ႁဝ်းၶႃႈၵေႃႈဢမ်ႇလၢမ်းလႆႈ- ဝႃႈၼႆ။

ၽူႈမီးၸၼ်ႉၼႂ်းဝႃႉၵေႃႉၼိုင်ႈ ၼႃႈလိၼ်ဝႃႉၵုမ်းၵမ် ပွတ်းတႂ်ႈ၊ ၼႃႈလိၼ်သိုၵ်း 171 လၢတ်ႈဝႃႈ- ႁဝ်းၶႃႈႁူႉၵူႈလွင်ႈယဝ်ႉ။ ဢၼ်သိုၵ်းမၢၼ်ႈလုၵ်ႉတၢင်းတူၵ်းၶူင်း ၶၢမ်ႈမႃးပွတ်းဢွၵ်ႇၶူင်းၸိူဝ်းၼႆႉ ႁဝ်းၶႃႈႁူႉ၊ ဢၼ်လုၵ်ႉတၢင်းၵဵင်းတုင် မိူင်းသၢတ်ႇသေ ဢဝ်ရူတ်ႉၵႃးတၢင်ႇမႃႉမႃး၊ ဢၼ်ပဵၼ်မႃႉတႃႇၸႂ်ႉ ၼႂ်းပၢင်တိုၵ်းၸိူဝ်းၼႆႉၵေႃႈ ႁဝ်းၶႃႈႁူႉၸွမ်းယူႇ။ ၵူၺ်းၵႃႈ ႁဝ်းၶႃႈၼႆႉ ဢမ်ႇၽွင်းလိူဝ်လႆႈ ၶေႃႈၸီႉသင်ႇတၢင်းၼိူဝ်၊ ပေႃးတၢင်းၼိူဝ် လၢတ်ႈဝႃႈထွၼ်ၵေႃႈ ႁဝ်းၶႃႈထွၼ်၊ ပေႃးတၢင်းၼိူဝ်လၢတ်ႈဝႃႈ ယႃႇထွၼ်ၵေႃႈ ႁဝ်းၵႃႈတေလႆႈပၵ်းယူႇတိၵ်းတိၵ်းယဝ်ႉ။ ၵွပ်ႈၼၼ်လႄႈ တီႈဢၼ်ႁဝ်းၶႃႈယူႇဝႆႉၼႆႉ ၵမ်ႈၼမ်ႁဝ်းတိုၵ်ႉပၵ်းယူႇဝႆႉယူႇ။ ဢၼ်ၵႂႃႇပၵ်းၸွမ်းၼိူဝ်သဵၼ်ႈတၢင်း ပုင်ႇပႃႇၶႅမ် မိူင်းႁၢင် မိူင်းတူၼ် ၸိူဝ်းၼႆႉသေ ဢဝ်မႆႉသၢဝ်ႈႁႄႉဝႆႉ ထတ်းၵူၼ်းၵႂႃႇမႃးၸိူဝ်းၼႆႉတႄႉ ထွၼ်ပၼ်မူတ်းယဝ်ႉ၊ လိူဝ်သေၼၼ်ႉ ဢမ်ႇထွၼ်သေတီႈ။ ၵူၺ်းၵႃႈ ဢၼ်ၾၢႆႇသိုၵ်းမၢၼ်ႈ ႁၢင်ႈႁႅၼ်းသိုၵ်းသေ သုတ်ႉၸူးဢိူမ်ႈၸမ်မႃးႁဝ်းတိၵ်းတိၵ်းၼႆႉတႄႉ ပေႃးဝႃႈတၢင်းၼိူဝ် ၸီႉသင်ႇဝႃႈယိုဝ်းလႄႈ ၼႆၵေႃႈၵႃႈလႆႈယိုဝ်းယဝ်ႉ၊ ထွမ်ႇၶေႃႈၸီႉသင်ႇ တၢင်းၼိူဝ်ၵူၺ်း- ဝႃႈၼႆ။

