ႁူဝ်ၾူၼ်ၼႆႉ တၢင်းပဵၼ်ၶႆႈၼၢဝ်ယုင်း လိူတ်ႈသုင် (ၶႆႈလိူတ်ႈဢွၵ်ႇ)  ၽႄႈၸွတ်ႇတီႈ ၸႄႈတွၼ်ႈ ၵဵင်းႁၢႆး  ပွတ်းလႅၼ်လိၼ် ထႆး- တႆး၊ ယၢမ်းလဵဝ် တၢင်းပဵၼ်ၶႆႈၼၢဝ်ၼႆႉ ၽႄႈၸပ်းၵၼ် မီးႁိမ်းၸမ် 200 ။

ၸဝ်ႈၼႃႈတီႈႁွင်ႈၵၢၼ် ၾၢႆႇပၢႆးယူႇလီ ႁူမ်ႈပႃးၾၢႆႇၸွႆႈထႅမ်ၼႂ်းဢိူင်ႇဝၢၼ်ႈ (ဢေႃႊသေႃမေႃႊ) ၽူႈႁူမ်ႈသၢင်ႈ(ဢႃႊသႃသမၵ်ႇ) ဝၢၼ်ႈႁူဝ်ၾၢႆ ၸႄႈဝဵင်းမိူင်း ၸႄႈတွၼ်ႈၵဵင်းႁၢႆး ဢွၼ်ၵၼ်လူင်းပိုၼ်ႉတီႈ သိတ်ႇယႃႈၶႃႈယုင်း  ၽဵဝ်ႈပတ်းထွၵ်ႇပႅတ်ႈၼမ်ႉၶင် ၼႂ်းၵွၵ်း ၼႂ်းထၢင် ၼႂ်းယၢင်မၢၵ်ႇရူတ်ႉၵႃး တီႈၼမ်ႉၸၢင်ႈၶွၼ်ႈၸၢင်ႈၶင်ဝႆႉၸိူဝ်းၼၼ်ႉ ႁဵတ်းလိူမ်ႈလႆႇမူတ်းသႂ် ဝႃႈၼႆ။


ႁွင်ႈၵၢၼ်ၶၢဝ်ႇ maesainews ပိုၼ်ၽၢဝ်ႇ မိူဝ်ႈဝၼ်းတီႈ 26 လိူၼ်ၵျႃၼ်ႊ 2015 ဝႃႈၸဝ်ႈၼႃႈတီႈ ၵူတ်ႇထတ်း ထူပ်းႁၼ်ၵူၼ်းၸပ်းတၢင်းပဵၼ် ၶႆႈလိူတ်ႈဢွၵ်ႇ  ပဵၼ် ၵူၼ်းလွႆ ၊ ၵူၼ်းၼႂ်းဝၢၼ်ႈ ႁူဝ်ၾၢႆ ၵူၼ်းဝၢၼ်ႈၸဵတ်းယွတ်ႈ ဝၢၼ်ႈၼွင်ႁဵင် ဢိၵ်ႇလၢႆလၢႆဝၢၼ်ႈ။ ၼႂ်းၸႄႈတွၼ်ႈၵဵင်းႁၢႆးၼႆႉ ၽႄႈတိူၼ်း 14 ၸႄႈဝဵင်း 36 ဢိူင်ႇ 63 ဝၢၼ်ႈ ။ ၼႂ်းပီၼႆႉၵူၺ်း ၵူၼ်း ၸပ်းတၢင်းပဵၼ် တင်းသဵင်ႈမီး 186 ၵေႃႉ ။

တၢင်းပဵၼ်လႆႈၼၢဝ်ယုင်း လိူတ်ႈသုင် ဢမ်ႇၼၼ် ဢၼ်ထႆးႁွင်ႉဝႃႈတၢင်းပဵၼ်ၶႆႈလိူတ်ႈဢွၵ်ႇၼႆႉ ပဵၼ်တၢင်းပဵၼ် ဢၼ်မႃးၸွမ်းယုင်းလၢႆး။ ယုင်းလၢႆးၼႆႉ ၽႄႈၸိူဝ်ႉတႅၵ်ႇၶႆႇၼႂ်းၶၢဝ်းၾူၼ်။ တၢင်းပဵၼ် ၶႆႈလိူတ်ႈဢွၵ်ႇၼႆႉၵေႃႈ ဢမ်ႇပႆႇမီးယႃႈယႃ တႃႇယူတ်းယႃၵမ်းသိုဝ်ႈ။ ပေႃးယႃ ဢမ်ႇၶိုတ်းၸိုင် ထိုင်တီႈၸၢင်ႈတၢႆ လူးၵွၼ်ႇ ။