ၸုမ်း SWAN ႁူပ်ႉထူပ်း ၶွမ်ႊမတီႊ ပွင်ၵၢၼ်လႄႈ လုၵ်ႈႁဵၼ်း SYN တီႈသီႇပေႃႉ



ၸုမ်းၼၢင်းယိင်းတႆး SWAN ႁူပ်ႉထူပ်း ၶွမ်ႊမတီႊ ပွင်ၵၢၼ်လႄႈ လုၵ်ႈႁဵၼ်း SYN တီႈဝဵင်းသီႇပေႃႉ၊ ပိူဝ်ႈတႃႇႁူမ်ႈမိုဝ်းတူင်ႉၼိုင် ႁဵတ်းသၢင်ႈ ၼႃႈၵၢၼ်ၸိူဝ်ႉၶိူဝ်း ႁူမ်ႈၵၼ်ၵႂႃႇမိူဝ်းၼႃႈ။



ဝၼ်းတီႈ 28/06/2015 တင်ႈတႄႇယၢမ်းဝၢႆးဝၼ်း 1 မူင်းထိုင် 4 မူင်းၶိုင်ႈ ႁူဝ်ၶမ်ႈ၊ ၸုမ်းၵပ်းသၢၼ် လွင်ႈၼၢင်းယိင်းတႆး (SWAN) တင်း ၵေႃၵပ်းသၢၼ်ၵူၼ်းၼုမ်ႇတႆး (SYN) ႁူပ်ႉထူပ်းဢုပ်ႇဢူဝ်းၵၼ် တီႈဝဵင်းသီႇပေႃႉ ၸိုင်ႈတႆးပွတ်းႁွင်ႇ။ ၸုမ်း SYN  လႆႈသပ်းလႅင်းၼႄ ၶေႃႈယိူင်းဢၢၼ်း 5 ၶေႃႈ လႄႈ သိုပ်ႇမိုတ်ႈပႃး ၶွမ်ႊမတီႊပွင်ၵၢၼ် ထႅင်ႈလၢႆလၢႆၵေႃႉ။ ၸုမ်း SWAN  ၵၢဝ်ႇလၢတ်ႈသပ်းလႅင်းၼႄ တင်းယိူင်းဢၢၼ်းလႄႈ လွင်ႈတူင်ႉၼိုင်မုၵ်ႉၸုမ်း။


ပႃႈယိင်းသီႇတႃႇ
ၽူႈၶၢၼ်ပၢၵ်ႇၸုမ်း SWAN ၼၢင်းသီၻႃးဝလ်း သိုပ်ႇမိုတ်ႈၸုမ်း SWAN ပၼ်ၸုမ်းလုၵ်ႈႁဵၼ်းၶဝ်။ ၽူႈၵိူဝ်းၵုမ်ၸုမ်း SWAN ၼၢင်းသႅင်ၼွင်ႉ လႄႈ ၼၢင်းထေးထေး သပ်းလႅင်းသူၼ်းတုမ် ၵဵဝ်ႇလူၺ်ႈလွင်ႈ လူင်းလၢႆးမိုဝ်း ၽိုၼ်လိၵ်ႈ တႃႇၵႅတ်ႇၶႄမႅတ်ႇပႅင်းပႂ်ႉပႃး ၼွင်ႁၢႆးယႃႈ ဢၼ်ၾၢႆႇဢိင်းၵလဵတ်ႈဝႃႈ Signature Campaign for Inlay Lake ၼႆယဝ်ႉ။

ၼၢင်းသီၻႃးဝလ်း မွၵ်ႇလၢတ်ႈၵႂၢမ်း
ၵဵဝ်ႇၵပ်းလူၺ်ႈလွင်ႈ ႁူပ်ႉထူပ်းဢုပ်ႇဢူဝ်းၵၼ်ၼႆႉသေ ၵေႃႉပဵၼ်ၽူႈၵွၼ်းႁူင်းႁဵၼ်း (SYN) ပႃႈယိင်းသီႇတႃႇ လၢတ်ႈဝႃႈ-“ႁဝ်းၶႃႈဢမ်ႇၸႅၵ်ႇၸုမ်းလႂ်ၸုမ်းၼၼ်ႉ၊ ၸုမ်းလႂ်မႃးၵေႃႈ ႁဝ်းၶႃႈႁူမ်ၸူမ်းႁပ်ႉတွၼ်ႈ ပိူဝ်ႈတႃႇႁဵတ်းၵၢၼ်တႆးႁဝ်းၵႂႃႇ၊ သွၼ်ႇႁႂ်ႈမီးၼမ်ႉၸႂ်ၽိူၵ်ႇၸိုၼ်ႈၶၢဝ်သႂ် ၶႂ်ႈၸွႆႈၶႂ်ႈထႅမ်သေ ဢမ်ႇႁဵတ်းၵိၼ်ၼမ်ႉတွၼ်း ၼိူဝ်ၸိူဝ်ႉၶိူဝ်းၵူၺ်း”- ဝႃႈၼႆ။