လၢႆၾၢႆႇၵေႃႈဢွၼ်ၵၼ်ထတ်းသၢင်ဝႃႈ- တပ်ႉသိုၵ်းမိူင်းဝႃႉ ၽွမ်ႉႁူမ်ႈၼႆႉ 1.မီးႁႅင်းၵူၼ်း။ 2.မီးႁႅင်းၵွင်ႈ။ 3.မီးႁႅင်းငိုၼ်း။ လိူဝ်သေၼၼ်ႉ ယင်းမီးထႅင်ႈ ၶိူင်ႈၵွင်ႈၵၢင်ႇဢၼ်ၶိုတ်းၵၢပ်ႈ မိူၼ်ၼင်ႇရူတ်ႉၵႃးၵၢပ်ႇလဵၵ်း၊ ၶိူင်ႈယိုဝ်းႁိူဝ်းဝိၼ်။ ၵမ်ႈၽွင်ႈ ယင်းလၢတ်ႈဝႃႈ ၸုမ်းဝႃႉ ယင်းမီးႁိူဝ်းဝိၼ် ဢၼ်ၸႂ်ႉၼႂ်းပၢင်တိုၵ်းလူးၵွၼ်ႇ။ ၾၢႆႇၼိုင်ႈၵေႃႈ ယင်းမီးသဵင်ၸီႉၼႄးထႅင်ႈဝႃႈ ၸုမ်းဝႃႉၼႆႉ ၶႄႇၵမ်ႉယၼ်ပၼ်ႁႅင်းဝႆႉလုမ်းလုမ်း၊ ၵွပ်ႈၼႆ ဝႃႉၸင်ႇႁတ်းၶတ်းၶႂၢင် ၶေႃႈၸီႉသင်ႇၾၢႆႇသိုၵ်းမၢၼ်ႈမႃး။

ၸုမ်းဝႃႉၼႆႉ တင်ႈတႄႇၵိုတ်းသိုၵ်းၵၼ်တင်း ၸုမ်းသိုၵ်းမၢၼ်ႈပီ 1989 မႃး ယၢမ်ႈႁူမ်ႈသိုၵ်းမၢၼ်ႈ လေႃႇတိုၵ်းတပ်ႉသိုၵ်း ဢၼ်ၶုၼ်သႃႇ ဢွၼ်ႁူဝ်မႃးလၢႆပွၵ်ႈလၢႆၵမ်း။ ၼႂ်းပီ 2001-02 တင်းၼႂ်းပီ 2005 ၸိူဝ်းၼႆႉၵေႃႈ ယၢမ်ႈႁူမ်ႈၵၼ်တင်းသိုၵ်းမၢၼ်ႈသေ ၶိုၼ်ႈလေႃႇတိုၵ်း တပ်ႉသိုၵ်းၸိုင်ႈတႆး RCSS/SSA ဢၼ်ၸဝ်ႈယွတ်ႈသိုၵ်းဢွၼ်ႁူဝ် ငဝ်ႈၸိုင်ႈလွႆတႆးလႅင်း၊ ၵူၺ်းၵႃႈ လႆႈလူႉယႂ်ႇသုမ်းလူင် ၵၢၼ်ႉသိုၵ်းသေ ထွၼ်ထွႆၶိုၼ်း။

ဢိင်ၼိူဝ် ၸွမ်သိုၵ်းလူင်ၶိၼ်ႇၺုၼ်ႉ လၢတ်ႈတီႈၸုမ်းဝႃႉဝႃႈ ပိုၼ်ႉတီႈၼႃႈလိၼ် ဢၼ် SSA ၵုမ်းၵမ် ၸွမ်းလႅၼ်လိၼ်ၸိူဝ်းၼႆႉ ပေႃးဝႃႈၸုမ်းဝႃႉ တိုၵ်းယိုဝ်းႁုပ်ႈယိုတ်းလႆႈၸိုင် တေပၼ်ယူႇသဝ်း ပဵၼ်ပိုၼ်ႉတီႈၼႃႈလိၼ်ၶိုၵ်ႉတွၼ်း ၸိူဝ်းၼႆႉ။ ၵွပ်ႈၼၼ် ၽွင်းပီ 2001-02 ၼၼ်ႉ ၸုမ်းဝႃႉၵေႃႈတေႃႉဢဝ် ၵူၼ်းမိူင်းၼႂ်းၼႃႈလိၼ်ဝႃႉ ပွတ်းၼိူဝ် လူင်းမႃးပွတ်းတႂ်ႈ မႃးတႄႇဝၢၼ်ႈတႄႇသူၼ်၊ မႃးယင်ႇႁၢၵ်ႈပၵ်းႁူဝ် ၸွမ်းလႅၼ်လိၼ်တႆး- ထႆး ၼႂ်းၸႄႈဝဵင်းမိူင်းတူၼ်။

ဢိင်ၼိူဝ်လွင်ႈၼႆႉသေ ၸုမ်းဝႃႉၵေႃႈ တူၵ်ႇလၢတ်ႈ ၶႂ်ႈတင်ႈမိူင်းႁင်းၶေႃ ယူႇတႂ်ႈၼေႇပျီႇတေႃႇၵမ်းသိုဝ်ႈ၊ ဢမ်ႇၵွမ်ႉၵႃႈၼႃႈလိၼ်ဝႃႉပွတ်းၼိူဝ်ၵူၺ်း၊ ၼႃႈလိၼ်ဝႃႉၵုမ်းၵမ် ပွတ်းတႂ်ႈ လႅၼ်လိၼ်ထႆးၸိူဝ်းၼႆႉၵေႃႈ ၶႂ်ႈဢဝ်ၵိုၵ်းပႃး ၼႃႈလိၼ်ဝႃႉပွတ်းၼိူဝ်သေ တင်ႈပဵၼ်ၸႄႈမိူင်း မိူင်းဝႃႉ။

ပူၼ်ႉမႃးမိူဝ်ႈၼႂ်းပီ 2009 ၾၢႆႇၸုမ်းသိုၵ်းမၢၼ်ႈ ယၢမ်ႈၸႂ်ႉၸုမ်းဝႃႉ လႅၵ်ႈလၢႆႈႁဵတ်းတပ်ႉပႂ်ႉလႅၼ်လိၼ်၊ မိူဝ်ႈၼၼ်ႉ ဝႃႉဢမ်ႇၽွမ်ႉသေ သွင်ၾၢႆႇလႆႈၶဵင်ႈၶႅင်ၵၢၼ်သိုၵ်း တေႃႇၵၼ်ၵမ်းၼိုင်ႈ။ ထိုင်မႃးၼႂ်းပီ 2013 ၵေႃႈ ၾၢႆႇတပ်ႉသိုၵ်းမၢၼ်ႈ ပိဝ်ႇႁႃႇပုင်ႇပႃႇၶႅမ် သင်ႇလၢတ်ႈတီႈၸုမ်းဝႃႉ ဢၼ်ယူႇပႃႈတႂ်ႈၼႃႈလိၼ်ပိဝ်ႇႁႃႇ ပုင်ႇပႃႇၶႅမ် ၼႂ်းၸႄႈဝဵင်းမိူင်းတူၼ်တင်းသဵင်ႈဝႃႈ ၸုမ်းဝႃႉၼႆႉ တပ်ႉလႂ်မီးႁႅင်းၵူၼ်းၵႃႈႁိုဝ်၊ ႁႅင်းၵွင်ႈၵၢင်ႇၵႃႈႁိုဝ် ၸိူဝ်းၼႆႉ ႁႂ်ႈသူင်ႇသၢႆမၢႆပၼ်တီႈ တပ်ႉသိုၵ်းမၢၼ်ႈတင်းမူတ်း၊ မိူဝ်ႈၼၼ်ႉ ၸုမ်းဝႃႉဢမ်ႇၽွမ်ႉသေ လႆႈၶဵင်ႈၶႅင်ၵၢၼ်သိုၵ်းတေႃႇၵၼ် ထႅင်ႈၵမ်းၼိုင်ႈ။ ၵွပ်ႈၼၼ် တင်ႈတႄႇၵိုတ်းသိုၵ်းပီ 1989 မႃး တေႃႇထိုင်ယၢမ်းလဵဝ် ဝႃႉတင်းမၢၼ်ႈ မီးလွင်ႈၶဵင်ႈၶႅင် ၵၢၼ်သိုၵ်းတေႃႇၵၼ် 2 ၵမ်းၼႆႉၵူၺ်း။

ၾၢႆႇၼိုင်ႈၵေႃႈ ဢိင်ၼိူဝ်သိုၵ်းဝႃႉ တင်းသိုၵ်းမၢၼ်ႈၶဵင်ႈၶႅင် ၵၢၼ်သိုၵ်းတေႃႇၵၼ်သေ ၾၢႆႇသိုၵ်းတႆး RCSS/SSA ၵေႃႈ လႆႈႁၢင်ႈႁႅၼ်းၵၢၼ်သိုၵ်းတူဝ်ႈတၼ်းဝႆႉ  ပိူဝ်ႈတႃႇႁႄႉၵင်ႈၽေးသိုၵ်း ဢၼ်ၸၢင်ႈမီးၽွၼ်း တုမ်ႉယွၼ်ႉမႃး၊ ပိူဝ်ႈတႃႇႁပ်ႉၵူၼ်းမိူင်း ဢၼ်ၸၢင်ႈပၢႆႈၽေးသိုၵ်းမႃးၸိူဝ်းၼၼ်ႉ-  လႅင်ႇၶၢဝ်ႇဢၼ်ယိုၼ်ယၼ်လႆႈ လၢတ်ႈၼင်ႇၼႆ။