ၼၢင်းသႅင်ၼွင်ႉ
ၽူႈၶၢၼ်ပၢၵ်ႇ ၸုမ်း SWAN ၼၢင်းသီၻႃးဝလ်း လၢတ်ႈဝႃႈ- “ႁဝ်းၶႃႈ ၶဝ်ႈၸိုဝ်ႈဝႃႈၸုမ်းၼၢင်းယိင်းတႆး ဝႃႈၼႆသေတႃႉ ဢမ်ႇၸႂ်ႈလႄႈဝႃႈ ႁဵတ်းၵၢၼ်တႃႇၼၢင်းယိင်းၵူၺ်း။ မိူၼ်ၼင်ႇ ၵၢၼ်တူင်ႇဝူင်းၵူၼ်းလႄႈ ၵၢၼ်သိင်ႇဝႅတ်ႉလွမ်ႉၸိူဝ်းၼႆႉၵေႃႈ ၶဝ်ႈႁူမ်ႈတူင်ႉၼိုင်ပႃးၸွမ်းယူႇ။ လိူဝ်ၼၼ်ႉ ပၢႆးပၺ်ၺႃၸိူဝ်းၼႆႉၵေႃႈ တူင်ႉၼိုင်ပႃးယူႇ၊ ၵွပ်ႈၼၼ်လႄႈ ႁႂ်ႈလႆႈတူင်ႉၼိုင်ႁဵတ်းသၢင်ႈၸွမ်းၵၼ်ၵႂႃႇ- ဝႃႈၼႆ။

ၼၢင်းထေးထေး
ၸုမ်းၵပ်းသၢၼ် လွင်ႈၼၢင်းယိင်းတႆး (SWAN) ၼႆႉ ပဵၼ်မုၵ်ႉၸုမ်း တူင်ႇဝူင်းၵူၼ်းတႆးဢၼ်ၼိုင်ႈ ဢၼ်ပၵ်းငဝ်ႈလုမ်းဝႆႉ တီႈဝဵင်းၵဵင်းမႆႇ ၸိုင်ႈထႆးသေ တူင်ႉၼိုင်ၵၢၼ်တႆးလၢႆလွင်ႈ၊ လုမ်းၵပ်းသၢၼ်ၼႂ်းမိူင်းၵေႃႈ ပၵ်းဝႆႉတီႈ ဝဵင်းလူင်တူၼ်ႈတီး ၸိုင်ႈတႆးပွတ်းၸၢၼ်း။





ၵေႃၵပ်းသၢၼ်ၵူၼ်းၼုမ်ႇတႆး (SYN)ၼႆႉ ၶွတ်ႇၽွတ်ႈမႃးမိူဝ်ႈႁၢင်ပီ 2014 သေ ပိုတ်ႇပၢင်သွၼ် လၢတ်ႈၵႂၢမ်းဢိင်းၵလဵတ်ႈ (English Speaking) မႃး ထိုင်ပွၵ်ႈၵမ်းထူၼ်ႈ 3 ၸုပ်ႈၼႆႉ။ ၽႅၼ်ၵၢၼ်မီးဝႆႉ တေသိုပ်ႇပိုတ်ႇၵႂႃႇၼိုင်ႈပီ 2 ပွၵ်ႈ။






ယိူင်းဢၢၼ်းလူင် 5 ၶေႃႈ ၵေႃၵပ်းသၢၼ်ၵူၼ်းၼုမ်ႇတႆး (SYN) 1.လုၵ်ႈဢွၼ်ႇၼုမ်ႇယိင်း/ ၸၢႆး ၸိၵ်းႁူၺ်ႈပၢႆလွႆ ႁႂ်ႈမီးလွင်ႈလၵ်းလႅမ် ႁူႉပွင်ႇတႃလႅင်း။ 2.ႁႂ်ႈယႃႈမဝ်းၵမ်ၼႂ်းၼႃႈတီႈ ပေႃးတေယူပ်ႈယွမ်းႁၢႆလၢႆ။ 3.ႁႅင်းၶၢႆႉဢွၵ်ႇမိူင်း / ႁႅင်းၵၢၼ်ယၢၼ်မိူင်း ႁႂ်ႈလူတ်းယွမ်းႁၢႆလၢႆ။ 4.ၵူၼ်းတေႃႇၵူၼ်းၵႃႉၶၢႆၵၼ် ႁႂ်ႈလူတ်းယွမ်းႁၢႆလၢႆ။ 5.လုၵ်ႈဢွၼ်ႇၼုမ်ႇၸၢႆး/ ယိင်း ထုင်ႉသၼ်လွႆ ႁႂ်ႈလႆႈမီးလွင်ႈၵွင်ႉသၢၼ် တိတ်းတေႃႇၵပ်းသိုပ်ႇၵၼ် ငၢႆႈလူမ်။






 
© 2012 All Rights Reserved | Asean Celebrity | Fonts @ AtFonts | Free Templates