ၵဵဝ်ႇၵပ်းလွင်ႈဢၼ် သိုၵ်းဝႃႉတင်းသိုၵ်းမၢၼ်ႈ ၶဵင်ႈၶႅင်ၵၢၼ်သိုၵ်းတေႃႇၵၼ် မႃးၸိူဝ်းၼႆႉသေ တူဝ်တႅၼ်းၸၼ်ႉသုင် ဢၼ်သၢင်ႈလွင်ႈငမ်းယဵၼ် ၼႂ်းဝူင်ႈၵၢင်ၸုမ်းယိပ်းၵွင်ႈၵၢင်ႇ ၸၢဝ်းၶိူဝ်း တင်းမၢၼ်ႈၵေႃႉၼိုင်ႈ ယၢမ်ႈလၢတ်ႈဝႃႈ- ႁႅင်းသိုၵ်းမၢၼ်ႈၼႆႉ မီးႁႃႈသႅၼ်၊ ပေႃးဝႃႈဢဝ်ထိုမ်ႈဢွႆႇဝႃႉ (ယွမ်းတၢႆ) တႃႇႁႃႈႁဵင် (5,000) ၵေႃႉၼႆတႄႉ ၼႃႈလိၼ်ဝႃႉတင်းသဵင်ႈၼႆႉ မၢၼ်ႈတေၵုမ်းၵမ်လႆႈတင်းမူတ်း၊ ၾၢႆႇမၢၼ်ႈယုမ်ႇယမ်ဝႆႉၸိူင်ႉၼႆ- ဝႃႈၼႆ။

ဢဵၼ်ႁႅင်းတပ်ႉသိုၵ်းဝႃႉၼႆႉ ပေႃးမႃးတူၺ်း ၼႃႈလိၼ်ဝႃႉၽွင်းငမ်း (ပွတ်းၼိူဝ်)  လႄႈ ၼႃႈလိၼ်ဝႃႉၵုမ်းၵမ်ဝႆႉ ပွတ်းတႂ်ႈၼႆႉ မီးတပ်ႉၸုမ်းလူင် တင်းမူတ်း 9 ဢၼ်။ ၼႃႈလိၼ်သိုၵ်း 171 ပွတ်းတႂ်ႈ 5 ဢၼ်၊ တီႈပၢင်သၢင်း ပႃးတပ်ႉႁူမ်ႇလူမ်ႈငဝ်ႈငုၼ်း မီး 4 ဢၼ်။ ၼႂ်းတပ်ႉၸုမ်းလူင် 9 ဢၼ်ၼႆႉ ၼိုင်ႈတပ်ႉၸုမ်း မီးႁႅင်းသိုၵ်း ဢမ်ႇယွမ်း 2,500- 3,200 ။ လိူဝ်သေၼၼ်ႉ ယင်းမီးတပ်ႉပီႇတုၸိတ်ႉ ဢၼ်ဝႃႉၶွတ်ႇၽွတ်ႈဝႆႉ၊ တပ်ႉပီႇတုၸိတ်ႉၼႆႉၵေႃႈ မီးတပ်ႉၸုမ်းလူင် ပီႇတုၸိတ်ႉၼင်ႇၵဝ်ႇ- ၽူႈမီးၸၼ်ႉ တီႈပၢင်သၢင်း ၵေႃႉၼိုင်ႈယၢမ်ႈလၢတ်ႈၼင်ႇၼႆ။

ၼႂ်းၼႃႈလိၼ်ဝႃႉၵုမ်းၵမ် ၸွမ်းၼင်ႇပိူင်မၢၼ်ႈတႅမ်ႈတမ်းဝႆႉဝႃႈ- ၸႄႈဝဵင်းပၢင်ဝၢႆ၊ ၼႃးၽၢၼ်း၊ မိူင်းမႂ်ႇ၊ ပၢင်သၢင်း၊ ၼႂ်း 4 ၸႄႈဝဵင်းၼႆႉ တပ်ႉၸုမ်းလူင်ဝႃႉ မီး 4 ဢၼ်ၼၼ်ႉ ပဵၼ်တပ်ႉၸုမ်းလူင် 318 ၊ 418 ၊ 468 တင်း တပ်ႉႁူမ်ႇလူမ်ႈငဝ်ႈငုၼ်း 618 ။ လိူဝ်သေၼၼ်ႉ ၸုမ်းဝႃႉ ၼႃႈလိၼ်သိုၵ်း 171 (ပွတ်းတႂ်ႈ) မီးတပ်ႉၸုမ်းလူင် 772, 775, 778, 518, 248 ၸိူဝ်းၼႆႉ။

ၼႂ်းၸိုင်ႈမိူင်းႁူမ်ႈတုမ်မၢၼ်ႈၼႆႉ သိုၵ်းမၢၼ်ႈသမ်ႉမီး တိူင်းသိုၵ်းလူင် 14 တိူင်း။ ၼႂ်းတိူင်းသိုၵ်း 14 ဢၼ်ၼႆႉ တႃႇ 4 တိူင်း ယူႇၼႂ်းမိူင်းတႆး။ တိူင်းသိုၵ်းမၢၼ်ႈ 1 ဢၼ် မီးတပ်ႉၶလယ တင်း ၶမယ 45 တပ်ႉၵွင်တေႃႇထိုင် 50 တပ်ႉၵွင်၊ ၼႂ်းၼႆႉ ပႆႇၼပ်ႉသွၼ်ႇပႃး တပ်ႉပၢႆးၸၢၵ်ႈ (ဢိၼ်ႊၵျိၼ်ႊၼီႊယိူဝ်ႊ)၊ တပ်ႉပၢႆးယူႇလီ၊ တပ်ႉၵွင်ႈလူင်၊ တပ်ႉၵႃးၵၢပ်ႇလဵၵ်း၊ တပ်ႉၵမ်ႉၸွႆႈ၊ တပ်ႉမ- ၸိူဝ်းၼႆႉ။

ၸိူင်ႉႁိုဝ်ၵေႃႈယဝ်ႉ တပ်ႉသိုၵ်းမိူင်းဝႃႉၽွမ်ႉႁူမ်ႈၼႆႉ တင်ႈတႄႇၵိုတ်းသိုၵ်းၵၼ် တင်းၸုမ်းသိုၵ်းမၢၼ်ႈမႃးမိူဝ်ႈပီ 1989 ။ ထိုင်မႃးပီ 2011 ဢိင်ၼိူဝ်ၸွမ်ၸိုင်ႈတဵင်းၸဵင်ႇ ပိုၼ်ၽၢဝ်ႇယိုၼ်ႈမိုဝ်း ပိူဝ်ႈတႃႇၵိုတ်းတိုၵ်းသေ ၼႂ်းၸုမ်းယိပ်းၵွင်ႈၵၢင်ႇၸၢဝ်းၶိူဝ်းၼႆႉ ၸုမ်းဝႃႉလူင်းလၢႆးမိုဝ်းၵိုတ်းသိုၵ်း ဢွၼ်တၢင်းသုတ်း၊ လူင်းလၢႆးမိုဝ်းယဝ်ႉၵႂႃႇ ၸၼ်ႉၸႄႈမိူင်းလႄႈ ၸၼ်ႉၸိုင်ႈမိူင်းႁူမ်ႈတုမ် ၵိုၵ်းၵၼ်ၵမ်းလဵဝ်။ ၼႂ်းၸိုင်ႈမိူင်းႁူမ်ႈတုမ်မၢၼ်ႈၼႆႉ ၼႂ်းၵႃႈ ၸုမ်းၸၢဝ်းၶိူဝ်းယိပ်းၵွင်ႈၵၢင်ႇ လုၵ်ႉၽိုၼ်ႉၼႆႉ ၸုမ်းဝႃႉပဵၼ်ၸုမ်းဢၼ် ဢဵၼ်ႁႅင်းယႂ်ႇလိူဝ်တၢင်ႇမူႇတၢင်ႇၸုမ်း တင်းသဵင်ႈ။




 
© 2012 All Rights Reserved | Asean Celebrity | Fonts @ AtFonts | Free Templates